Tumangon Nindo si Satanas, Asin Sia Madulag!

“Pumasakop kamo sa Dios; alagad tumangon nindo an Diablo, asin sia madulag sa saindo.”​—SANTIAGO 4:7.

1, 2. (a) Anong karakteristiko kan Diablo an nababanaag sa mga tataramon na nakasurat sa Isaias kapitulo 14? (b) Anong mga hapot an satong totokaron?

AN Diablo iyo an personipikasyon nin kapaabaw-abawan. An saiyang kapalangkawan nababanaag sa mga tataramon na isinurat kan propeta nin Dios na si Isaias. Labing sarong siglo bago magin nangingibabaw na kapangyarihan pankinaban an Babilonya, ilinaladawan an banwaan ni Jehova na nagpapahayag kaini tumang sa “hade nin Babilonya”: “Ika nagsabi sa saimong puso, ‘Masakat ako sa kalangitan. Ilalangkaw ko an sakuyang trono sa ibabaw kan mga bitoon nin Dios [mga hade sa makahadeng linya ni David] . . . Gigibohon ko an sadiri ko na kabaing kan Kaharohalangkawe.’ ” (Isaias 14:​3, 4, 12-15; Bilang 24:17) An kapalangkawan kan “hade nin Babilonya” pareho kan espiritu ni Satanas, an “dios kan sistemang ini nin mga bagay.” (2 Corinto 4:4) Alagad an kapaabaw-abawan ni Satanas matatapos sa grabeng kapahamakan, kun paanong an dinastiya kan Babilonya natapos sa makasusupog na paagi.

² Minsan siring, sagkod na nag-eeksister an Diablo, tibaad interesado kita sa mga hapot na arog kaini: Maninigo daw kitang matakot ki Satanas? Taano ta sinusutsutan nia an mga tawo na paglamagon an mga Kristiano? Paano niato malilikayan na masaroan kan Diablo?

Maninigo daw Kitang Matakot sa Diablo?

3, 4. Taano an linahidan na mga Kristiano asin an saindang kairiba ta dai natatakot sa Diablo?

³ Nakakapakosog na marhay sa linahidan na mga Kristiano an mga tataramon na ini ni Jesu-Cristo: “Dai ka matakot sa mga bagay na saimong titioson. Uya! Ibibilanggo kan Diablo an nagkapira sa saindo tanganing kamo lubos na mabalo, asin tanganing magkaigwa kamo nin kahorasaan sa laog nin sampulong aldaw. Patunayan mo na ika maimbod dawa sagkod sa kagadanan, asin ta itatao ko sa saimo an korona nin buhay.” (Kapahayagan 2:10) An mga linahidan asin an saindang kairiba na may daganon na paglaom dai natatakot sa Diablo. An kawaran na ini nin takot bakong huli sa natural na kosog nin boot. Igwa sinda kaiyan huling may reberensial na takot sinda sa Dios asin ‘minapaili sa lindong kan saiyang mga pakpak.’​—Salmo 34:9; 36:7.

⁴ An daing takot na enot na mga disipulo ni Jesu-Cristo nagin maimbod sagkod sa kagadanan sa ibong kan mga bagay na inagihan ninda. Dai sinda nagpadaog sa takot sa kun ano an kayang gibohon ni Satanas na Diablo, ta aram ninda na nungkang babayaan ni Jehova an mga maimbod sa Saiya. Sa kaagid na paagi, sa ibong nin makosog na paglamag sa presenteng panahon, an linahidan na mga Kristiano asin an saindang nagdusay na kairiba determinadong dai raoton an saindang integridad sa Dios. Minsan siring, sinabi ni apostol Pablo  na an Diablo puedeng magpangyari nin kagadanan. Bako daw na maninigo niatong ikatakot iyan?

5. Ano an manonodan niato sa Hebreo 2:​14, 15?

⁵ Sinabi ni Pablo na si Jesus ‘nakikabtang sa dugo asin laman’ tangani na “paagi sa saiyang kagadanan mapara nia an saro na igwa kan kapangyarihan na magpangyari nin kagadanan, an boot sabihon, an Diablo; asin tanganing matawan nia nin katalingkasan an gabos na huli sa pagkatakot sa kagadanan napairarom sa kaoripnan sa bilog nindang pagkabuhay.” (Hebreo 2:​14, 15) Bilang “an saro na igwa kan kapangyarihan na magpangyari nin kagadanan,” kinontrol ni Satanas si Judas Iscariote dangan ginamit an Judiong mga namomoon asin an mga Romano tanganing gadanon si Jesus. (Lucas 22:3; Juan 13:​26, 27) Minsan siring, paagi sa saiyang kagadanan bilang atang, pinapatalingkas ni Jesus an makasalan na katawohan sa pamomogol ni Satanas asin ginigibong posible para sa sato na magkaigwa nin buhay na daing katapusan.​—Juan 3:16.

6, 7. Sagkod saen an kapangyarihan ni Satanas na magpangyari nin kagadanan?

⁶ Sagkod saen an kapangyarihan kan Diablo na magpangyari nin kagadanan? Bueno, poon sa kapinonan kan maraot na mga gibo ni Satanas, an saiyang mga kaputikan asin paggiya nagpangyari nin kagadanan sa mga tawo. Ini huli ta nagkasala si Adan asin sa siring ipinamana an kasalan asin kagadanan sa pamilya nin tawo. (Roma 5:12) Dugang pa, pinaglalamag kan daganon na mga lingkod ni Satanas an mga parasamba ki Jehova, na kun beses sagkod sa kagadanan, siring kan ginibo ninda ki Jesu-Cristo.

⁷ Minsan siring, dai niato maninigong isipon na kaya kan Diablo na magpangyari nin kagadanan sa siisay man na indibiduwal na gusto niang gadanon. Pinoprotehiran nin Dios an mga sadiri Nia asin nungka niang totogotan si Satanas na pohoon an gabos na tunay na parasamba digdi sa daga. (Roma 14:8) Totoo, itinotogot ni Jehova na umagi nin paglamag an saiyang bilog na banwaan, asin itinotogot niang umagi nin kagadanan an nagkapira sa sato bilang resulta kan mga pagsalakay kan Diablo. Pero, itinatao kan Kasuratan an makangangalas na paglaom na pagkabuhay liwat para sa mga nasa “libro nin girumdoman” nin Dios​—asin an Diablo mayo nanggad nin magigibo na olangon an siring na pagbabalik kan buhay!​—Malaquias 3:​16; Juan 5:​28, 29; Gibo 24:15.

Taano ta Pinaglalamag Kita ni Satanas?

8. Taano ta pinaglalamag kan Diablo an mga lingkod nin Dios?

⁸ Kun kita maimbod na mga lingkod nin Dios, may pundamental na dahelan an Diablo na paglamagon kita. An saiyang katuyohan iyo na ikakompromiso niato an satong pagtubod. Igwa kita kan mahalagang marhay na relasyon sa satong langitnon na Ama, asin minamawot ni Satanas na raoton iyan. Dai ta ini maninigong ipagngalas. Sa Eden, ihinula ni Jehova na magkakaigwa nin pag-iiwal sa pag-oltanan kan saiyang simbolikong “babae” asin kan “halas” asin sa pag-oltanan kan saindang ‘mga banhi.’ (Genesis 3:​14, 15) Ipinapamidbid kan Kasuratan an Diablo bilang  “an enot na halas” asin ihinahayag na halipot na ngonyan an saiyang panahon asin dakula an saiyang kaanggotan. (Kapahayagan 12:​9, 12) Mantang nagpapadagos an pag-iiwal sa pag-oltanan kan duwang “banhi,” an mga maimbod na naglilingkod ki Jehova makakaasa na paglalamagon sinda. (2 Timoteo 3:12) Aram daw nindo an pundamental na dahelan kan siring na paglamag ni Satanas?

9, 10. Anong isyu an ibinangon kan Diablo, asin ano an koneksion dian kan gawe-gawe kan mga tawo?

⁹ Ibinangon kan Diablo an isyu nin unibersal na soberaniya. May koneksion dian, kinuestion nia an integridad kan mga tawo sa saindang Kaglalang. Pinaglamag ni Satanas an tanos na tawong si Job. Taano? Tanganing raoton an integridad ni Job ki Jehova. An agom ni Job asin an tolo niang “pararangang nakakaparibok” nagamit sa katuyohan kan Diablo sa panahon na idto. Siring kan ipinapaheling sa libro nin Job, inangat kan Diablo an Dios, na hinihingako na mayong tawo an magdadanay na maimbod sa Saiya kun totogotan si Satanas na baloon an tawong iyan. Alagad nanindogan nin marigon si Job sa saiyang integridad, na sa siring pinapatunayan na si Satanas sarong putikon. (Job 1:8–​2:9; 16:2; 27:5; 31:6) Pinaglalamag kan Diablo an mga Saksi ni Jehova ngonyan sa paghihingoang raoton an saindang integridad asin patunayan na totoo an saiyang angat.

¹⁰ An totoo, makakatabang sa sato na magpakarigon nin boot asin magpakakosog an pakaaram na pinaglalamag kita kan Diablo huling may pagkadesesperar na minamawot niang raoton an satong integridad sa Dios. (Deuteronomio 31:6) An satong Dios iyo an Unibersal na Soberano, asin tatabangan nia kita na papagdanayon an satong integridad. Pirme logod na pagmaigotan ta na pagayagayahon an puso ni Jehova paagi sa pagigin mga nagdadanay na may integridad, na tinatawan sia nin ikakasimbag sa dakulang paratuya, si Satanas na Diablo.​—Talinhaga 27:11.

“Iligtas Mo Kami sa Maraot”

11. Ano an boot sabihon kan kahagadan na, “Dai mo kami darahon sa sugot”?

¹¹ An pagigin nagdadanay na may integridad bakong simpleng bagay; nangangaipo iyan nin odok na pamibi. Nangorognang nakakatabang an mga tataramon sa modelong pamibi. Sa sarong kabtang, si Jesus nagsabi: “Dai mo kami darahon sa sugot, kundi iligtas mo kami sa maraot.” (Mateo 6:13) Dai kita sinusugotan ni Jehova na magkasala. (Santiago 1:13) Minsan siring, kun beses sinasabi kan Kasuratan na sia an naggigibo o nagpapangyari sa mga bagay-bagay, mantang, an totoo, itinotogot sana nia an mga iyan. (Rut 1:​20, 21) Kun siring, paagi sa pagpamibi nin siring kan sinabi ni Jesus, hinahagad niato ki Jehova na dai kita pagpabayaan na mahulog sa sugot. Asin dai nia kita babayaan, huling yaon sa sato an garantiyang ini kan Kasuratan: “Maimbod an Dios, asin dai nia itotogot na kamo masugotan nin labi sa saindong makakaya, kundi kaibahan kan sugot matao man sia nin luluwasan tanganing iyan matagalan nindo.”​—1 Corinto 10:13.

12 Taano ta namimibi kita na: “Iligtas mo kami sa maraot”?

¹² Pagkatapos na masambitan an sugot sa modelong pamibi, angay nanggad na sinabi ni Jesus: “Iligtas mo kami sa maraot.” An sarong traduksion nin Biblia nagsasabi: “Protehiran mo kami sa maraot.” (Contemporary English Version) Minsan siring, sa Kasuratan, an pananaram na ‘iligtas sa’ ginagamit sa pangenot mapadapit sa mga tawo, asin an Ebanghelyo ni Mateo inaapod an Diablo bilang “an Parasugot,” sarong persona. (Mateo 4:​3, 11) Kaya mahalaga na mamibi na logod iligtas kita sa “maraot,” si Satanas na Diablo. Pinagmamaigotan niang papagkasalaon kita sa Dios. (1 Tesalonica 3:5) Kun satong hinahagad na, “Iligtas mo kami sa maraot,” nakikiolay kita sa satong langitnon na Ama na giyahan asin tabangan kita tanganing dai kita masaroan kan Diablo.

 Dai Togotan na Masaroan Kamo kan Diablo

13, 14. Taano ta kinaipuhan kan mga taga Corinto na bagohon an saindang pagtratar sa sarong tawo sa kongregasyon na dating inmoral?

¹³ Kan sadolon ni Pablo an mga Kristiano sa Corinto na magin mapagpatawad, sia nagsurat: “An ano man na bagay na maboot nindong ipinapatawad sa siisay man, ipinapatawad ko man. Sa katunayan, kun para sa sako, an ano man na maboot kong ipinatawad, kun ako maboot na nagpatawad nin ano man na bagay, idto para sa kapakanan nindo sa pagheling ni Cristo; tanganing dai kita masaroan ni Satanas, huli ta bako kitang ignorante sa saiyang mga pakana.” (2 Corinto 2:​10, 11) Puede kitang masaroan kan Diablo sa manlaenlaen na paagi, alagad taano ta sinabi ni Pablo an mga tataramon na kinotar pa sana?

¹⁴ Sinagwe ni Pablo an mga taga Corinto huling tinogotan ninda an sarong inmoral na tawo na magdanay sa kongregasyon. Seguradong nagpaogmang marhay ini ki Satanas, ta nagkaigwa nin katuyawan an kongregasyon huli sa pagkonsinte sa ‘siring na pakikisaro na dai nin kaagid minsan sa tahaw kan mga nasyon.’ Pag-abot nin panahon, itiniwalag an paragibo nin maraot. (1 Corinto 5:​1-5, 11-​13) Nagsolsol sa huri an tawong idto. Kun habo kan mga taga Corinto na patawadon asin ibalik an tawong idto, masasaroan sinda kan Diablo sa saro pang paagi. Taano man? Magigin sindang maringis asin mayong pagkaherak, kapareho ni Satanas mismo. Kun an nagsosolsol na tawong idto “madaog kan saiyang pagigin labi-labi kamamondo” asin biyo nang sumuko, an kamagurangan an nangorognang may paninimbagan sa bagay na ini sa atubangan kan maheherakon na Dios, si Jehova. (2 Corinto 2:7; Santiago 2:​13; 3:1) Siempre, mayong tunay na Kristiano an gustong arogon si Satanas sa pagigin maisog, maringis, asin mayong pagkaherak.

Protektado kan Pangalasag Hale sa Dios

15. Anong pakikilaban an isinasagibo niato, asin saen nakadepende an kapangganahan?

¹⁵ Tangani na kita makaligtas sa Diablo, dapat kitang makilaban sa espirituwal na paagi tumang sa maraot na mga puersang espiritu. An kapangganahan sa siring na mga kalaban nagdedepende sa pagsulog niato kan “bilog na pangalasag hale sa Dios.” (Efeso 6:​11-​18) Kaiba sa pangalasag na ini “an takop sa daghan na katanosan.” (Efeso 6:14) Si Hadeng Saul kan suanoy na Israel nakisuway sa Dios asin nawara sa saiya an banal na espiritu. (1 Samuel 15:​22, 23) Alagad kun nagsasagibo kita nin katanosan asin sulog an kompletong espirituwal na pangalasag, mapapasatuya an banal na espiritu nin Dios asin an kinakaipuhan na proteksion tumang ki Satanas asin sa saiyang maraot na mga anghel, an mga demonyo.​—Talinhaga 18:10.

16. Paano kita magkakaigwa nin padagos na proteksion tumang sa maraot na mga puersang espiritu?

¹⁶ Para sa padagos na proteksion tumang sa maraot na mga puersang espiritu, kaipuhan niato na, kabilang sa iba pang bagay, regular na basahon asin pag-adalan an Tataramon nin Dios, na ginagamit sa marahay na paagi an mga publikasyon na itinatao paagi sa “maimbod na mayordomo.” (Lucas 12:42) Sa siring, pinapano niato an satong isip nin kapakipakinabang na espirituwal na mga bagay, na kaoyon kan hatol ni Pablo: “Mga tugang, ano man na totoo, ano man na seryosong bagay, ano man na matanos, ano man na malinig, ano man na madaling kamotan, ano man na marahay an dangog, ano man na moral na karahayan asin ano man na inoomaw, padagos na horophoropon an mga bagay na ini.”​—Filipos 4:8.

17. Ano an makakatabang sa sato na magin epektibong mga parabalangibog kan maogmang bareta?

 ¹⁷ Pinapangyari ni Jehova na an satong ‘bitis masapinan kan kasangkapan kan maogmang bareta nin katoninongan.’ (Efeso 6:15) An regular na pagpartisipar sa Kristianong mga pagtiripon nagsasangkap sa sato na ibalangibog an maogmang bareta kan Kahadean nin Dios. Kanigoan na kagayagayahan an nakukua niato sa pagtabang sa iba na makanood kan katotoohan nin Dios asin makaeksperyensia nin espirituwal na katalingkasan! (Juan 8:32) Kaipuhan nanggad “an espada kan espiritu, arin na baga, an tataramon nin Dios,” sa paglaban sa falsong mga katokdoan asin sa “pagtumba sa mga bagay na marigonon an pundasyon.” (Efeso 6:​17; 2 Corinto 10:​4, 5) An ekspertong paggamit kan nasusurat na Tataramon nin Dios, an Biblia, nagtatabang sa sato na itokdo an katotoohan asin nagpoprotehir sa sato sa pagpadaog sa mga pakana kan Diablo.

18. Paano kita ‘marigon na makakapanindogan tumang sa mga pakana kan Diablo’?

¹⁸ Pinonan ni Pablo an saiyang pagtokar sa satong espirituwal na pangalasag sa pagsabing: “Padagos kamong magkaigwa nin kosog sa Kagurangnan asin sa kapangyarihan kan saiyang kosog. Isulog nindo an bilog na pangalasag hale sa Dios tanganing kamo marigon na makapanindogan tumang sa mga pakana [“katusohan,” nota sa ibaba] kan Diablo.” (Efeso 6:​10, 11) An termino sa Griego na trinadusir na “marigon na makapanindogan” konektado sa pagdadanay nin sarong soldados sa saiyang posisyon. Nagdadanay kitang marigon sa satong espirituwal na pakikilaban, maski ngani naggagamit si Satanas nin manlaenlaen na tusong paagi sa saiyang paghihingoa na raoton an satong pagkasararo, raoton an satong mga katokdoan, o raoton an satong integridad sa Dios. Alagad an mga pananalakay kan Diablo dai nagin mapanggana sagkod sa presente​—asin dai nanggad iyan magigin mapanggana! *

Tumangon Nindo an Diablo, Asin Sia Madulag

19. Ano an sarong paagi nin pagtumang sa Diablo?

¹⁹ Puede kitang magin mapanggana sa satong espirituwal na pakikilaban tumang sa Diablo asin sa maraot na mga puersang espiritu na saiyang pinapangenotan. Mayong rason na magtakig huli sa takot ki Satanas, huling an disipulong si Santiago nagsurat: “Pumasakop kamo sa Dios; alagad tumangon nindo an Diablo, asin sia madulag sa saindo.” (Santiago 4:7) An sarong paagi nin pagtumang ki Satanas asin sa kaiba niang maraot na espiritung mga linalang iyo an dai pakikilabot sa okulto o mga gibo nin mahika asin sa mga nagsasagibo kaiyan. Malinaw na ipinapaheling kan Kasuratan na an mga lingkod ni Jehova dapat na dai maghanap nin mga signos o makilabot sa astrolohiya, pagtoodtood, asin espiritismo. Kun kita aktibo asin makosog sa espirituwal, dai kita kaipuhan na matakot na may man-eengkanto sa sato.​—Bilang 23:23; Deuteronomio 18:10-​12; Isaias 47:12-​15; Gibo 19:18-​20.

20. Paano niato matutumang an Diablo?

²⁰ Satong ‘tinutumang an Diablo’ paagi sa pagsunod sa mga pamantayan asin katotoohan kan Biblia asin paagi sa marigon na paninindogan tumang sa saiya. An kinaban kaoyon ni Satanas huling sia an dios kaiyan. (2 Corinto 4:4) Kun siring, isinisikwal niato an mga karakteristiko kan kinaban, arog kan kapalangkawan, kaimotan, inmoralidad, kadahasan, asin materyalismo. Aram niato na nagdulag an Diablo kan kontrahon ni Jesus an saiyang pagsalakay paagi sa paggamit kan Kasuratan kan sinusugotan sa kaawagan. (Mateo 4:​4, 7, 10, 11) Kaagid kaiyan, si Satanas ‘madulag sa sato’ huli sa pagkadaog kun lubos kitang nagpapasakop ki Jehova asin mapagngayongayong nagsasarig sa Saiya. (Efeso 6:18) Paagi sa pagsuportar ni Jehova Dios asin kan saiyang namomotan na Aki, mayo nin makakagibo sa sato nin permanenteng danyos​—mayo, maski pa an Diablo!​—Salmo 91:​9-​11.

[Nota sa Ibaba]

Ano an Simbag Nindo?

• Maninigo daw kitang matakot ki Satanas na Diablo?

• Taano ta pinaglalamag ni Satanas an mga Kristiano?

• Taano ta namimibi kita na logod iligtas kita sa “maraot”?

• Paano kita magigin mapanggana sa espirituwal na pakikilaban?

[Mga Hapot Para sa Pag-adal]

[Ritrato sa pahina 26]

An daing takot na enot na mga parasunod ni Cristo nagin maimbod sagkod sa kagadanan

[Ritrato sa pahina 27]

Dai kayang olangon kan Diablo an pagkabuhay liwat kan mga nasa memorya ni Jehova

[Ritrato sa pahina 28]

Namimibi daw kamo na logod iligtas kamo sa “maraot”?

[Ritrato sa pahina 29]

Isinusulog daw nindo “an bilog na pangalasag hale sa Dios”?