Mga Hapot Hale sa mga Parabasa

Duwa daw sanang tabla nin gapo an laog kan kaban kan tipan, o may iba pa daw na laog iyan?

Sa panahon kan dedikasyon kan templo ni Salomon kan 1026 B.C.E., “mayo nin ano man sa Kaban kundi an duwang tabla na itinao ni Moises sa Horeb, kan si Jehova makipagtipan sa mga aki ni Israel mantang paluwas sinda sa Egipto.” (2 Cronica 5:10) Minsan siring, bakong pirmeng arog kaini an kamugtakan.

“Kan ikatolong bulan pagkaluwas kan mga aki ni Israel sa daga nin Egipto,” naglaog sinda sa kaawagan nin Sinai. (Exodo 19:​1, 2) Pagkatapos kaiyan, nagtukad si Moises sa Bukid nin Sinai asin naresibi an duwang tablang gapo kan Ley. Sia nagsasaysay: “Dangan buminirik ako asin luminugsad sa bukid asin ibinugtak an mga tabla sa kaban na ginibo ko, tanganing magdanay an mga iyan dian, siring sa ipinagboot ni Jehova sa sako.” (Deuteronomio 10:5) Ini sarong temporaryong kaban, o lalagan, na ipinagibo ni Jehova ki Moises bilang laganan kan mga tabla kan Ley. (Deuteronomio 10:1) An kaban kan tipan natapos kaidto sanang mga katapusan nin 1513 B.C.E.

Dai nahaloy pagkakalda ninda sa Egipto, an mga Israelita nagpoon na maggurumodgumod manongod sa kakanon. Kaya tinawan sinda ni Jehova nin mana. (Exodo 12:​17, 18; 16:1-5) Kan panahon na iyan, ininstruksionan ni Moises si Aaron: “Kumua ka nin sarong dulay asin bugtakan mo iyan nin sarong omer na mana asin ibugtak mo iyan sa atubangan ni Jehova bilang bagay na iingatan sa bilog nindong kapag-arakian.” An pagkasaysay nagsasabi: “Siring sa ipinagboot ni Jehova ki Moises, ibinugtak iyan ni Aaron sa atubangan kan Pagpatotoo [sarong artsibo na sarayan nin mahalagang mga dokumento] bilang bagay na iingatan.” (Exodo 16:​33, 34) Minsan ngani daing duda na nagkua si Aaron nin mana na ibinugtak sa sarong dulay kan panahon na iyan, an pagbugtak kaiyan sa atubangan kan Pagpatotoo kaipuhan na maghalat sagkod na magibo ni Moises an Kaban asin ikabugtak dian an mga tabla.

Arog kan ipinaliwanag na, an kaban kan tipan nahaman nin huri kan 1513 B.C.E. An sogkod ni Aaron mas huri nang ibinugtak sa Kaban na iyan, pagkatapos kan pagrebelde ni Core asin kan iba pa. Nasambitan ni apostol Pablo “an kaban kan tipan . . . , na nasa laog kaiyan an bulawan na dulay nin mana asin an sogkod ni Aaron na nagsupang asin an mga tabla kan tipan.”​—Hebreo 9:4.

An mana iyo an probisyon nin Dios durante kan 40 taon na temporaryong pag-istar kan mga Israelita sa kaawagan. Dai na iyan itinao kan “nagpoon sindang kumakan kan ani kan [dagang]” ipinanuga. (Josue 5:​11, 12) An sogkod ni Aaron ibinugtak sa kaban kan tipan para sa sarong katuyohan​—tanganing magserbing tanda o patotoo tumang sa rebeldeng kapag-arakian. Isinusuherir kaini na an sogkod nagdanay duman kisuerra durante kan pagbaklay ninda sa kaawagan. Kun siring, garo baga lohikong ikonklusyon na pakalihis nin pirang panahon pagkalaog kan Israel sa Dagang Panuga asin bago an pagdedikar kan templo ni Salomon, an sogkod ni Aaron asin an bulawan na dulay nin mana hinale sa kaban kan tipan.