‘Patotoo sa Gabos na Nasyon’

“Kamo magigin mga saksi ko . . . sagkod sa kaporoporohi kan daga.”​—GIBO 1:8.

1. Kasuarin asin saen enot na nadangog kan mga disipulo an hula na nakarekord sa Mateo 24:14?

PAMILYAR na marhay an mga tataramon ni Jesus na nakarekord sa Mateo 24:14 kaya tuom na iyan kan dakol sa sato. Asin kanigoan kapambihirang hula iyan! Imahinaron nindo kun ano an siertong inisip kan mga disipulo kan enot nindang madangog iyan! An taon 33 C.E. An mga disipulo nagin kaibaiba ni Jesus sa laog nin mga tolong taon, asin ngonyan nag-iba sinda sa saiya sa Jerusalem. Naheling ninda an saiyang mga milagro asin naghinanyog sinda sa saiyang mga pagtotokdo. Minsan ngani naogmang gayo sinda sa mahalagang marhay na mga katotoohan na itinokdo sa sainda ni Jesus, aram nindang marhay na bakong gabos naogma na kapareho ninda. May mga kaiwal si Jesus na may kapangyarihan asin maimpluwensia.

2. Anong mga peligro asin kadepisilan an aatubangon kan mga disipulo?

² Sa Bukid nin mga Olibo, apat na disipulo an nakatukaw sa kaibahan ni Jesus, na atentong naghihinanyog mantang sinasambit nia an maabot na mga peligro asin kadepisilan na aatubangon ninda. Bago kaidto, sinabi sa sainda ni Jesus na sia gagadanon. (Mateo 16:21) Ngonyan saiyang lininaw na maeeksperyensiahan man ninda an maringis na pagtumang. “Dadarahon kamo nin mga tawo sa kahorasaan asin gagadanon kamo,” an sabi nia. “Asin ikakaongis kamo kan gabos na nasyon huli sa ngaran ko.” Bako sana iyan. Ilalagalag kan falsong mga propeta an dakol. An iba magkakasiringkog asin magpapasinaraloiban patin magkakainorongisan. An iba pa, sa katunayan an “dakol,” totogotan na lumipot an saindang pagkamoot sa Dios asin sa saiyang Tataramon.​—Mateo 24:​9-​12.

3. Taano ta kahangahanga nanggad an mga tataramon ni Jesus sa Mateo 24:14?

³ Pakatapos na sambiton an siring na nakakapanluyang mga kamugtakan, ipinahayag ni Jesus an sarong bagay na seguradong ipinagngalas kan mga disipulo. Sia nagsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) Iyo, an gibohon na pinonan ni Jesus sa Israel​—an ‘pagpatotoo sa katotoohan’​—​magpapadagos asin maghihiwas sa bilog na kinaban. (Juan 18:37) Kahangahanga nanggad na hula! An pagpaabot kan gibohon na iyan sa “gabos na nasyon” magigin masakit; an paggibo kaiyan mantang inaatubang an ‘pagkaongis kan gabos na nasyon’ saro nanggad na milagro. An pagkaotob kan dakulaon na gibohon na ini magbabantog bako sanang kan soberaniya asin kapangyarihan ni Jehova kundi kan saiya man na pagkamoot, pagkaherak, asin pagpapasensia. Dugang pa, tatawan kaiyan nin oportunidad an saiyang mga lingkod na ipaheling an saindang pagtubod asin debosyon.

4. Sairisay an sinabihan na magpatotoo, asin anong pagranga an itinao ni Jesus?

⁴ Lininaw na marhay ni Jesus sa saiyang mga disipulo na igwa sindang mahalagang marhay na gibohon. Bago sia magsakat sa langit, nagpaheling si Jesus sa sainda asin nagsabi: “Kamo mag-aako nin kapangyarihan kun dumatong na sa saindo an banal na espiritu, asin kamo magigin mga saksi ko sa Jerusalem sagkod sa bilog na Judea asin Samaria patin sagkod sa kaporoporohi kan daga.” (Gibo 1:8) Siempre, dai na mahahaloy may mga maayon sa sainda. Minsan siring, kakadikit sana an mga disipulo. Seguradong nakakaranga nanggad na maaraman na an makapangyarihan na banal na espiritu nin Dios matao nin kosog sa sainda tanganing magibo an asignasyon na ini nin Dios!

5. Ano an dai aram kan mga disipulo manongod sa gibohon na pagpapatotoo?

 ⁵ Aram kan mga disipulo na kaipuhan nindang ihulit an maogmang bareta asin ‘gumibo nin mga disipulo sa mga tawo kan gabos na nasyon.’ (Mateo 28:​19, 20) Alagad dai ninda aram kun gurano kalubos an gigibohon na pagpatotoo, asin dai ninda aram kun noarin maabot an katapusan. Maski kita dai niato aram. Mga bagay ini na si Jehova sana an nakakaaram. (Mateo 24:36) Kun an pagpatotoo magibo na sa paaging kontento na si Jehova, tataposon na nia an maraot na sistemang ini nin mga bagay. Dangan sana masasabotan kan mga Kristiano na an paghuhulit nagibo na oyon sa gusto ni Jehova. Dai nanggad naimahinar kan enot na mga disipulong idto kun gurano kahiwas an pagpatotoo sa panahon na ini kan katapusan.

An Pagpatotoo kan Enot na Siglo

6. Ano an nangyari kan Pentecostes 33 C.E. asin dai nahaloy pakatapos kaiyan?

⁶ Kan enot na siglo, an paghuhulit kan Kahadean asin paggibo nin disipulo nagkaigwa nin makangangalas na mga resulta. Kan aldaw nin Pentecostes 33 C.E., mga 120 disipulo an nasa itaas na kuarto sa Jerusalem. Ibinubo sa sainda an banal na espiritu nin Dios, si apostol Pedro nagtao nin nakakapukaw sa boot na pahayag na ipinapaliwanag an kahulogan kan milagrong ini, asin mga 3,000 an nagturubod asin nabautismohan. Kapinonan pa sana idto. Sa ibong kan desididong paghihingoa kan mga namomoon sa relihion na papondohon an paghuhulit kan maogmang bareta, ‘padagos na idinudugang ni Jehova sa mga disipulo aroaldaw an mga naliligtas.’ Dai nahaloy, “an kabilangan kan mga lalaki nagin mga limang ribo.” Pakatapos kaiyan, “an mga nagturubod sa Kagurangnan padagos na nakakadagdag, mga kadaklan nin mga lalaki sagkod babae.”​—Gibo 2:1-4, 8, 14, 41, 47; 4:4; 5:14.

7. Taano an pagkakombertir ni Cornelio ta sarong mahalagang pangyayari?

⁷ Kan taon 36 C.E. naheling an saro pang mahalagang pangyayari​—an pagkakombertir asin bautismo ni Cornelio na sarong Hentil. Paagi sa pagpaduman ki apostol Pedro sa matatakton sa Dios na lalaking ini, ipinarisa ni Jehova na an pagboot ni Jesus na ‘gumibo nin mga disipulo sa mga tawo kan gabos na nasyon’ bakong limitado sa mga Judio sa manlaenlaen na kadagaan. (Gibo 10:​44, 45) Ano an nagin reaksion kan mga nangengenot? Kan masabotan kan mga apostol asin kamagurangan na lalaki sa Judea na an maogmang bareta kaipuhan man na ipaabot sa mga taga ibang nasyon​—mga bakong Judio​—​pinamuraway ninda an Dios. (Gibo 11:​1, 18) Mientras tanto, an paghuhulit padagos na namunga sa tahaw kan mga Judio. Pakalihis nin pirang taon, posible na kan mga 58 C.E., ikinadagdag sa mga Hentil na nagturubod an ‘rinibong Judio na nagturubod.’​—Gibo 21:20.

8. Paano nakakaapekto sa mga indibiduwal an maogmang bareta?

⁸ Minsan ngani makangangalas an pag-oswag sa kabilangan kan enot na siglong mga Kristiano, maninigo na nungka niatong paglingawan an mga indibiduwal na irinerepresentar kan kabilangan na iyan. Mapuersa an mensahe kan Biblia na nadangog ninda. (Hebreo 4:12) Liniwat kaiyan sa dramatikong paagi an buhay kan mga maogmang nag-ako kaiyan. An mga indibiduwal nagpoon na mamuhay na malinig sa moral, isinulog an bagong personalidad, asin nakipag-ulian sa  Dios. (Efeso 4:​22, 23) Totoo man iyan ngonyan. Asin an mga minaako sa maogmang bareta gabos igwa kan makangangalas na esperansang mabuhay sagkod lamang.​—Juan 3:16.

Mga Kapwa Trabahador nin Dios

9. Rinekonoser kan enot na mga Kristiano na igwa sinda nin anong pribilehio asin responsibilidad?

⁹ Dai kinua kan enot na mga Kristiano an kredito sa kun ano an nagibo. Rinekonoser ninda na an saindang gibohon bilang mga ministro suportado kan “kapangyarihan kan banal na espiritu.” (Roma 15:​13, 19) Si Jehova iyo an responsable sa espirituwal na pag-oswag. Kadungan kaiyan, aram kan mga Kristianong idto na igwa sinda kan pribilehio asin responsibilidad na magin “mga kapwa trabahador nin Dios.” (1 Corinto 3:6-9) Bilang resulta, kaoyon kan konseho ni Jesus, naghingoa sinda nin maigot sa gibohon na iinasignar sa sainda.​—Lucas 13:24.

10. Anong mga paghihingoa an ginibo kan nagkapirang enot na Kristiano tanganing magpatotoo sa gabos na nasyon?

¹⁰ Bilang “apostol sa mga nasyon,” si Pablo nagbiahe sa daga asin dagat nin rinibong kilometro, na nag-eestablisar nin dakol na kongregasyon sa Romanong probinsia nin Asia asin sa Grecia. (Roma 11:13) Nagbiahe man sia sa Roma asin posibleng pati sa España. Mientras tanto, si apostol Pedro, na pinaniwalaan “kan maogmang bareta . . . para sa mga tinuri,” nagbiahe sa ibang direksion tanganing maglingkod sa Babilonya, sarong mahalagang sentro nin Judaismo kan panahon na idto. (Galacia 2:​7-9; 1 Pedro 5:13) Kabilang sa dakol pang iba na nagmaigot sa gibohon kan Kagurangnan iyo an mga babae na siring ki Trifina asin Trifosa. An saro pang babae na an ngaran Persida, sinasabi na “naggibo nin dakol dian sa Kagurangnan.”​—Roma 16:12.

11. Paano binendisyonan ni Jehova an mga paghihingoa kan mga disipulo?

¹¹ Abundang binendisyonan ni Jehova an mga paghihingoa kan mga nasambitan na idto asin kan iba pang maigot na trabahador. Mayo pang 30 taon pakatapos na ihula ni Jesus na magkakaigwa nin pagpatotoo sa gabos na nasyon, nagsurat si Pablo na ‘ikinahulit na sa gabos na linalang sa sirong nin langit an maogmang bareta.’ (Colosas 1:23) Nagdatong daw kaidto an katapusan? Sa sarong aspekto, talagang nagdatong iyan. Nagdatong iyan sa Judiong sistema nin mga bagay kan taon 70 C.E. kan laglagon kan mga hukbong Romano an Jerusalem pati an templo. Pero, nagdesisyon si Jehova na gibohon an mas mahiwas na pagpatotoo bago nia taposon an pambilog na globong sistema nin mga bagay ni Satanas.

An Pagpatotoo na Ginigibo Ngonyan

12. Paano sinabot kan enot na Mga Estudyante sa Biblia an pagboot na maghulit?

¹² Durante kan huring kabtang kan ika-19 siglo, pakalihis nin halawig na peryodo nin pangingibabaw nin relihiosong apostasiya, inestablisar giraray an dalisay na pagsamba. Malinaw na nasabotan kan Mga Estudyante sa Biblia, na apod kaidto sa Mga Saksi ni Jehova, an pagboot na gumibo nin mga disipulo sa bilog na daga. (Mateo 28:​19, 20) Kan taon 1914, may mga 5,100 na aktibong nakikikabtang sa paghuhulit, asin an maogmang bareta nakaabot na sa mga 68 kadagaan. Minsan siring, dai nasabotan kan enot na Mga Estudyanteng idto sa Biblia an lubos na kahulogan kan Mateo 24:14. Sa mga huring kabtang kan ika-19 siglo, an Biblia, na igwa kan maogmang bareta, o ebanghelyo, tinatradusir asin iniimprenta kan mga sosyedad sa Biblia sa dakol na lenguahe asin idinidistribwir sa bilog  na kinaban. Huli kaini, sa laog nin nagkapirang dekada, inisip kan Mga Estudyante sa Biblia na nagibo na an pagpatotoo sa mga nasyon.

13, 14. Anong mas malinaw na pakasabot kan kabotan asin katuyohan nin Dios an iprinesentar sa isyu kan The Watch Tower kan 1928?

¹³ Luway-luway, tinawan ni Jehova an saiyang banwaan nin mas malinaw na pakasabot kan saiyang kabotan asin katuyohan. (Talinhaga 4:18) An The Watch Tower kan Disyembre 1, 1928, nagsabi: “Masasabi daw niato na an pagdistribwir kan Biblia nakaotob kan ihinulang paghuhulit kan ebanghelyo kan kahadean? Dai nanggad! Sa ibong kan pagdistribwir na ini kan Biblia kaipuhan pa man giraray kan sadit na grupo nin mga saksi nin Dios sa daga na mag-imprenta nin mga literatura na nagpapaliwanag sa [katuyohan nin] Dios asin dumalaw sa mga harong na nawarasan kan mga Bibliang ini. Ta kun dai magigin mayong aram an mga tawo manongod sa pagpatindog kan Mesiyanikong Kahadean sa kaaldawan niato.”

¹⁴ An isyung iyan kan The Watch Tower nagsabi pa: “Kan 1920, . . . nasabotan nin tama kan Mga Estudyante sa Biblia an hula kan satong Kagurangnan na yaon sa Mateo 24:14. Narealisar ninda kaidto na ‘an ebanghelyong ini’ na kaipuhan na ihulit sa bilog na kinaban para sa pagpatotoo sa mga Hentil o sa gabos na nasyon, bakong ebanghelyo nin sarong kahadean na maabot pa sana kundi ebanghelyo na nagsasabi sa pundamental na an Mesiyanikong Hade nagpoon na sa saiyang pagreynar sa daga.”

15. Paano huminiwas an pagpapatotoo poon kan dekada nin 1920?

¹⁵ An “sadit na grupo[ng iyan] nin mga saksi” kan dekada nin 1920 dai nagdanay na sadit. Sa nagsurunod na dekada, namidbid “an sarong dakulang kadaklan” nin “ibang karnero” asin pinonan na tiponon iyan. (Kapahayagan 7:9; Juan 10:16) Ngonyan, igwa nin mga 6,613,829 parabalangibog kan maogmang bareta sa 235 nasyon sa daga. Abaa kamakangangalas na kaotoban kan hula! Nungka pang ikinahulit “an maogmang baretang ini kan kahadean” sa siring kadakulang sokol. Nungka pang nagkaigwa nin kadakol na maimbod na lingkod ni Jehova digdi sa daga.

16. Ano an nagibo sa nakaaging taon nin paglilingkod? (Helingon an tsart sa pahina 27-30.)

¹⁶ Magkairibanan, an dakulang kaburunyogan na ini nin mga Saksi nagin sibot durante kan 2005 taon nin paglilingkod. Labi sa sarong bilyon na oras an ginamit sa pagbalangibog kan maogmang bareta sa 235 kadagaan. Minilyon na pagdalaw liwat asin minilyon man na pag-adal sa Biblia an isinagibo. An gibohon na ini nagibo kan Mga Saksi ni Jehova, na bulaos na nagtao kan saindang panahon asin rekurso tanganing ihiras sa iba an Tataramon nin Dios. (Mateo 10:8) Paagi kan saiyang makapangyarihan na banal na espiritu, padagos na tinatawan ni Jehova nin puersa an saiyang mga lingkod tanganing gibohon an saiyang kabotan.​—Zacarias 4:6.

Pagmamaigot na Magpatotoo

17. Paano naghihimate an banwaan ni Jehova sa mga tataramon ni Jesus manongod sa paghuhulit kan maogmang bareta?

¹⁷ Minsan ngani haros 2,000 na taon na an nakaagi poon kan sabihon ni Jesus na ihuhulit an maogmang bareta, an kaigotan kan banwaan nin Dios para sa gibohon dai luminuya. Aram ta na paagi sa pakatagal niato sa paggibo nin marahay, ipinapabanaag niato an mga kualidad ni Jehova  na pagkamoot, pagkaherak, asin pagpapasensia. Kapareho nia, dai niato mawot na an siisay man malaglag kundi mawot niato na an mga tawo magsolsol asin makipag-uli ki Jehova. (2 Corinto 5:18-20; 2 Pedro 3:9) Huling malaad sa espiritu nin Dios, maigot na ipinagpapadagos kan Mga Saksi ni Jehova na ibalangibog an maogmang bareta sagkod sa kaporoporohi kan daga. (Roma 12:11) Bilang resulta, an mga tawo sa gabos na lugar nag-aako kan katotoohan asin nagsusunod sa mamomoton na pagdirehir ni Jehova. Estudyare an pirang halimbawa.

18, 19. Anong mga eksperyensia an ikakasaysay nindo manongod sa nagkapira na naghimate sa maogmang bareta?

¹⁸ Si Charles sarong paraoma sa solnopan na Kenya. Kan 1998 nakapabakal sia nin labing 8,000 na kilo nin tabako asin tinawan nin sertipiko na nagtao sa saiya kan titulong Pinakamatibay na Paratanom nin Tabako. Sa panahon na iyan, nagpoon na siang mag-adal sa Biblia. Dai nahaloy narealisar nia na an sarong tawo na imbuelto sa pagprodusir nin tabako linalapas an pagboot ni Jesus na kamotan an saiyang kapwa. (Mateo 22:39) Kan makapagkonklusyon sia na ‘an pinakamatibay na paratanom nin tabako’ sa katunayan iyo ‘an pinakamatibay na paragadan,’ binomba ni Charles nin medisinang pangadan an saiyang mga tanom na tabako. Nag-oswag sia pasiring sa pagdusay asin bautismo asin ngonyan sia saro nang regular payunir saka ministeryal na lingkod.

¹⁹ Daing duwa-duwa na yinuyugyug ni Jehova an mga nasyon paagi kan ginigibong lakop sa globong pagpatotoo, asin an kawiliwiling mga bagay​—an mga tawo​—​nagraralaog. (Haggeo 2:7) Si Pedro, na taga Portugal, naglaog sa seminaryo kan sia 13 anyos. An saiyang pasohan iyo na magin misyonero asin magtokdo sa Biblia. Minsan siring, pakalihis nin halipot na panahon, naghale sia sa seminaryo huling bihirang itokdo an Biblia sa saiyang mga klase. Pakalihis nin anom na taon nag-adal sia nin sikolohiya sa sarong unibersidad sa Lisbon. Nakiistar sia sa saiyang inaon, saro sa mga Saksi ni Jehova, na nag-enkaminar sa saiya na mag-adal sa Biblia. Kan panahon na iyan, dai segurado ni Pedro kun nag-eeksister an Dios, asin dai man sia makadesisyon kun baga mag-aadal sa Biblia o dai. Ipinakipag-olay nia sa saiyang propesor sa sikolohiya an manongod sa pagigin dai makadesisyon. An propesor nagsabi na an sikolohiya nagtotokdo na an mga tawong dai makapagdesisyon may tendensia na ipahamak an sadiri. Sa puntong iyan, nagdesisyon si Pedro na mag-adal sa Biblia. Nabautismohan sia kasuarin pa sana asin ngonyan nagkokondukta na man nin sadiri niang mga inaadalan sa Biblia.

20. Taano ta makakapaggayagaya kita na nagigibo nin mahiwason an pagpatotoo sa mga nasyon?

²⁰ Dai pa man giraray niato aram kun sagkod saen gigibohon an pagpatotoo sa mga nasyon, ni aram niato kun anong aldaw asin oras madatong an katapusan. Aram sana niato na iyan dai na mahahaloy. Naggagayagaya kita na an mahiwason na paghuhulit kan maogmang bareta saro sana kan dakol na nagpaparisa na harani na an panahon tanganing salidahan kan Kahadean nin Dios an mga gobyerno nin tawo. (Daniel 2:44) Sa kada taon na minaagi, minilyon an natatawan nin oportunidad na maghimate sa maogmang bareta, asin napapamuraway kaini an satong Dios, si Jehova. Magin determinasyon logod niato na magdanay na maimbod asin magdanay na sibot sa gibohon na pagpatotoo sa gabos na nasyon kaiba kan satong mga tugang sa bilog na kinaban. Sa paggibo kaiyan, ililigtas niato an satong sadiri sagkod an mga naghihinanyog sa sato.​—1 Timoteo 4:16.

Nagigirumdoman daw Nindo?

• Taano ta pambihira nanggad na hula an Mateo 24:14?

• Anong mga paghihingoa an ginibo kan enot na mga Kristiano sa paghuhulit, asin may anong mga resulta?

• Paano nasabotan kan Mga Estudyante sa Biblia an pangangaipo na magpatotoo sa gabos na nasyon?

• Sa pag-estudyar sa aktibidad kan banwaan ni Jehova sa nakaaging taon nin paglilingkod, ano an hinahangaan nindo?

[Mga Hapot Para sa Pag-adal]

 [Tsart sa pahina 27-30]

REPORT KAN 2005 TAON NIN PAGLILINGKOD KAN MGA SAKSI NI JEHOVA SA BILOG NA KINABAN

 (Hilingon an publikasyon)

[Mapa/Mga Ritrato sa pahina 25]

Nagbiahe si Pablo nin rinibong kilometro sa daga asin dagat tanganing ihulit an maogmang bareta

[Ritrato sa pahina 24]

Giniyahan ni Jehova si Pedro na magpatotoo ki Cornelio asin sa pamilya kaini