Gibohon na Nakakaogma an Paghorophorop

PARA sa nagkapirang tawo an ideya nin paghorophorop tibaad nakakagulat. Tibaad mansayon ninda an paghorophorop bilang depisil na gibohon na nangangaipo nin hararom na pagkonsentrar. An siring na mga tawo tibaad masupog man huli ta napapabayaan ninda an paghorophorop, nangorogna kun nababasa ninda an manongod sa importansia kaiyan. (Filipos 4:8) Minsan siring, an silensiong pagpensar kan mga katotoohan na satong nanodan manongod ki Jehova, sa saiyang magagayon na kualidad, sa saiyang makangingirhat na mga nagibo, sa saiyang mga kahagadan, asin sa saiyang mamuraway na katuyohan puede asin maninigo na magin nakakaogmang marhay na paagi nin paggamit kan panahon. Taano?

Si Jehova Dios iyo an Supremong Namamahala kan uniberso asin sia sibot sa pagtrabaho tanganing maotob an saiyang dakulang katuyohan. (Juan 5:17) Dawa siring, sia nagpapaheling nin interes sa saboot kan balang indibiduwal na parasamba. Aram ini kan salmistang si David asin paagi sa pagpasabong nin Dios sia nagsurat: “O Jehova, siniyasat mo ako, asin midbid mo ako. Ika mismo nakaaram kan sakong pagtukaw asin kan sakong pagtindog. Inestudyaran mo an sakong pag-isip hale sa harayo.”​—Salmo 139:​1, 2.

Sa primero, tibaad mansayon nin negatibo kan sarong tawo an mga tataramon na iyan kan salmista. Tibaad ipangatanosan nia, ‘Minsan an Dios “harayo,” naririsa nia an lambang maraot na minasabong sa isip ko.’ Siempre, an siring na pakarealisar may pakinabang. Iyan makakatabang sa sato na labanan an salang mga kaisipan asin, kun kita may siring na mga kaisipan, ituga niato an mga iyan sa Dios, na kompiadong papatawadon nia kita basado sa satong pagtubod sa atang na pantubos ni Jesus. (1 Juan 1:​8, 9; 2:​1, 2) Minsan siring, kadungan kaiyan, maninigo niatong girumdomon na sinisiyasat ni Jehova an saiyang mga parasamba sa positibong paagi. Sia nagtatao nin atension kun kita nag-iisip nin may pagpasalamat manongod sa saiya.

“Talaga daw na tinatawan nin atension ni Jehova an gabos na marahay na kaisipan kan saiyang minilyon na parasamba?” an tibaad ihapot nindo. Iyo nanggad. Idinoon ni Jesus an pagmakolog ni Jehova sa sato kan sabihon nia na rinirisa ni Jehova dawa an sadit na mga dignos, dangan idinagdag nia: “Orog kamong mahalaga kisa dakol na dignos.” (Lucas 12: ​6, 7) An mga dignos dai kayang mag-isip manongod ki Jehova. Kaya kun sia may pagmakolog sa sainda, lalo nang may pagmakolog sia sa sato asin naoogmang marhay sa diosnon na mga kaisipan kan balang saro sa sato! Iyo, kapareho ni David, kita makakapamibi na may pagsarig: “Logod an . . . paghorophorop kan sakong puso magin nakakaogma sa saimo, O Jehova na sakong Gapo asin sakong Paratubos.”​—Salmo 19:14.

An dugang pang prueba na si Jehova talagang nagpapaheling nin interes sa paghorophorop kan saiyang maimbod na mga parasamba makukua sa ipinasabong na mga tataramon ni propeta Malaquias. Nagtataram manongod sa satong kaaldawan, ihinula nia: “Sa panahon na iyan idtong mga nagkakatarakot ki Jehova nag-oorolay-olay, an lambang saro sa saiyang kaibanan, asin si Jehova padagos na nagtao nin atension asin naghinanyog. Asin an sarong libro nin girumdoman pinonan na isurat sa atubangan nia para sa mga natatakot ki Jehova asin para sa mga naghohorophorop sa saiyang ngaran.” (Malaquias 3:16) An pagpagirumdom sa satong sadiri na si Jehova padagos na ‘nagtatao nin atension’ kun hinohorophorop niato an manongod sa saiya gigibohon nanggad na nakakaogma an satong diosnon na paghorophorop. Kun siring, logod na arogon niato an mga tataramon kan salmista na nagsurat: “Hohorophoropon ko nanggad an gabos mong aktibidad, asin aatoman ko an saimong mga ginibo.”​—Salmo 77:12.