Mga Hapot Hale sa mga Parabasa

Sinasabi kan Salmo 102:26 na an daga asin kalangitan “mapapara.” An tataramon daw na iyan nangangahulogan na an planetang Daga lalaglagon?

Sa sarong pamibi ki Jehova, an salmista nagsabi: “Kaidtong haloy nang panahon ibinugtak mo an mga pundasyon kan daga mismo, asin an kalangitan gibo kan saimong mga kamot. Sinda mismo mapapara, alagad ika mismo magdadanay na nag-eeksister; asin siring sa sarong gubing sinda gabos maluluma. Siring sa gubing sasanglian mo sinda, asin matatapos na man sinda.” (Salmo 102:​25, 26) An konteksto nagpapaheling na an mga bersikulong ini nagtataram, bakong dapit sa paglaglag kan daga, kundi kan pagigin daing sagkod nin Dios. Ipinapaheling man kan konteksto kun taano ta an mahalagang marhay na katotoohan na iyan nakakaranga sa mga lingkod nin Dios.

An salmista, na tibaad desterrado sa Babilonya, nagpoon sa pagsaysay kan saiyang makuring sakit. Sia nagtatangis na an saiyang buhay madaling mawawara “siring sa aso.” Rinaraot nin nakakatarantang kahaditan an saiyang hawak, kaya an pagmate nia an saiyang mga tolang ‘nagbabaga siring sa sarong alisabwan.’ Sia pagal-pagal, “naalang na garo sana pananom,” asin sia napupungaw, “siring sa gamgam na nagsosolo sa ibabaw nin atop.” Dahel sa saiyang mga kasakitan, nawaran sia nin ganang kumakan, asin an saiyang mga aldaw pano nin pagmondo. (Salmo 102:3-11) Dawa siring, an salmista dai biyong nawaran nin pag-asa. Taano ta dai? Huli sa panuga ni Jehova na gigibohon sa Sion, o Jerusalem.

Minsan ngani an Sion linaglag, nanuga si Jehova na iyan ibabalik sa dati. (Isaias 66:8) Kun siring, an salmista kompiadong nagsasabi ki Jehova: “Maheherak ka sa Sion, huli ta iyan an panahon na maherak sa saiya, huli ta nagdatong na an itinalaan na panahon. Huli ta tunay na papatindogon ni Jehova an Sion.” (Salmo 102:​13, 16) Dangan an salmista buminalik sa pagtaram dapit sa saiyang personal na pagdusa. Garo man sana ipinapangatanosan nia na kun an Jerusalem na gaba kayang ibalik sa dati paagi sa kapangyarihan nin Dios, kaya nanggad siang sukorohan ni Jehova sa saiyang miserableng kamugtakan. (Salmo 102:​17, 20, 23) Asin may saro pang bagay na nagpahiro sa salmista na lubos na magtiwala ki Jehova. Ano? An bagay na an Dios daing sagkod.

An daing sagkod na pag-eksister ni Jehova biyong kabaliktaran kan halipot na buhay mismo kan salmista. “An saimong mga taon sa bilog na panahon kan gabos na kapag-arakian,” an sabi nia ki Jehova. (Salmo 102:24) An salmista sunod na nagsabi: “Kaidtong haloy nang panahon ibinugtak mo an mga pundasyon kan daga mismo, asin an kalangitan an gibo kan saimong mga kamot.”​—Salmo 102:25.

Pero, dawa an halawig na pag-eksister kan daga asin kalangitan dai ikakakomparar sa daing sagkod na pag-eksister ni Jehova. Idinugang kan salmista: “Sinda [an daga asin kalangitan] mismo mapapara, alagad ika mismo magdadanay na nag-eeksister.” (Salmo 102:26) An pisikal na daga asin kalangitan puedeng mapara. Totoo na sinabi ni Jehova sa ibang kabtang na an mga iyan magdadanay sagkod lamang. (Salmo 119:90; Eclesiastes 1:4) Alagad an mga iyan puedeng laglagon kun ini an katuyohan nin Dios. Sa kabaliktaran, an Dios dai magagadan. An pisikal na mga linalang ‘nagdadanay sagkod lamang’ huli sana ta pinapagdanay sinda nin Dios. (Salmo 148:6) Kun papapondohon ngani ni Jehova na magbago giraray kan sadiri an pisikal na mga linalang, kun siring, arog “sa sarong gubing sinda gabos maluluma.” (Salmo 102:26) Kun paanong pinaglulumaan asin riniribayan nin tawo an saiyang gubing, garo man lulumaan asin riribayan ni Jehova an saiyang mga linalang​—kun iyan an bobooton niang gibohon. Minsan siring, aram niato sa ibang mga teksto na bako iyan an kabotan nia. Inaasegurar kita kan Tataramon nin Dios na dinesisyonan na ni Jehova na an literal na daga asin kalangitan magdadanay sagkod lamang.​—Salmo 104:5.

Nakakaranga nanggad na maaraman na si Jehova pirmeng yaon tanganing otobon an gabos niang panuga. Ano man na kasakitan an tibaad saparon niato, kun kita mag-agrangay sa saiya, makakakompiar kita na “tunay na hihinanyogon nia an pamibi kan mga hinalean kan gabos, asin dai nia isisikwal an saindang pamibi.” (Salmo 102:17) Iyo, an pag-asegurar ni Jehova na sia masuportar na manonompongan sa Salmo 102 mas masarig pa ngani kisa sa daga na tinotongtongan niato.