Estorya nin Buhay

Naako Ko ‘an mga Kahagadan kan Sakong Puso’

ISINAYSAY NI DOMINIQUE MORGOU

Sa katapustapusi, kan Disyembre 1998, yaon ako sa Aprika! An sakong pangarap kan ako aki pa nagin totoo na ngonyan. Kaidto pa napapalukso na an puso ko kun iniisip ko an mahiwason na mga lugar asin interesanteng mga hayop na layas sa Aprika. Ngonyan talagang yaon ako duman! Kadungan kaiyan, saro pang pangarap an nagin totoo. Saro akong bilog na panahon na ebanghelisador na naglilingkod sa ibang nasyon. Para sa dakol, garo baga imposible ini. An sakong pagheling limitadong marhay, asin naglalakaw ako sa mabaybay na mga tinampo sa mga baryo nin Aprika sa tabang nin naggigiyang ayam na sinanay sa mga tinampo kan mga siudad sa Europa. Togotan nindo akong iestorya saindo kun paano nagin posible para sa sako na maglingkod sa Aprika asin kun paano itinao sa sako ni Jehova ‘an mga kahagadan kan sakong puso.’​—Salmo 37:4.

NAMUNDAG ako kan Hunyo 9, 1966, sa timog na Pransia. Ako an kangudhan sa pitong aki​—duwang lalaki asin limang babae​—na gabos kami inataman nin mamomoton na mga magurang. Minsan siring, igwa nin sarong mamondong pangyayari kan ako hoben pa. Arog kan sakong lola, sakong ina, asin saro sa sakong mga tugang na babae, may erensia akong helang na sa kahurihurihi masagkod sa sakong lubos na pagkabuta.

Kan ako tinedyer, nagtios ako nin rasismo, daing binabasaran na pagkaanggot, asin ipokresiya, na nagpangyari sa sako na magrebelde tumang sa sosyedad. Durante kan depisil na panahon na ini buminalyo kami sa rehion nin Hérault. Duman, may marahayon na nangyari.

Sarong Domingong aga, duwa sa Mga Saksi ni Jehova an nag-abot sa samong pinto. Midbid sinda kan sakong ina asin inimbitaran sindang dumagos.  Hinapot si Nanay kan saro sa mga babae kun nagigirumdoman nia na sarong beses nangako sia na sa maabot na panahon aakoon nia an pag-adal sa Biblia. Nagirumdoman iyan ni Nanay asin naghapot sia, “Noarin kita mapoon?” Nagkaoyon sinda na maghelingan kada Domingong aga, asin sa paaging ini an sakong ina nagpoon na makanood kan “katotoohan kan maogmang bareta.”​—Galacia 2:14.

Pagkaigwa nin Pakarorop

Mahigos na naghingoa si Nanay na masabotan asin magirumdoman an saiyang nanonodan. Huling buta, kaipuhan niang tuomon an gabos. An mga Saksi mapasensiang marhay sa saiya. Ako man, basta mag-abot an mga Saksi, nagtatago ako sa sakong kuarto asin nagluluwas sana ako paghale ninda. Minsan siring, sarong hapon, nanuparan ako ni Eugénie, na saro sa mga Saksi, asin sia nakipag-olay sa sako. Sinabi nia sa sako na hahaleon kan Kahadean nin Dios an gabos na ipokresiya, pagkaongis, asin daing binabasaran na pagkaanggot sa kinaban. “An Dios sana an igwa kan solusyon,” an sabi nia. Gusto ko daw na makanood nin orog pa? Kan sumunod na aldaw, pinonan ko an sakong pag-adal sa Biblia.

Bago sa sako an gabos na nanonodan ko. Nasasabotan ko na ngonyan na igwa nin marahay na mga dahelan kun taano ta temporaryong tinotogotan nin Dios an karatan sa daga. (Genesis 3:15; Juan 3:16; Roma 9:17) Nanodan ko pa na dai kita binabayaan ni Jehova na mayo nin paglaom. Itinao nia sa sato an saiyang makangangalas na panuga na buhay na daing katapusan sa sarong paraisong daga. (Salmo 37:29; 96:​11, 12; Isaias 35:​1, 2; 45:18) Sa Paraisong iyan, makakabalik giraray an sakong pagheling, na luway-luway nang nawawara sa sako.​—Isaias 35:5.

Paglaog sa Bilog na Panahon na Paglilingkod

Kan Disyembre 12, 1985, sinimbolisaran ko an sakong pagdusay ki Jehova paagi sa bautismo sa tubig, na iniibanan an sakong tugang na babaeng si Marie-Claire, na naggibo na kan lakdang na ini. Dai nahaloy an sakong tugang na lalaking si Jean-Pierre nagpabautismo man, siring man an sakong mahal na ina.

Sa kongregasyon na inaasosyaran ko, igwa nin nagkapirang regular payunir, o bilog na panahon na mga ebanghelisador. Naparigon an boot ko kan saindang kagayagayahan asin entusiasmo sa ministeryo. Dawa si Marie-Claire, na igwa nin helang sa mata asin may orthopedic na aparato sa sarong tabay, naglaog sa bilog na panahon na paglilingkod. Sagkod ngonyan padagos siang nagtatao sa sako nin espirituwal na pagparigon sa boot. An pagigin napapalibotan nin mga payunir sa kongregasyon asin sa pamilya nakatabang sa sako na mapatalubo an makosog na pagmawot na makikabtang sa bilog na panahon na paglilingkod. Kaya kan Nobyembre 1990, nagpoon akong maglingkod sa Béziers bilang payunir.​—Salmo 94:17-19.

Pakikipaglaban sa Pagkadesganar

Sa ministeryo, natabangan ako kan pagigin maasikaso kan ibang payunir. Dawa siring, paminsanminsan, nadedesganar ako huli sa sakong mga limitasyon asin nagmamawot ako na orog pa kutana an magibo ko. Minsan siring, sinusteniran ako ni Jehova sa mga panahon na iyan nin pagkadesganar. Nagsiyasat ako sa Watch Tower Publications Index, na hinahanap an mga estorya nin buhay nin mga payunir na arog ko may diperensia sa pagheling. Nasorpresa ako ta dakol iyan! An praktikal asin nakakaparigon sa boot na mga pagkasaysay na ini nagtokdo sa sako na pahalagahan an nakakaya kong gibohon asin akoon an sakong mga limitasyon.

Tanganing suportaran an sakong mga pangangaipo, nagtrabaho ako bilang paralinig sa mga galeriya kaiba kan ibang Saksi. Sarong aldaw narisa ko na linilinigan giraray kan sakong mga katrabaho an mga lugar na nalinigan ko pa sana. Malinaw na dakol akong nalilipasan na ati. Kinaolay ko si Valérie, an payunir na namamahala sa samong grupo nin paralinig, asin hinagad ko sa saiya na prangkahon ako asin sabihon sa sako kun nakakapagabat ako sa grupo. May kabootan na pinabayaan nia akong magdesisyon kun sa pagmate ko dai ko na kayang gibohon an trabahong iyan. Kan Marso 1994, binutasan ko an sakong trabaho na paglinig.

Sa giraray, pinangibabawan ako nin pakamate nin pagigin daing serbi. Namibi ako nin odok ki Jehova, asin aram ko na dinangog nia an sakong mga pakimaherak. Sa giraray, an pag-adal kan Biblia asin kan Kristianong mga publikasyon nagin dakulang tabang. Dawa siring, mantang an sakong pagheling nagluluya, an sakong pagmawot  na maglingkod ki Jehova nagkokosog. Ano an magigibo ko?

Enot Nasa Listahan nin mga Naghahalat, Dangan Marikas na Desisyon

Nag-aplay ako para sa pagsasanay sa Klinika sa Rehabilitasyon Para sa mga Buta Asin May Diperensia sa Pagheling sa Nîmes asin sa kahurihurihi inadmitir ako sa laog nin tolong bulan. Kapakipakinabang an panahon na iyan. Nasabotan ko an limitasyon kan sakong diperensia asin nanodan kong makaadaptar dian. An pakikiasosyar sa mga tawo na igwa nin gabos na klase nin kamatean nakatabang sa sako na marealisar kun gurano kahalagang marhay an sakong Kristianong paglaom. Minsan paano igwa ako nin pasohan asin puede akong gumibo nin bagay na kapakipakinabang. Dugang pa, nag-adal ako nin Braille sa Pranses.

Kan magpuli ako sa harong, narisa kan sakong pamilya kun guranong tabang an nakua ko sa pagsasanay na iyan. Pero, an sarong bagay na talagang dai ko gusto iyo an sogkod na kaipuhan kong gamiton. Nasakitan akong akoon an “sogkod” na iyan. Marahay kun may ibang pantabang sa sako​—tibaad sarong naggigiyang ayam.

Nag-file ako nin kahagadan para sa pagkaigwa nin sarong ayam alagad sinabihan ako na halaba pa an listahan nin mga naghahalat. Siring man, kaipuhan na mag-imbestigar an ahensia. An sarong naggigiyang ayam dai itinatao sa basta kiisay na sana. Sarong aldaw an babaeng nagtatabang sa pagpadalagan nin asosasyon para sa mga buta nagsabi sa sako na an lokal na klab sa tennis madonar nin naggigiyang ayam sa sarong buta o medyo dai na nakakaheling na nag-iistar sa samong lugar. Sinabi nia na nagirumdoman nia ako. Aakoon ko daw iyan? Narisa ko na yaon an kamot ni Jehova sa bagay na iyan asin inako ko an maboot na alok. Minsan siring, kaipuhan kong maghalat nin ayam.

Iniisip Ko Pa Man Giraray an Manongod sa Aprika

Mantang naghahalat, ibinalyo ko an sakong atension sa ibang direksion. Siring kan nasambitan  sa enotan, poon kan ako aki pa interesado na akong marhay sa Aprika. Sa ibong kan nagluluya kong pagheling, an interes na iyan mas kuminosog kisa kasuarin man, nangorogna poon kan maaraman ko na kadakol na tawo sa Aprika an interesado sa Biblia asin sa paglilingkod ki Jehova. Kaidto, basta ko sanang nasambitan ki Valérie na gusto kong magbisita sa Aprika. Gusto daw niang mag-iba sa sako? Ominoyon sia, asin nagsurat kami sa nagkapirang sangang opisina kan Mga Saksi ni Jehova sa Aprika na Pranses an tataramon.

May uminabot na simbag hale sa Togo. Napapalukso an puso, hinagad ko ki Valérie na basahon iyan sa sako. An surat nakakaparigon sa boot, kaya si Valérie nagsabi: “Bueno, taano ta dai kita magduman?” Pagkatapos na makisuratan sa mga tugang sa sangang opisina, sinabihan ako na makikomunikar ki Sandra, sarong payunir sa Lomé, an kabiserang siudad. Disyembre 1, 1998 an itinalaan ming petsa kan samong paghale.

Laen nanggad, alagad kanigoan kanakakaogmang marhay! Paglanding mi sa Lomé, nagluwas kami sa eroplano asin namatean mi an garo mainit na tamong na klima kan Aprika. Sinabat kami ni Sandra. Nungka pa kaming nagkahelingan kaidto, alagad tolos na kami nagin garo haloy nang magkatood. Dai nahaloy bago kami umabot, si Sandra asin an saiyang kapartner na si Christine, ninombrahan bilang mga espesyal payunir sa Tabligbo, sarong sadit na banwaan sa interior. May pribilehio kami ngonyan na ibanan sinda sa bago nindang destino. Nagdanay kami dian nin mga duwang bulan, asin kan maghale kami, aram ko na mabalik ako.

Nakakaogmang Marhay na Pagbabalik

Sa Pransia, tolos akong nagpoon na mag-andam para sa ikaduwa kong pagbiahe pasiring sa Togo. Sa pagsuportar kan sakong pamilya, nahimo kong iareglo na magdanay duman nin anom na bulan. Kaya kan Setyembre 1999, nag-eroplano giraray ako pasiring sa Togo. Minsan siring, solo ako ngonyan. Imahinara an pagmate kan sakong pamilya kan maheling ninda akong maghale nin solo sa ibong kan sakong diperensia! Alagad mayong dahelan na maghadit sinda. Inasegurar ko an sakong mga magurang na an sakong mga katood, na nagin nang garo kapamilya ko, naghahalat sa sako sa Lomé.

Nakakaogmang marhay nanggad na makabalik sa lugar na kadakol an nagpapaheling nin interes sa Biblia! Bakong pambihira na makaheling nin mga tawo na nagbabasa kan Biblia sa kalye. Sa Tabligbo aapodon ka kan mga tawo tangani sanang makipag-olay manongod sa Biblia. Asin kanigoan na pribilehio na makaiba an duwang espesyal payunir na tugang sa saindang simple sanang dinadagosan! Nakanood ako nin saro pang kultura, sarong laen na paagi nin pagmansay sa mga bagay-bagay. Enot sa gabos, narisa ko na an samong Kristianong mga tugang na lalaki asin babae sa Aprika ineenot sa saindang buhay an intereses kan Kahadean. Halimbawa, dai nakakaolang sa saindang pag-atender sa mga pagtiripon an paglakaw nin dakol na kilometro pasiring sa Kingdom Hall. Dakol man na leksion an nanodan ko sa saindang mainit na pakikiiba asin pagkamapag-istimar.

Sarong aldaw kan papuli na kami hale sa paglilingkod sa langtad, nagtuga ako ki Sandra na natatakot akong magbalik sa Pransia. An sakong pagheling lalo pang luminuya. Nasa isip ko an matawo asin maribok na mga tinampo sa Béziers, an mga hagyanan sa mga edipisyo nin apartment, asin  kadakol na iba pang bagay na nagpapadepisil sa saro na limitado an pagheling. Sa kabaliktaran, an mga tinampo sa Tabligbo, minsan ngani bakong sementado, toninong​—bakong matawo asin mayong gayong trapik. Paano ko makakayanan na mabuhay sa Pransia ngonyan na natuod na ako sa Tabligbo?

Pakalihis nin duwang aldaw nag-apod an sakong ina tanganing ipaaram sa sako na naghahalat sa sako an eskuelahan para sa naggigiyang mga ayam. An sarong hoben pang ayam na Labrador retriever na an ngaran Océane andam nang magin sakong “mga mata.” Sa giraray, ikinatao an sakong mga pangangaipo asin nahale an sakong mga kahaditan. Pakalihis nin anom na bulan nin maogmang paglilingkod sa Tabligbo, pabalik na ako sa Pransia tanganing maheling si Océane.

Pakatapos nin nagkapirang bulan nin pagsasanay, ipinagkatiwala sa sako si Océane. Kan primero, iyan bakong pasil. Kaipuhan ming makanood na magkasinabotan. Pero, luway-luway na narealisar ko na talagang kaipuhan ko si Océane. An totoo, si Océane nagin kabtang na ngonyan kan buhay ko. Ano an reaksion kan mga tawo sa Béziers kun naheheling ninda na pasiring ako sa saindang pinto na may kaibang ayam? Naeksperyensiahan ko an dakulang paggalang asin kabootan. Si Océane nagin an “eroe” sa pagtaraed. Mantang dakol an bakong komportable sa presensia nin sarong tawong may diperensia, an pagkaigwa nin ayam nagpangyari sa sako na masabi ko an manongod sa sakong kamatean sa natural na paagi. An mga tawo napapamugtak an boot asin naghihinanyog sa sako. Tunay nanggad, si Océane an nagin pinakamagagamit na pambukas nin orolay.

Sa Aprika Kaiba si Océane

Dai ko nalingawan an Aprika, asin ngonyan nagpoon akong mag-andam para sa ikatolo kong pagbiahe. Ngonyan, kaiba ko si Océane. Inibanan man ako nin sarong hoben na mag-agom, si Anthony asin Aurore, saka an sakong amiga na si Caroline​—na gabos payunir kapareho ko. Kan Setyembre 10, 2000, nag-abot kami sa Lomé.

Kan primero, dakol an natatakot ki Océane. Dikit sana sa Lomé an nakaheling na nin siring kaiyan kadakulang ayam, mantang an kadaklan na ayam sa Togo saradit. Kun naheheling ninda an saiyang gayak, may mga naghohona na sia maisog na hayop na kaipuhan na pogolan. Si Océane nagkaigwa man nin ugale na andam na magdepensa, na andam na protehiran ako tumang sa ano man na marisa niang peligro. Pero, dai nahaloy si Océane napamugtak sa bagong palibot. Kun sulot nia an gayak, sia nagtatrabaho​—disiplinado, responsable, asin danay na nasa kataed ko. Kun sia butas, sia makinawat, asin kun beses makaraw. Dakol na nakakaogmang bagay an ginibo ming magkaibanan.

Inimbitaran kami gabos na mag-istar kaiba ni Sandra asin ni Christine sa Tabligbo. Tanganing tabangan an mga tugang duman na matuod ki Océane, inimbitaran mi sinda na dalawon kami asin ipinaliwanag mi sa sainda an papel nin naggigiyang ayam, kun taano ta kaipuhan ko iyan, asin kun paano sinda maninigong humiro kun yaon sia. Uminoyon an kamagurangan na mag-iba sa sako si Océane sa Kingdom Hall. Mantang an areglong ini pambihira nanggad sa Togo, ginibo an sarong anunsio sa kongregasyon na nagpapaliwanag kan bagay na ini. Kun manongod sa ministeryo, si Océane minaiba sana kun ako nagdadalaw liwat asin naggigibo nin mga pag-adal sa Biblia​—mga situwasyon na magigin mas pasil na masabotan an saiyang presensia.

An paghuhulit sa teritoryong ini danay na nakakaogmang marhay. Pirme akong nakakamate nin pagpasalamat sa pagigin makonsiderasyon kan maboot na mga tawo, na ipinapaheling paagi sa maboot na mga gibo, arog kan pagkagalaga ninda na tawan ako nin tukawan. Kan Oktubre 2001, an sakong ina nag-iba sa sako sa ikaapat na pagbiahe ko pasiring sa Togo. Pakalihis nin tolong semana nagbalik sia sa Pransia, na naasegurar liwat an boot asin maogma.

Nagpapasalamat akong marhay ki Jehova na nakapaglingkod ako sa Togo. Kompiado ako na padagos na itatao sa sako ni Jehova ‘an mga kahagadan kan sakong puso’ mantang padagos na ginagamit ko an gabos na nasa sako sa paglilingkod sa saiya. *

[Nota sa Ibaba]

[Mga Ritrato sa pahina 10]

Kaidto pa napapalukso na an puso ko kun iniisip ko an mahiwason na mga lugar asin interesanteng mga hayop na layas sa Aprika

[Ritrato sa pahina 10]

Si Océane minaiba sa mga pagdalaw liwat

[Ritrato sa pahina 11]

Uminoyon an kamagurangan na darahon ko si Océane sa mga pagtiripon