Mga Hapot Hale sa mga Parabasa

Mapapagdanay daw nin sarong Kristiano an malinig na konsensia kun aakoon nia an trabaho na kalabot an pagdara nin armas?

An Mga Saksi ni Jehova sa bilog na kinaban sineseryoso an saindang tao nin Dios na paninimbagan na sustentohan sa materyal an saindang pamilya. (1 Timoteo 5:8) Minsan siring, an nagkapirang klase nin trabaho malinaw na minabalga sa mga prinsipyo sa Biblia asin maninigong likayan. Kaiba sa mga ini an trabaho na konektado sa paghuego, salang paggamit nin dugo, asin pag-enkaminar kan paggamit nin mga produkto nin tabako. (Isaias 65:11; Gibo 15:29; 2 Corinto 7:1; Colosas 3:5) An ibang klase nin trabaho, minsan ngani dai direktang kinokondenar sa Biblia, puedeng makapurisaw sa konsensia nin saro o kan iba.

An paglaog sa sekular na trabaho na nangangaipong magdara nin badil o iba pang armas sarong personal na desisyon. Minsan siring, an trabaho na kalabot an pagdara nin armas ibinubugtak an saro sa posibilidad na magkasala sa dugo kun hagadon sa saiya na gamiton nia an armas. Huli kaini, kaipuhan na mapagngayongayong isipon nin sarong Kristiano kun baga andam sia na akoon an magabat na responsibilidad na paggibo nin ensegidang desisyon kun saen buhay nin tawo an kalabot. An pagdara nin armas ibinubugtak man an saro sa peligro na maerido o magadan huli sa pag-atake o pagbalos.

An iba tibaad maapektaran man kan desisyon nin saro. Halimbawa, an pangenot na paninimbagan nin sarong Kristiano iyo an paghuhulit kan maogmang bareta kan Kahadean nin Dios. (Mateo 24:14) Puede daw na tokdoan niato an iba na “makipagkatoninongan sa gabos na tawo,” mantang kadungan kaiyan naghahanap-buhay kita paagi sa pagdara nin armas? (Roma 12:18) Kumusta man an mga aki o ibang miembro kan pamilya? An pagkaigwa daw nin badil sa harong nagsasapeligro kan saindang buhay? Apuera dian, puede daw na masingkog an iba sa paninindogan nin saro sa bagay na iyan?​—Filipos 1:10.

Sa “huring mga aldaw” na ini, nagdadakol an mga tawong “maringis, mayong pagkamoot sa karahayan.” (2 Timoteo 3:​1, 3) Sa pakaaram kaini, puede daw na an saro magdanay na “dai maaakusar nin ano man” kun pipilion nia an trabaho na kalabot an pagdara nin armas na puedeng magbunga nin pakikilaban nia sa siring na mga indibiduwal? (1 Timoteo 3:10) Dai nanggad. Sa dahelan na ini, an siring na tawo dai mimidbidon kan kongregasyon bilang “mayo nin katuyawan” kun padagos siang madara nin armas pagkatapos na may kabootan siang tawan nin hatol sa Biblia. (1 Timoteo 3:2; Tito 1:​5, 6) Huli kaini, an siring na lalaki o babae dai makukualipikar sa ano man na espesyal na mga pribilehio sa kongregasyon.

Inasegurar ni Jesus an saiyang mga disipulo na kun eenoton ninda an intereses kan Kahadean sa saindang buhay, dai sinda kaipuhan na mahadit nin sobra manongod sa pagkaigwa nin mga pangangaipo sa buhay. (Mateo 6:​25, 33) Tunay nanggad, kun lubos kitang magtitiwala ki Jehova, “sia mismo matabang sa [sato]. Noarin man dai nia totogotan na matanyog an matanos.”​—Salmo 55:22.