Nagigirumdoman daw Nindo?

Inapresyar daw nindo an pagbasa kan dai pa sana nahahaloy na mga isyu kan An Torrengbantayan? Helingon kun masisimbag nindo an minasunod na mga hapot:

• Taano ta an enot na kasalan​—an kasumbikalan ni Adan​—​puedeng iagid sa sarong helang na namamana?

Iyan garo helang huli ta ipinamana ni Adan an kasalan sa saiyang mga aki. Sa siring namana niato an depekto nin kasalan, kun paanong may mga aki na nagmana nin helang sa saindang mga magurang.​—​8/15, pahina 5.

• Ano an pundamental na mga dahelan kan nag-oorog na kadahasan ngonyan?

Nagmamaigot si Satanas na parayoon an boot kan mga tawo ki Jehova paagi sa pagtanom nin espiritu nin kadahasan sa puso, arog baga kan mga pelikula, musika, asin kawat sa komputer na dinadagka an mga nagkakawat na arogon an kabangisan asin garadanan. An kadahasan sa media nakakontribwir sa dakol na gibo nin kadahasan.​—9/1, pahina 29.

• Siisay si Poncio Pilato?

Sia sarong Romano na kabilang sa mga nobleng tawo na mas hababa an posisyon na posibleng marhay na dating nasa militar. Ninombrahan ni Emperador Tiberio nin Roma si Pilato na magin gobernador kan probinsia nin Judea kan 26 C.E. Sa pagbista ki Jesus, nadangog ni Pilato an mga sahot kan mga Judiong namomoon. Tanganing paoyonan an kadaklan, inaprobaran nia an paggadan ki Jesus.​—9/15, pahina 10-​12.

• Ano an “tanda” na nasambitan sa Mateo 24:3?

An tanda na ini kompuesto nin nagkapirang kabtang na minabilog nin sarong nagpapamidbid na tanda, o senyal, na kompuesto nin laen-laen na kabtang. Kaiba sa tanda an guerra, tiggutom, peste, asin mga linog, asin ini an mapangyari sa mga parasunod ni Jesus na risahon an saiyang “presensia” saka an “pagtatapos kan sistema nin mga bagay.”​—10/1, pahina 4-5.

• Ano an Diaspora, asin anong mga lugar an kalabot?

An termino minaaplikar sa mga Judio na nag-eerok sa luwas kan Palestina. Kan enot na siglo, an pangenot na mga sentro kan mga Judio nasa Siria, Asia Minor, Babilonya, asin Egipto, asin may mas saradit na komunidad sa kabtang kan Europa na sakop kan Imperyo nin Roma.​—10/15, pahina 12.

• Mapapagdanay daw nin sarong Kristiano an malinig na konsensia kun maako sia nin trabaho na kalabot an pagdara nin armas?

An paglaog sa sekular na trabaho na nangangaipong magdara nin badil o iba pang armas sarong personal na desisyon. Alagad an trabaho na kalabot an pagdara nin armas ibinubugtak an saro sa posibleng kasalan sa dugo kun gamiton nin saro an armas asin ibinubugtak an saro sa peligro na maerido o magadan huli sa pag-atake o pagbalos. An Kristiano na nagdadara nin siring na armas dai makukualipikar sa espesyal na mga pribilehio sa kongregasyon. (1 Timoteo 3:​3, 10)​—11/1, pahina 31.

• Mantang an tataramon na “Armagedon” kinua sa ekspresyon na “Bukid nin Megido,” an ralaban daw nin Armagedon paglalabanan sa sarong bukid sa Tahaw na Sirangan?

Dai. Mayo nin Bukid nin Megido, kundi saro sanang bulod sa kataed kan kapatagan sa Israel. An lugar na iyan sadit na marhay tanganing magkaigo an gabos na “hade kan daga asin an saindang mga hukbo.” An dakulang guerra nin Dios paglalabanan sa bilog na daga, asin iyan an matapos kan gabos na guerra. (Kapahayagan 16:​14, 16; 19:19; Salmo 46:​8, 9)​—12/1, pahina 4-7.