“Good News for People of All Nations”

AN NASA itaas sarong pulyeto na ilinuwas sa 2004/05 na “Maglakaw sa Kaibanan nin Dios” na mga Pandistritong Kombension kan Mga Saksi ni Jehova. An sarong edisyon kaiyan iyo an 96 na pahinang pulyeto na may halipot na mensahe sa 92 na lenguahe, poon sa Aprikano sagkod sa Zulu, asin dinisenyo tanganing makatabang sa pagpalakop kan maogmang bareta kan Kahadean sa pinakadakol na tawo sagkod sa mapupuede. (Mateo 24:14) An minasunod iyo an tipikong resulta kun ginagamit an pulyeto.

• Pakaresibi kan pulyeto sa kombension, sarong pamilyang Saksi an nagbisita sa tolong nasyonal na parke. Duman nakamidbid ninda an mga tawong hale sa India, Netherlands, Pakistan, asin Pilipinas. An agom na lalaki nagkomento: “Minsan ngani gabos sinda nakakataram nin kadikit na Ingles, nagulat sinda kan ipaheling mi sa sainda an mensahe sa sadiri nindang lenguahe, mantang sinda harayong marhay sa saindang sadiring lugar. Nagin malinaw sa sainda na pambilog na kinaban an satong gibohon saka may pagkasararo kita.”

• Ipinaheling nin sarong Saksi an pulyeto sa sarong katrabaho na hale sa India. Ogmahon sia kan maheling an gabos na lenguahe na yaon dian asin binasa an mensahe na nasa sadiri niang lenguahe. Nagbunga ini nin dugang pang pag-oolay manongod sa Biblia. Napangalas an sarong katrabaho hale sa Pilipinas kan maheling an saiyang lenguahe sa pulyeto asin nagkainteres ini na makanood nin orog pa manongod sa Mga Saksi ni Jehova.

• Sa Canada, sarong babaeng hale sa Nepal an uminoyon na makipag-adal kan Biblia sa sarong Saksi paagi sa telepono alagad nagduduwaduwang imbitaran an tugang na babae sa saiyang harong. Minsan siring, kan sinabi kan Saksi sa babae an manongod sa pulyeto na may mensahe sa Nepali, ogmahon na inimbitaran nia an tugang na dumanan sia. Gusto nia nanggad na maheling mismo an mensahe sa saiyang nagimatan na lenguahe! Poon kaidto an pag-adal sa Biblia ginigibo na sa harong kan babae.