Mga Hapot Hale sa mga Parabasa
Mga Hapot Hale sa mga Parabasa
Naggamit daw si Jose, na sarong maimbod na lingkod ni Jehova, nin sarong espesyal na kopang pirak sa pagbasa nin mga tanda, na garo baga iyong ipinaparisa sa Genesis 44:5?
Mayo nin dahelan na maniwala na si Jose talagang naggamit nin ano man na porma nin pagtoodtood.
Ihinahayag kan Biblia an totoong pakasabot ni Jose sa paggamit nin mahika tanganing maaraman an ngapit. Bago kaidto, kan ipainterpretar sa saiya an mga pangatorogan ni Faraon, paorootrong iininsistir ni Jose na an Dios sana an puedeng ‘mag-anunsiar’ kan nagdadangadang na mga pangyayari. Bilang resulta, si Faraon mismo nagtubod na an Dios na sinasamba ni Jose—an tunay na Dios, bakong kapangyarihan nin okulto—an nagpangyari na maaraman ni Jose an mga detalye manongod sa ngapit. (Genesis 41:16, 25, 28, 32, 39) Sa Ley na itinao ki Moises kan huri, ibinawal ni Jehova an paggamit nin mahika o pagtoodtood, sa siring kinokompirmar na Sia sana an naghuhula kan ngapit.—Deuteronomio 18:10-12.
Taano, kun siring ta sinabi ni Jose paagi sa saiyang surugoon na naggagamit sia nin sarong kopang pirak sa ‘ekspertong pagbasa nin mga tanda’? * (Genesis 44:5) Kaipuhan na konsideraron niato an mga kamugtakan kan sinabi ini.
Huli sa sarong makuring tiggutom, an mga tugang ni Jose nagpasiring sa Egipto tanganing magbakal nin kakanon. Dakol na taon bago kaidto, an mga tugang man sanang ini ni Jose an nagpabakal sa saiya sa kaoripnan. Ngonyan, dai sindang kaaram-aram, naghahagad sinda nin tabang sa sadiri nindang tugang, na nagin administrador nin kakanon sa Egipto. Dai nagpamidbid sa sainda si Jose. Imbes, nagdesisyon sia na baloon sinda. Angay sana na gustong maaraman ni Jose kun tunay an pagsolsol ninda. Gusto man niang maaraman kun baga may pagkamoot sinda—asin kun sagkod saen an pagkamoot ninda—sa saindang tugang na si Benjamin asin sa saindang ama, si Jacob, na espesyalmenteng padangat si Benjamin. Huli kaini, guminamit nin taktika si Jose.—Genesis 41:55–44:3.
Pinagbotan ni Jose an saro sa saiyang mga surugoon na panoon nin suplay nin kakanon an mga sako kan saiyang mga tugang, iuli an kuarta kan lambang saro sa bunganga kan saiyang sako, asin ibugtak an kopang pirak ni Jose sa bunganga kan sako ni Benjamin. Sa gabos na ini, si Jose nag-aakto bilang sarong administrador nin sarong paganong nasyon. Ibinagay nia an saiyang sadiri, an saiyang hiro-hiro, asin an saiyang pananaram sa karakter nin siring kaiyan na administrador, na maheheling kan daing pag-aram-aram niang mga tugang.
Kan komprontaron ni Jose an saiyang mga tugang, ipinagpadagos nia an saiyang pagsaginsagin, na hinahapot sinda: “Dai daw nindo naaaraman na an sarong tawo na arog ko ekspertong nakakabasa nin mga tanda?” (Genesis 44:15) Sa siring, an kopa minalataw na kabtang sana kan estratehiya. Dai man talaga ginamit ni Jose an kopa sa pagbasa nin mga tanda, kun paanong dai man talaga iyan hinabon ni Benjamin.
[Nota sa Ibaba]
^ par. 5 Sa paglaladawan kan suanoy na kaugalean na ini, an The Holy Bible, With an Explanatory and Critical Commentary, na an editor iyo si F. C. Cook, nagpapaliwanag: “Ginigibo iyan magsalang paagi sa paghulog nin bulawan, pirak, o mutya, sa tubig, dangan sinisiyasat an itsura kan mga iyan; o paagi sa pagheling sana sa tubig na garo nagheheling sa salming.” An komentarista sa Biblia na si Christopher Wordsworth nagsabi: “Kun beses an kopa pinapano nin tubig, asin an simbag itinatao paagi sa ladawan, na ipinapabanaag kan saldang sa tubig na nasa kopa.”