Mga Anghel—Kun Paano Sinda Nakakaapekto sa Sato

SA PAGLALADAWAN sa bisyon na naheling nia may koneksion sa pamilya nin mga anghel nin Dios, si propeta Daniel nagsurat: “Manriboribo [na mga anghel] an padagos na naglilingkod sa [Dios], asin manampulong ribo sa manampulong ribo an padagos na nagtitirindog sa atubangan nia.” (Daniel 7:10) Ihinahayag kan bersikulong ini an katuyohan nin Dios sa paglalang nin mga anghel. Sinda maglilingkod sa saiya asin andam na maggibo kan saiyang mga instruksion.

Ginagamit nin Dios an mga anghel tanganing gibohon an nagkapirang bagay may koneksion sa mga tawo. Eestudyaran niato kun paano nia sinda ginagamit tanganing magpakosog asin magprotehir sa saiyang banwaan, magpaabot nin mga mensahe sa mga tawo, asin magsagibo kan paghokom nia sa mga maraot.

An mga Anghel Nagpapakosog Asin Nagpoprotehir

Poon pa kan maheling kan espiritung mga linalang an paglalang kan daga asin kan enot na mga tawo, sinda nagpaheling nin makosog na interes sa katawohan. Nagtataram bilang personipikadong kadonongan, si Jesu-Cristo, sa saiyang buhay bago nagin tawo, nagsabi: “An mga bagay na sakong kinakaogmahan iyaon sa mga aki nin mga tawo.” (Talinhaga 8:31) Asin sinasabi sa sato kan Biblia na “an mga anghel nagmamawot na makaaninaw” sa mga impormasyon manongod ki Cristo asin sa ngapit na ihinayag sa mga propeta nin Dios.​—1 Pedro 1:​11, 12.

Sa pag-agi nin panahon, naobserbaran kan mga anghel na an mayoriya kan pamilya nin tawo dai naglilingkod sa saindang mamomoton na Kaglalang. Seguradong nakapamondo nanggad ini sa maimbod na mga anghel! Sa ibong na lado, basta may sarong nagkasala na nagsosolsol asin nagbabalik ki Jehova, “nagkakaigwa nin kagayagayahan an mga anghel.” (Lucas 15:10) An mga anghel may hararom na pagmakolog sa ikakarahay kan mga naglilingkod sa Dios, asin paorootro sindang ginamit ni Jehova tanganing magpakosog asin magprotehir sa saiyang maimbod na mga lingkod digdi sa daga. (Hebreo 1:14) Estudyare an nagkapirang halimbawa.

Duwang anghel an nagtabang sa matanos na si Lot asin sa saiyang mga aking babae na makaligtas sa kalaglagan kan maraot na mga siudad nin Sodoma asin Gomorra paagi sa pag-alalay sa sainda paluwas  sa lugar na iyan. * (Genesis 19:​1, 15-​26) Pakalihis nin mga siglo, minsan ngani inapon si propeta Daniel sa lungib kan mga leon, dai sia naano. Taano? “An sakuyang Dios nagsugo kan saiyang anghel asin tinikom an ngoso kan mga leon,” an sabi nia. (Daniel 6:22) Tinabangan si Jesus kan mga anghel sa pagpopoon kan saiyang ministeryo sa daga. (Marcos 1:13) Asin dai nahaloy bago magadan si Jesus, sarong anghel an nagpaheling sa saiya asin “pinakosog sia.” (Lucas 22:43) Kanigoan na bendisyon nanggad para ki Jesus an pagsuportar na iyan kan mga anghel sa importanteng mga panahon na idto sa saiyang buhay! Sarong anghel man an nagpatalingkas ki apostol Pedro sa bilanggoan.​—Gibo 12:6-11.

Pinoprotehiran daw kita kan mga anghel ngonyan? Kun sinasamba niato si Jehova oyon sa saiyang Tataramon, nakakaseguro kita na poprotehiran kita kan saiyang makapangyarihan, dai naheheling na mga anghel. An Biblia nanunuga: “An anghel ni Jehova nagkakampo sa palibot kan mga natatakot sa saiya, asin sinda saiyang iliniligtas.”​—Salmo 34:7.

Minsan siring, dapat niatong rekonoseron na sa pangenot an mga anghel naglilingkod sa Dios, bakong sa mga tawo. (Salmo 103:​20, 21) Nagsusunod sinda sa pagdirehir nin Dios, bakong sa mga pag-apod o kahagadan nin mga tawo. Huli kaini, an dapat na hagadan niato nin tabang iyo si Jehova Dios, bakong an mga anghel. (Mateo 26:53) Siempre, mantang dai niato naheheling an mga anghel, dai niato madedeterminaran kun sagkod saen sinda ginagamit nin Dios sa pagtabang sa mga tawo sa manlaenlaen na bagay. Alagad aram niato na ‘ipinapaheling ni Jehova an saiyang kosog para duman sa mga an puso kompleto para sa saiya.’ (2 Cronica 16:9; Salmo 91:11) Asin igwa kita kan garantiya na “minsan ano an satong hagadon segun sa saiyang kabotan, dinadangog nia [nin Dios] kita.”​—1 Juan 5:14.

Sinasabi man sa sato kan Kasuratan na an satong mga pamibi asin pagsamba maninigo na idirekta sana sa Dios. (Exodo 20:3-5; Salmo 5:​1, 2; Mateo 6:9) Ineenkaminar kita kan maimbod na mga anghel na gibohon iyan. Halimbawa, kan probaran ni apostol Juan na sambahon an sarong anghel, sinaway sia kan espiritung linalang na iyan, na nagsasabi: “Mag-ingat ka! Dai mo iyan paggibohon! . . . Sumamba ka sa Dios.”​—Kapahayagan 19:10.

An mga Anghel Naghahatod nin mga Mensahe kan Dios

An terminong “anghel” nangangahulogan “mensahero,” asin iyan an saro pang paagi nin paglilingkod kan mga anghel sa Dios​—bilang mga mensahero nia sa mga tawo. Halimbawa, “an anghel na si Gabriel isinugo hale sa Dios pasiring sa siudad nin Galilea na an ngaran Nazaret.” Taano? Tanganing sabihan an sarong hoben na babae na an ngaran Maria na minsan ngani sia daraga, sia mangingidam sa saiyang matris asin mangangaki nin sarong aking lalaki na aapodon na Jesus. (Lucas 1:26-31) Ipinadara man an sarong anghel sa mga pastor sa oma tanganing baretaan sinda na namundag na “si Cristo na Kagurangnan.” (Lucas 2:8-11) Siring man, an mga anghel naghatod nin mga mensahe hale sa Dios pasiring ki Abraham, Moises, Jesus, asin iba pa na nasambitan sa Biblia.​—Genesis 18:1-5, 10; Exodo 3:​1, 2; Lucas 22:39-43.

Paano naglilingkod an mga anghel bilang mga mensahero nin Dios ngonyan? Estudyare an gibohon na ihinula ni Jesus na gigibohon kan saiyang mga parasunod bago an katapusan kan sistemang ini nin mga bagay. Sia nagsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:​3, 14) Taon-taon, an Mga Saksi ni Jehova naggagamit nin labing sarong bilyon na oras sa paghuhulit kan maogmang bareta manongod sa Kahadean nin Dios. Alagad aram daw nindo na imbuelto man an mga anghel sa gibohon na  ini? Sinambit ni apostol Juan an sarong bisyon na naheling nia, na nagsasabi: “Naheling ko an saro pang anghel . . . , asin igwa sia nin daing katapusan na maogmang bareta na ipapahayag bilang nakakaogmang notisya sa mga nag-eerok sa daga, asin sa lambang nasyon asin tribo asin tataramon patin banwaan.” (Kapahayagan 14:​6, 7) Itinatampok kan tekstong ini an pangenot na gibohon nin mga anghel para sa mga tawo ngonyan.

Naheheling kan Mga Saksi ni Jehova an ebidensia kan paggiya nin mga anghel mantang isinasagibo ninda an saindang paghuhulit sa harong-harong. Sa parate nakakaolay ninda an mga indibiduwal na namimibi pa sanang may magtabang sa sainda na masabotan an mga katuyohan nin Dios. Bilang resulta kan paggiya nin mga anghel asin kan inisyatiba mismo kan mga Saksi, kada taon ginatos na ribo an nakakamidbid ki Jehova. Logod na makinabang kamo sa nagliligtas-buhay na gibohon na ini sa irarom kan paggiya nin mga anghel.

Isinasagibo kan mga Anghel an Paghokom nin Dios

Minsan ngani dai sinda inautorisaran na maghokom sa mga tawo, an mga anghel bakong mga paramasid sana. (Juan 5:22; Hebreo 12:​22, 23) Naglilingkod bilang mga parakastigo, isinagibo ninda an mga paghokom nin Dios kan nakaaging mga panahon. Halimbawa, ginamit nin Dios an mga anghel sa pakikipaglaban nia tumang sa suanoy na mga Egipcio, na nan-ooripon sa mga Israelita. (Salmo 78:49) Asin sa laog sana nin sarong banggi na ginadan kan “anghel ni Jehova” an sanggatos may walong polo may limang ribong soldados sa kampo nin kaiwal kan banwaan nin Dios.​—2 Hade 19:35.

Sa ngapit man, isasagibo kan mga anghel an paghokom nin Dios na bakong paborable. Si Jesus madatong “kaiba an saiyang makapangyarihan na mga anghel sa naglalaad na kalayo, kun sia mamalos na sa mga dai nakakamidbid sa Dios asin sa mga dai nagkukuyog kan maogmang bareta.” (2 Tesalonica 1:​7, 8) Pero, an paglaglag na iyan gigibohon sana sa mga dai naghihimate sa mensahe na ihinuhulit ngonyan sa bilog na daga sa tabang kan mga anghel. An mga naghahanap sa Dios asin nagsusunod sa mga katokdoan na sono sa Kasuratan dai mapapahamak.​—Sofonias 2:3.

Makakapagpasalamat nanggad kita sa maimbod na mga anghel, na pirmeng nagsasagibo kan mga instruksion nin Dios! Ginagamit sinda ni Jehova tanganing magtabang asin magprotehir sa saiyang maimbod na mga lingkod sa daga. Partikularmenteng nakakaranga ini sa sato huli ta igwa nin peligrosong espiritung mga linalang na inaapod na mga demonyo na gustong mandanyar sa sato.

Mga Demonyo—Siisay Sinda?

Kan suminunod na 15 siglo pagkatapos na dayaon ni Satanas si Eva sa Eden, naheling kan pamilya nin mga anghel nin Dios na nagin mapanggana si Satanas na Diablo na patalikodon sa Dios an gabos na tawo apuera sa pira  sanang maimbod, siring ki Abel, Enoc, asin Noe. (Genesis 3:1-7; Hebreo 11:​4, 5, 7) May mga anghel man na suminunod ki Satanas. Inaapod sinda kan Biblia na masumbikal na mga espiritu “kan mga aldaw ni Noe.” (1 Pedro 3:​19, 20) Paano nagin risang-risa an saindang kasumbikalan?

Kan panahon ni Noe binayaan kan rebeldeng mga anghel na dai masabi an kabilangan an saindang lugar sa langitnon na pamilya nin Dios, buminaba sa daga, asin nagmateryalisar nin hawak na laman. Taano? Nagkaigwa sinda nin pagmawot na makidorog sa mga babae. Nagbunga ini nin pagkaigwa ninda nin mga aki na inapod na mga Nefilim, na nagin madahas na mga higante. Dugang pa, “an karatan nin tawo abunda na sa daga asin an gabos na tendensia kan mga kaisipan kan saiyang puso danay na maraot na sana.” Minsan siring, dai itinogot ni Jehova Dios na magpadagos an pagraot na ini nin katawohan. Nagpaabot sia nin sarong Baha na lakop sa globo, na guminadan sa gabos na maraot na tawo kaiba an mga Nefilim. An natada sanang buhay iyo an maimbod na mga lingkod nin Dios.​—Genesis 6:1-7, 17; 7:23.

An rebeldeng mga anghel nakadulag sa kalaglagan kan panahon kan Baha. Binayaan ninda an saindang hawak na laman asin nagbalik sa rona nin mga espiritu bilang espiritung mga linalang. Pakatapos kaiyan, inapod na sindang mga demonyo. Kuminampi sinda ki Satanas na Diablo, na inapod na “an namamahala sa mga demonyo.” (Mateo 12:24-27) Kapareho kan namamahala sa sainda, an mga demonyo naghihimuyawot na sambahon sinda nin mga tawo.

Peligroso an mga demonyo, alagad dai kita kaipuhan na matakot nin grabe sa sainda. Limitado an saindang kapangyarihan. Kan buminalik sa langit an masumbikal na mga anghel, dai na sinda tinogotan na bumalik sa pamilya nin maimbod na mga anghel nin Dios. Imbes, mayo na sinda nin ano man na espirituwal na kaliwanagan hale sa Dios, na mayo nang paglaom para sa ngapit. Sa katunayan, sinda linaom sa sarong kamugtakan nin espirituwal na kadikloman na inaapod na Tartaro. (2 Pedro 2:4) Pinogolan sinda ni Jehova paagi sa “daing sagkod na mga gapos,” kaya sinda nasa espirituwal na kadikloman. Apuera kaini, dai na ninda kaya ngonyan na magmateryalisar sa hawak nin tawo.​—Judas 6.

Ano an Maninigo Nindong Gibohon?

An mga demonyo daw igwa pa man giraray nin impluwensia sa mga tawo? Iyo, ginigibo ninda iyan paagi sa paggamit nin “mga pakana,” o “katusohan,” na arog kan ginagamit kan namamahala sa sainda, si Satanas na Diablo. (Efeso 6:​11, 12) Minsan siring, paagi sa pag-aplikar kan hatol sa Tataramon nin Dios, puede kitang manindogan nin marigon tumang sa mga demonyo. Dugang pa, an mga namomoot sa Dios pinoprotehiran kan makapangyarihan na mga anghel.

Mahalagang marhay nanggad na pag-adalan nindo an manongod sa mga kahagadan nin Dios na manonompongan sa Kasuratan asin isagibo an nanonodan nindo! Makakanood kamo nin orog pa manongod sa mga katokdoan kan Biblia paagi sa pagkontak sa mga Saksi ni Jehova sa saindong lugar o paagi sa pagsurat sa mga kagpublikar kan magasin na ini. Maoogma an mga Saksi ni Jehova na adalan kamo sa Biblia na daing bayad asin sa kombenyenteng oras nindo.

[Nota sa Ibaba]

[Kahon sa pahina 6]

MGA ANGHEL​—KUN PAANO AN PAGKAORGANISAR SA SAINDA

Inorganisar ni Jehova an saiyang dakulaon na pamilya nin mga anghel segun sa minasunod:

An anghel na pangenot sa kapangyarihan asin autoridad iyo si Miguel na arkanghel, o si Jesu-Cristo. (1 Tesalonica 4:16; Judas 9) An mga serafin, kerubin, asin iba pang anghel sakop nia.

An mga serafin may halangkawon na katongdan sa areglo nin Dios. Sinda an nag-aasikaso sa trono nin Dios. Kabale sa asignasyon ninda an pagpahayag kan kabanalan nin Dios asin pagpapadanay sa saiyang banwaan na malinig sa espirituwal.​—Isaias 6:1-3, 6, 7.

An mga kerubin nasa kaibanan kan trono nin Dios asin sinusuportaran ninda an kamahalan ni Jehova.​—Salmo 80:1; 99:1; Ezequiel 10:​1, 2.

An ibang anghel mga ahente ni Jehova, asin ginigibo ninda an kabotan nin Dios.

[Ritrato sa pahina 4]

Si Lot asin an saiyang mga aking babae inalalayan kan mga anghel pasiring sa lugar na harayo sa peligro

[Ritrato sa pahina 5]

Kan probaran ni apostol Juan na sambahon an anghel, sinabihan sia: “Dai mo iyan paggibohon!”

[Ritrato sa pahina 6]

Isinasagibo kan mga anghel an paghokom nin Dios

[Ritrato sa pahina 7]

Nakikinabang daw kamo sa paghuhulit na ginigibo sa irarom kan paggiya nin mga anghel?