Kapaskohan​—Saen Iyan Nakapokus?

PARA sa minilyon an Pasko asin Bagong Taon iyo an panahon tanganing makaibanan an pamilya asin mga katood, panahon tanganing pakosogon giraray an bogkos nin kapadangatan. An dakol na iba pa ibinibilang iyan na panahon nin paghorophorop sa pagkamundag ni Jesu-Cristo asin sa saiyang papel sa pagliligtas kan katawohan. Sa Rusya, bakong arog sa ibang mga nasyon, dai pirmeng itinotogot kaidto an pagselebrar nin Pasko. Minsan ngani hayag na isineselebrar kan mga nasa Iglesia Ortodokso nin Rusya an Pasko sa laog nin dakol nang siglo, dai sinda tinogotan na gibohon iyan sa dakulang kabtang kan ika-20 siglo. Ano an nagin dahelan kan pagbabagong iyan?

Dai nahaloy pakatapos kan rebolusyon kan Komunistang Bolshevik kan 1917, sinunod kan mga autoridad kan Sobyet an sarong agresibong palakaw na ateismo sa bilog na estado. An bilog na Kapaskohan kaiba an relihiosong kahulogan kaiyan dinesaprobar na. An Estado nagpoon na magpalakop nin propaganda tumang sa mga selebrasyon nin Pasko sagkod Bagong Taon. Nagkaigwa pa ngani nin hayag na pagkondenar sa lokal na mga simbolo kan okasyon​—an Christmas tree asin si Ded Moroz, o Lolo Yelo, an katumbas ni Santa Klaus sa Rusya.

Kan 1935, nagkaigwa nin pagbabago na biyong nakaliwat sa paagi nin pagselebrar nin Pasko asin Bagong Taon kan mga Ruso. Ibinalik kan mga Sobyet si Lolo Yelo, an kahoy na ginagamit sa okasyon, asin an selebrasyon nin Bagong Taon​—alagad may dakulang pagkakalaen. Si Lolo Yelo daa madara nin mga regalo, bakong sa Pasko, kundi sa Aldaw nin Bagong Taon. Siring man, mayo na nin Christmas tree. Iyan magigin New Year’s tree! Sa siring, nagkaigwa nin dakulang pagbabago nin pokus sa Unyon Sobyet. An selebrasyon nin Bagong Taon garo man sana suminalida sa Pasko.

An Kapaskohan nagin biyong sekular na kapiestahan, na opisyal nang hinalean nin ano man na relihiosong kahulogan. An New Year’s tree linagan, bako nin relihiosong mga dekorasyon, kundi nin sekular na mga dekorasyon na naglaladawan kan progreso kan Unyon Sobyet. An magasin sa Rusya na Vokrug Sveta (Sa Bilog na Kinaban) nagpapaliwanag: “May posibilidad na masusog giraray an kasaysayan kan pag-establisar nin sarong Komunistang sosyedad paagi sa mga dekorasyon kan New Year’s tree sa laen-laen na taon kan kapanahonan nin Sobyet. Kaiba kan ordinaryong mga kuneho, icicle, asin bilog na tinapay, ilinuwas an mga dekorasyon na korteng kagot, pamokpok, asin traktora. Kan huri nasalidahan ini nin mga pigurin nin minero asin astronaut na Sobyet, oil rig (kasangkapan sa paghanap nin krudo), roket, asin lunadan sa bulan.”

Kumusta an mismong Aldaw nin Pasko? Dai na nanggad iyan rinekonoser. Imbes, ginibo iyan kan mga autoridad kan Sobyet na ordinaryong aldaw nin trabaho. An mga nagmamawot na magselebrar nin Pasko sa relihiosong paagi patago sanang makakagibo kaiyan, na namemeligro sa pagdesaprobar kan Estado asin maraot na kaaabtan. Iyo, an Rusya sa ika-20 siglo, nagkaigwa nin pagbabago sa pokus kun manongod sa Pasko asin Bagong Taon, hale sa relihiosong selebrasyon pasiring sa sekular na selebrasyon.

Mas Dai Pa Sana Nahahaloy na Pagbabago

Kan 1991 buminagsak an Unyon Sobyet asin nagkaigwa nin orog na katalingkasan. Nawara na an palakaw na ateismo kan Estado. An manlaenlaen na bago pa sanang mabilog na soberanong estado sa kadaklan bakong relihioso, na magkasuway an Simbahan asin Estado. Dakol na relihioso  an nagsaboot na puede na nindang sunodon ngonyan an saindang relihiosong mga paniniwala. Ipinangatanosan ninda na an sarong paagi na magibo ini iyo an pagselebrar kan relihiosong okasyon nin Pasko. Minsan siring, dai nahaloy dakol sa sainda an nadesganar na marhay. Taano?

Sa kada pag-agi nin taon, an kapiestahan na iyan nagigin mas komersialisado. Iyo nanggad, arog sa Solnopan, an Kapaskohan nagin saro sa pinakamarahay na paagi na magganansia an mga pabrikante, paratinda nin pakyawan, asin negosyante. An mga dekorasyon sa Pasko heling-heling sa atubangan nin mga tindahan. An mga musika asin kanta sa Pasko na estilong pansolnopan, na dati dai aram sa Rusya, nadadangog na sa mga tindahan. An mga ahente na may darang darakulang bag na may laog na mga dekorasyon sa Pasko nagtitinda kan saindang mga paninda sa mga tren asin iba pang pampublikong transportasyon. Iyan na an maheheling ngonyan.

Tibaad mapurisaw dawa an mga nagsasaboot na bakong sala an direktang komersialismong ini huli sa saro pang nakakapurisaw na aspekto kan okasyon​—an pag-abuso sa inomon na de alkohol kaiba an gabos na negatibong epekto kaiyan. An sarong doktor sa pan-emerhensiang kuarto sa sarong ospital sa Moscow nagpaliwanag: “Para sa mga doktor, akseptado na ninda na an selebrasyon nin Bagong Taon nangangahulogan nin kadakol na pagkaerido poon sa bukol asin bakros sagkod sa mga lugad nin kutsilyo asin bala, na an kadaklan bunga nin kadahasan sa laog kan pamilya, iriwal nin mga burat, asin aksidente sa auto.” An sarong halangkaw an posisyon na sientista sa sarong sanga kan Russian Academy of Sciences nagsabi: “Biglang duminakol an kabilangan nin mga nagagadan na konektado sa inomon na de alkohol. Partikularmenteng halangkaw iyan kan taon nin 2000. Luminangkaw man an kabilangan nin mga paghugot asin paggadan.”

Makamomondo, an arin man kan siring na gawe-gawe kun Pasko asin Bagong Taon sa Rusya pinapagrabe nin saro pang dahelan. Sa irarom kan pangenot na baretang “An mga Ruso Duwang Beses na Nagseselebrar nin Pasko,” an peryodikong Izvestiya nagbabareta: “Haros 1 sa 10 Ruso an nagseselebrar nin Pasko nin duwang beses. Siring kan naheling sa surbey kan sentro nin pagsubaybay kan ROMIR, 8 porsiento sa mga hinapot an nag-admitir na isineselebrar ninda an Pasko sa Disyembre 25, segun sa Katolikong kalendaryo sa Pasko, asin sa Enero 7, oyon sa Ortodoksia . . . Para sa nagkapira, malinaw na an mahalaga bakong an relihiosong kahulogan nin Pasko kundi an oportunidad na magselebrar.” *

An Paagi daw nin Pagselebrar Ngonyan Talagang Nagtatao nin Onra ki Cristo?

Malinaw nanggad, dakol na bakong diosnon na gawe-gawe an naheheling kun Pasko asin  Bagong Taon. Minsan ngani nakakapurisaw ini, an nagkapira tibaad nagsasaboot na maninigo nindang otobon an selebrasyon huli sa paggalang sa Dios asin ki Cristo. Kaomaw-omaw an pagmawot na paogmahon an Dios. Alagad talaga daw na ikinakaogma nin Dios asin ni Cristo an Kapaskohan? Estudyare an ginikanan kaiyan.

Halimbawa, ano man an pagheling nin saro dapit sa paninindogan kan mga Sobyet manongod sa Pasko, masakit na kontrahon an masunod na makasaysayan na impormasyon na yaon sa Great Soviet Encyclopedia: “An Pasko . . . hale sa ginigibo kaidtong panahon bago kan mga Kristiano na pagsamba sa mga dios na ‘nagagadan asin nabubuhay liwat,’ na espesyalmenteng lakop sa tahaw kan mga tawo na nabubuhay sa agrikultura. Sa panahon na parateng solsticio sa tiglipot poon Disyembre 21-​25, taon-taon na isineselebrar kan mga tawong idto an ‘pagkamundag’ kan Dios na Paraligtas, na nagtatao nin bagong buhay sa naturalesa.”

Tibaad manompongan nindo na mahalaga an eksaktong sinasabi kan ensiklopedyang iyan: “An Kristianismo kan enot na mga siglo dai aram an selebrasyon nin Pasko. . . . Magpoon sa kabangaan kan ikaapat na siglo, inako kan Kristianismo an selebrasyon nin solsticio sa tiglipot hale sa pagsamba ki Mitra, na ginibo iyan na selebrasyon nin Pasko. An primerong nagselebrar nin Pasko iyo an relihiosong mga komunidad sa Roma. Kan ikasampulong siglo, an Pasko, kaiba an Kristianismo, luminakop sa Rusya, kun saen isinalak iyan sa selebrasyon sa tiglipot kan suanoy na mga Eslavo, na tinatawan nin onra an mga espiritu kan mga apoon.”

‘Ano an sinasabi kan Tataramon nin Dios, an Biblia, manongod sa pagkamundag ni Jesus sa Disyembre 25?’ an tibaad ihapot nindo. An totoo, an Biblia mayong sinasabing espesipikong petsa kan pagkamundag ni Jesus, asin mayo nin rekord na may sinabi mismo si Jesus manongod dian, lalo nang mayo siang sinabi na selebraron iyan. Minsan siring, tinatabangan kita kan Biblia na madeterminaran an panahon kan taon na namundag si Jesus.

Oyon sa Ebanghelyo ni Mateo, kapitulo 26 asin 27, si Jesus ginadan kan Nisan 14, kan hapon kan aldaw kan Judiong Paskua na nagpoon nin Marso 31, 33 C.E. Naaraman niato sa Ebanghelyo ni Lucas na si Jesus mga 30 anyos kan sia bautismohan asin magpoon sa saiyang ministeryo. (Lucas 3:21-23) An ministeryong iyan nagtolo may kabangang taon. Kun siring, si Jesus mga 33 1⁄2 taon kan sia magadan. Sia ma-34 anyos kutana pag-abot nin mga Oktubre 1, 33 C.E. Nagbabareta si Lucas na kan mamundag si Jesus, an mga pastor “nag-iistar sa luwas asin nagbabantay sa banggi kan saindang mga aripompon.” (Lucas 2:8) An mga pastor mayo kutana sa luwas kaiba an saindang mga aripompon sa malipot na panahon nin Disyembre, na puede nganing nagniniebe sa palibot nin Betlehem. Alagad puedeng yaon sinda duman kaiba an saindang mga aripompon sa panahon nin mga Oktubre 1, na oyon sa ebidensia iyo an panahon kan pagkamundag ni Jesus.

Kulibat palan, kumusta an selebrasyon nin Bagong Taon? Siring kan naheling niato, iyan pano nin marigsok na gawe-gawe. Sa ibong kan mga paghihingoa na sekularisaron iyan, iyan igwa man nin kuestionableng ginikanan.

 Malinaw nanggad, sa liwanag kan mga impormasyon manongod sa Pasko asin Bagong Taon, an mga sarabihon na arog kan, Si Jesus an rason kan selebrasyon nagigin daing kahulogan. Kun naaaburido kamo kan komersialismo asin nakakapurisaw na gawe-gawe na konektado sa Kapaskohan, saka kan mandata asin paganong ginikanan kaiyan, dai madesganar. Igwa nin tamang paagi na ikakapaheling niato an nanonongod na reberensia sa Dios asin onra ki Cristo, na kadungan kaiyan pinapakosog an bogkos kan pamilya.

 Mas Marahay na Paagi nin Pagtao nin Onra sa Dios Asin ki Cristo

Sinasabi sa sato kan Biblia na si Jesu-Cristo nagdigdi tanganing “itao an saiyang kalag bilang pantubos na karibay nin dakol.” (Mateo 20:28) Itinogot nia na gadanon sia, na gikan sa boot na magadan para sa satong mga kasalan. Tibaad may nagkapira na gustong magtao nin onra ki Cristo, na nagsasaboot na puede nindang gibohon ini sa Kapaskohan. Alagad siring kan naheling niato, an Pasko asin Bagong Taon mayo ngani nin koneksion ki Cristo asin naggikan sa paganong mga selebrasyon. Siring man, an Kapaskohan, gurano man iyan kanakakaakit sa nagkapira, midbid sa daing supog na komersialismo. Apuera kaini, dapat na admitiron na an Pasko konektado sa makasusupog na gawe-gawe na dai nagugustohan nin Dios asin ni Cristo.

Ano an maninigong magin reaksion nin saro na naghihingoang paogmahon an Dios? Imbes na mangapot sa mga tradisyon nin tawo na tibaad makapaginhawa sa pakamate nin pagigin relihioso alagad kontra sa Kasuratan, an sinserong tawo mahanap kan tamang paagi nin pagtao nin onra sa Dios asin ki Cristo. Ano an tamang paagi, asin ano an maninigo niatong gibohon?

Si Cristo mismo nagsasabi sa sato: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) Iyo, an sinsero nanggad na tawo nagmamaigot na ilaog sa isip an tamang kaaraman kun paano matao nin onra sa Dios asin ki Cristo. Dangan iinaaplikar nia an kaaraman na ini bako sanang durante nin sarong panahon kan taon kundi sa pangaroaldaw na buhay. An Dios naoogmang marhay sa siring na sinserong mga paghihingoa, na puedeng maggiya sa buhay na daing katapusan.

Gusto daw nindo na an saindong pamilya makabilang sa mga tunay na nagtatao nin onra sa Dios asin ki Cristo kaoyon kan Kasuratan? An Mga Saksi ni Jehova nakatabang na sa minilyon na pamilya sa bilog na kinaban na ilaog sa isip an mahalagang marhay na kaaraman hale sa Biblia. Mainit na iniimbitaran niamo kamo na kontakon an mga Saksi ni Jehova sa saindong lugar o sumurat sa sainda sa angay na adres na yaon sa pahina 2 kan magasin na ini.

[Nota sa Ibaba]

[Kahon/Ritrato sa pahina 7]

Ginikanan kan Selebrasyon nin Bagong Taon

Nagtaram an Sarong Monghe kan Ortodokso nin Georgia

“An kapiestahan nin Bagong Taon naggikan sa dakol na paganong kapiestahan na hale sa suanoy na Roma. An Enero 1 sarong kapiestahan na idinusay sa paganong dios na si Janus, asin an ngaran kan bulan na iyan hale sa ngaran nia. An mga imahen ni Janus may duwang lalauogon sa man-ibong-ibong, na nangangahulogan na naheheling nia an nakaagi sagkod an presente. May kasabihan na an siisay man na magsabat sa Enero 1 na may kaogmahan, pagngisi, asin abundansia magkakaigwa nin kaogmahan asin marahay na kamugtakan sa bilog na taon. An superstisyon man sanang iyan katakod kan pagselebrar kan bagong taon para sa dakol na kahimanwa niato . . . Durante nin nagkapirang paganong kapiestahan, an mga tawo direktang nagdadara nin mga atang sa sarong idolo. Nagkapira an bantog sa inmoral na mga pagpalabilabi sa sekso, pagsambay, asin pakikisaro. Sa ibang okasyon, halimbawa durante kan kapiestahan ni Janus, may mga pagpalabilabi sa pagkakan asin pag-inom, pagbuburat, asin gabos na klaseng kaatian na kaiba kaiyan. Kun gigirumdomon niato kun paano kita nagseselebrar nin Bagong Taon kan nakaaging mga panahon, kun siring dapat na admitiron niato na gabos kita nagpartisipar sa paganong selebrasyon na ini.”​—Sarong peryodiko sa Georgia.

[Ritrato sa pahina 7]

An mga pastor mayo kutana sa luwas kaiba an saindang mga aripompon sa malipot na panahon nin Disyembre