Si Jehova an Satong Pastor

“Si Jehova an sakuyang Pastor. Dai ako magkukulang nin ano man.”​—SALMO 23:1.

1-3. Taano ta bakong makangangalas na ikinomparar ni David si Jehova sa sarong pastor?

KUN ipapaladawan sa saindo kun paano inaataman ni Jehova an saiyang banwaan, ano an sasabihon nindo? Anong komparasyon an ikakatao nindo na magpapahayag kan mapagpadangat na pag-ataman na itinatao nia sa saiyang maimbod na mga lingkod? Labing 3,000 na taon na an nakaagi, nagsurat an salmistang hade na si David nin sarong magayon na paglaladawan ki Jehova, na ginagamit an pagbabaing na ibinasar sa trabaho ni David kan sia hoben pa.

² Bilang hoben na lalaki, si David nagin sarong pastor, kaya aram nia an manongod sa pag-ataman nin mga karnero. Aram niang marhay na an mga karnero, kun dai inaasikaso, madaling mawara asin magin biktima nin mga parahabon o mabangis na hayop. (1 Samuel 17:34-​36) Kun mayo nin nagmamakolog na pastor, tibaad dai sinda makakua nin masasabsaban. Kan sia gurang na, daing duda na si David igwa nin maogmang mga memorya kan dakol na oras na ginamit nia sa paggiya, pagprotehir, asin pagpasabsab sa mga karnero.

³ Bakong makangangalas na naglaog sa isip ni David an trabaho nin sarong pastor kan sia pasabngan na iladawan an pag-ataman na ipinapaheling ni Jehova sa saiyang banwaan. An ika-23 na Salmo, na isinurat ni David, nagpopoon sa mga tataramon na: “Si Jehova an sakong Pastor. Dai ako magkukulang nin ano man.” Estudyaran niato kun taano ta angay an mga tataramon na ini. Dangan, sa tabang kan Salmo 23, hehelingon niato kun sa anong mga paagi inaataman ni Jehova an saiyang mga parasamba siring sa pag-ataman nin sarong pastor sa saiyang mga karnero.​—1 Pedro 2:25.

Sarong Angay na Komparasyon

4, 5. Paano ilinaladawan kan Biblia an mga ugale nin mga karnero?

⁴ Dakol an titulo ni Jehova sa Kasuratan, alagad an titulong “Pastor” saro sa nagpapahayag nin pinakadakulang kapadangatan. (Salmo 80:1) Tanganing orog na masabotan kun taano si Jehova ta angay na apodon na Pastor, nakakatabang na maaraman niato an duwang bagay: enot, an karakteristiko nin mga karnero asin ikaduwa, an mga obligasyon asin kualidad nin sarong marahay na pastor.

⁵ Parateng nasasambitan kan Biblia an mga ugale nin mga karnero, na ilinaladawan sinda bilang madaling bumoot huli sa kapadangatan nin sarong pastor (2 Samuel 12:3), bakong agresibo (Isaias 53:7), asin daing kalabanlaban. (Miqueas 5:8) Sarong parasurat na nag-ataman nin mga karnero sa laog nin dakol na taon an nagsabi: “An mga karnero dai ‘basta inaataman an saindang sadiri’ siring kan tibaad ipamugtak nin iba. Orog kisa arin man na ataman na hayop, kaipuhan ninda an daing katapusan na  atension asin maingat na pag-ataman.” Tanganing magdanay na buhay, kaipuhan kan mga hayop na ini na daing maginibo an sarong may pagmakolog na pastor.​—Ezequiel 34:5.

6. Paano ipinapaliwanag kan sarong diksionaryo sa Biblia an tipikong aldaw sa buhay nin sarong suanoy na pastor?

⁶ Paano an tipikong aldaw para sa suanoy na pastor? An sarong diksionaryo sa Biblia nagpapaliwanag: “Sa amay na aga pinapaluwas nia an aripompon sa toril, na pinapangenotan sinda pasiring sa papasabsaban sa sainda. Binabantayan nia sinda digdi sa bilog na aldaw, na sinesegurado na mayo sa mga karnero an malalagalag, asin kun may temporaryong nakakadulag sa saiyang pagbantay asin napapasuway sa aripompon, maigot siang naghahanap sagkod na makua asin ikabalik iyan. . . . Sa banggi ibinabalik nia an aripompon sa toril, na binibilang sinda pag-agi ninda sa irarom kan sogkod sa may pinto tanganing maseguro nia mismo na mayo nin nawawara. . . . Sa parate kaipuhan na bantayan nia an toril sa bilog na banggi laban sa pagsalakay nin mabangis na mga hayop, o sa tusong mga pagprobar kan naghihikap na mga parahabon.” *

7. Taano ta may mga panahon na kaipuhan na magpaheling an sarong pastor nin dagdag na pasensia asin pagpadangat?

⁷ May mga panahon na an mga karnero, nangorogna an mga bados asin an ogbon, nangangaipo nin dagdag na pasensia asin pagpadangat. (Genesis 33:13) An sarong reperensia sa Biblia nagsasabi: “An pagkamundag nin sarong ogbon sa aripompon parateng nangyayari sa harayong lugar sa may gilid nin bukid. Maasikasong binabantayan kan pastor an ina sa mga oras na ini daing maginibo asin binubuhat nia an kordero asin dinadara iyan sa aripompon. Sa laog nin nagkapirang aldaw, sagkod na makalakaw na iyan, tibaad kargahon nia iyan sa saiyang mga takyag o sa darakulang katiklopan kan saiyang gubing.” (Isaias 40:​10, 11) Malinaw nanggad, kaipuhan pareho kan sarong marahay na pastor an makosog saka mapagpadangat na mga kualidad.

8. Anong mga dahelan kan saiyang kompiansa ki Jehova an sinasambit ni David?

⁸ “Si Jehova an sakong Pastor”​—bako daw na angay na paglaladawan iyan sa satong langitnon na Ama? Mantang sinisiyasat niato an Salmo 23, maheheling niato kun paano kita inaataman nin Dios na may kosog asin pagpadangat nin sarong pastor. Sa bersikulo 1, ipinapahayag ni David an saiyang kompiansa na itatao nin Dios an gabos na kinakaipuhan na probisyon para sa Saiyang mga karnero tanganing dai sinda ‘magkulang nin ano man.’ Sa suminunod na mga bersikulo, sinasambit ni David an tolong dahelan para sa kompiansang ini: Si Jehova naggigiya, nagpoprotehir, asin nagpapakakan sa Saiyang mga karnero. Saro-saro niato ining pag-olayan.

“Ginigiyahan Nia Ako”

9. Anong matoninong na kamugtakan an ilinaladawan ni David, asin paano mapapaduman sa siring na kamugtakan an mga karnero?

⁹ Enot, ginigiyahan ni Jehova an saiyang banwaan. Si David nagsurat: “Sa madoot na mga sabsaban pinapaluko nia ako; dinadara nia ako sa matubig na mga pahingaloan. An sakuyang kalag saiyang pinapaginhawa. Ginigiyahan nia ako sa mga dalan nin katanosan huli sa saiyang ngaran.” (Salmo 23:​2, 3) Sarong aripompon na matoninong na nagluluko sa tahaw nin abundansia​—ilinaladawan digdi ni David an sarong kamugtakan nin pagkakontento, kaginhawahan, asin katiwasayan. An termino sa Hebreo na trinadusir na “mga sabsaban” puedeng mangahulogan nin “magayon na lugar.” Posibleng marhay, kun sinda sana, an mga karnero dai makakakua nin nakakaginhawang lugar na malulukohan ninda nin matoninong. Dapat na giyahan sinda kan saindang pastor sa siring na “magayon na lugar.”

10. Paano ipinapaheling nin Dios an pagkompiar nia sa sato?

¹⁰ Paano kita ginigiyahan ni Jehova ngonyan? An sarong paagi na ginigibo nia iyan iyo an pagtao nin halimbawa. Sinasadol kita kan saiyang Tataramon na ‘magin mga paraarog sa Dios.’ (Efeso 5:1) Nasasambitan kan konteksto kan mga tataramon na iyan an pagmalasakit, pagpatawad, asin pagkamoot. (Efeso 4:​32; 5:2) Tunay nanggad, nagtatao si Jehova kan pinakamarahay na halimbawa sa pagpaheling kan siring na kawiliwiling mga kualidad. Sia daw nagigin bakong realistiko sa paghagad sa sato na arogon sia? Dai. An ipinasabong na konsehong iyan sa katunayan sarong makangangalas na kapahayagan kan saiyang kompiansa sa sato. Sa anong paagi? Ginibo kita sa ladawan nin Dios,  na an boot sabihon tinawan kita nin moral na mga kualidad asin kan kapasidad para sa espirituwalidad. (Genesis 1:26) Huli kaini, naaaraman ni Jehova na sa ibong kan satong mga pagkabakong sangkap, yaon sa sato an potensial na kultibaron an mga kualidad na kapareho kan ipinaheling nia paagi sa halimbawa. Isip-isipa na sana​—kompiado an satong mamomoton na Dios na puede kitang magin arog nia. Kun aarogon niato an saiyang halimbawa, gigiyahan nia kita, sabi ngani, sa sarong magayon na “pahingaloan.” Sa tahaw kan madahas na kinaban na ini, ‘maontok kita sa katiwasayan,’ na nagkakamit kan katoninongan na naggigikan sa pakaaram na yaon sa sato an pag-oyon nin Dios.​—Salmo 4:8; 29:11.

11. Sa paggiya sa saiyang mga karnero, ano an kinokonsiderar ni Jehova, asin paano ini nababanaag sa hinahagad nia sa sato?

¹¹ Sa paggiya sa sato, mapagpadangat asin mapasensia si Jehova. Kinokonsiderar nin sarong pastor an mga limitasyon kan saiyang mga karnero, kaya naggigiya sia “sono sa rikas kan mga hayop.” (Genesis 33:14) Naggigiya man si Jehova “sono sa rikas kan” saiyang mga karnero. Kinokonsiderar nia an satong mga abilidad asin kamugtakan. Garo man sana ibinabagay nia an rikas, na nungkang naghahagad nin labi sa ikakatao niato. An talagang hinahagad nia iyo na kita magin bilog na kalag. (Colosas 3:23) Alagad paano kun mas may edad na kamo asin dai na nindo nagigibo an dating nagigibo nindo? O paano kun kamo may grabeng helang na nakakalimitar sa saindo? Yaon dian an kagayonan kan kahagadan na kita magin bilog na kalag. Mayong duwang kalag na eksaktong pareho. An paglilingkod nin bilog na kalag nangangahulogan nin paggamit kan bilog nindong kosog asin enerhiya sa pinakalubos na mahihimo nindo sa paglilingkod sa Dios. Sa ibong kan mga kaluyahan na tibaad makaapektar sa satong rikas, pinapahalagahan ni Jehova an satong bilog na pusong pagsamba.​—Marcos 12:​29, 30.

12. Anong halimbawa sa Ley ni Moises an nag-iilustrar na naggigiya si Jehova “sono sa rikas kan” saiyang mga karnero?

¹² Tanganing iilustrar na naggigiya si Jehova “sono sa rikas kan” saiyang mga karnero, pensara an sinabi manongod sa nagkapirang dolot para sa pagkakasala sa Ley ni Moises. An gusto ni Jehova marahay na mga dolot na motibado nin nagpapasalamat na puso. Kadungan kaiyan, kinaklasipikar an dolot segun sa kakayahan kan nagdodolot. An Ley nagsasabi: “Kun dai nia kaya an sarong karnero, dangan dadarahon nia . . . an duwang agbaan o duwang pitson.” Asin paano kun dai nia kaya dawa an duwang pitson? Kun siring puede siang magdara nin kadikit na “pinong harina.” (Levitico 5:​7, 11) Ipinapaheling kaini na an Dios dai naghagad kan dai kayang itao kan magdodolot. Mantang an Dios dai nagbabago, mararanga kita sa pakaaram na nungka siang naghahagad nin labi sa ikakatao niato; imbes, naoogma siang akoon an kaya niatong itao sa saiya. (Malaquias 3:6) Kawiliwili nanggad na giyahan kan siring na mapagsabot na Pastor!

“Dai Ako Natatakot sa Ano Man na Maraot, Huli ta Ika Kaibanan Ko”

13. Sa Salmo 23:​4, paano si David nagtataram na may orog na kadayupotan, asin taano ta bako ining makangangalas?

¹³ Itinatao ni David an ikaduwang dahelan kan saiyang kompiansa: Pinoprotehiran ni Jehova an saiyang mga karnero. Mababasa niato: “Minsan ako maglakaw sa kababan nin kadikloman, dai ako natatakot sa ano man na maraot, huli ta ika kaibanan ko; an saimong sogkod asin an saimong baston iyo an mga nakakaranga sa sako.” (Salmo 23:4) Si David ngonyan nagtataram na may orog na kadayupotan,  na kinakaolay si Jehova sa pronombreng “ika.” Bako ining makangangalas, huling ipinapahayag ni David kun paano sia tinabangan nin Dios na tagalan an kasakitan. Dakol an inagihan ni David na madiklom na kababan​—mga panahon na nameligro an saiya mismong buhay. Alagad dai nia tinogotan an takot na mangibabaw sa saiya, huling namamatean nia na an Dios​—na andam na gamiton an Saiyang “sogkod” asin “baston”​—​nasa kaibanan nia. An pakaaram na ini na sia may pagprotehir nakaranga ki David asin daing duda na orog na nakaparani sa saiya ki Jehova. *

14. Anong kasiertohan an itinatao sa sato kan Biblia mapadapit sa pagprotehir ni Jehova, alagad ano an dai boot sabihon kaini?

¹⁴ Paano pinoprotehiran ni Jehova an saiyang mga karnero ngonyan? Sinisierto sa sato kan Biblia na mayo nin paratumang​—demonyo man o tawo—na magigin mapanggana sa pagpoho sa saiyang mga karnero sa daga. Nungka na totogotan iyan ni Jehova. (Isaias 54:17; 2 Pedro 2:9) Minsan siring, dai ini nangangahulogan na iingatan kita kan satong Pastor sa gabos na kalamidad. Naeeksperyensiahan niato an mga kasakitan na lakop sa mga tawo, asin napapaatubang kita sa pagtumang na inaagihan kan gabos na tunay na Kristiano. (2 Timoteo 3:​12; Santiago 1:2) May mga panahon na tibaad kita “maglakaw sa kababan nin kadikloman,” sabi ngani. Halimbawa, tibaad mameligro an satong buhay huli sa paglamag o problema sa salud. O tibaad may namomotan kita na nameligro an buhay o nagadan pa ngani. Durante kan garo baga pinakamadiklom na mga panahon, nasa kaibanan niato an satong Pastor, asin iingatan nia kita. Paano?

15, 16. (a) Sa anong mga paagi kita tinatabangan ni Jehova na makaya an mga olang na tibaad mapaatubang sa sato? (b) Isaysay an sarong eksperyensia tanganing ipaheling kun paano kita tinatabangan ni Jehova sa mga panahon nin pagbalo.

¹⁵ Dai nanunuga si Jehova nin milagrosong pag-interbenir. * Alagad makakasierto kita sa bagay na ini: Tatabangan kita ni Jehova na malusotan an ano man na olang na tibaad mapaatubang sa sato. Puede nia kitang tawan kan kadonongan na makaya an “manlaenlaen na pagbalo.” (Santiago 1:​2-5) Ginagamit kan pastor an saiyang sogkod o baston bako sanang tanganing bugawon an mga naniniba kundi tangani man na itulod an saiyang mga karnero sa tamang direksion. Puede kitang “itulod” ni Jehova, tibaad paagi sa kapwa parasamba, na iaplikar an basado sa Bibliang konseho na tibaad makapabago nanggad sa satong kamugtakan. Dugang pa, puede kitang tawan ni Jehova kan kosog tanganing makatagal. (Filipos 4:13) Paagi sa saiyang banal na espiritu, kaya nia kitang sangkapan nin “puersa na labi sa ordinaryo.” (2 Corinto 4:7) An espiritu nin Dios makakapangyari sa sato na tagalan an ano man na pagbalo na posibleng ipaabot sa sato ni Satanas. (1 Corinto 10:13) Bako daw na nakakarangang maaraman na si Jehova pirmeng andam na tabangan kita?

¹⁶ Iyo, sa ano man na madiklom na kababan na kita tibaad mapaduman, dai niato kaipuhan na maglakaw dian na nagsosolo. Nasa kaibanan niato an satong Pastor, na nagtatabang sa sato sa mga paagi na tibaad dai niato lubos na nasasabotan sa primero. Isip-isipa an eksperyensia nin sarong Kristianong magurang sa kongregasyon na nadiskobre na may tumor sa hotok na puedeng ikagadan. “Inaadmitir ko na kan primero iniisip-isip ko kun baga anggot sako si Jehova o kun baga namomotan nia ngani ako. Alagad determinado ako na dai rumayo ki Jehova. Imbes, sinabi ko sa saiya an sakong mga kapurisawan. Asin tinabangan ako ni Jehova, na sa parate rinaranga ako paagi sa sakong mga tugang na lalaki asin babae. Dakol an nagsabi sa sako nin nakakatabang na mga komentong may pakarorop basado sa saindang sadiring eksperyensia sa pag-atubang sa grabeng helang. An saindang timbang na mga komento nagpagirumdom sa sako na mayo nin pambihira sa inaagihan ko. An praktikal na tabang, kaiba an nagkapirang nakakapukaw sa boot na pag-opresir nin kabootan, nagpakosog giraray sa sakong boot na si Jehova dai naaanggot sa sako. Siempre, dapat kong padagos na labanan an sakong helang, asin dai ko aram kun ano an magigin resulta. Alagad kombensido ako na nasa kaibanan ko si Jehova asin na padagos nia akong tatabangan sa pagbalong ini.”

“Nag-aandam Ka sa Atubangan Ko nin Lamesa”

17. Paano ilinaladawan ni David si Jehova sa Salmo 23:​5, asin taano ta bako ining kakontra kan ilustrasyon nin sarong pastor?

¹⁷ Sinasambit ngonyan ni David an ikatolong  dahelan kan saiyang kompiansa sa saiyang Pastor: Pinapakakan ni Jehova an saiyang mga karnero, asin ginigibo nia iyan nin abunda. Si David nagsurat: “Nag-aandam ka sa atubangan ko nin lamesa sa atubangan kan mga nagpapaheling nin kaanggotan sa sakuya. Pinahidan mo nin lana an sakuyang payo; an sakuyang kopa pano nanggad.” (Salmo 23:5) Sa bersikulong ini, ilinaladawan ni David an saiyang Pastor bilang sarong matinaong kag-imbitar na abundang nagtatao nin pagkakan asin inomon. An duwang ilustrasyon​—sarong nagmamakolog na pastor asin sarong matinaong kag-imbitar​—​bakong magkakontra. Total, dapat aram kan sarong marahay na pastor kun saen manonompongan an marahay na pasabsaban asin supisyenteng maiinom na tubig tangani na an saiyang aripompon ‘dai magkulang nin ano man.’​—Salmo 23:​1, 2.

18. Ano an nagpapaheling na si Jehova sarong matinaong kag-imbitar?

¹⁸ An sato daw na Pastor saro man na matinaong kag-imbitar? Dai nanggad iyan mapagdududahan! Horophoropa na sana an kualidad, kadakolan, asin pagkalaenlaen kan espirituwal na pagkakan na nakakamtan niato ngonyan. Paagi sa grupong maimbod asin mapagmansay na oripon, tinatawan kita ni Jehova nin nakakatabang na mga publikasyon asin nakakapagtokdong mga programa sa mga pagtiripon, asamblea, asin kombension​—na gabos nagpapanigo sa satong espirituwal na mga pangangaipo. (Mateo 24:45-​47) Mayo nanggad nin kakulangan sa espirituwal na pagkakan. “An maimbod asin mapagmansay na oripon” nagprodusir nin minilyon na Biblia asin pantabang sa pag-adal kan Biblia, asin an siring na mga publikasyon makukua na ngonyan sa 413 lenguahe. Itinao ni Jehova an espirituwal na pagkakan na ini sa kadakol na laen-laen na klase​—poon sa “gatas,” an pundamental na mga katokdoan sa Biblia, sagkod sa “kakanon na matagas,” an mas hararom na espirituwal na mga katokdoan. (Hebreo 5:​11-​14) Bilang resulta, kun napapaatubang kita sa mga problema o sa paggibo nin mga desisyon, parate niatong nakukua an eksaktong kaipuhan niato. Haen daw kita kun mayo an siring na espirituwal na mga pagkakan? Saro nanggad na matinaong paratao an satong Pastor!​—Isaias 25:6; 65:13.

“Mag-oontok Ako sa Harong ni Jehova”

19, 20. (a) Sa Salmo 23:​6, anong kompiansa an ipinahayag ni David, asin paano kita puedeng magkaigwa kan siring na kompiansa? (b) Ano an ipapaliwanag sa masunod na artikulo?

¹⁹ Pagkatapos na horophoropon an mga paagi nin paghiro kan saiyang Pastor asin Paratao, si David nagkonklusyon: “Sierto na susundan ako nin karahayan asin mamomoton na kabootan sa gabos na aldaw kan sakuyang buhay; asin mag-oontok ako sa harong ni Jehova sagkod sa kahalawigan nin mga aldaw.” (Salmo 23:6) Si David nagtataram gikan sa puso na pano nin pagpasalamat asin pagtubod​—pagpasalamat sa paggirumdom kan nakaagi asin pagtubod sa pagtanaw sa ngapit. An dating pastor na ini tiwasay, na naaaraman na sagkod na nagdadanay siang harani sa saiyang langitnon na Pastor, na garo nag-oontok sa Saiyang harong, pirme niang makakamtan an mamomoton na pag-ataman ni Jehova.

²⁰ Kanigoan an pagpasalamat niato sa magayon na mga tataramon na nakarekord sa ika-23 na Salmo! Ini na nanggad an pinakaangay na paagi na ikakaladawan ni David kun paano si Jehova naggigiya, nagpoprotehir, asin nagpapakakan sa saiyang mga karnero. Iningatan an may init na mga kapahayagan ni David tanganing magtao sa sato nin kompiansa na kita man makakaasa ki Jehova bilang satong Pastor. Iyo, sagkod na nagdadanay kitang harani ki Jehova, bilang mamomoton na Pastor aatamanon nia kita “sagkod sa kahalawigan nin mga aldaw,” sagkod pa ngani sa panahon na daing katapusan. Minsan siring, bilang saiyang mga karnero, may paninimbagan kita na maglakaw sa kaibanan kan satong dakulang Pastor, si Jehova. Kun ano an kalabot digdi ipapaliwanag sa masunod na artikulo.

[Mga Nota sa Ibaba]

Nagigirumdoman daw Nindo?

• Taano ta angay na ikinomparar ni David si Jehova sa sarong pastor?

• Paano kita ginigiyahan ni Jehova na may pagsabot?

• Sa anong mga paagi na kita tinatabangan ni Jehova na makatagal sa mga pagbalo?

• Ano an nagpapaheling na si Jehova sarong matinaong kag-imbitar?

[Mga Hapot Para sa Pag-adal]

[Ritrato sa pahina 18]

Siring sa sarong pastor sa Israel, ginigiyahan ni Jehova an Saiyang mga karnero