Totoo daw an Diablo?

ANO an pagheling nindo sa Diablo? Iniisip daw nindo na sia sarong totoong persona na nagtetentar sa mga tawo na gumibo nin maraot na mga bagay, o sia daw nagrerepresentar sana sa ideya nin karatan? An Diablo daw dapat na katakotan, o maninigo daw na sabihon na sia saro sanang superstisyosong ideya o sarong mitolohikong eroestorya? An termino daw na “diablo” nanonongod sa sarong teoretiko asin mapanlaglag na puersa sa uniberso? An termino daw na iyan saro sanang simbolo kan maraot na mga karakteristiko sa mga tawo, siring kan hinihingako kan dakol na teologo sa presenteng panahon?

Bakong makangangalas na an katawohan laen-laen an opinyon sa hapot na kun siisay an Diablo. Imahinara kun gurano kadepisil na maaraman kun siisay man nanggad an saro na eksperto sa pagbalatkayo! Partikularmenteng totoo iyan kun determinado siang padagos na magtago sa likod nin maskara. Ilinaladawan kan Biblia an Diablo na may siring kaiyan na personalidad. Inaapod sia na Satanas, iyan nagsasabi: “Si Satanas pirmeng nagmamalemale na anghel nin liwanag.” (2 Corinto 11:14) Minsan ngani sia maraot, nagsasaginsagin an Diablo na sia marahay tanganing dayaon an iba. Asin kun mapatubod nia an mga tawo na sia talagang dai nag-eeksister, lalo pa nganing pabor iyan sa saiyang katuyohan.

Kun siring, siisay talaga an Diablo? Kasuarin asin paano sia nag-eksister? Paano nia iniimpluwensiahan an katawohan ngonyan? Ano an puede niatong gibohon, kun igwa man, tanganing labanan an impluwensiang iyan? Yaon sa Biblia an eksaktong kasaysayan kan Diablo poon sa mismong kapinonan nia asin nagtatao iyan nin totoong simbag sa mga hapot na ini.

[Ritrato sa pahina 3]

Depisil nanggad na sabihon kun siisay an saro na determinadong padagos na magtago sa likod nin maskara!