An Paghanap sa Katanosan Maprotehir sa Sato

“Kun siring, padagos na hanapon nguna an . . . katanosan [nin Dios].”​—MATEO 6:33.

1, 2. Anong desisyon an ginibo nin sarong hoben na Kristiana, asin taano ta ginibo nia an desisyon na iyan?

SARONG hoben na Kristiana sa Asia an nagtatrabaho bilang sekretarya sa sarong opisina nin gobyerno. Sia sadiosan, amay na naglalaog asin dai naghihinugak sa saiyang trabaho. Minsan siring, mantang bako siang permanente sa trabaho, nag-abot an panahon para sa ebalwasyon. Sinabihan kan pamayo kan departamento an hoben na babae na gigibohon sia kaining permanente sa trabaho asin tatawan pa ngani sia nin mas halangkaw na posisyon, sa kondisyon na magkaigwa sia nin inmoral na relasyon sa saiya. Daing pag-alangan na sinayumahan nia ini, dawa ngani mangangahulogan iyan nin pagkawara kan saiyang trabaho.

² An hoben daw na Kristianang idto bakong realistiko? Dai, maingat niang sinusunod an mga tataramon ni Jesus: “Kun siring, padagos na hanapon nguna an . . . katanosan [nin Dios].” (Mateo 6:33) Para sa saiya, an pagsunod sa matanos na mga prinsipyo mas mahalagang marhay kisa pagkamit nin pakinabang paagi sa pagkomiter nin seksuwal na inmoralidad.​—1 Corinto 6:18.

An Halaga nin Katanosan

3. Ano an katanosan?

³ An “katanosan” nagpaparisa nin kamugtakan nin moral na integridad asin pagkasadiosan. Sa Biblia, an Griego asin Hebreong mga tataramon para sa katanosan igwa kan ideya nin “moral na integridad” o “pagigin tanos.” Bako iyan na pagpakangmatanos, na hinuhusgaran an sadiri paagi sa sadiri niang mga pamantayan. (Lucas 16:15) Iyan pagigin tanos oyon sa mga pamantayan ni Jehova. Iyan katanosan nin Dios.​—Roma 1:​17; 3:21.

4. Taano ta mahalaga an katanosan sa sarong Kristiano?

⁴ Taano ta mahalaga an katanosan? Huling inooyonan ni Jehova, an “matanos na Dios,” an saiyang banwaan kun naggigibo sinda nin katanosan. (Salmo 4:1; Talinhaga 2:​20-​22; Habacuc 1:13) An siisay man na naggigibo nin pagkabakong matanos dai magkakaigwa nin haraning relasyon sa saiya. (Talinhaga 15:8) Kaya sinadol ni apostol Pablo si Timoteo: “Dumulag ka sa mga mawot na konektado sa pagkahoben, kundi sumunod ka sa katanosan,” saka sa iba pang mahalagang marhay na mga kualidad. (2 Timoteo 2:22) Iyan man an dahelan kun taano ta iiniba ni Pablo “an takop sa daghan na katanosan” kan ilista nia an manlaenlaen na kabtang kan satong espirituwal na pangalasag.​—Efeso 6:14.

5. Paano mahahanap kan bakong sangkap na mga linalang an katanosan?

⁵ Siempre, mayong tawo na matanos sa lubos na sentido. An gabos nagmana nin pagkabakong sangkap ki Adan, asin an gabos nagkakasala, bakong matanos, poon sa pagkamundag. Pero, sinabi ni Jesus na maninigo niatong hanapon an katanosan. Paano iyan posible? Iyan huling itinao ni Jesus an saiyang sangkap na buhay bilang pantubos sa sato, asin kun nagtutubod kita sa atang na iyan, si Jehova andam na patawadon an satong mga kasalan. (Mateo 20:28; Juan 3:​16; Roma 5:​8, 9, 12, 18) Basado dian, mantang nanonodan niato an matanos na mga pamantayan ni Jehova asin ginigibo an pinakamakakaya niato tanganing kuyogon iyan​—na namimibi para sa tabang na mapangganahan an satong mga kaluyahan​—​inaako ni Jehova an satong pagsamba. (Salmo 1:6; Roma 7:​19-​25; Kapahayagan 7:​9, 14) Nakakaranga nanggad iyan!

Matanos sa Bakong Matanos na Kinaban

6. Taano ta an kinaban peligrosong lugar para sa enot na mga Kristiano?

⁶ Kan akoon kan mga disipulo ni Jesus an sugo na magin saiyang mga saksi “sagkod sa kaporoporohi kan daga,” napaatubang sinda sa depisil na situwasyon. (Gibo 1:8) An gabos na teritoryong iinasignar sa sainda “namumugtak sa kapangyarihan  kan maraot,” si Satanas. (1 Juan 5:19) An kinaban kontaminado na kan maraot na espiritu na saiyang pinapalakop, asin an mga Kristiano kaidto puedeng maimpluwensiahan kan nakakaolakit na impluwensia kaiyan. (Efeso 2:2) Para sa sainda, an kinaban sarong peligrosong lugar. Solamente paagi sa paghanap nguna sa katanosan nin Dios na makakatagal asin makakapagdanay sinda sa saindang integridad. An kadaklan talagang nakatagal, alagad an nagkapira napasuhay sa “dalan nin katanosan.”​—Talinhaga 12:28; 2 Timoteo 4:10.

7. Anong mga paninimbagan an naghahagad na labanan nin sarong Kristiano an nakakaraot na mga impluwensia?

⁷ An kinaban daw mas ligtas para sa mga Kristiano ngonyan? Dai nanggad! Mas maraot pa ngani iyan kisa kan enot na siglo. Dugang pa, si Satanas ihinulog na sa daga asin nakikilaban nin madahas tumang sa linahidan na mga Kristiano, “sa mga natatada kan . . . banhi [kan babae], na nagkukuyog sa mga togon nin Dios asin igwa kan gibohon na pagpatotoo ki Jesus.” (Kapahayagan 12:​12, 17) Sinasalakay man ni Satanas an siisay man na nagsusuportar sa “banhi” na iyan. Pero, an mga Kristiano dai makakadulag sa kinaban. Minsan ngani bako sindang kabtang kaiyan, kaipuhan sindang mag-istar dian. (Juan 17:​15, 16) Asin kaipuhan sindang maghulit dian tanganing hanapon an mga tawong tama an inklinasyon asin tokdoan sinda na magin mga disipulo ni Cristo. (Mateo 24:14; 28:​19, 20) Kun siring, mantang an mga Kristiano dai biyong makakalikay sa nakakaraot na mga impluwensia sa kinaban na ini, dapat na labanan ninda iyan. Estudyaran niato an apat sa mga impluwensiang iyan.

An Silo nin Inmoralidad

8. Taano an mga Israelita ta nagpoon na magsamba sa mga dios kan mga Moabita?

⁸ Sa pagtatapos kan saindang 40 taon na pagbaklay sa kaawagan, dakol na Israelita an nagbaya sa dalan nin katanosan. Naheling ninda an dakol na gibo nin pagliligtas ni Jehova, asin dai na mahahaloy malaog na sinda sa Dagang Panuga. Pero, sa kritikal na panahon na iyan, nagpoon sindang magsamba sa mga dios kan mga Moabita. Taano? Napadara sinda sa “mawot kan laman.” (1 Juan 2:16) An rekord nagsasabi: “An banwaan nagpoon na magkaigwa nin inmoral na relasyon sa mga aking babae ni Moab.”​—Bilang 25:1.

9, 10. Anong kamugtakan sa ngonyan an nagigin dahelan na mahalagang marhay na pirmeng girumdomon an nakakaraot na impluwensia kan salang makalaman na mga mawot?

⁹ Ipinapaheling kan pangyayaring iyan kun paano puedeng raoton kan makalaman na mga mawot an mga dai nagmamaan. Maninigong makanood kita dian, nangorogna ta inaako nin dakol an inmoralidad bilang estilo nin pamumuhay. (1 Corinto 10:​6, 8) An sarong report sa Estados Unidos nagsasabi: “Bago kan 1970, an cohabitation [pagsasaro kan mga bakong kasal] ilegal sa gabos na estado nin Amerika. Ngonyan, ordinaryo na sana iyan. Labi sa kabanga kan gabos na enot na pagpakasal nangyayari pakatapos nin pagsasaro.” Iyan asin an kaagid na malalaswang gawe-gawe sa moral bakong sa sarong nasyon sana nangyayari. Nangyayari iyan sa bilog na kinaban, asin makamomondo, nagkapirang Kristiano an naggigibo na man kaiyan​—na nahale pa ngani sinda sa Kristianong kongregasyon.​—1 Corinto 5:11.

¹⁰ Dugang pa, an mga propaganda na nagpapalakop nin inmoralidad garo baga minsan saen na sana. An mga pelikula asin programa sa telebisyon  nagsusuherir na puedeng-puede para sa mga hoben na magdorog bago kasalon. Ipinapaheling bilang normal an homoseksuwal na relasyon. Asin dakol na pasale an paorog nang paorog na ilinaladawan nin klaro an sekso. An mga retrato na may klarong paglaladawan nin sekso madali sana man na maheling sa Internet. Halimbawa, ibinareta nin sarong kolumnista sa peryodiko na an saiyang siete anyos na aking lalaki nagpuli hale sa eskuelahan asin ogmahon na sinabi sa saiya na nabukasan kan saro niang amigo sa eskuelahan an sarong site sa Internet na ipinapaheling an mga babaeng huba na naggigibo nin mga akto sa sekso. Nakubhanan an ama, alagad pira daw na aki an nakakabukas kan siring na mga site na dai sinasabi sa saindang mga magurang? Dugang pa, pira daw na magurang an nag-aaram kan laog kan mga kawat sa video na kinakawat kan saindang mga aki? Dakol na popular na karawat an nagtatampok nin makababaldeng inmoralidad, saka demonismo asin kadahasan.

11. Paano mapoprotehiran an sarong pamilya tumang sa inmoralidad kan kinaban?

¹¹ Paano malalabanan nin pamilya an siring na hababaon na klase nin “aling-alingan”? Paagi sa paghanap nguna kan katanosan nin Dios, na nagsasayumang mapalabot sa ano man na inmoral. (2 Corinto 6:​14; Efeso 5:3) An mga magurang na tama an pagmato sa mga aktibidad kan saindang mga aki asin itinatadom sa saindang mga aki an pagkamoot ki Jehova asin sa saiyang matanos na mga ley nagpapasarig sa sainda tumang sa pornograpiya, pornograpikong mga kawat sa video, inmoral na mga pelikula, asin iba pang bakong matanos na mga sugot.​—Deuteronomio 6:​4-9. *

An Peligro kan Pangigipit kan Komunidad

12. Anong problema an naglataw kan enot na siglo?

¹² Kan si Pablo nasa Listra sa Asia Minor, milagroso niang pinaomayan an sarong lalaki. An pagkasaysay nagsasabi: “An kadaklan, pagkaheling kan ginibo ni Pablo, nagkururahaw, na an sabi sa tataramon nin Licaonia: ‘An mga dios nagin kabaing nin mga tawo asin naghilig sa sato!’ Asin inapod ninda si Bernabe na Zeus, alagad si Pablo Hermes, mantang sia an nangengenot sa pagtaram.” (Gibo 14:​11, 12) Pagkatapos an kadaklan man sanang idto gustong gadanon si Pablo asin Bernabe. (Gibo 14:19) Malinaw nanggad, an mga tawong idto madali nanggad na madara sa pangigipit kan komunidad. Minalataw na kan an nagkapira sa rehion na iyan magin Kristiano, dai ninda hinale an saindang superstisyosong mga tendensia. Sa saiyang surat sa mga Kristiano sa Colosas, nagpatanid si Pablo tumang sa “pagsamba sa mga anghel.”​—Colosas 2:18.

13. Ano an nagkapirang kostumbre na kaipuhan na likayan nin sarong Kristiano, asin paano sia makakakua nin kosog na gibohon iyan?

¹³ Ngonyan, an tunay na mga Kristiano kaipuhan man na lumikay sa popular na inaakong mga kostumbre na nakabasar sa falsong relihiosong mga ideya na naglalapas sa Kristianong mga prinsipyo. Halimbawa, sa nagkapirang kadagaan, an dakol na pinagkatodan nang mga seremonya may koneksion sa pagkamundag asin kagadanan nakabasar sa kaputikan na may espiritu kita na nagdadanay na buhay pagkagadan. (Eclesiastes 9:​5, 10) Igwang mga nasyon na may kostumbre na  ipasairarom an mga aking babae sa female genital mutilation [paghale sa sarong parte o mayor na parte kan ikinabuhay nin babae]. * Ini sarong maringis, dai kaipuhan na kaugalean na bakong kaoyon kan mamomoton na pagmakolog na maninigong itao nin mga magurang sa saindang mga aki. (Deuteronomio 6:​6, 7; Efeso 6:4) Paano malalabanan nin mga Kristiano an mga pangigipit kan komunidad asin bayaan an siring na mga kaugalean? Paagi sa pagkaigwa nin lubos na pagtitiwala ki Jehova. (Salmo 31:6) An matanos na Dios magpapakosog asin magmamakolog sa mga nagsasabi sa saiya hale sa saindang puso: “Ika an sakuyang pailihan asin an sakuyang kuta, an sakuyang Dios, na sakuyang pagtitiwalaan.”​—Salmo 91:2; Talinhaga 29:25.

Dai Paglingawan si Jehova

14. Anong patanid an itinao ni Jehova sa mga Israelita dai nahaloy bago sinda lumaog sa Dagang Panuga?

¹⁴ Dai nahaloy bago lumaog an mga Israelita sa Dagang Panuga, pinatanidan sinda ni Jehova na dai sia paglingawan. Sia nagsabi: “Ingatan an saimong sadiri na dai mo malingawan si Jehova na saimong Dios tanganing dai na magkuyog kan saiyang mga pagboot asin kan saiyang hudisyal na mga desisyon asin kan saiyang mga ipinapakuyog na ipinagboboot ko sa saimo ngonyan; ta tibaad magkakan ka asin magpanigo nanggad kan saimong sadiri, asin magtogdok nin magayon na mga harong asin mag-erok nanggad dian, asin magdakol an saimong mga baka asin karnero, asin magdakol saimo an pirak asin bulawan, asin magdakol an gabos na sadiri mo; asin an saimong puso magpalangkaw asin malingawan mo nanggad si Jehova na saimong Dios.”​—Deuteronomio 8:11-14.

15. Paano kita makakasegurado na dai niato nalilingawan si Jehova?

¹⁵ Puede daw na mangyari an kaagid kaiyan sa ngonyan? Iyo, kun igwa kita nin salang mga prioridad. Minsan siring, kun hinahanap nguna niato an katanosan nin Dios, an dalisay na pagsamba iyo an magigin pinakamahalagang bagay sa satong buhay. Siring kan inenkaminar sa sato ni Pablo na gibohon, ‘tutuboson niato an panahon’ asin magkakaigwa nin pakamate nin pag-apura sa satong ministeryo. (Colosas 4:5; 2 Timoteo 4:2) Pero, kun an pag-atender sa pagtiripon asin an paglilingkod sa langtad mas dikit an halaga sa sato kisa pagpaharohayahay o paghanap nin mga paagi para sa pagpasiramsiram, puede niatong malingawan si Jehova sa sentido na minamansay niato sia bilang sekondaryo sa satong buhay. Sinabi ni Pablo na sa huring mga aldaw, an mga tawo magigin “mga mamomoton sa kasingawan imbes na mga mamomoton sa Dios.” (2 Timoteo 3:4) An sinserong mga Kristiano regular na sinisiyasat an saindang sadiri tanganing masegurado na dai sinda naiimpluwensiahan kan siring na kaisipan.​—2 Corinto 13:5.

Mag-ingat sa Espiritu nin Pagigin Independiente

16. Anong salang espiritu an ipinaheling ni Eva asin nin nagkapira kan kaaldawan ni Pablo?

¹⁶ Sa Eden, mapangganang napukaw ni Satanas an paslong kamawotan ni Eva na magin independiente. Gusto ni Eva na gumibo nin sadiri niang mga desisyon manongod sa tama asin sala. (Genesis 3:​1-6) Kan enot na siglo, an nagkapira sa kongregasyon sa Corinto igwa kan kaparehong espiritu nin pagigin independiente. Inisip ninda na mas nakakaaram sinda kisa ki Pablo, asin mapagtuyang inapod nia sindang labi-labi karahay na mga apostol.​—2 Corinto 11:​3-5; 1 Timoteo 6:​3-5.

17. Paano niato malilikayan na makapatalubo nin espiritu nin pagigin independiente?

 ¹⁷ Sa kinaban ngonyan, dakol an “matagas an payo, mga maabhaw huli sa kapalangkawan,” asin an nagkapirang Kristiano naimpluwensiahan kan siring na kaisipan. An nagkapira nagin paratumang pa ngani sa katotoohan. (2 Timoteo 3:4; Filipos 3:18) Kun mapadapit sa dalisay na pagsamba, mahalagang marhay na humagad kita ki Jehova nin paggiya asin makikooperar sa “maimbod asin mapagmansay na oripon” asin sa kamagurangan sa kongregasyon. Iyan sarong paagi nin paghanap sa katanosan, asin pinoprotehiran kita kaiyan na makapatalubo nin espiritu nin pagigin independiente. (Mateo 24:45-​47; Salmo 25:​9, 10; Isaias 30:21) An kongregasyon kan mga linahidan “sarong harigi asin sulay kan katotoohan.” Itinao iyan ni Jehova tanganing protehiran asin giyahan kita. (1 Timoteo 3:15) An pagrekonoser sa mahalagang marhay na papel kaiyan matabang sato na ‘dai maggibo nin ano man huli sa egotismo’ mantang mapakumbaba kitang nagpapasakop sa matanos na kabotan ni Jehova.​—Filipos 2:​2-4; Talinhaga 3:4-6.

Magin mga Paraarog ni Jesus

18. Sa anong mga paagi dinadagka kita na arogon si Jesus?

¹⁸ Manongod ki Jesus, an Biblia makahulang nagsasabi: “Namoot ka sa katanosan asin naongis ka sa karatan.” (Salmo 45:7; Hebreo 1:9) Kanigoan karahay na aktitud na dapat arogon! (1 Corinto 11:1) Bako sanang aram ni Jesus an matanos na mga pamantayan ni Jehova; namotan nia iyan. Kaya kan sugotan sia ni Satanas sa kaawagan, si Jesus mayong pagduwaduwa asin marigon sa saiyang pagsayuma na rumayo sa “dalan nin katanosan.”​—Talinhaga 8:​20; Mateo 4:​3-​11.

19, 20. Ano an marahay na mga resulta kan paghanap sa katanosan?

¹⁹ Totoo, an bakong matanos na mga mawot kan laman puedeng makosog. (Roma 7:​19, 20) Sa ibong kaiyan, kun an katanosan mahalagang marhay sa sato, papakosogon kita kaini tumang sa karatan. (Salmo 119:165) An hararom na pagkamoot sa katanosan maprotehir sa sato kun napapaatubang kita sa maraot. (Talinhaga 4:​4-6) Girumdomon, kada magpadaog kita sa sugot, pinapanggagana niato si Satanas. Kanigoan karahay na labanan sia asin itao an kapangganahan ki Jehova!​—Talinhaga 27:11; Santiago 4:​7, 8.

²⁰ Huling hinahanap ninda an katanosan, an tunay na mga Kristiano ‘pano nin matanos na bunga, na paagi ki Jesu-Cristo, para sa kamurawayan asin kaomawan nin Dios.’ (Filipos 1:​10, 11) Isinusulog ninda an “bagong personalidad na linalang segun sa kabotan nin Dios sa tunay na katanosan asin kaimbodan.” (Efeso 4:24) Sinda sadiri ni Jehova asin nabubuhay tanganing maglingkod sa saiya, bako na panigoan an saindang sadiri. (Roma 14:8; 1 Pedro 4:2) Iyan an nagdedeterminar sa saindang kaisipan asin gawe-gawe. Kanigoan kadakulang kaogmahan an itinatao ninda sa puso kan saindang langitnon na Ama!​—Talinhaga 23:24.

[Mga Nota sa Ibaba]

Ikakapaliwanag daw Nindo?

• Taano ta mahalagang marhay na hanapon an katanosan?

• Paano mahahanap nin bakong sangkap na Kristiano an katanosan?

• Ano an nagkapirang bagay sa kinaban na dapat likayan nin sarong Kristiano?

• Paano nagpoprotehir sa sato an paghanap sa katanosan?

[Mga Hapot Para sa Pag-adal]

[Ritrato sa pahina 26]

Para sa mga parasunod ni Jesus, an kinaban sarong peligrosong lugar

[Ritrato sa pahina 27]

An mga aki na tinotokdoan na mamoot ki Jehova mapapasarig tumang sa inmoralidad

[Ritrato sa pahina 28]

Nalingawan kan nagkapirang Israelita si Jehova pagkatapos na magin marahay an buhay ninda sa Dagang Panuga

[Ritrato sa pahina 29]

Kapareho ni Jesus, ikinakaongis nin mga Kristiano an pagkabakong matanos