Sarong Patotoo sa Pagkamoot, Pagtubod, Asin Pagkuyog

AN AGA nin Mayo 16, 2005 presko asin masaldang sa Watchtower Farms sa Wallkill, Nueva York. An magayonon an pagkahawan na mga natad asin an mga masitas naglilinanglinang huli sa oran bago mag-aagahon. An sarong pato kaiba an walong siyo kaiyan naglalangoylangoy nin trangkilo sa toninong na tubig harani sa gilid kan danaw-danaw. Napapangalas sa gayon an mga bisita. Maluway sana an erestoryahan ninda, na garo baga habong istorbohon an katrangkilohan kan aga.

Mga Saksi ni Jehova an mga bisita na naggikan sa 48 nasyon sa bilog na kinaban. Alagad dai sinda nag-abot tanganing helingon an tanawon. Sinda interesado sa nangyayari sa laog nin mahiwas na edipisyo na gibo sa ladrilyo, na pinakabagong idinagdag sa Bethel sa Estados Unidos na yaon sa Wallkill. Sa laog kan edipisyong iyan, sinda napangalas giraray, minsan ngani an palibot bakong silensio ni trangkilo.

Gikan sa sarong entresuelo, nadungawan kan mga bisita an kadakoldakol na makina. Okupado kan limang dakulaon na makinang pang-imprenta an makintab, konkretong salog na mas mahiwas pa kisa sa siyam na pinagkakawatan nin putbol. Digdi iniimprenta an mga Biblia, libro, asin magasin. An dakulaon na mga rolyo nin papel, na an kada saro may timbang na 1,700 kilos, nag-iitok siring sa mga rueda nin marikason na trak. An kada rolyo nin papel na 23 kilometros an laba nababadbad asin nag-aagi sa makinang pang-imprenta sa laog sana nin 25 minutos. Sa laog kan panahon na iyan, an makina nag-iimprenta saka pinapamara an tinta asin pinapalipot an papel tanganing iyan matiklop na magin mga magasin na marikas na dinadara nin mga transportador na nasa itaas tanganing ilaag sa kahon asin ipaktora pasiring sa mga kongregasyon. An ibang makina sibot sa pag-imprenta nin mga signatura nin libro, na marikas na ibinabalyo sa sarong sarayan na lugar na an langkaw poon sa salog sagkod sa kisame sagkod na darahon an mga ini sa gibohan nin libro. An bilog na operasyon eksaktong-eksakto  an dalagan na dinidirehiran nin komputer.

Paghale sa lugar nin pag-imprenta, nagpasyar an mga bisita sa gibohan nin libro. Digdi an mga makina nagpoprodusir nin mga librong matagas an tutob asin deluxe na mga Biblia sa rikas na sagkod sa 50,000 na kopya kada aldaw. An mga signatura nin libro tinitipon sa tamang pagkasunodsunod, pinagkakabitkabit, asin tinatarasan an mga gilid. Dangan ikinakabit an mga tutob. Ilinalaag sa mga karton an suon-suon na mga librong kompleto na. An mga karton automatikong sineserahan, tinatatakan, asin pinagsusuonsuon sa sarong paleta. Saro pa, an sarong linya nin operasyon para sa mga librong malugyat an tutob tinitipon asin ilinalaag sa karton an sagkod sa 100,000 na libro kada aldaw. Kadakol man kan makina sa operasyon na ini​—dai mabilang na mga motor, transportador, enggranahe, rueda, asin korea​—​na gabos pambihira an rikas tanganing magprodusir nin literatura sa Biblia.

Nagpupunsionar na arog kaeksakto nin sarong relo na marahay an pagkagibo, an marikason an dalagan, pinakamodernong mga makina kan imprentahan sarong ngangalasan sa modernong teknolohiya. Siring sa maheheling niato, iyan man sarong patotoo sa pagkamoot, pagtubod, asin pagkuyog kan banwaan nin Dios. Pero, taano ta ibinalyo an pag-imprenta hale sa Brooklyn, Nueva York, pasiring sa Wallkill?

An sarong mayor na dahelan gibohon na simple an pag-imprenta asin pagpaktora paagi sa pagsentralisar kan operasyon sa sarong lugar. Sa dakol na taon, an mga libro iniimprenta asin ipinapaktora gikan sa Brooklyn, asin an mga magasin iniimprenta asin ipinapaktora gikan sa Wallkill. Kun pagsasaroon an operasyon, maiinaan an mga nagtatrabaho asin magagamit nin mas marahay an idinusay na mga pondo. Apuera kaini, mantang an mga makinang pang-imprenta sa Brooklyn naluluma na, duwang bagong makinang pang-imprenta na MAN Roland Lithoman an pinedido sa Alemania. An mga makinang ini na pang-imprenta dai magkakaigo sa imprentahan sa Brooklyn.

Sinusuportaran ni Jehova an Gibohon

An katuyohan kan pag-imprenta poon pa kaidto iyo na ilakop an maogmang bareta kan Kahadean nin Dios. Risang-risa na binebendisyonan ni Jehova an gibohon poon sa kapoonpooni. Poon 1879 sagkod 1922, an mga libro inimprenta nin komersial na mga establisimiento sa pag-imprenta. Kan 1922, may inarkilang anom na eskalon na edipisyo sa 18 Concord Street sa Brooklyn asin binakal an mga kasangkapan para sa pag-imprenta nin mga libro. Kan panahon na idto, may mga nagduda kun baga kaya kan mga tugang an gibohon.

Saro sa mga nagduda an presidente kan kompanya na nag-iimprenta kan kadaklan na libro niato. Kan sia dumalaw sa Concord Street, sia nagsabi: “Primera klase an imprentahan nindo, pero mayo ni saro sa saindo na nakakaaram kun ano an gigibohon dian. Sa laog nin anom na bulan ini gabos magkakararaot na; asin marerealisar nindo na an mga tawo na dapat na mag-imprenta para sa saindo iyo an mga dati nang naggigibo kaiyan, asin iyan talaga an trabaho.”

An paraataman sa imprentahan kan panahon na idto, si Robert J. Martin, nagkomento: “Iyan garo lohiko man, alagad ipinuera kaiyan an Kagurangnan; asin sia kaibanan niato sa gabos na panahon. . . . Dai nahaloy kita naggigibo na nin mga libro.” Durante kan suminunod na 80 taon, an mga Saksi ni Jehova nag-imprenta nin binilyon na literatura sa saindang sadiring mga makinang pang-imprenta.

Dangan kan Oktubre 5, 2002, sa taonan na miting kan Watch Tower Bible and Tract Society of Pennsylvania, iinanunsiar na inaprobaran kan Namamahalang Grupo an pagbalyo sa Wallkill kan pag-imprenta kan sangang opisina sa Estados Unidos. Duwang bagong makinang pang-imprenta an pinedido, na maabot sa petsang Pebrero 2004. An mga tugang kaipuhan na gibohan nin plano saka pahiwason an imprentahan asin magin andam na resibihon an bagong mga makinang pang-imprenta sa laog nin 15 bulan. Dangan, an instalasyon kan bagong gibohan nin libro asin pasilidad sa pagpaktora kaipuhan na matapos sa laog kan masunod na siyam na bulan. An nagkapira tibaad nagkaigwa nin  mga pagduda kan madangog ninda an iskedyul​—an gibohon garo baga imposible. Pero, aram kan mga tugang na sa bendisyon ni Jehova, magigibo iyan.

“Maogmang Espiritu nin Kooperasyon”

Sa pakaaram na an banwaan ni Jehova gikan sa boot na magpepresentar kan saindang sadiri, pinonan kan mga tugang an proyekto. (Salmo 110:3) Huli sa kadakulaan kaini, nangaipo nin mas dakol na trabahador kisa sa yaon na sa mga departamento nin pagtogdok sa Bethel. Gikan sa Estados Unidos asin Canada, labing 1,000 tugang na lalaki asin babae na may mga abilidad sa pagtogdok an nagboluntaryo na maglingkod poon sa sarong semana sagkod sa tolong bulan bilang kabtang kan programa nin temporaryong pagboluntaryo. An iba na gikan sa mga programa nin internasyonal na lingkod asin nin pagboluntaryo inimbitaran na makikabtang sa proyekto. Dakula man an ikinontribwir kan mga Rehional na Komite sa Pagtogdok.

Para sa dakol, an pagboboluntaryo para sa proyekto sa Wallkill nangahulogan nin dakulang gastos sa pagbiahe asin sa panahon na sinda mayo sa sekular na trabaho. Alagad, magayagaya nindang ginibo an mga pagsasakripisyong ini. An pagpaistar asin pagpakakan sa dakol na dugang na boluntaryong ini nagtao nin mga oportunidad sa pamilyang Bethel na maghingoa bilang pagsuportar sa proyekto. Labing 535 miembro kan pamilyang Bethel gikan sa Brooklyn, Patterson, asin Wallkill an nagboluntaryong magtrabaho sa proyekto kun Sabado, apuera sa saindang normal na mga asignasyon sa ordinaryong mga aldaw kan semana. An dakulaon na suporta na itinao kan banwaan nin Dios sa historikong paghihingoang ini nagin posible sana huli ta sinuportaran ni Jehova an proyekto.

An iba nagkontribwir sa pinansial. Halimbawa, an mga tugang nakaresibi nin sarong surat gikan sa nuebe anyos na si Abby. Isinurat nia: “Nagpapasalamat po akong marhay sa gabos na ginigibo nindo​—an paggibo kan gabos na marahayon na libro. Tibaad madali na akong makadalaw sa saindo. An sabi ni tatay sa masunod na taon! Itatadik ko po an sakong ngaran tanganing mamidbid nindo ako. Uya an 20 dolyar para sa bagong makinang pang-imprenta! Iyan paragastos ko, alagad gusto ko pong itao iyan sa saindo.”

Sarong tugang na babae an nagsurat: “Akoa tabi nindo an sakong regalo na ginansilyong mga bonete na ginibo kan sadiri kong hamak na mga kamot. Gusto ko na itao an mga boneteng ini sa mga nagtatrabaho sa proyekto sa Wallkill. An sarong almanac nagsabi na magigin malipoton an tiglipot ngonyan. Kun baga tama sinda o bako, dai ko aram. Alagad aram ko na an kadaklan na trabaho sa Wallkill gigibohon sa luwas, asin gusto kong seguradohon na magigin mahimbong pirme an payo kan sakong mga tugang na lalaki asin babae. Mayo ako kan arin man sa mga abilidad na hinahanap kan mga tugang, alagad nakakagansilyo ako, kaya nagdesisyon ako na gamiton an abilidad na ini tanganing makakontribwir kan makakaya ko.” Kalakip an 106 na ginansilyong bonete!

An imprentahan natapos nin tama sa iskedyul. Si John Larson, an paraataman sa imprentahan, nagsabi: “Nagkaigwa nanggad nin maogmang espiritu nin kooperasyon. Siisay an magdududa na binebendisyonan ni Jehova an gibohon? Marikason an nagin dalagan kan mga bagay. Nagigirumdoman ko na kan Mayo 2003 nagtitindog ako sa laboy  mantang pinagheheling an mga tugang na ibinubugtak an pundasyon kan edipisyo. Mayo pang sarong taon an nakaagi, nagtitindog ako sa iyo man sanang lugar na pinagmamasdan an sarong nag-aandar nang makinang pang-imprenta.”

An Programa sa Pagdedikar

An programa sa pagdedikar kan bagong imprentahan, kaiba an tolong edipisyong istaran, ginibo sa Wallkill kan Lunes, Mayo 16, 2005. An Bethel sa Patterson asin Brooklyn, siring man an Bethel sa Canada, ikinonektar paagi sa video. Sa pankagabsan, 6,049 an nakaatender sa programa. Si Theodore Jaracz, miembro kan Namamahalang Grupo nin Mga Saksi ni Jehova, naglingkod bilang tsirman asin nagtao nin sarong halipot na sumaryo kan kasaysayan kan pag-imprenta. Paagi sa mga interbio asin mga presentasyon sa video, rinepaso kan mga miembro kan Komite kan Sangang Opisina na si John Larson asin si John Kikot an kasaysayan kan proyekto nin pagtogdok sagkod kan pag-imprenta sa Estados Unidos. Itinao ni John Barr kan Namamahalang Grupo an pangultimong pahayag, na idinedikar ki Jehova Dios an bagong imprentahan asin an tolong edipisyong istaran.

Durante kan suminunod na semana, tinawan nin oportunidad an mga Bethelite gikan sa Patterson asin Brooklyn na liboton an bagong mga pasilidad. Sa pankagabsan, 5,920 an nagdalaw durante kan panahon na idto.

Paano Niato Minamansay an Imprentahan?

Sa pahayag sa pagdedikar, ipinagirumdom ni Tugang na Barr sa mga nagdadangog saiya na an imprentahan, minsan ngani tibaad nakakagulat iyan, bakong manongod sa mga makina. Iyan manongod sa mga tawo. An literatura na satong iniimprenta igwa nin hararom na epekto sa buhay nin mga tawo.

An kada saro sa bagong mga makinang pang-imprenta kayang mag-imprenta nin sarong milyon na pulyeto sa laog sana nin labing sarong oras! Pero, an sasarong pulyeto puedeng magkaigwa nin halawig na epekto sa buhay nin sarong tawo. Halimbawa, kan 1921 an sarong grupo nin mga lalaki na nagmamantener kan perokaril sa Aprika del Sur nagtrabaho  nin dirediretso sa sarong kabtang kan riles nin tren. An saro sa sainda, sarong lalaki na an ngaran Christiaan, may nariparong kapidasong papel na nakatangil sa irarom kan riles. Iyan saro sa satong mga pulyeto. May dakulang interes na iyan binasa ni Christiaan. Nagdalagan sia sa pagsabat sa saiyang manugang na lalaki asin ogmahon niang sinabi: “Nanompongan ko ngonyan an katotoohan!” Dai nahaloy pagkatapos, sinda nagsurat para sa dugang pang impormasyon. An sangang opisina sa Aprika del Sur nagpadara nin dugang pang literatura sa Biblia. An duwang lalaki nag-adal, nabautismohan, asin ipinaabot sa iba an katotoohan sa Biblia. Bilang resulta, dakol an nag-ako kan katotoohan. Sa katunayan, sa enot na mga taon kan dekada 1990, labing sanggatos sa saindang mga gikan an mga Saksi ni Jehova​—na gabos resulta kan pakadiskobre nin sarong lalaki sa saro sanang pulyeto sa riles nin tren!

An literatura na satong iniimprenta, an sabi ni Tugang na Barr, naggigiya sa mga tawo sa katotoohan, pinapapagdanay sinda sa katotoohan, nagmomotibar sa sainda sa orog na kaigotan, asin nakakabogkos sa kasararoan nin magturugang. Asin labi sa gabos, an literatura, na gabos kita may kabtang sa pagdistribwir, nagpapamuraway sa satong Dios, si Jehova!

Paano Minamansay ni Jehova an Imprentahan?

Sinabi man ni Tugang na Barr sa mga nagdadangog na pensaron kun paano minamansay ni Jehova an imprentahan. Tunay nanggad na sia dai nagdedepende dian. Puede niang papaghuliton kan maogmang bareta an mga gapo! (Lucas 19:40) Apuera kaini, sia dai nagugulat sa pagkakomplikado, kadakulaan, rikas, o mga kakayahan nin mga makina. Tara, sia an naglalang kan uniberso! (Salmo 147:​10, 11) Aram ni Jehova an mas superyor na mga paagi sa pagprodusir nin literatura, mga paagi na dai pa naimbento ni naimahinar man lamang nin mga tawo. Kaya, ano an naheheling ni Jehova na talagang pinapahalagahan nia? Daing duwa-duwa na naheheling nia sa imprentahan na ini an mahalagang marhay na mga kualidad kan saiyang banwaan​—an saindang pagkamoot, pagtubod, asin pagkuyog.

Iinilustrar an aspekto kan pagkamoot. An sarong daragita nagluto nin keik para sa saiyang mga magurang. Posibleng marhay na mapapahiro an boot kan mga magurang. Iyo, ano man an luwasan kan keik, an nakakapahiro sa boot kan mga magurang iyo an pagkamoot kan saindang aki na ipinapaheling kan saiyang matinaong gibo. Kaagid kaiyan, kun pinagheheling ni Jehova an bagong imprentahan na ini, an naheheling nia bako sanang an edipisyo asin an mga makina. Sa pangenot, naheheling nia iyan bilang kapahayagan nin pagkamoot para sa saiyang ngaran.​—Hebreo 6:10.

Apuera kaini, kun paanong minansay ni Jehova an dahong bilang kapahayagan kan pagtubod ni Noe, pinagheheling nia an imprentahan na ini bilang aktuwal na ebidensia kan satong pagtubod. Pagtubod sa ano? Si Noe nagtubod na mangyayari an ihinula ni Jehova. Kita nagtutubod na nabubuhay kita sa huring mga aldaw, na an maogmang bareta an pinakamahalagang mensahe na ibinabalangibog sa daga, asin na importanteng marhay na madangog iyan nin mga tawo. Aram niato na an mensahe kan Biblia makakapagligtas nin mga buhay.​—Roma 10:​13, 14.

Daing duwa-duwa, naheheling man ni Jehova sa imprentahan na ini an kapahayagan kan satong pagkuyog. Arog kan aram niato, kabotan nia na an maogmang bareta ihulit sa bilog na kinaban bago dumatong an katapusan. (Mateo 24:14) An imprentahan na ini, kaiba idtong mga nasa ibang mga rehion kan kinaban, magkakaigwa nin kabtang sa pag-otob kan sugong iyan.

Iyo, an pagkamoot, pagtubod, asin pagkuyog na ipinaheling sa pagtipon kan kinakaipuhan na pondo, pagtogdok, asin operasyon kan mga pasilidad na ini nababanaag man sa maigot na aktibidad kan banwaan ni Jehova sa gabos na lugar mantang sinda nagpapadagos sa pagbalangibog kan katotoohan sa gabos na maghihinanyog.

[Kahon/​Mga Ritrato sa pahina 11]

PAGHIWAS KAN PAG-IMPRENTA SA ESTADOS UNIDOS

1920: Iniimprenta an mga magasin gamit an enot na nag-iitok na makinang pang-imprenta, sa 35 Myrtle Avenue, Brooklyn.

1922: Ibinalyo an imprentahan sa sarong anom na eskalon na edipisyo sa 18 Concord Street. Nag-iimprenta na nin mga libro.

1927: Ibinalyo an imprentahan sa bagong edipisyo na itinogdok sa 117 Adams Street.

1949: Nadoble an hiwas kan imprentahan huli sa idinagdag na siyam na eskalon.

1956: Nadoble giraray an hiwas kan imprentahan sa Adams Street kan itogdok an bagong edipisyo sa 77 Sands Street.

1967: Itinogdok an sampulong eskalon na edipisyo, kaya nagin posible an sarong magkakoronektar na imprentahan na sampulong beses na mas mahiwas kisa sa orihinal na edipisyo.

1973: Itinogdok an dagdag na imprentahan sa Wallkill, sa pangenot para sa pagprodusir nin magasin.

2004: Pinagsararo sa Wallkill an gabos na pag-imprenta, paggibo nin libro, asin pagpaktora sa Estados Unidos.