“Maghulit nin Pagkabutas sa mga Bihag”

SA KAPINONAN kan saiyang ministeryo, sinabi ni Jesus na kaiba sa sugo sa saiya an “maghulit nin pagkabutas sa mga bihag.” (Lucas 4:18) Bilang pagsunod sa halimbawa kan saindang Kagurangnan, an tunay na mga Kristiano naghuhulit kan maogmang bareta kan Kahadean sa “gabos na klase nin tawo,” na nagpapangyari na sinda makabutas sa espirituwal na pagkabihag asin tinatabangan sindang mapakarhay an saindang buhay.​—1 Timoteo 2:4.

Ngonyan, kaiba sa gibohon na ini an paghuhulit sa literal na mga bihag​—mga tawo na nabilanggo huli sa manlaenlaen na krimen asin nagpapahalaga sa espirituwal na pagkabutas. Mag-ogma kamo sa nakakaparigon sa boot na baretang ini manongod sa paghuhulit kan mga Saksi ni Jehova sa mga bilanggoan sa Ucrania asin sa iba pang kabtang nin Europa.

Dating mga Adikto sa Droga na Nagin mga Kristiano

Sa 38 taon kan buhay ni Serhii, * 20 an ipinagdanay nia sa bilanggoan. Nakatapos ngani sia sa pag-eskuela sa bilanggoan. Sinabi nia: “Dakol nang taon an nakaagi, nabilanggo ako huli sa paggadan, asin dai pa tapos an sentensia sa sako. Sa bilanggoan garo ako tirano, asin an ibang mga preso takot sa sako.” Nakamate daw sia nin katalingkasan huli kaini? Dai. Sa laog nin dakol na taon, si Serhii napaoripon sa droga, inomon na de alkohol, asin tabako.

Dangan ipinaabot sa saiya nin sarong kapwa preso an katotoohan sa Biblia. Idto siring sa sarong sirang nin liwanag sa kadikloman. Sa laog nin nagkapira sanang bulan, pinondo nia an saiyang mga pagkaadikto, nagin siang parahulit kan maogmang bareta, asin sia nabautismohan. Sibot ngonyan an buhay ni Serhii sa bilanggoan, na naglilingkod bilang bilog na panahon na ministro ni Jehova. Natabangan nia an pitong kriminal na magbakle asin magin saiyang espirituwal na mga tugang. An anom sa sainda nakaluwas na, alagad si Serhii nabibilanggo pa man giraray. Dai ini ikinakakolog kan boot nia ta maogma sia na natatabangan nia an iba na makabutas sa espirituwal na pagkabihag.​—Gibo 20:35.

An saro sa mga inadalan ni Serhii sa bilanggoan iyo si Victor, dating parapabakal nin saka adikto sa droga. Pakaluwas nia sa bilanggoan, si Victor padagos na nag-oswag sa espirituwal asin pag-abot nin panahon naggradwar sa Paadalan sa Ministeryal na Pagsasanay sa Ucrania. Ngonyan naglilingkod sia bilang espesyal payunir na ministro sa Moldova.  Sinabi ni Victor: “Nagpoon akong magsigarilyo kan ako 8 anyos, mag-abuso sa inomon na de alkohol sa edad na 12, asin maggamit nin droga kan ako 14 anyos. Gusto kong bagohon an sakong buhay, alagad nasudya an gabos kong pagprobar. Dangan kan 1995, kan kami mag-agom nagpaplano nang rumayo sa sakong maraot na mga kaibaiba, ginadan sia sa saksak nin sarong buang paragadan. Nagin biyong miserable an sakong buhay. ‘Haen daw an sakong agom ngonyan? Ano daw an nangyayari kun an sarong tawo magadan?’ Padagos akong naghahapot alagad mayo akong manompongan na mga simbag. Paorog nang paorog an sakong pagdroga tanganing panigoan an namamatean kong kakulangan. Inarestar ako huli sa pagpabakal nin droga asin nasentensiahan nin limang taon na pagkabilanggo. Duman, tinabangan ako ni Serhii na manompongan an mga simbag. Dakol na beses na hiningoa ko na makatalingkas sa droga, alagad ngonyan sana ako nagin mapanggana sa tabang kan Biblia. Talagang mapuersa an Tataramon nin Dios!”​—Hebreo 4:12.

Nagbakle an mga Kriminal na Garo Dai Na Mababakle

Si Vasyl nungkang naggamit nin droga, alagad dai sia nakadulag sa pagkabihag. “Nagin adikto ako sa kickboxing,” an paliwanag nia. “Sinanay ko an sadiri ko na mambugbog na mayong naheheling na mga labod.” Ginamit ni Vasyl an saiyang kadahasan sa paghabon. “Tolong beses akong nabilanggo, na nagbunga kan pagdiborsio sa sako kan sakong agom. Durante kan huring limang taon na sentensia, nagin pamilyar ako sa literatura kan Mga Saksi ni Jehova. Nagmotibar ini sa sako na basahon an Biblia, alagad imbuelto pa man giraray ako sa talagang namomotan ko​—an labanan na mayong mga regulasyon.

“Minsan siring, pagkatapos nin anom na bulan na pagbasa kan Biblia, may nabago sa sako. An panggana sa labanan dai na nagtao sa sako nin satispaksion na arog kan dati. Kaya pinonan kong analisaron an sakong buhay sa tabang kan Isaias 2:4 asin narealisar ko na kun dai ko itatanos an sakong kaisipan, bilog na buhay na akong mabibilanggo. Kaya itinapok ko an gabos kong kasangkapan sa pakikilaban asin pinonan kong bagohon an sakong personalidad. Iyan bakong pasil, alagad an paghorophorop asin pamibi luway-luway na nakatabang sa sako na haleon an sakong maraot na mga ugale. Kun beses, nagbobolos an luha na ako nakikimaherak ki Jehova na tawan ako kan kosog na makatalingkas sa sakong pagkaadikto. Sa katapustapusi, nagin mapanggana ako.

“Pakaluwas ko sa bilanggoan, nakaibanan ko giraray an sakong pamilya. Ngonyan nagtatrabaho ako sa sarong mina nin karbon. Nagtatao ini sa sako nin igong panahon na makikabtang sa paghuhulit kaiba  an sakong agom asin otobon an sakong mga paninimbagan sa kongregasyon.”

Hinabonan ni Mykola asin kan saiyang mga katood an nagkapirang bangko sa Ucrania. Nagresulta ini sa sentensiang sampulong taon na pagkabilanggo para sa saiya. Bago sia mabilanggo, sarong beses sana siang nakalaog sa simbahan​—sa pag-andam na habonan an simbahan na iyan. Dai ini nagin mapanggana, alagad huli sa pagpasyar na iyan naniwala si Mykola na an Biblia seguradong pano nin nakakaumoy na mga estorya manongod sa mga pading Ortodokso, kandila, asin relihiosong kapiestahan. Sinabi nia: “Dai ko aram nin eksakto kun taano, alagad nagpoon akong magbasa kan Biblia. Napangalas ako na maaraman na iyan laen na marhay sa sakong pinaghona!” Hinagad nia na adalan sia sa Biblia asin sia nabautismohan kan 1999. Kun hehelingon sia ngonyan, depisil tubodon na an mapakumbabang ministeryal na lingkod na ini dating maraot an intension, armadong parahabon sa bangko!

Si Vladimir sinentensiahan nin kagadanan. Mantang hinahalat an paggadan sa saiya, sia namibi sa Dios asin nanuga na maglilingkod sa Saiya kun sia paligtason. Mientras tanto, binago an ley, asin an penalidad sa saiya na kagadanan ibinaba sa bilog na buhay na pagkabilanggo. Tanganing otobon an saiyang panuga, pinonan na hanapon ni Vladimir an tunay na relihion. Sia nagpalista sa sarong kurso paagi sa surat asin nag-ako nin diploma gikan sa iglesia Adventista, alagad dai sia nanigoan.

Minsan siring, pagkatapos na mabasa an mga magasin na An Torrengbantayan asin Awake! sa libreriya kan bilanggoan, nagsurat si Vladimir sa sangang opisina kan Mga Saksi ni Jehova sa Ucrania, na naghahagad na dalawon sia. Kan dalawon sia kan lokal na mga tugang, ibinibilang na nia an saiyang sadiri na Saksi asin naghuhulit na sia sa bilanggoan. Tinabangan sia na makualipikar bilang sarong parahayag kan Kahadean. Sa panahon na isinusurat ini, si Vladimir asin an pito pa sa bilanggoan na iyan naghahalat na mabautismohan. Alagad igwa sinda nin problema. Mantang an mga preso na may sentensiang bilog na buhay na pagkabilanggo ibinubugtak sa mga selda oyon sa saindang relihiosong mga pagtubod, si Vladimir asin an saiyang mga kaibahan sa selda magkaparareho sa pagtubod. Kaya kiisay daw sinda makakapaghulit? Ipinapaabot ninda an maogmang bareta sa mga guardia kan bilanggoan asin paagi sa pagsurat.

Si Nazar nagbalyo sa Republika Checoslovaco gikan sa Ucrania, kun saen nakiiba sia sa sarong gang nin mga parahabon. Ini nagbunga nin tolo may kabangang taon na pagkabilanggo nia. Mantang nasa bilanggoan, sia naghimate sa mga pagdalaw kan mga Saksi ni Jehova gikan sa siudad nin Karlovy Vary, nakanood kan katotoohan, asin biyong narehabilitar. Pakaheling kaini, an saro sa mga guardia nagsabi sa mga kaibahan ni Nazar sa selda: “Kun kamo gabos magigin arog kan Ucrainianong iyan, mababago ko na sa katapustapusi an sakong propesyon.” An saro pa nagsabi: “Ining mga Saksi ni Jehova totoong mga eksperto. An saro minalaog sa bilanggoan na sarong kriminal, alagad sia minaluwas na sarong disenteng tawo.” Ngonyan nakapuli na sa harong si Nazar. Sia nakanood na magkarpintero asin nag-agom, asin sinda mag-agom nasa bilog na panahon na ministeryo. Nagpapasalamat nanggad sia sa mga pagdalaw sa bilanggoan kan mga Saksi!

Opisyal na Pagrekonoser

Bako sanang mga preso an nagpapasalamat sa paglilingkod na itinatao kan mga Saksi ni Jehova. Si Miroslaw Kowalski, representante sa pagtaram kan saro sa mga bilanggoan sa Polandia, nagsabi: “Inaapresyar niamong marhay an saindang mga pagdalaw. An nagkapirang preso may mamondong mga pinaghalean. Nungka gayod sindang trinatar bilang mga tawo. . . . An tabang [kan mga Saksi] mahalagang marhay huli ta kulang kami sa mga empleyado asin edukador.”

An warden kan saro pang bilanggoan sa Polandia nagsurat sa sangang opisina, na naghahagad na dugangan kan mga Saksi an saindang aktibidad sa saiyang bilanggoan. Taano? Ipinaliwanag nia: “An mas parateng pagdalaw kan mga representante kan Watchtower tibaad makatabang sa mga preso na pataluboon an mga kualidad na kawiliwili sa sosyedad, na napopogolan an karingisan sa tahaw ninda.”

An sarong peryodiko sa Ucrania nagbareta manongod sa sarong may depresyon na preso na nagprobar na maghugot alagad ta natabangan kan mga Saksi ni Jehova. “Sa presente, an lalaking ini naoomayan na sa emosyonal,” an sabi kan bareta. “Sia nagpapasakop na sa rutina kan bilanggoan asin saro nang halimbawa para sa ibang mga preso.”

 Mga Pakinabang Sagkod sa Luwas kan Bilanggoan

An mga pakinabang gikan sa gibohon kan mga Saksi ni Jehova dai natatapos sa laog kan bilanggoan. An mga ini nagpapadagos pakaluwas kan mga preso. An duwang Kristiana, si Brigitte asin Renate, nagtatabang sa mga babaeng preso sa paaging ini sa laog na nin nagkapirang taon. An sarong peryodiko sa Alemania, an Main-Echo Aschaffenburg, nagbareta manongod sa sainda: “Inaasikaso ninda an mga preso sa laog nin tolo sagkod limang bulan pakaluwas ninda, na pinaparigon an boot ninda na magkaigwa nin katuyohan sa buhay. . . . Sinda opisyal na rinerekonoser bilang boluntaryong mga nagbabantay sa mga nasa probasyon. . . . Igwa man sinda nin nakakatabang asin positibong relasyon sa mga empleyado kan bilanggoan.” Dakol an nagdusay kan saindang buhay ki Jehova bilang resulta kan siring kaining klase nin tabang.

Dawa an mga opisyal kan bilanggoan nakikinabang sa gibohon na pagtotokdo kan Biblia kan mga Saksi ni Jehova. Halimbawa, si Roman dating meidyor sa militar asin sikologo sa sarong bilanggoan sa Ucrania. Kan dumalaw an mga Saksi sa saiyang harong, nag-oyon sia sa sarong pag-adal sa Biblia. Dangan naaraman nia na an mga Saksi dai tinotogotan na kontakon an mga preso sa pinagtatrabawohan nia. Kaya naghagad sia nin permiso sa warden na gamiton an Biblia sa trabaho nia sa mga preso. Itinogot an saiyang kahagadan, asin mga sampulong preso an nagpaheling nin interes. Regular na ipinaabot ni Roman an saiyang nagtatalubong kaaraman sa Biblia sa mga presong ini, asin an saiyang mga paghihingoa nagbunga nin marahayon na mga resulta. Pakaluwas, an nagkapira padagos na nag-oswag asin nagin bautisadong mga Kristiano. Huling naheling an puersa kan Tataramon nin Dios, orog na sineryoso ni Roman an saiyang pag-adal. Binayaan nia an militar asin nagpadagos sia sa saiyang mga aktibidad sa pagtotokdo kan Biblia. Ngonyan nakikikabtang sia sa paghuhulit kaiba an sarong dating preso.

“Digdi sinususteniran kami kan Biblia, kan mga publikasyon sa Biblia, asin kan pag-adal sa Biblia,” an isinurat nin sarong preso. An mga tataramon na ini nagpapaheling nanggad kan pangangaipo para sa mga literatura sa Biblia sa nagkapirang bilanggoan. An sarong kongregasyon sa Ucrania nagbareta manongod sa gibohon na pagtotokdo kan Biblia sa sarong lokal na bilanggoan: “Nagpapasalamat an administrasyon para sa literatura na samong itinatao. Sinusuplayan niamo sinda nin 60 kopya kada isyu kan An Torrengbantayan asin Awake!” An saro pang kongregasyon nagsurat: “Inaasikaso niamo an sarong koreksional na igwa nin 20 libreriyang saraday. Tinawan niamo kan satong prinsipal na mga publikasyon an kada libreriya. Ini uminabot sa 20 kahon nin literatura.” Sa sarong bilanggoan, an mga guardia pirmeng igwa nin file kan satong mga magasin sa libreriya tanganing an mga preso makinabang sa kada isyu.

Kan 2002 an sangang opisina sa Ucrania nag-establisar nin sarong Departamento Para sa mga Preso. Sagkod ngonyan, nakontak na kan departamentong ini an mga 120 koreksional asin ikinaasignar na an mga kongregasyon na maasikaso sa mga ini. Kada bulan mga 50 surat gikan sa mga preso an nareresibi, na an kadaklan naghahagad nin literatura o nin pag-adal sa Biblia. An sangang opisina nagpapadara sa sainda nin mga libro, magasin, asin brosyur sagkod na makontak sinda kan lokal na mga tugang.

“Girumdoma nindo an mga nagagapos sa bilanggoan,” an isinurat ni apostol Pablo sa saiyang mga kapwa Kristiano. (Hebreo 13:3) Sia nagtataram kaidto manongod sa mga nabilanggo huli sa saindang pagtubod. Ngonyan, an mga Saksi ni Jehova ginigirumdom idtong mga nasa karsel, dinadalaw an mga bilanggoan, asin ‘naghuhulit nin pagkabutas sa mga bihag.’​—Lucas 4:18.

[Nota sa Ibaba]

[Ritrato sa pahina 9]

An lanob kan bilanggoan, L’viv, Ucrania

[Ritrato sa pahina 10]

Si Mykola

[Ritrato sa pahina 10]

Si Vasyl kaiba an saiyang agom, si Iryna

[Ritrato sa pahina 10]

Si Victor