An Teknika sa Paghinanyog na May Pagkamoot

“SALAMAT sa paghinanyog mo sa sako.” May nagsabi na daw kaiyan sa saindo kasuarin pa sana? Abaang pag-omaw iyan! An sarong matibay maghinanyog inaapresyar kan haros gabos na tawo. Paagi sa paghinanyog nin marhay, puede niatong paginhawahon an mga tawo na napupurisaw o nagagabatan huli sa mga problema. Asin bako daw na an pagigin matibay maghinanyog nagtatabang sa sato na pakamahalon an mga tawo? Sa Kristianong kongregasyon, an paghinanyog na may pagkamoot sarong mahalagang marhay na kabtang kan ‘pagkonsiderar sa lambang saro tanganing mandagka sa pagkamoot asin sa marahay na mga gibo.’​—Hebreo 10:24.

Minsan siring, dakol na tawo an maluyang maghinanyog. An gusto ninda magsadol, mag-estorya kan saindang sadiring mga eksperyensia, o magsabi kan saindang punto de vista imbes na maghinanyog sa sasabihon nin iba. An paghinanyog talagang sarong teknika. Paano kita makakanood na maghinanyog na may pagkamoot?

Sarong Nakakakontribwir na Bagay na Mahalagang Marhay

Si Jehova an satong “Kaharohalangkaweng Paratokdo.” (Isaias 30:20) Dakol an ikakatokdo nia sa sato manongod sa paghinanyog. Estudyaran kun paano tinabangan ni Jehova si propeta Elias. Natakot sa mga huma ni Reyna Jezabel, si Elias nagdulag pasiring sa kaawagan asin nagpahayag kan kamawotan na magadan. Duman nakipag-olay sa saiya an anghel nin Dios. Mantang ipinapaliwanag kan propeta an saiyang mga kinakatakotan, si Jehova naghinanyog dangan nagpaheling kan Saiyang dakulang kapangyarihan. Ano an nagin resulta? Dai na natatakot, si Elias nagbuelta sa saiyang asignasyon. (1 Hade 19:​2-​15) Taano ta tinatawan nin panahon ni Jehova na hinanyogon an mga kapurisawan kan saiyang mga lingkod? Huli ta sia may pagmakolog sa sainda. (1 Pedro 5:7) Uya an sarong nakakakontribwir na bagay sa pagigin sarong matibay maghinanyog: Magmakolog sa iba, asin magpaheling nin tunay na interes sa sainda.

Kan an sarong lalaki sa Bolivia nakakomiter nin magabat na sala, inapresyar nia an pag-ako nin siring na pagmakolog gikan sa sarong kapagtubod. Ipinapaliwanag kan lalaki: “Saro idto sa pinakamamondong parte kan buhay ko. Tibaad suminuko tolos ako sa paghihingoa na maglingkod ki Jehova kun bakong huli sa sarong tugang na lalaki na nagtao nin panahon na maghinanyog sa sako. Mayo siang gayong sinabi, alagad an pakaaram na sia may igong pagmakolog tanganing maghinanyog talagang nagpakosog sa sako. Dai ko kaipuhan an solusyon; aram ko an maninigo kong gibohon. Kaipuhan ko sanang maaraman na may nagmamakolog sa kun ano an sakong saboot. An saiyang paghinanyog nakatabang sa sako na dai madaog nin pagkadesesperar.”

Si Jesu-Cristo sarong dakulang Arogan dapit sa teknika sa paghinanyog na may pagkamoot. Dai nahaloy pagkagadan ni Jesus, duwa sa mga disipulo nia an nagbabaklay kaidto gikan sa Jerusalem pasiring sa sarong baryo na mga 11 kilometros an rayo. Daing duda na sinda pinanluluyahan nin boot. Kaya an binuhay liwat na si Jesu-Cristo nagpoon na sabayan sinda sa paglakaw. Sia naghapot na maingat na pinipili an mga tataramon tanganing enganyaron sinda na magtaram, asin an mga disipulo nagsimbag. Ipinahayag ninda an saindang mga paglaom kaidto asin an pagkadesesperar saka pagkaribaraw ninda ngonyan. Si Jesus may pagmakolog sa sainda, asin an saiyang paghinanyog na may pagkamoot nag-andam sa duwang disipulo na maghinanyog. Dangan ‘ipinaliwanag ni Jesus sa sainda an mga bagay  manongod sa saiya sa bilog na Kasuratan.’​—Lucas 24:13-​27.

An paghinanyog nguna sarong mamomoton na paagi tanganing an iba maghinanyog man sa sato. “An sakong mga magurang asin an sakong mga panugangan nagpoon na kontrahon an paagi nin pagpadakula ko sa mga aki ko,” an isinabi nin sarong babae na taga Bolivia. “Ikinaanggot ko an saindang mga komento, alagad nawaran ako nin kompiansa sa sakong sadiri bilang magurang. Kan panahon man na idto, saro sa mga Saksi ni Jehova an nagdalaw sa sako. Ipinakipag-olay nia sa sako an manongod sa mga panuga nin Dios. Minsan siring, an paagi kan paghagad nia kan sakong opinyon iyo an nakatabang sa sako na marealisar na an babaeng ini andam na maghinanyog. Pinadagos ko sia, asin dai nahaloy ipinapaliwanag ko na sa saiya an sakong problema. Sia pasensiosang naghinanyog. Hinapot nia ako kun ano an gusto ko para sa sakong mga aki asin kun ano an saboot kan sakong agom manongod kaiyan. Nakakaginhawa na makaibanan an sarong tawo na andam na maghingoa na saboton ako. Kan sia magpoon na ipaheling sa sako an sinasabi kan Biblia manongod sa buhay pampamilya, aram ko na an kaolay ko saro na may pagmakolog sa sakong situwasyon.”

“An pagkamoot . . . dai naghahanap kan saiyang sadiring kapakanan,” an sabi kan Biblia. (1 Corinto 13:​4, 5) Kun siring, an paghinanyog na may pagkamoot nangangahulogan na ipinapagilid niato an satong sadiring mga interes. Tibaad hagadon kaini na gadanon niato an telebisyon, pondohon an pagbasa kan peryodiko, o gadanon an cell phone kun may nakikipag-olay sa sato manongod sa sarong seryosong bagay. An paghinanyog na may pagkamoot nangangahulogan nin pagigin interesadong marhay sa mga kaisipan kan kaolay niato. Hinahagad kaiyan na likayan niato na magpoon na mag-estorya manongod sa satong sadiri paagi sa pagsasabi nin arog kaini, “Nagigirumdoman ko logod an nangyari sa sako mga pirang taon na an nakaagi.” Mantang an siring na pag-estoryahan puede sa sarong makikatood na pag-orolay, kaipuhan niatong ipagilid an personal na mga interes kun may nakikipag-olay sa sato manongod sa sarong seryosong problema. An tunay na interes sa iba ikakapaheling sa saro pang paagi.

Maghinanyog Tanganing Risahon an mga Saboot

An mga kaibaiba kan lalaking si Job nadangog an kisuerra sampulo kan saiyang mga diskurso. Pero, si Job nagkagsing pa man giraray: “O kun igwa lamang kutana nin maghihinanyog sa sako!” (Job 31:35) Taano? Huli ta an saindang paghinanyog dai nakaranga. Sinda daing pagmakolog ki Job ni gusto man nindang saboton an saiyang mga saboot. Sinda seguradong mayo nin pakikipagkapwa bilang maduminamay na mga parahinanyog. Alagad si apostol Pedro nagkonseho: “Kamo gabos magin parareho an isip, nagpapaheling nin pakikipagkapwa, may kapadangatan na sa magturugang, mapagmalasakit sa mapagpadangat na paagi, mapakumbaba sa isip.” (1 Pedro 3:8) Paano kita makakapaheling nin pakikipagkapwa? An sarong paagi iyo an pagpaheling nin pagmakolog sa mga saboot kan kaolay niato asin paghihingoa na saboton an mga iyan. An pagsabi nin maduminamay na mga komento arog kan “seguro makolog iyan sa boot” o “seguro an pagmate mo namisinterpretar ka” sarong paagi na ikapaheling na kita may pagmakolog. An saro pang paagi iyo na ipahayag sa sadiri niatong tataramon an sinasabi kan kaolay niato, sa siring ipinapaheling na nasabotan niato an saiyang sinabi. An paghinanyog na may pagkamoot nangangahulogan nin pagtao nin atension bako sanang sa mga tataramon kundi siring man sa mga emosyon na ipinaparisa.

Si Robert * sarong eksperyensiadong bilog na panahon na ministro kan Mga Saksi ni Jehova. Isinaysay nia: “May panahon kaidto na nadesganar ako sa sakong ministeryo. Kaya hinagad ko na makipag-olay sa nagbibiaheng paraataman. Sia talagang  naghinanyog asin naghingoa na saboton an sakong mga saboot. Garo ngani narorop nia an sakong takot na tibaad tatsaran nia ako huli sa sakong aktitud. Inasegurar ako kan tugang na ini na an sakong mga saboot natural sana, huli ta naeksperyensiahan nia mismo an kaagid na mga emosyon. Ini talagang nakatabang sa sako na magpadagos.”

Puede daw kitang maghinanyog na dai minaoyon sa sinasabi? Puede daw na sabihon niato sa sarong tawo na inaapresyar ta an pagsabi nia sa sato kan saiyang saboot? Iyo. Paano kun an sarong aking lalaki makiiwal sa eskuelahan o an sarong aking daragita magpuli sa harong asin magsabi na sia namomoot na? Bako daw na mas marahay para sa sarong magurang na maghinanyog asin hingoahon na saboton an kaisipan kan aki bago ipaliwanag kun ano an tama asin salang gawe-gawe?

“An planong gibohon sa puso nin tawo siring sa hararom na katubigan,” an sabi kan Talinhaga 20:​5, “alagad an tawong mapagrisa iyo an masakdo kaiyan.” Kun an sarong madonong asin eksperyensiadong tawo bakong mahilig na magtao nin sadol na dai hinagad, tibaad kaipuhan niatong enganyaron sia na magtaram tanganing maako niato an saiyang konseho. Kaagid kaiyan an situwasyon kun kita naghihinanyog na may pagkamoot. Kaipuhan an pagigin mapagrisa tanganing maenganyar an sarong tawo na magtaram. An paghapot nakakatabang, alagad dapat na mag-ingat kita na an satong mga hapot dai nakikiaram sa pribadong mga bagay. Tibaad makakatabang na isuherir na an nagtataram magpoon sa mga bagay na komportable siang sambiton. Halimbawa, an sarong agom na babae na gustong makipag-olay manongod sa mga problema sa saiyang pag-agom tibaad mas mapasilan na magpoon paagi sa pag-estorya kun paano sinda mag-agom nagkamidbidan asin nagkainagoman. An sarong indibiduwal na nagin inaktibo sa Kristianong ministeryo tibaad mas mapasilan na magpoon paagi sa pagpaliwanag kun paano nia nanodan an katotoohan.

Paghinanyog na May Pagkamoot​—Sarong Kadepisilan

Tibaad depisil an paghinanyog kun makolog an boot sa sato nin sarong tawo, huli ta an natural na inklinasyon niato idepensa an satong sadiri. Paano niato maaatubang an kadepisilan na ini? “An simbag, kun mahoyo, nakakaparayo nin kaanggotan,” an sabi kan Talinhaga 15:1. An maboot na pag-imbitar sa tawo na magtaram dangan an pasensiosong paghinanyog mantang ipinapahayag nia an saiyang reklamo sarong paagi tanganing makasimbag nin mahoyo.

An mainit na mga diskutiran sa parate kalabot an duwang tawo na inootro sana an nasabi na ninda. An pagmate kan lambang saro dai naghihinanyog an sa ibong na lado. Marahayon kutana kun an saro sa sainda magpondo asin talagang maghinanyog! Siempre, mahalaga na magpogol sa sadiri asin magpahayag kan nasa boot sa mapagmansay asin mamomoton na paagi. Sinasabi kan Biblia sa sato: “An nagpopogol kan saiyang mga ngabil naghihirong may pagmansay.”​—Talinhaga 10:19.

Bakong natural sanang minaluwas an kakayahan na maghinanyog na may pagkamoot. Minsan siring, iyan sarong teknika na puedeng manodan paagi sa paghihingoa asin disiplina. Tunay nanggad na iyan sarong abilidad na kapakipakinabang na makamtan. An talagang paghinanyog kun an iba nagtataram sarong kapahayagan kan satong pagkamoot. Iyan nakakakontribwir man sa satong kaogmahan. Madonong nanggad, kun siring, na kultibaron an teknika sa paghinanyog na may pagkamoot!

[Nota sa Ibaba]

[Ritrato sa pahina 11]

Kun naghihinanyog, maninigo niatong ipagilid an satong sadiring mga interes

[Ritrato sa pahina 12]

Puedeng magin depisil an paghinanyog kun an saro makolog an boot