Gurano Karigon an Saindong Pagtitiwala sa Dios?

Kun siring, padagos na hanapon nguna an kahadean.”​—MATEO 6:33.

1, 2. Anong lakdang mapadapit sa trabaho an ginibo nin sarong hoben na lalaki, asin taano?

GUSTO nin sarong hoben na lalaki na magin orog na kapakipakinabang sa saiyang kongregasyon. An problema iyo na naoolang kan saiyang sekular na trabaho an saiyang regular na pag-atender sa pagtiripon. Paano nia rinesolberan an situwasyon? Pinasimple nia an saiyang buhay, nagdemitir sa saiyang trabaho, asin pag-abot nin panahon nakakua nin trabaho na dai nakaolang sa saiyang Kristianong mga aktibidad. Ngonyan, naggaganar sia nin mas hababa kisa dati, pero naaasikaso pa man giraray nia an mga pangangaipo kan saiyang pamilya asin mas nasusuportaran na nanggad nia an kongregasyon.

² Nasasabotan daw nindo kun taano ta ginibo kan hoben na lalaking iyan an siring na lakdang? Arog man daw kutana kaiyan an ginibo nindo kun kamo nasa kamugtakan na arog kan sa saiya? Kaomaw-omaw, dakol na Kristiano an naggibo nin arog man kaiyan, asin an saindang ginibo nagpapaheling kan saindang pagsarig sa panuga ni Jesus: “Kun siring, padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.” (Mateo 6:33) Nagtitiwala sinda ki Jehova para sa seguridad imbes na sa sekular na kinaban.​—Talinhaga 3:​23, 26.

3. Taano ta tibaad isipon nin nagkapira kun baga praktikal ngonyan na enoton an Kahadean nin Dios?

³ Huli sa masakit na mga panahon na kinabubuhayan niato, tibaad isip-isipon nin nagkapira kun baga madonong na desisyon an ginibo kan hoben na lalaking idto. Ngonyan, an sarong kabtang kan katawohan nabubuhay sa labi-labing kadukhaan mantang an iba nasa pinakahalangkaw na klase nin pamumuhay sa kasaysayan. An kadaklan na tawo sa dukhang mga nasyon galagang aaprobetsaran an ano man na oportunidad tanganing umasenso nin kadikit an saindang buhay. Sa ibong na lado, dakol sa mas mayayaman na nasyon an nasasakitan sa pagmantener kan saindang klase nin pamumuhay sa atubangan nin nagluluyang ekonomiya, pagbago nin malalaogan na mga trabaho, asin mga among na padakol nang padakol an hinahagad. Huli sa kadepisilan sa paghanap-buhay, tibaad isipon nin nagkapira, ‘Praktikal pa daw na hanapon nguna an Kahadean?’ Tanganing matabangan na masimbag an hapot na iyan, estudyare an mga nagdadangog na kinakaolay kaidto ni Jesus.

“Dai Na Kamo Magparahadit”

4, 5. Paano iinilustrar ni Jesus na rasonable para sa banwaan nin Dios na dai magparahadit nin sobra manongod sa pangaroaldaw na mga bagay?

⁴ Nasa Galilea kaidto si Jesus, na nakikipag-olay sa sarong dakulang kadaklan nin mga tawo hale sa dakol na lugar. (Mateo 4:25) Pipira sana kun igwa man sa mga tawong idto an mayaman. Posibleng marhay na an kadaklan dukha. Pero, sinadol sinda ni Jesus na tawan nin prioridad, bakong an pagtipon nin materyal na kayamanan, kundi an pagtipon nin sarong bagay na mas mahalagang marhay​—an espirituwal na kayamanan. (Mateo 6:​19-​21, 24) Sia nagsabi: “Dai na kamo magparahadit dapit sa saindong kalag kun ano an saindong kakakanon o kun ano an saindong iinomon, o dapit sa saindong hawak kun ano an saindong gugubingon. Bako daw na an kalag orog kisa sa kakanon asin an hawak orog kisa sa gubing?”​—Mateo 6:25.

⁵ Para sa dakol na nagdadangog na idto, garo bakong praktikal an mga tataramon ni Jesus. Aram ninda na kun dai sinda magmaigot sa pagtrabaho, magtitios an saindang pamilya. Minsan siring, ipinagirumdom sa sainda ni Jesus an manongod sa mga gamgam. Kaipuhan kan mga gamgam na susteniran an saindang buhay kada aldaw, pero inaataman sinda ni Jehova. Ipinagirumdom man ni Jesus kun paano inaataman ni Jehova an kadlaganon na mga burak, na an kagayonan kaiyan nakakalabi kan ki Salomon sa gabos niang kamurawayan. Kun inaataman ni Jehova an mga gamgam asin burak, gurano pa daw na dai nia kita atamanon? (Mateo 6:​26-​ 30) Siring kan sinabi ni Jesus, an satong buhay (kalag) asin hawak mas mahalagang marhay kisa sa pagkakan na binabakal niato tangani na susteniran an satong buhay asin bado tangani na gubingan an satong hawak. Kun idinudusay niato an gabos tang paghihingoa tangani sanang pakakanon asin gubingan an satong sadiri, na haros mayo nang itinatagama sa paglilingkod ki Jehova, nalilingawan niato an pinakakatuyohan nin buhay.​—Eclesiastes 12:13.

Sarong Timbang na Punto de Vista

6. (a) Ano an paninimbagan kan mga Kristiano? (b) Kiisay lubos na nagtitiwala an mga Kristiano?

⁶ Siempre, dai inenkaminar ni Jesus an mga nagdadangog sa saiya na dai na magtrabaho asin maghalat na sana sa Dios na maski paano iyo an magsustento sa saindang pamilya. Maski an mga gamgam kaipuhan na maghanap nin pagkakan para sa sainda asin sa saindang mga siyo. Sa siring, an mga Kristiano kaidto kaipuhan na magtrabaho kun gusto nindang magkakan. Kaipuhan nindang asikasohon an mga paninimbagan sa pamilya. An Kristianong mga surugoon asin oripon kaipuhan na magtrabaho nin mahigos para sa saindang mga kagurangnan. (2 Tesalonica 3:​10-​12; 1 Timoteo 5:8; 1 Pedro 2:18) Si apostol Pablo nagtrabaho sa parate bilang paragibo nin tolda tanganing sustentohan an saiyang sadiri. (Gibo 18:​1-4; 1 Tesalonica 2:9) Pero, an mga Kristianong idto dai nagsarig sa sekular na trabaho para sa seguridad. Nagtiwala sinda ki Jehova. Bilang resulta, nakamtan ninda an panlaog na katoninongan na dai aram kan iba. An salmista nagsabi: “An mga nagtitiwala ki Jehova siring sa Bukid nin Sion, na dai matatanyog, kundi mag-eerok dawa sa panahon na daing talaan.”​—Salmo 125:1.

7. Ano an posibleng punto de vista nin saro na dai nagtitiwala nin marigon ki Jehova?

⁷ An siisay man na dai nagtitiwala nin marigon ki Jehova tibaad kabaliktaran an isipon. An mayoriya kan katawohan minamansay an materyal na kayamanan bilang pangenot na paagi sa pagkaigwa nin seguridad. Huli kaini, ineenkaminar nin mga magurang an saindang mga aki na idusay an dakol na panahon kan saindang pagkahoben sa mas halangkaw na edukasyon, na naglalaom na iyan an maandam sa sainda sa mga karerang halangkaw an sueldo. Makamomondo, may mga pamilyang Kristiano na nagdusa nin grabe huli sa pagdusay nin dakol na panahon asin paghihingoa sa mas halangkaw na edukasyon, mantang an saindang mga aki nawaran na nin espirituwal na pagmansay asin materyalistikong mga pasohan na an pinag-aaabot.

8. Anong pagkatimbang an pinapagdadanay nin mga Kristiano?

⁸ Huli kaini, narerealisar nin madonong na mga Kristiano na aplikadong marhay ngonyan an konseho ni Jesus siring kaidtong enot na siglo, asin pinagmamaigotan nindang magdanay na timbang. Dawa kun kaipuhan nindang gumamit nin dakol na  oras sa sekular na trabaho tanganing maasikaso an sono sa Kasuratan na mga paninimbagan, nungka nindang tinotogotan na mapabayaan an mas mahalagang espirituwal na mga bagay huli sa pangangaipong magganar.​—Eclesiastes 7:12.

“Dai Kamo Noarin Man Maghadit”

9. Paano inaasegurar giraray ni Jesus an mga lubos na nagtitiwala ki Jehova?

⁹ Sa saiyang Sermon sa Bukid, sinadol ni Jesus an mga naghihinanyog sa saiya: “Dai kamo noarin man maghadit asin magsabi, ‘Ano an samong kakakanon?’ o, ‘Ano an samong iinomon?’ o, ‘Ano an samong gugubingon?’ Huli ta an gabos na ini iyo an mga bagay na hinahanap na gayo kan mga nasyon. Huli ta an saindong langitnon na Ama nakakaaram na kaipuhan nindo an gabos na bagay na ini.” (Mateo 6:​31, 32) Abaa kanakakaparigon sa boot na mga tataramon! Kun lubos kitang nagtitiwala ki Jehova, yaon sia pirme tanganing suportaran kita. Minsan siring, nakakapapensar man an mga tataramon ni Jesus. Ipinapagirumdom kaiyan sa sato na kun hahanapon “na gayo” niato an materyal na mga bagay, an satong kaisipan arog kan sa “mga nasyon,” mga tawo na bakong tunay na Kristiano.

10. Kan an sarong hoben na lalaki dumolok ki Jesus tanganing humagad nin hatol, paano ihinayag ni Jesus kun ano an pinakanamomotan kan hoben na lalaki?

¹⁰ Sa sarong okasyon, an sarong mayaman na marhay na hoben na lalaki naghapot ki Jesus kun ano an maninigo niang gibohon tanganing magkamit nin buhay na daing katapusan. Ipinagirumdom ni Jesus sa saiya an mga kahagadan kan Ley, na nagpupunsionar pa sa panahon na idto. Inasegurar kan hoben na lalaki si Jesus: “Inotob ko an gabos na ini; ano pa an kulang sa sako?” An simbag ni Jesus tibaad garo baga bakong praktikal para sa dakol. Sia nagsabi: “Kun ika boot na magin sangkap, pabakalan an saimong mga sadiri asin tawan iyan sa mga dukha asin magkakaigwa ka nin kayamanan sa langit, asin madia sumunod ka sa sako.” (Mateo 19:16-21) An hoben na lalaki naghaleng mamondo, huling dai nia maako an mawaran kan saiyang kayamanan. Minsan gurano pa an pagkamoot nia ki Jehova, orog niang namomotan an saiyang mga rogaring.

11, 12. (a) Anong nakakapapensar na mga tataramon an sinabi ni Jesus mapadapit sa kayamanan? b) Paano an mga rogaring puedeng magin kaolangan sa paglilingkod ki Jehova?

¹¹ An pangyayaring iyan naggiya ki Jesus na sabihon an sarong bagay na dai linalaoman: “Magigin masakit para sa sarong mayaman na makalaog sa kahadean kan kalangitan. . . . Mas pasil pa para sa sarong kamelyo na umagi sa labot nin dagom kisa sarong mayaman na makalaog sa kahadean nin Dios.” (Mateo 19:​23, 24) Boot daw sabihon ni Jesus na mayong mayaman na tawo an magmamana kan Kahadean? Dai, huling nagpadagos sia sa pagsabi: “Sa Dios an gabos na bagay posible.” (Mateo 19:​25, 26) Sa katunayan, huli sa tabang ni Jehova an nagkapirang mayaman na tawo kaidto nagin linahidan na mga Kristiano. (1 Timoteo 6:17) Minsan siring, may marahay na dahelan na sinabi ni Jesus an nakakabiglang mga tataramon na idto. Nagtatao sia nin patanid.

¹² Kun an sarong tawo bangkag sa saiyang mga rogaring arog kan mayaman na hoben na lalaking idto, an mga iyan magigin kaolangan sa saiyang bilog na pusong paglilingkod ki Jehova. Totoo iyan sa saro na dati nang mayaman sagkod sa saro na “determinadong yumaman.” (1 Timoteo 6:​9, 10) An sobrang pagsarig sa materyal na mga bagay puedeng magin dahelan na an saro daing gayo ‘makamate kan saiyang espirituwal na pangangaipo.’ (Mateo 5:3) Bilang resulta, tibaad dai man nia mamatean an pangangaipo para sa tabang ni Jehova. (Deuteronomio 6:​10-​12) Tibaad mag-asa sia nin espesyal na tratamiento sa kongregasyon. (Santiago 2:​1-4) Asin puede niang gamiton an kadaklan kan saiyang panahon sa pagpasiramsiram sa saiyang kayamanan imbes na sa paglilingkod ki Jehova.

Kultibaron an Tamang Punto de Vista

13. Ano an salang punto de vista kan mga taga Laodicea?

¹³ An sarong grupo na may salang pagmansay sa mga rogaring iyo an enot na siglong kongregasyon sa Laodicea. Sinabi ni Jesus sa sainda: “Ika nagsasabi: ‘Ako mayaman asin nakatipon nin kayamanan patin dai nagkakaipo nin ano man,’ alagad dai mo naaaraman na ika nasasakitan asin kaherakherak asin dukha asin buta patin huba.” Bako an kayamanan ninda an nagdara sa mga taga Laodicea sa siring na kaherakherak na espirituwal na kamugtakan. Iyan iyo an bagay na nagsarig sinda sa kayamanan imbes na ki Jehova. Bilang resulta, sinda gabinhod sa espirituwal, na madali nang ‘itupga’ sa ngoso ni Jesus.​—Kapahayagan 3:​14-​17.

14. Taano ta angay sa komendasyon ni Pablo an Hebreong mga Kristiano?

 ¹⁴ Sa sarong lado, kinomendaran ni Pablo an Hebreong mga Kristiano sa saindang aktitud durante nin mas naenot na panahon nin paglamag. Sia nagsabi: “Kamo nagpahayag nin pakikidamay sa mga nasa bilanggoan sagkod magayagaya man na inako nindo an pagsamsam sa saindong mga rogaring, sa pakaaram na kamo igwa nin rogaring na orog karahay asin nagdadanay.” (Hebreo 10:34) An mga Kristianong idto dai nanluya nin biyo huli sa pagkawara kan saindang mga rogaring. Napagdanay ninda an saindang kagayagayahan huling padagos nindang pinangaptan an saindang pinakamahalagang rogaring, an saindang “rogaring na orog karahay asin nagdadanay.” Arog kan negosyante sa parabola ni Jesus na isinakripisyo an gabos para sa sarong mamahalon na perlas, determinado sinda na dai butasan an saindang paglaom sa Kahadean, ano man an mangyari. (Mateo 13:​45, 46) Marahayon nanggad na aktitud!

15. Paano inenot nin sarong Kristiana sa Liberia an intereses kan Kahadean?

¹⁵ Dakol sa ngonyan an nagkultibar nin kaparehong marahay na aktitud. Halimbawa, sa Liberia, sarong hoben na Kristiana an inalokan nin oportunidad na mag-eskuela sa unibersidad. Sa nasyon na iyan, minamansay an siring na alok bilang sarong paagi tanganing magkaigwa nin seguradong ngapit. Minsan siring, payunir sia kaidto, sarong bilog na panahon na ebanghelisador, asin nakaresibi sia nin imbitasyon na maglingkod bilang temporaryong espesyal payunir. Pinili nia na hanapon nguna an Kahadean asin magdanay sa bilog na panahon na paglilingkod. Nagduman sia sa saiyang destino asin nakapoon nin 21 pag-adal sa Biblia sa laog nin tolong bulan. An hoben na tugang na babaeng ini asin an rinibong arog nia hinahanap nguna an Kahadean, dawa mawara an posibleng materyal na mga bentaha. Paano ninda napagdadanay an siring na aktitud sa materyalistikong kinaban na ini? Saindang kinultibar an dakol na marahay na kualidad. Pag-olayan niato an nagkapira sa mga ini.

16, 17. (a) Taano ta mahalaga an kababaan nin boot tangani na makapagtiwala kita ki Jehova? (b) Taano ta maninigo niatong kultibaron an pagsarig sa mga panuga nin Dios?

¹⁶ Kababaan nin boot: An Biblia nagsasabi: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana. Dai ka magpakadonong sa saimong sadiring mga mata.” (Talinhaga 3:5-7) Kun beses, an sarong lakdang na gigibohon tibaad garo baga praktikal kun sa kinabanon na punto de vista. (Jeremias 17:9) Pero, an sarong sinserong Kristiano naglalaom ki Jehova para sa paggiya. (Salmo 48:14) ‘Sa gabos niang dalan’​—sa mga bagay na pankongregasyon, edukasyon o sekular na trabaho, pagpaharohayahay, o ano pa man​—​may kababaan nin boot na hinahagad nia an hatol ni Jehova.​—Salmo 73:24.

 ¹⁷ Pagsarig sa mga panuga ni Jehova: Si Pablo nagsabi: “An minadolok sa Dios kaipuhan na magtubod na sia iyo nanggad asin na sia nagigin an parabalos sa mga maigot na naghahanap sa saiya.” (Hebreo 11:6) Kun nagdududa kita na ootobon ni Jehova an saiyang mga panuga, tibaad garo baga makatanosan na ‘gamiton an kinaban na ini nin lubos.’ (1 Corinto 7:31) Sa ibong na lado, kun makosog an satong pagtubod, magigin determinado kita na hanapon nguna an Kahadean. Paano mapapatalubo an makosog na pagtubod? Paagi sa pagrani ki Jehova sa dayaday, odok sa pusong pamibi asin paagi sa regular na personal na pag-adal. (Salmo 1:​1-3; Filipos 4:​6, 7; Santiago 4:8) Kapareho ni Hadeng David, makakapamibi kita: “Sa saimo ako nanarig, O Jehova. Ako nagsabi: ‘Ika an sakuyang Dios.’ Kanigoan kaabunda kan saimong karahayan!”​—Salmo 31:​14, 19.

18, 19. (a) Paano an kahigosan nagpapakosog kan satong pagtitiwala ki Jehova? (b) Taano ta maninigong magin andam an sarong Kristiano na gumibo nin mga pagsasakripisyo?

¹⁸ Kahigosan sa paglilingkod ki Jehova: An pagsarig sa mga panuga ni Jehova ikinonektar ni Pablo sa pagigin mahigos kan sia sumurat: “Minamawot niamo na an lambang saro sa saindo magpaheling kan kaparehong kahigosan tanganing magkaigwa kan lubos na kasiertohan kan paglaom sagkod sa katapusan.” (Hebreo 6:11) Kun kita sibot sa paglilingkod ki Jehova, susuportaran nia kita. Kada maeksperyensiahan niato an suportang iyan, orog na minakosog an satong pagtitiwala sa saiya, kita nagigin “marigon, dai natatanyog.” (1 Corinto 15:58) An satong pagtubod napapakosog giraray, asin an satong paglaom nagigin segurado.​—Efeso 3:​16-​19.

¹⁹ Pagigin andam na gumibo nin mga pagsasakripisyo: Isinakripisyo ni Pablo an may potensial na karera tanganing sumunod ki Jesus. Malinaw nanggad na tama an pinili nia, minsan ngani kun beses masakit an saiyang buhay kun sa materyal na punto de vista. (1 Corinto 4:​11-​13) Si Jehova dai nanunuga nin sarong maluhong buhay, asin kun beses nagtitios nin mga kasakitan an saiyang mga lingkod. An pagigin andam niato na pasimplehon an satong estilo nin pamumuhay asin gumibo nin mga pagsasakripisyo nagpapatunay sa kosog kan satong determinasyon na paglingkodan si Jehova.​—1 Timoteo 6:​6-8.

20. Taano ta mahalagang marhay an pasensia sa saro na ineenot an intereses kan Kahadean?

²⁰ Pasensia: Sinadol ni disipulo Santiago an kapwa mga Kristiano: “Kun siring, magin mapasensia kamo, mga tugang, sagkod sa presensia kan Kagurangnan.” (Santiago 5:7) Sa sibot na kinaban na ini, depisil na magin mapasensia. Gusto niatong mangyari tolos an mga bagay-bagay. Alagad sinasadol kita ni Pablo na arogon idtong “mga nagmamana sa mga panuga paagi sa pagtubod asin pasensia.” (Hebreo 6:12) Magin andam na maghalat ki Jehova. Buhay na daing katapusan sa paraisong daga​—bawi nanggad na halaton iyan!

21. (a) Ano an satong pinapatunayan kun ineenot niato an intereses kan Kahadean? (b) Ano an totokaron sa masunod na artikulo?

²¹ Iyo, praktikal an sadol ni Jesus na hanapon nguna an Kahadean. Kun ginigibo niato iyan, pinapatunayan niato na talagang nagtitiwala kita ki Jehova asin pinipili niato an solamenteng ligtas na paagi nin pamumuhay para sa sarong Kristiano. Minsan siring, sinasadol man kita ni Jesus na padagos na “hanapon nguna an . . . katanosan” nin Dios. Sa masunod na artikulo, maheheling niato kun taano an pagparigon sa boot na iyan ta espesyalmenteng kaipuhan ngonyan.

Ikakapaliwanag daw Nindo?

• Mapadapit sa materyal na mga bagay, dinagka kita ni Jesus na magkaigwa nin anong pagkatimbang?

• Ano an manonodan niato sa ilustrasyon ni Jesus dapit sa kamelyo asin sa labot nin dagom?

• Anong Kristianong mga kualidad an nakakatabang sa sato na hanapon nguna an Kahadean nin Dios?

[Mga Hapot Para sa Pag-adal]

[Ritrato sa pahina 21]

An dakol na nakadangog sa mga tataramon ni Jesus dukha

[Ritrato sa pahina 23]

Isinakripisyo kan negosyante sa parabola ni Jesus an gabos para sa sarong mamahalon na perlas

[Ritrato sa pahina 23]

Mas orog an pagkamoot kan mayaman na hoben na lalaki sa saiyang mga rogaring kisa pagkamoot nia sa Dios

[Ritrato sa pahina 24]

Kun sibot kita sa paglilingkod ki Jehova, susuportaran nia kita