Maglakaw sa Kaibanan nin Dios, Asin Mag-ani nin Marahay

“Nagsasarabwag sinda nin doros, asin doros nin bagyo an saindang aanihon.”​—OSEAS 8:7.

1. Paano kita makakalakaw sa kaibanan ni Jehova?

AN PAGBAKLAY sa sarong peligrosong lugar magigin mas ligtas kun may sarong eksperyensiadong naggigiya sa dalan. Madonong na maglakaw kaiba an siring na giya imbes na maglakaw nin solo. Sa nagkapirang paagi, siring kaiyan an situwasyon niato. Garo man sana nag-aalok si Jehova na giyahan kita sa mahiwas na desierto kan presenteng maraot na kinaban. Madonong na kita lumakaw sa kaibanan nia imbes na maghingoang giyahan an sadiri niatong mga lakad. Paano kita makakalakaw sa kaibanan nin Dios? Paagi sa pagsunod sa paggiya na itinatao nia sa saiyang Tataramon.

2. Ano an totokaron sa artikulong ini?

² Tinokar sa naenot na artikulo an simbolikong drama na manonompongan sa Oseas kapitulo 1 sagkod 5. Siring kan naheling niato, an dramang iyan igwa nin mga leksion na makakatabang sa sato na maglakaw sa kaibanan nin Dios. Pag-olayan niato ngonyan an nagkapirang tampok na kabtang kan kapitulo 6 sagkod 9. Makakatabang na pumoon paagi sa sumaryo kan apat na kapitulong ini.

Sarong Halipot na Sumaryo

3. Isaysay sa halipot an laog kan Oseas kapitulo 6 sagkod 9.

³ Isinugo ni Jehova si Oseas na humula sa pangenot sa sampulong tribong kahadean nin Israel sa amihanan. Nagbaya sa Dios an nasyon na iyan, na midbid man bilang Efraim na inginaran sa nangingibabaw na tribo kaiyan. Ipinapaheling kan Oseas kapitulo 6 sagkod 9 na an banwaan nagpaheling nin kadaihan nin kaimbodan paagi sa paglapas sa tipan ni Jehova asin paggibo nin karatan. (Oseas 6:7) Nagtiwala sinda sa kinabanon na mga kaalyansa imbes na bumalik ki Jehova. Huling padagos sindang nagtatanom nin maraot, maraot man an aanihon ninda. Sa ibang pagtaram, madatong an bakong paborableng paghokom. Alagad igwa man nin nakakaogmang mensahe an hula ni Oseas. Inasegurar an banwaan na puede sindang bumalik ki Jehova asin kaheherakan sinda kun ikapaheling ninda an ebidensia kan odok sa pusong pagsolsol.

4. Anong praktikal na mga leksion sa hula ni Oseas an pag-oolayan niato?

⁴ Sa apat na kapitulong ini kan hula ni Oseas, makakakua kita nin dugang na paggiya na matabang sa sato na maglakaw sa kaibanan nin Dios. Pag-olayan niato an apat na praktikal na leksion: (1) An tunay na pagsolsol ipinapaheling paagi sa mga gibo, bakong sa tataramon sana; (2) bako sana an mismong mga atang an nakakapaogma sa Dios; (3) nakokolgan an boot ni Jehova kun minatalikod sa saiya an mga parasamba sa saiya; asin (4) tanganing mag-ani nin marahay, dapat na marahay man an satong itanom.

Kun Paano Maheheling an Tunay na Pagsolsol

5. Itao an pinakaubod kan sinasabi sa Oseas 6:1-3.

⁵ Dakol an itinotokdo sa sato kan hula ni Oseas manongod sa pagsolsol asin pagkaherak. Sa Oseas 6:1-3, mababasa niato: “Madia kamo, asin bumalik kita ki Jehova, huli ta sia mismo nampisangpisang alagad papaomayan nia kita. Sia padagos na nanhampak, alagad bobogkosan nia kita. Bubuhayon nia kita pakalihis nin duwang aldaw. Sa ikatolong aldaw ibabangon nia kita, asin mabubuhay kita sa atubangan nia. Asin kita makakamidbid, magpapadagos kitang mamidbid si Jehova. Siring kan kaagahon, marigon an saiyang pagluwas. Asin sia madatong sa satuya na siring sa oran; siring sa oran nin tigsoli na nakakasagom sa daga.”

6-8. Ano an sala sa pagsolsol kan Israel?

⁶ Siisay an nagtaram kan mga tataramon na nakasurat sa mga bersikulong ini? Sinasabi nin nagkapira na an bakong maimbod na mga Israelita an  nagtaram kaini asin sinasabi ninda na an bakong makinuyog na banwaan sagin sanang nagsosolsol asin inaaprobetsaran an pagkaherak nin Dios. Minsan siring, an iba nagsasabi na si propeta Oseas an nagtataram, na nakikiolay sa banwaan na bumalik ki Jehova. Dawa kun siisay an nagtaram kaini, an importanteng hapot iyo ini, An mga tawo daw kan sampulong tribong kahadean nin Israel sa pankagabsan nagbalik ki Jehova, na nagpapaheling nin tunay na pagsolsol? An simbag dai. Si Jehova nagsabi paagi ki Oseas: “Ano an gigibohon ko sa saimo, O Efraim? Ano an gigibohon ko sa saimo, O Juda, mantang an mamomoton na kabootan nindo siring sa mga panganoron sa kaagahan asin siring sa ambon na amay na nawawara?” (Oseas 6:4) Katunayan nanggad kan makamomondong espirituwal na kamugtakan kan banwaan nin Dios! An mamomoton na kabootan, o maimbod na pagkamoot, haros nawara na​—siring sa ambon sa maagahon na madaling nawawara pagsirang kan saldang. Minsan ngani minalataw na sagin nagsolsol an banwaan, si Jehova dai nakanompong nin basehan tanganing maherak. Ano an problema?

⁷ An pagsolsol kan Israel bako talagang odok sa puso. Ini an sinasabi kan Oseas 7:14 manongod sa kaanggotan ni Jehova sa saiyang banwaan: “Dai sinda naghagad nin tabang sako gikan sa saindang puso, minsan ngani padagos sindang nagkukurahaw sa saindang mga higdaan.” Idinugang kan bersikulo 16: “Nagbalik sinda, bakong sa ano man na mas halangkaw”​—an boot sabihon, “bakong sa halangkaw na klase nin pagsamba.” (Nota sa ibaba) Habo kan banwaan na bumalik sa mamuraway na pagsamba ki Jehova paagi sa paggibo kan mga pagbabago na kaipuhan tanganing ikabalik an saindang relasyon sa saiya. Tunay nanggad, habo talaga nindang maglakaw sa kaibanan nin Dios.

⁸ May saro pang problema sa pagsolsol kan Israel. An banwaan nagpapadagos sa paggibo nin kasalan​—sa katunayan, dakol na klaseng kasalan, kaiba na an pandadaya, paggadan, paghabon, idolatriya, asin bakong madonong na pakikialyansa sa ibang mga nasyon. Sa Oseas 7:​4, an banwaan ibinaing sa “sarong horno,” minalataw na huli sa maraot na mga pagmawot na naglalaad sa laog ninda. Huli sa siring na makamomondong kamugtakan sa espirituwal, maninigo daw na kaherakan an banwaan? Dai nanggad! Sinabihan ni Oseas an rebeldeng banwaan na “gigirumdomon [ni Jehova] an saindang sala” asin “tatawan nia nin atension an saindang mga kasalan.” (Oseas 9:9) Dai sinda kaheherakan!

9. Ano an itinotokdo sa sato kan mga tataramon ni Oseas manongod sa pagsolsol asin pagkaherak?

⁹ Mantang binabasa niato an mga tataramon ni Oseas, ano an nanonodan niato manongod sa pagsolsol asin pagkaherak? An nagpapatanid na halimbawa kan daing pagtubod na mga Israelita nagtotokdo sa sato na tanganing makinabang sa pagkaherak ni Jehova, dapat kitang magpaheling nin odok sa pusong pagsolsol. Paano ipinapaheling an siring na pagsolsol? Si Jehova dai nadadaya nin mga luha o mga tataramon sana. An tunay na pagsolsol pinapatunayan nin mga gibo. Tanganing umako nin pagkaherak, an sarong nagkasala dapat na lubos na bayaan an saiyang makasalan na dalan asin ioyon an saiyang buhay sa halangkaw na mga  pamantayan kan halangkaw na klase nin pagsamba ki Jehova.

Bako Sana an Mismong mga Atang an Nakakapaogma ki Jehova

10, 11. Siring kan iniilustrar sa kamugtakan kan Israel, taano ta bako sana an mismong mga atang an nakakapaogma ki Jehova?

¹⁰ Pag-olayan niato ngonyan an ikaduwang leksion na makakatabang sa sato na maglakaw sa kaibanan ni Jehova. Iyo ini: Bako sana an mismong mga atang an nakakapaogma sa Dios. An Oseas 6:6 nagsasabi: “Sa mamomoton na kabootan ako [si Jehova] naogma nin labi-labi, asin bakong sa atang; asin sa kaaraman dapit sa Dios kisa bilog na mga dolot na tinotong.” Mangnohon nindo na naoogma nin labi-labi si Jehova sa mamomoton na kabootan, o maimbod na pagkamoot​—sarong kualidad kan puso​—​asin sa kaaraman dapit sa saiya. Alagad tibaad nagngangalas kamo: ‘Taano ta sinasabi sa bersikulong ini na si Jehova naoogma nin labi-labi bakong sa “atang” asin sa “bilog na mga dolot na tinotong”? Bako daw na mga kahagadan iyan sa Ley ni Moises?’

¹¹ An mga atang asin dolot kahagadan sa Ley, alagad may seryosong problema an mga katemporanyo ni Oseas. Minalataw na may mga Israelita na nagdodolot kaiyan bilang obligasyon tanganing magpaheling nin paimbabaw na debosyon. Kadungan kaiyan, naggigibo sinda nin kasalan. Paagi sa saindang pagkamakasalan ipinaheling ninda na an saindang puso mayo nin maimbod na pagkamoot. Ipinaheling man ninda na isinikwal ninda an kaaraman dapit sa Dios, huli ta dai sinda namumuhay kaoyon kaiyan. Kun an banwaan mayo nin tamang kamugtakan nin puso asin dai sinusunod an tamang paagi nin pamumuhay, ano an serbi kan saindang mga atang? An saindang mga atang nakakaanggot ki Jehova Dios.

12. Ano an itinataong patanid kan Oseas 6:6 para sa mga tawo na nabubuhay ngonyan?

¹² An mga tataramon ni Oseas nagseserbing patanid sa dakol na parasimba ngonyan. Nagdodolot sinda sa Dios paagi sa relihiosong kaugalean. Alagad an saindang pagsamba kadikit an tunay na epekto, kun igwa man, sa saindang pangaroaldaw na paggawe. Napapaogma daw talaga kan siring na mga tawo an Dios kun dai man sinda minomotibar kan saindang puso na kumua nin tamang kaaraman manongod sa saiya asin iaplikar an kaaraman na iyan paagi sa pagtalikod sa makasalan na mga gibo? Dai mag-isip an siisay man na naoogma an Dios sa mismong relihiosong mga gibo. Dai naoogma si Jehova sa mga tawo na naghihingoang kamtan an saiyang pabor sa paramas sanang paagi nin pagsamba imbes na talagang mamuhay sono sa saiyang Tataramon.​—2 Timoteo 3:5.

13. Anong klase nin mga atang an idinodolot niato, alagad ano an maninigong girumdomon manongod sa halaga kaiyan?

¹³ Bilang tunay na mga Kristiano, ginigirumdom niato na bako sana an mismong mga atang an nakakapaogma sa Dios. Totoo na dai kita nagdodolot nin mga atang na hayop ki Jehova. Minsan siring, kita talagang ‘nagdodolot sa Dios nin atang nin pag-omaw, na iyo, an bunga nin mga ngabil na nagpapahayag sa publiko kan saiyang ngaran.’ (Hebreo 13:15) Mahalagang marhay na dai kita magin arog kan makasalan na mga Israelita kan kaaldawan ni Oseas, na naghohona na mababayadan niato an maraot na gibo paagi sa pagdolot kan siring na espirituwal na mga atang sa Dios. Estudyare an halimbawa nin sarong hoben na patagong naggigibo nin seksuwal na inmoralidad. Inadmitir nia kan huri: “Dinagdagan ko an sakong ministeryo sa langtad, sa paghona na minsan paano matatahoban kaini an sala ko.” Siring kaiyan an hiningoang gibohon kan sumbikalan na mga Israelita. Minsan siring, inaako sana ni Jehova an satong atang nin pag-omaw kun iyan iniibanan nin tamang motibasyon nin puso asin diosnon na paggawe.

 Nakokolgan si Jehova Kun Binabayaan Sia kan Saiyang mga Parasamba

14. Ano an ihinahayag kan hula ni Oseas manongod sa mga pagmate nin Dios?

¹⁴ An ikatolong leksion na manonodan niato sa Oseas kapitulo 6 sagkod 9 iyo an mapadapit sa kun ano an namamatean ni Jehova kun minatalikod sa saiya an saiyang mga parasamba. An Dios igwa nin makosog sagkod mamomoton na mga pagmate. Igwa sia nin mamomoton na mga pagmate nin kagayagayahan asin pagmalasakit sa mga nagsosolsol sa saindang mga kasalan. Pero, kun habong magsolsol an saiyang banwaan, naggigibo sia nin mapuersa asin desididong aksion. Huling an Dios may odok na pagmakolog para sa kapakanan niato, naggagayagaya sia kun kita maimbod na naglalakaw sa kaibanan nia. “Si Jehova nawiwili sa saiyang banwaan,” an sabi kan Salmo 149:4. Pero, ano an namamatean nin Dios kun bakong maimbod an saiyang mga lingkod?

15. Oyon sa Oseas 6:​7, paano guminawe an nagkapirang Israelita?

¹⁵ Sa pagtaram manongod sa bakong maimbod na mga Israelita, sinabi ni Jehova: “Sinda mismo, arog nin daganon na tawo, naglapas sa tipan. Dian sinda nagtraydor sa sako.” (Oseas 6:7) An termino sa Hebreo na trinadusir na ‘pagtraydor’ nangangahulogan man nin “pandadaya, pagigin bakong maimbod.” Sa Malaquias 2:10-16, ginamit an iyo man sanang termino sa Hebreo tanganing iladawan an bakong maimbod na paggawe kan mga Israelitang idto na bakong maimbod sa saindang agom. Mapadapit sa paggamit kan terminong ini sa Oseas 6:​7, sinasabi nin sarong reperensia na iyan “sarong piguratibong pananaram dapit sa pag-agoman na nagpapangyaring magkaigwa nin personal na mga kualidad an relasyon . . . Personal na relasyon iyan na kun saen linapas an pagkamoot.”

16, 17. (a) Paano guminawe an Israel may koneksion sa pakipagtipan nin Dios sa nasyon na iyan? (b) Ano an maninigong girumdomon niato mapadapit sa satong mga gawe?

¹⁶ Minansay ni Jehova an Israel bilang saiyang piguratibong agom na babae huli sa saiyang pakipagtipan sa nasyon. Kaya kan lapason kan saiyang banwaan an mga kondisyon kan tipan na iyan, garo man sana sinda nagsambay. An Dios siring sa sarong maimbod na agom na lalaki, alagad binayaan sia kan saiyang banwaan!

¹⁷ Kumusta man kita? Interesado an Dios kun baga kita naglalakaw sa kaibanan nia o dai. Marahay na girumdomon niato na “an Dios pagkamoot” asin na an satong mga ginigibo nakakaapektar sa saiya. (1 Juan 4:16) Kun mapadagos kita sa salang paggawe, posibleng makolgan niato an boot ni  Jehova asin siertong maaanggot sia. An paggirumdom niato kaini puedeng magin mapuersang pan-olang na dai kita magpadaog sa sugot.

Kun Paano Kita Mag-aani nin Marahay

18, 19. Anong prinsipyo an maheheling niato sa Oseas 8:​7, asin paano nagkatotoo an prinsipyong iyan sa mga Israelita?

¹⁸ Pag-olayan niato an ikaapat na leksion sa hula ni Oseas​—kun paano kita mag-aani nin marahay. Mapadapit sa mga Israelita saka sa kabalisngagan asin pagkadaing kamanungdanan kan saindang pagigin daing pagtubod, si Oseas nagsurat: “Nagsasarabwag sinda nin doros, asin doros nin bagyo an saindang aanihon.” (Oseas 8:7) Digdi maheheling niato an sarong prinsipyo na marahay na tandaan niato: May direktang koneksion kun ano an ginigibo niato ngonyan asin kun ano an mangyayari sa sato sa huri. Paano nagin totoo an prinsipyong ini sa kamugtakan kan bakong maimbod na mga Israelita?

¹⁹ Paagi sa paggibo nin kasalan, an mga Israelitang idto nagtatanom nin maraot. Padagos daw na magigibo ninda iyan na dai mag-aani nin maraot na mga resulta? Sierto na dai ninda madudulagan an bakong paborableng paghokom. An Oseas 8:13 nagsasabi: “Gigirumdomon nia [ni Jehova] an saindang sala asin maniningil huli sa saindang mga kasalan.” Asin sa Oseas 9:​17, satong mababasa: “Isisikwal sinda kan sakong Dios, huli ta dai sinda naghinanyog sa saiya, asin sinda magigin mga dulag sa tahaw nin mga nasyon.” Sisingilon ni Jehova an mga Israelita sa saindang mga kasalan. Huling nagtanom sinda nin maraot, maraot man an aanihon ninda. Ginibo an paghokom nin Dios tumang sa sainda kan 740 B.C.E., kan ibagsak kan mga Asirio an sampulong tribong kahadean nin Israel asin dinarang bihag an mga nag-eerok dian.

20. Ano an itinotokdo sa sato kan inagihan kan mga Israelita?

²⁰ An inagihan kan mga Israelitang idto nagtotokdo sato nin pundamental na katotoohan: Aanihon niato kun ano an satong itinanom. An Tataramon nin Dios nagpapatanid sa sato: “Dai kamo palagalag: An Dios dai maoolog-olog. Huli ta ano man an itinatanom nin tawo, ini man an saiyang aanihon.” (Galacia 6:7) Kun nagtatanom kita nin maraot, maraot man an aanihon niato. Halimbawa, an mga namumuhay nin inmoral mag-aani nin mapait na mga resulta. Magkakaigwa nin mamondong resulta para sa habong magsolsol na paragibo nin maraot.

21. Paano kita mag-aani nin marahay?

²¹ Kun siring, paano kita mag-aani nin marahay? Puedeng simbagon an hapot na iyan paagi sa sarong simpleng ilustrasyon. Kun gusto nin sarong paraoma na mag-ani nin paroy, trigo daw an itatanom nia? Siempre bako! Dapat siang magtanom kan gusto niang anihon. Kaagid kaiyan, kun gusto niatong mag-ani nin marahay, dapat man kitang magtanom nin marahay. Gusto daw nindong padagos na mag-ani nin marahay​—sarong nakakakontentong buhay ngonyan na may paglaom na mabuhay na daing katapusan sa bagong kinaban nin Dios? Kun siring, dapat na padagos kamong magtanom nin marahay paagi sa paglakaw sa kaibanan nin Dios asin pamumuhay kaoyon kan saiyang matanos na mga pamantayan.

22. Anong mga leksion an satong nanodan poon sa Oseas kapitulo 6 sagkod 9?

²² Poon sa Oseas kapitulo 6 sagkod 9, nanodan niato an apat na leksion na makakatabang sato na maglakaw sa kaibanan nin Dios: (1) An tunay na pagsolsol ipinapaheling paagi sa mga gibo; (2) bako sana an mismong mga atang an nakakapaogma sa Dios; (3) nakokolgan an boot ni Jehova kun minatalikod sa saiya an saiyang mga parasamba; asin (4) tanganing mag-ani nin marahay, dapat na marahay man an satong itanom. Paano daw kita matatabangan kan ultimong limang kapitulo kan librong ini sa Biblia na maglakaw sa kaibanan nin Dios?

Ano an Isisimbag Nindo?

• Paano ipinapaheling an tunay na pagsolsol?

• Taano ta bako sana an mismong mga atang an nakakapaogma sa satong langitnon na Ama?

• Ano an namamatean nin Dios kun binabayaan sia kan saiyang mga parasamba?

• Ano an dapat niatong itanom kun gusto niatong mag-ani nin marahay?

[Mga Hapot Para sa Pag-adal]

[Ritrato sa pahina 23]

Siring sa mga panganoron sa kaagahon, nawara an maimbod na pagkamoot kan Israel

[Ritrato sa pahina 23]

An salang mga pagmawot kan Israel naglaad siring sa sarong horno

[Ritrato sa pahina 24]

Taano ta isinikwal ni Jehova an mga atang kan saiyang banwaan?

[Ritrato sa pahina 25]

Tanganing mag-ani nin marahay, dapat na marahay man an satong itanom