Pagigin Progresibo Asin Madaling Makibagay na mga Ministro
Pagigin Progresibo Asin Madaling Makibagay na mga Ministro
“Ako nagin gabos na bagay sa gabos na klase nin tawo, tanganing sa gabos na paagi ikaligtas ko an nagkapira.”—1 CORINTO 9:22.
1, 2. (a) Sa anong mga paagi na si apostol Pablo sarong epektibong ministro? (b) Paano ilinadawan ni Pablo an saiya mismong aktitud sa saiyang asignasyon?
PAMUGTAK an boot nia sa eksperyensiadong mga intelektuwal asin sa hamak na mga paragibo nin tolda. Matibay siang mangombensir sa mga dignitaryong Romano asin sa mga paraomang Frigiano. An saiyang mga surat nakakamotibar sa liberal na mga Griego asin sa konserbatibong mga Judio. An saiyang lohika dai mapapahimutikan mantang mapuersa an saiyang pan-akit sa emosyon. Pinagmaigotan niang makakua nin puntong pagkakaoyonan nia asin kan gabos niang kaolay tanganing madara nia an nagkapira ki Cristo.—Gibo 20:21.
2 An lalaking iyan iyo si apostol Pablo, na daing duwa-duwa na sarong epektibo asin progresibong ministro. (1 Timoteo 1:12) Inako nia ki Jesus an sugo na ‘magdara kan ngaran ni Cristo sa mga nasyon saka sa mga hade asin mga aki ni Israel.’ (Gibo 9:15) Ano an nagin aktitud nia sa asignasyon na ini? Sinabi nia: “Ako nagin gabos na bagay sa gabos na klase nin tawo, tanganing sa gabos na paagi ikaligtas ko an nagkapira. Alagad ta ginigibo ko an gabos na bagay para sa kapakanan kan maogmang bareta, tanganing ikapaabot ko iyan sa iba.” (1 Corinto 9:19-23) Ano an manonodan niato sa halimbawa ni Pablo na makakatabang sa sato na magin orog na epektibo sa satong paghuhulit asin pagtotokdo?
Inatubang nin Sarong Naliwat na Tawo an Angat
3. Ano an saboot ni Pablo sa mga Kristiano bago sia nakombertir?
3 Si Pablo daw kaidto pa saro nang tawong may pakatios asin makonsiderasyon, na angay para sa asignasyon na inako nia? Bako nanggad! Dahelan sa relihiosong panatisismo, si Saulo (na dating apod ki Pablo) nagin sarong madahas na paralamag kan mga parasunod ni Cristo. Kan hoben pa, inoyonan nia an paggadan ki Esteban. Dai nahaloy, daing herak na hinanap ni Pablo an mga Kristiano. (Gibo 7:58; 8:1, 3; 1 Timoteo 1:13) Nagpadagos sia sa pagtaram nin “huma asin paggadan tumang sa mga disipulo kan Kagurangnan.” Huling bakong kontento sa paghanap sa mga nagtutubod na yaon sana sa Jerusalem, pinonan niang palakopon an saiyang kampanya nin pagkaongis sagkod sa amihanan sa Damasco.—Gibo 9:1, 2.
4. Anong pagliliwat an kinaipuhan na gibohon ni Pablo tanganing otobon an saiyang asignasyon?
4 Posibleng marhay na an pinakadahelan kan grabeng pagkaongis ni Pablo sa Kristianismo iyo an makosog na paniniwala na raraoton kan bagong pagtubod an Judaismo ta masasalakan iyan nin iba asin bakong marahay na mga ideya. Total, si Pablo dating “sarong Fariseo,” na an mismong ngaran nangangahulogan “isiniblag.” (Gibo 23:6) Imahinara an seguradong pagkabigla ni Pablo kan saiyang maaraman na pinili sia nin Dios na ihulit si Cristo sa—sa gabos na puedeng hulitan—mga Hentil pa! (Gibo 22:14, 15; 26:16-18) Tara, an mga Fariseo habong makikakan man lamang sa mga ibinibilang nindang parakasala! (Lucas 7:36-39) Daing duwa-duwa na nangaipo sia nin dakulang paghihingoa tanganing horophoropon giraray an saiyang punto de vista asin ioyon iyan sa kabotan nin Dios na an gabos na klase nin tawo maligtas.—Galacia 1:13-17.
5. Paano niato maaarog si Pablo sa satong ministeryo?
5 Tibaad kaipuhan man niatong gibohon iyan. Mantang nanunuparan niato an nagdadakol na manlaenlaen na tawo sa satong langtad na hale sa dakol na nasyon asin lenguahe, kaipuhan na gumibo kita nin maigot na paghihingoa na siyasaton an satong aktitud asin haleon sa satong sadiri an ano man na salang paghusgar sa mga tawo. (Efeso 4:22-24) Baga man narerealisar niato o dai, naiimpluwensiahan kita kan sosyal asin edukasyonal na pagpadakula sa sato. Ikakatadom kaini sa sato an may kinakampihan, salang paghusgar, asin dai mababagong mga punto de vista asin aktitud. Dapat na mahale niato an siring na mga saboot kun gusto niatong magin mapanggana sa paghanap asin pagtabang sa arog-karnerong mga tawo. (Roma 15:7) Iyan an ginibo ni Pablo. Inako nia an angat na pahiwason an saiyang ministeryo. Huling motibado nin pagkamoot, pinatalubo nia an mga abilidad sa pagtotokdo na maninigo na arogon. Sa katunayan, an pag-adal sa ministeryo kan “apostol sa mga nasyon” nagpapaheling na isinasaisip nia an saiyang kaolay, sia madaling makibagay, asin mapamaagi sa paghuhulit asin pagtotokdo. *—Roma 11:13.
Sarong Progresibong Ministro na Naggigibo
6. Paano isinaisip ni Pablo an pinaghalean kan mga naghihinanyog sa saiya, asin ano an nagin resulta?
6 Isinasaisip ni Pablo an mga paniniwala asin pinaghalean kan mga naghihinanyog sa saiya. Kan kinakaolay si Hadeng Agripa II, rinekonoser ni Pablo na an hade “eksperto sa gabos na kostumbre saka sa mga kontrobersia sa tahaw nin mga Judio.” Dangan may pagkaekspertong ginamit ni Pablo an saiyang kaaraman manongod sa mga paniniwala ni Agripa asin ipinakipag-olay sa saiya an mga bagay na nasasabotan na marhay kan hade. Naheling nanggad an pagkaklaro asin kombiksion kan pangangatanosan ni Pablo kaya nagsabi si Agripa: “Sa halipot na panahon makokombensir mo akong magin Kristiano.”—Gibo 26:2, 3, 27, 28.
7. Paano ipinaheling ni Pablo an pagigin madaling makibagay kan naghuhulit sa sarong kadaklan sa Listra?
7 Madali man na makibagay si Pablo. Mangnoha kun paano napapalaen an nagin pamamaagi nia kan pagmaigotan niang pogolan an sarong kadaklan sa siudad nin Listra sa pagsamba sa saiya asin ki Bernabe bilang mga dios. Sinasabi na an mga tawong ini, na nagtataram nin Licaoniano, kabilang sa mga kulang an inadalan asin mas superstisyoso sa mga tawo duman. Oyon sa Gibo 14:14-18, itinokdo ni Pablo an mga linalang asin an abundansia sa naturalesa bilang ebidensia kan pagigin nakakalabi kan tunay na Dios. Pasil na masundan an argumento, asin minalataw na “napogolan [kaiyan] an mga kadaklan sa pag-atang” ki Pablo asin Bernabe.
8. Sa anong mga paagi ipinaheling ni Pablo na madali siang makibagay apisar na kun beses makosog an saiyang mga saboot?
8 Siempre, bakong sangkap si Pablo, asin kun beses, sia may makosog na mga saboot manongod sa nagkapirang bagay. Halimbawa, sa sarong pangyayari kan sia atakehon sa makasusupog asin bakong makatanosan na paagi, bigla siang nakapagtaram nin malanit tumang sa sarong Judio na an ngaran Ananias. Alagad kan sinabihan si Pablo na nainsulto nia nin dai tinutuyo an halangkaw na saserdote, tolos-tolos siang naghagad nin dispensasyon. (Gibo 23:1-5) Sa Atenas, kan primero “nasumo [sia] sa pakaheling na an siudad pano nin idolo.” Pero, sa saiyang diskurso sa Bulod ni Marte, dai ipinaheling ni Pablo an siring na pagkasumo. Imbes, kinaolay nia an mga taga Atenas sa saindang pampublikong tiriponan, na ginagamit na basehan an puntong pinagkakaoyonan paagi sa pagsambit sa saindang altar na “Sa Dios na Dai Midbid” asin pagsambit sa saro kan saindang mga poeta.—Gibo 17:16-28.
9. Paano ipinaheling ni Pablo an pagkamapamaagi sa pagtratar nia sa manlaenlaen na nagdadangog?
9 Sa pagtratar sa manlaenlaen na nagdadangog, nagpaheling si Pablo nin pambihirang pagkamapamaagi. Kinonsiderar nia an kultura asin mga kamugtakan na nakaimpluwensia sa kaisipan kan mga nagdadangog sa saiya. Kan sia sumurat sa mga Kristiano sa Roma, aram niang marhay na nag-iistar sinda sa kabisera kan pinakadakulang politikal na kapangyarihan kan panahon na idto. An mayor na punto kan surat ni Pablo sa mga Kristiano sa Roma iyo na an kapangyarihan kan kasalan ni Adan na manraot nadaog na kan kapangyarihan ni Cristo na mambalukat. Nagtaram sia sa mga Kristiano sa Roma asin sa mga nasa palibot ninda sa lenguahe na makakaakit sa saindang puso.—Roma 1:4; 5:14, 15.
10, 11. Paano ibinagay ni Pablo an saiyang mga ilustrasyon sa mga naghihinanyog sa saiya? (Helingon man an nota sa ibaba.)
10 Ano an ginigibo ni Pablo kun gusto niang ipaliwanag sa mga naghihinanyog sa saiya an hararom na mga katotoohan sa Biblia? Eksperto an apostol sa paggamit nin pamilyar, madaling masabotan na mga ilustrasyon tanganing linawon an komplikadong espirituwal na mga ideya. Halimbawa, aram ni Pablo na aram na marhay kan mga tawo sa Roma an sistema nin pan-ooripon sa bilog na Imperyo nin Roma. Sa katunayan, kadaklan kan mga tawo na sinusuratan nia tibaad mga oripon. Kun siring, ginamit ni Pablo an pan-ooripon bilang ilustrasyon na masuportar sa mapuersa niang argumento manongod sa pagpili nin saro nin papasakopan magsalang sa kasalan o sa katanosan.—Roma 6:16-20.
11 “Sa mga Romano,” an sabi nin sarong reperensia, “puedeng lubos na patalingkason kan kagsadiri an sarong oripon, o puedeng bakalon kan oripon an saiyang katalingkasan paagi sa pagbayad sa kagsadiri sa saiya. Puede man na iareglo an katalingkasan kun an pagigin kagsadiri ibinalyo sa sarong dios.” An pinatalingkas na oripon puedeng padagos na magtrabaho sa saiyang kagurangnan na may bayad. Minalataw na an kaugalean na ini an pinapanongdan ni Pablo kan sia magsurat manongod sa pagpili nin indibiduwal kun arin na kagurangnan an kukuyogon—kasalan o katanosan. Pinatalingkas na sa kasalan an mga Kristiano sa Roma asin sadiri na sinda ngonyan nin Dios. Talingkas na sindang maglingkod sa Dios, pero puede pa giraray na pilion nindang maglingkod sa kasalan—an dating kagurangnan—kun iyan an gusto ninda. An simple alagad pamilyar na ilustrasyon na iyan magpapahiro sa mga Kristianong idto sa Roma na hapoton an saindang sadiri, ‘Arin na kagurangnan an pinaglilingkodan ko?’ *
Pakanood sa Halimbawa ni Pablo
12, 13. (a) Anong paghihingoa an kaipuhan ngonyan tanganing aboton an puso kan laen-laen na nagdadangog sa sato? (b) Ano an napatunayan nindong epektibo kun naghuhulit sa mga tawo na laen-laen an pinaghalean?
12 Kapareho ni Pablo, dapat niatong isaisip an satong kaolay, magin madaling makibagay, asin mapamaagi tanganing aboton an puso kan laen-laen na
nagdadangog sa sato. Tanganing matabangan an mga naghihinanyog sa sato na masabotan an maogmang bareta, mawot niato na gumibo nin labi pa sa basta sana pagdalaw, pagtao nin nakaandam nang mensahe, o pagwalat nin nagkapirang literatura sa Biblia. Hinihingoa niato na saboton an saindang mga pangangaipo asin ikinakahadit, an saindang mga gusto asin dai gusto, asin an saindang mga ikinakatakot asin salang paghusgar. Minsan ngani nangangaipo ini nin dakulang paghorophorop asin paghihingoa, galagang ginigibo iyan kan mga parahayag kan Kahadean sa bilog na kinaban. Halimbawa, an sangang opisina kan Mga Saksi ni Jehova sa Hungaria nagbabareta: “Ipinapaheling kan mga tugang an paggalang sa mga kostumbre asin estilo nin pamumuhay kan mga taga ibang nasyon asin dai ninda sinda inaasahan na makibagay sa lokal na mga kostumbre.” An mga Saksi sa iba pang lugar naghihingoang gibohon man iyan.13 Sa sarong nasyon sa Harayong Sirangan, an kadaklan na tawo interesado sa salud, pagsasanay sa aki, asin edukasyon. An mga parahayag kan Kahadean duman nagmamaigot na itampok an mga temang ini imbes na ipakipag-olay an mga tema na siring kan naggagrabeng mga kamugtakan sa bilog na globo o komplikadong sosyal na mga isyu. Kaagid kaiyan, narisa kan mga parahayag sa sarong dakulang siudad sa Estados Unidos na an mga tawo sa sarong partikular na lugar sa saindang teritoryo interesado sa mga tema na arog kan karatan sa gobyerno, pagigin matrapik, asin krimen. Mapangganang ginagamit kan mga Saksi an mga temang ini tanganing ponan an mga pag-orolay sa Biblia. Sinesegurado kan epektibong mga paratokdo sa Biblia na ano man na topiko an saindang pilion, magdadanay sindang positibo asin nakakaparigon sa boot, na idinodoon an praktikal na halaga kan pag-aplikar kan mga prinsipyo sa Biblia ngonyan asin an maogmang paglaom na inaalok nin Dios para sa ngapit.—Isaias 48:17, 18; 52:7.
14. Sabihon kun ano an mga paagi na puede kitang makibagay sa magkakalaen na pangangaipo asin kamugtakan nin mga tawo.
14 Nakakatabang man an paggamit niato nin laen-laen na pamamaagi sa ministeryo, ta an mga tawo may laen-laen na marhay na kultura, edukasyon, asin relihion. An pamamaagi niato nin pakipag-olay sa mga tawo na naniniwala sa sarong Kaglalang pero sa Biblia dai iba man sa ginagamit niatong pakikipag-olay sa mga naniniwalang mayo nin Dios. Sa sarong tawo na naniniwala na an gabos na relihiosong literatura ginagamit sa pagdoktrina, an presentasyon na ginagamit niato laen man sa ginagamit niato sa saro na nagtutubod sa itinotokdo kan Biblia. Kaipuhan man an pagigin madaling makibagay sa pagtratar sa laen-laen na marhay na naabot na edukasyon kan mga tawo na kinakaolay niato. Gagamiton nin ekspertong mga paratokdo an pangangatanosan asin mga ilustrasyon na angay sa naabotan na situwasyon.—1 Juan 5:20.
Tabang Para sa Bagong mga Ministro
15, 16. Taano ta igwa nin pangangaipo na sanayon an bagong mga ministro?
15 Si Pablo bako sanang interesado sa pagpaoswag kan sadiri niang mga paagi nin pagtotokdo. Naheling nia an pangangaipong sanayon asin andamon idtong hoben pang henerasyon, arog ni Timoteo asin Tito, na magin epektibong mga ministro. (2 Timoteo 2:2; 3:10, 14; Tito 1:4) Kaagid kaiyan, igwa ngonyan nin dakulang pangangaipo na magtao asin mag-ako nin pagsasanay.
16 Kan 1914, igwa nin mga 5,000 na parahayag kan Kahadean sa bilog na daga; ngonyan, kada semana mga 5,000 na bagohan an nababautismohan! (Isaias 54:2, 3; Gibo 11:21) Kun an mga bagohan magpoon nang makiasosyar sa Kristianong kongregasyon asin gusto nang umiba sa ministeryo, kaipuhan ninda an pagsasanay asin paggiya. (Galacia 6:6) Mahalagang marhay na gamiton niato an mga pamamaagi kan Kagurangnan, si Jesus, sa pagtotokdo asin pagsasanay sa mga disipulo. *
17, 18. Paano niato matatabangan an mga bagohan na magkaigwa nin kompiansa sa ministeryo?
17 Dai sana hinanap ni Jesus an kadaklan asin sinabihan an saiyang mga apostol na pumoon sa pakikipag-olay. Idinoon nguna nia na kaipuhan an paghuhulit asin dinagka an pamimibi para sa tabang nin Dios. Dangan ginibo nia an tolong pundamental na probisyon: sarong kapartner, sarong asignadong teritoryo, asin sarong mensahe. (Mateo 9:35-38; 10:5-7; Marcos 6:7; Lucas 9:2, 6) Magigibo man niato iyan. Baga man an satong tinatabangan mismong aki niato, sarong bagong inaadalan sa Biblia, o saro na dai nakapakikabtang sa paghuhulit sa halipot na panahon, angay na gumibo nin paghihingoa na tumao nin pagsasanay sa paaging ini.
18 Kaipuhan nin mga bagohan an darudakulang tabang tanganing magkaigwa nin kompiansa sa pag-atubang kan mensahe kan Kahadean. Matatabangan daw nindo sinda na mag-andam asin magpraktis nin sarong simple asin kawiliwiling presentasyon? Sa langtad, pahelingan sinda nin halimbawa nindo tanganing makanood mantang kamo an nakikipag-olay sa enot na nagkapirang harong. Puede nindong arogon an halimbawa ni Gedeon, na nagsabi sa kapwa nia mga parapakilaban: “Makanood kamo sa pagmamasid sa sako, asin iyan an maninigong gibohon nindo.” (Hokom 7:17) Dangan tawan an bagohan nin oportunidad na magpartisipar. Maogmang komendaran an mga bagohan sa saindang mga paghihingoa, asin kun angay, tumao nin halipot na mga suhestion para sa pag-oswag.
19. Ano an saindong determinasyon mantang nagmamaigot kamo na ‘lubos na maotob an saindong ministeryo’?
19 Tanganing ‘lubos niatong maotob an satong ministeryo,’ determinado kitang magin mas madaling makibagay sa satong pamamaagi, asin gusto niatong sanayon an bagong mga ministro na gibohon man iyan. Kun ineestudyaran niato an importansia kan satong pasohan—an pagpaabot kan mismong kaaraman nin Dios na naggigiya sa kaligtasan—kombensido kita na bawi an gabos na ginibo niatong paghihingoa na magin “gabos na bagay sa gabos na klase nin tawo, tanganing sa gabos na paagi ikaligtas [niato] an nagkapira.”—2 Timoteo 4:5; 1 Corinto 9:22.
[Mga Nota sa Ibaba]
^ par. 5 Para sa mga halimbawa kan siring na mga kualidad sa ministeryo ni Pablo, estudyare an Gibo 13:9, 16-42; 17:2-4; 18:1-4; 19:11-20; 20:34; Roma 10:11-15; 2 Corinto 6:11-13.
^ par. 11 Kaagid kaiyan, sa pagpaliwanag sa bagong relasyon sa pag-oltanan nin Dios asin kan saiyang linahidan nin espiritung “mga aki,” naggamit si Pablo nin legal na konsepto na medyo pamilyar sa saiyang mga parabasa sa Imperyo nin Roma. (Roma 8:14-17) “An pag-ampon sa pundamental sarong Romanong kostumbre, asin konektadong marhay sa Romanong ideya nin pamilya,” an sabi kan librong St. Paul at Rome.
^ par. 16 Sa presente, gabos na kongregasyon kan Mga Saksi ni Jehova igwa kan programang An mga Payunir Nagtatabang sa Iba. Ginagamit kan programa an eksperyensia asin pagsasanay kan bilog na panahon na mga ministro sa pagtabang sa mga parahayag na kulang pa an kabatidan.
Nagigirumdoman daw Nindo?
• Sa anong mga paagi niato maaarog si Pablo sa satong ministeryo?
• Anong mga pagbabago sa satong kaisipan an tibaad kaipuhan?
• Paano niato mapagdadanay na positibo an satong mensahe?
• Ano an kaipuhan kan bagong mga ministro tanganing magkaigwa nin kompiansa?
[Mga Hapot Para sa Pag-adal]
[Blurb sa pahina 29]
Isinasaisip ni apostol Pablo an saiyang kaolay, sia madaling makibagay, asin mapamaagi sa paghuhulit asin pagtotokdo
[Blurb sa pahina 31]
Naggibo si Jesus nin tolong pundamental na probisyon para sa saiyang mga disipulo: sarong kapartner, sarong asignadong teritoryo, asin sarong mensahe
[Mga Ritrato sa pahina 28]
Nagin mapanggana si Pablo sa pag-abot sa laen-laen na nagdadangog paagi sa pagigin madaling makibagay
[Ritrato sa pahina 30]
Kinokonsiderar nin epektibong mga ministro an pinaghalean na kultura kan mga naghihinanyog sa sainda
[Ritrato sa pahina 31]
Tinatabangan nin progresibong mga ministro an mga bagohan na mag-andam para sa ministeryo