“An Tabang sa Sako Gikan ki Jehova”

An Pagigin Mapagsakripisyo Nagbubunga kan Bendisyon ni Jehova

AN SARONG lalaki nagbibisikleta sa mahibog na kadlagan kan Cameroon. Sa laog nin dakol na oras, sia nagbibisikleta sa binabahang mga tinampo asin sa malaboy, na inaatubang an peligro tanganing pakosogon an iba. Tanganing tokdoan an sarong napapasuway na grupo, igwa sa Zimbabwe nin mga naglalakaw nin 15 kilometros sa binabahang mga salog, na binabalanse an saindang mga bado asin sapatos na sunong ninda sa saindang payo tanganing dai iyan mabasa. Sa iba pang lugar, an sarong babae minabangon nin alas kuatro nin aga tanganing dalawon asin tokdoan an sarong nars na puede sanang mag-adal kan Biblia nin sarong oras sa amay na aga.

Ano an pagkakapareho kan mga tawong ini na naggigibo nin siring na paghihingoa? Sinda gabos bilog na panahon na ministro kan Mga Saksi ni Jehova na nakikikabtang sa pagtotokdo kan katotoohan sa Biblia. Kaiba sa sainda an mga regular asin espesyal payunir, misyonero, nagbibiaheng paraataman, asin rinibong boluntaryo sa mga erokan na Bethel sa bilog na kinaban. Asin midbid sinda sa pagigin mapagsakripisyo. *

Tamang Motibo

Hinihimate kan Mga Saksi ni Jehova an konseho ni apostol Pablo ki Timoteo: “Gibohon mo an bilog mong makakaya tanganing ikaatubang mo an saimong sadiri na inooyonan nin Dios, sarong paragibo na mayo nin maninigong ikasupog, na ginagamit an tataramon kan katotoohan sa tamang paagi.” (2 Timoteo 2:15) Alagad ano an nagmomotibar sa ginatos na ribong Saksi na maglingkod bilang bilog na panahon na ministro?

Kun hinahapot an bilog na panahon na mga lingkod kun taano ta naghihingoa sinda sa paglilingkod ki Jehova, kalabot sa saindang simbag an pagkamoot sa Dios asin sa kapwa. (Mateo 22:37-39) Angay na marhay ini, huli ta kun bakong pagkamoot an motibo, magigin daing kamanungdanan an ano man na paghihingoa.​—1 Corinto 13:1-3.

Mapagsakripisyong Paglilingkod

Inako kan gabos na nagdusay na Kristiano an pangapodan ni Jesus: “Kun an siisay man boot na magsunod sa sako, paindahan nia an saiyang sadiri asin pasanon an saiyang hariging pasakitan patin padagos akong sundan.” (Mateo 16:24) An pagpainda sa satong sadiri nangangahulogan nin gikan sa boot na pagpasakop niato bilang sadiri asin ginigiyahan ni Jehova Dios asin ni Jesu-Cristo. Para sa dakol, nagbunga ini nin mapagsakripisyong paglilingkod sa bilog na panahon na ministeryo.

Dakol na Saksi an naggigibo nin dakulang paghihingoa tanganing pahiwason an saindang paglilingkod ki Jehova. Isipon nindo an 56 anyos na si Julia, na sarong regular payunir sa São Paulo, Brazil. “Inapodan ako sa telepono nin sarong Intsik na tugang na lalaki tanganing hapoton ako kun gusto kong mag-adal nin Intsik,” an nagigirumdoman nia. “Huli sa sakong edad, dai ko inisip na mag-adal nin bagong lenguahe. Alagad pakalihis nin nagkapirang aldaw, inako ko an angat na iyan. Ngonyan, nakakatao na ako nin presentasyon na sono sa Kasuratan sa Intsik.”

 An sangang opisina kan Mga Saksi ni Jehova sa Peru nagbabareta: “Kan nakaagi pa sanang mga taon, ginatos na regular payunir an nagbalyo sa mga teritoryo na mayo pang nakadestinong maghulit, na nagpapaheling nin kosog nin boot asin mapagsakripisyong aktitud. Nagbalyo sinda sa hararayong banwaan kun saen mayo nin modernong mga kagianan asin limitado an oportunidad sa trabaho. An mga tugang na lalaki asin babae na ini andam na gibohon an ano man na kaipuhan tanganing magdanay sa saindang mga destino. Alagad an pinakamahalaga, an saindang aktibidad sa ministeryo sarong bendisyon sa dakol na lugar. An mga nagbibiaheng paraataman nagbabareta na may bagong mga grupo na naorganisar sa tabang kan mapagsakripisyong mga regular payunir na ini.”

May mga Kristiano na isinapeligro an saindang buhay tanganing matabangan an mga kapagtubod. (Roma 16:​3, 4) An sarong paraataman sa sirkito sa lugar na nababanga huli sa guerra sa Aprika nagbabareta: “Bago makaabot sa huring barikada sa pag-oltanan kan mga teritoryo na okupado kan mga rebelde asin kan mga teritoryo na kontrolado kan gobyerno, pinalibotan kaming mag-agom nin apat na komandante militar kan mga rebelde asin kan saindang mga badigard, na naghahapot kun siisay kami. Mantang bineberepikar an samong mga identity card, naheling ninda na hale kami sa lugar na kontrolado kan gobyerno, kaya ninerbios sinda. Sinahotan akong espiya. Kaya, nagdesisyon sindang iapon ako sa sarong kalot. Ipinaliwanag ko kun siisay kami, asin sa kahurihurihi pinahale na ninda kami.” Nagpapasalamat nanggad an mga kongregasyon na nahimo kan mapagsakripisyong mag-agom na ini na madalaw sinda!

Sa ibong kan naeeksperyensiahan na mga kadepisilan, an mga kabilang sa siring na bilog na panahon na mga ministro nagdadakol sa bilog na kinaban. (Isaias 6:8) Pinapahalagahan kan mahigos na mga trabahador na ini an saindang pribilehio na maglingkod ki Jehova. Huling may kaparehong mapagsakripisyong aktitud, minilyon na iba pa ngonyan an nag-oomaw ki Jehova. Binebendisyonan man nia sinda nin abunda. (Talinhaga 10:22) Huling kompiado sa padagos na bendisyon asin suporta, ipinapabanaag kan siring na mahigos na mga trabahador an saboot kan salmista na nag-awit: “An tabang sa sako gikan ki Jehova.”​—Salmo 121:2.

[Nota sa Ibaba]

[Blurb sa pahina 9]

“An saimong banwaan gikan sa boot na magpepresentar kan saindang sadiri sa aldaw kan saimong puersa militar.”​—SALMO 110:3

[Kahon sa pahina 8]

PINAPAHALAGAHAN NI JEHOVA AN SAIYANG DUSAY NA MGA LINGKOD

“Magin kamong marigon, dai natatanyog, na danay na dakol an gigibohon sa gibohon kan Kagurangnan, sa pakaaram na an saindong pagpapagal bakong sayang sana may koneksion sa Kagurangnan.”​—1 Corinto 15:58.

“An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran.”​—Hebreo 6:10.