Linapag kan Primero, Dangan Maogmang Inako

NAGKAPIRANG taon na an nakaagi, si Santiago asin an agom nia, si Lourdes, nagbalyo sa magayon na banwaan nin Huillcapata, Peru, tanganing ihiras an mensahe nin paglaom kan Biblia sa mga tawo duman. Minsan siring, dai nahaloy, uminabot an sarong padi hale sa Cuzco asin nagpaapod na magtiripon an mga residente kan banwaan. Pinatanidan sinda kan padi na an presensia kan mga Saksi ni Jehova mabunga nin nakakagadan na damat asin makosog na pag-oran nin niebe na magadan sa saindang mga baka asin maraot sa saindang mga pananom.

Dakol an naimpluwensiahan kan “hulang” ini, asin sa laog nin labing kabangang taon, mayo ni saro sa banwaan an nag-ako kan imbitasyon ni Santiago asin Lourdes na mag-adal sa Biblia. Linapag si Santiago asin Lourdes sa tinampo nin sarong opisyal kan banwaan na an ngaran Miguel, an tenyente gobernador, na dinadaklag sinda nin mga gapo. Alagad pirme sindang guminawe sa mapagpatoninong asin sa Kristianong paagi.

Pag-abot nin panahon, an nagkapirang namamanwaan nag-ako nin pag-adal sa Biblia. Dawa si Miguel nagbago an saiyang aktitud. Nagpoon siang makipag-adal sa Biblia ki Santiago, nagpondo sa sobrang pag-inom, asin nagin mapagpatoninong na tawo. Sa kahurihurihi maogmang inako ni Miguel, kan saiyang agom, asin kan duwa sa saiyang mga aking babae an katotoohan sa Biblia.

Ngonyan, igwa na nin sarong maoswag na kongregasyon kan Mga Saksi ni Jehova sa banwaan na ini. Naogma si Miguel na an kadaklan na gapong idinaklag nia ki Santiago asin Lourdes dai tuminama sa sainda, asin nagpapasalamat sia sa mag-agom huli sa marahayon na halimbawa ninda sa pagigin mapagpatoninong.

[Mga Ritrato sa pahina 32]

An mapagpatoninong na ugale ni Santiago asin Lourdes (na nasa itaas) an nagpabago kan aktitud ni Miguel (na nasa too)