Tunay na Prosperidad sa Bagong Kinaban nin Dios

SI David, * sarong Kristianong agom asin ama, nagbalyo sa Estados Unidos, na kompiadong tama an ginigibo nia. Minsan ngani habo niang bayaan an saiyang agom asin mga aki, segurado na siang magigin mas marahay an buhay para sa sainda gabos kun igwa sana sia nin mas dakol na kuarta. Kaya inako nia an imbitasyon kan mga paryente sa Nueva York asin dai nahaloy nakakua sia nin trabaho duman.

Pero, sa pag-agi nin mga bulan, an optimistikong paglaom ni David nagpoon nang mawara. Kadikit na sana an panahon na ginagamit nia sa espirituwal na mga aktibidad. Nag-abot an panahon na haros nawaran na sia nin pagtubod sa Dios. Kaidto sanang nagpadaog sia sa sarong sugot sa moral na sa katapustapusi narealisar nia an tunay niang situwasyon. An pagkonsentrar nia sa materyal na prosperidad luway-luway na irinarayo sia sa gabos na talagang mahalaga sa saiya. Kaipuhan niang gumibo nin pagbabago.

Arog ni David, kada taon dakol an naghahale sa tios na dagang tinuboan ninda, na naglalaom na rumahay an saindang pagbuhay. Pero, sa parate nakakaeksperyensia sinda nin grabeng pagkapierde sa espirituwal. May mga nag-iisip-isip, ‘Puede daw na an sarong Kristiano magmaigot na magkamit  nin materyal na kayamanan asin magin mayaman man sa Dios?’ An popular na mga parasurat asin parahulit nagsasabi na posible ini. Alagad siring kan nanodan ni David asin kan iba pa, an pagkamit kan saro kaiyan na dai mawawara an saro pa puedeng magin depisil.​—Lucas 18:24.

Bakong Maraot an Kuarta

Siempre, an kuarta imbento nin tawo. Arog nin dakol pang ibang imbension, iyan mismo bakong maraot o sala. An totoo, saro sana iyan na pambayad. Sa siring, kun ginagamit nin tama, nagtatao iyan nin pakinabang. Halimbawa, rinerekonoser kan Biblia na “an kuarta para sa proteksion,” espesyalmente tumang sa mga problema na may koneksion sa kadukhaan. (Eclesiastes 7:12) Garo baga, kisuerra para sa nagkapira, “kuarta an solusyon sa gabos na bagay.”​—Eclesiastes 10:​19, New International Version.

Kinokondenar kan Kasuratan an kahugakan asin ineenkaminar an kahigosan. Kaipuhan na sustentohan niato an satong pinakaharaning kapamilya, asin kun igwa kita nin kadikit na sobra, igwa kita nin ‘ikakatao sa nangangaipo.’ (Efeso 4:28; 1 Timoteo 5:8) Apuera dian, imbes na suportaran an pagdehar sa sadiri, ineenkaminar kita kan Biblia na ikaogma an satong mga rogaring. Sinasabihan kita na “darahon an [satong] kahirasan” asin mag-ogma sa mga bunga kan satong mga pagpapagal. (Eclesiastes 5:18-20) Sa katunayan, may nagkapirang halimbawa sa Biblia nin maimbod na mga lalaki asin babae na mayayaman.

Maimbod na mga Tawo na Mayayaman

Si Abraham, sarong maimbod na lingkod nin Dios, nagkaigwa nin dakol na karnero asin baka, dakol na pirak asin bulawan, saka dakulang pamilya nin mga surugoon na ginatos an kabilangan. (Genesis 12:5; 13:​2, 6, 7) An matanos man na si Job may awad-awad na kayamanan​—ataman na mga hayop, mga surugoon, bulawan, asin pirak. (Job 1:3; 42:​11, 12) Mayaman an mga tawong ini dawa sa mga pamantayan ngonyan, alagad sinda mayaman man sa Dios.

Inaapod ni apostol Pablo si Abraham na “ama kan gabos na igwa nin pagtubod.” Si Abraham bakong maimot ni gakod na marhay sa saiyang mga rogaring. (Roma 4:11; Genesis 13:9; 18:1-8) Kaagid kaiyan, inapod mismo nin Dios si Job na “daing katuyawan asin tanos.” (Job 1:8) Pirme siang andam na tumabang sa mga dukha asin nagsasakit. (Job 29:12-16) Si Abraham sagkod si Job nagtiwala sa Dios imbes na sa saindang kayamanan.​—Genesis 14:22-24; Job 1:​21, 22; Roma 4:9-12.

Si Hadeng Salomon an saro pang halimbawa. Bilang nagmana kan trono nin Dios sa Jerusalem, si Salomon biniyayaan bako sana nin kadonongan hale sa Dios kundi pati nin abundang kayamanan asin kamurawayan. (1 Hade 3:4-14) Sa kadaklan na panahon kan saiyang buhay, sia maimbod. Pero, sa huring mga taon kan saiyang buhay, ‘an puso ni Salomon dai nagin bilog ki Jehova.’ (1 Hade 11:1-8) Sa katunayan, malinaw na ipinapaheling kan saiyang mamondong eksperyensia an nagkapira sa komun na natatagong  peligro nin materyal na prosperidad. Estudyare an pira sana.

Natatagong mga Peligro nin Prosperidad

An pinakapeligroso iyo an pagigin mamomoton sa kuarta asin kun ano an mababakal kaiyan. An kayamanan nagpupukaw sa nagkapira nin pagmawot na nungkang napapanigoan. Sa kapinonan pa sana, narisa na ni Salomon an tendensiang ini sa iba. Sia nagsurat: “An mamomoton sa pirak dai makokontento sa pirak, ni an siisay man na mamomoton sa kayamanan makokontento man sa ginaganar. Ini man daing kamanungdanan.” (Eclesiastes 5:10) Kan huri pinatanidan ni Jesus sagkod ni Pablo an mga Kristiano manongod sa mapandayang pagkamoot na ini.​—Marcos 4:​18, 19; 2 Timoteo 3:2.

Kun an kuarta magin pangenot na pinagkakainteresan niato imbes na magamit sana tangani na magibo an mga bagay-bagay, kita madaling tatamaan kan gabos na klase nin sugot sa moral, kaiba an pagputik, paghabon, asin pandadaya. Pinasaloiban ni Judas Iscariote, na saro sa mga apostol ni Cristo, an saiyang kagurangnan sa kantidad na 30 pidasong pirak sana. (Marcos 14:11; Juan 12:6) Sa sobrang pagkamoot sa kuarta, sinamba pa ngani nin nagkapira an kuarta imbes na an Dios. (1 Timoteo 6:10) Kun siring, an mga Kristiano maninigo na pirmeng magmaigot na magin onesto sa tunay na motibo ninda sa pagtipon nin kuarta.​—Hebreo 13:5.

An pagmamaigot na kamtan an kayamanan igwa man nin mas tagong peligro. Enot, an pagkaigwa nin abundang kayamanan nagpapakosog sa pagsarig sa sadiri. Iiniba ini ni Jesus kan sinambit nia “an mapandayang kapangyarihan nin kayamanan.” (Mateo 13:22) An kagsurat kan Biblia na si Santiago nagpatanid man sa mga Kristiano na dai paglingawan an Dios dawa kun naggigibo nin mga plano sa negosyo. (Santiago 4:13-16) Mantang an kuarta minalataw na nagtatao man sa sato nin independensia, para sa mga igwa kaiyan, yaon pirme an peligro na magsarig sa saindang kuarta imbes na sa Dios.​—Talinhaga 30:7-9; Gibo 8:18-24.

Ikaduwa, arog kan nanompongan ni David, na nasambitan sa kapinonan, an pagmamaigot na kamtan an kayamanan parateng minaubos sa panahon asin kosog nin sarong tawo kaya luway-luway sia kaiyan na irinarayo sa espirituwal na mga aktibidad. (Lucas 12:13-21) Para sa mayayaman, yaon man an nagpapadagos na sugot na gamiton an yaon sa sainda sa pangenot para sa pagpasiramsiram o personal na mga aktibidad.

An pagbagsak daw sa espirituwal ni Salomon sa sarong kabtang puedeng huli ta tinogotan nia an maluhong buhay na pabagolon an saiyang pakamate? (Lucas 21:34) Aram nia an direktang pagbabawal nin Dios sa pakialyansa sa pag-agom sa mga taga ibang nasyon. Pero, pag-abot nin panahon sia nakatipon nin mga sangribong agom asin kerida. (Deuteronomio 7:3) Huling gustong-gusto niang paogmahon an saiyang mga agom na taga ibang daga, prinobaran niang iareglar an sarong klase nin pag-iribaiba nin relihion para sa sainda. Arog kan nasambitan sa enotan, an puso ni Salomon luway-luway na ruminayo ki Jehova.

Malinaw nanggad, ipinapaheling kan mga halimbawang ini an pagigin totoo kan hatol ni Jesus: “Dai kamo makakapaglingkod sa Dios asin sa Kayamanan.” (Mateo 6:24) Kun siring, paano mapangganang maaatubang nin sarong Kristiano an mga problema sa pagbuhay na inaatubang kan kadaklan ngonyan? Mas mahalaga, ano an paglaom para sa mas marahay na buhay sa ngapit?

Tunay na Prosperidad sa Ngapit

Bakong arog kan patriarkang si Abraham asin Job saka kan nasyon nin Israel, an mga parasunod ni Jesus isinugo na ‘gumibo nin mga disipulo sa mga tawo kan gabos na nasyon.’ (Mateo 28:​19, 20) An pag-otob kan sugong iyan nangangaipo nin panahon asin paghihingoa na puedeng gamiton kutana sa sekular na mga okupasyon. Kun siring, an liabe sa kapangganahan iyo an paggibo kan ipinapagibo sa sato ni Jesus: “Kun siring, padagos na hanapon nguna an kahadean [nin Dios] asin an saiyang katanosan, asin ini gabos na ibang bagay idadagdag na sana sa saindo.”​—Mateo 6:33.

Pagkatapos na dikit pang mawara sa saiya an saiyang pamilya asin an saiyang espirituwalidad, sa katapustapusi si David nakabawi. Siring kan ipinanuga ni Jesus, kan pinonan ni David na ipaorog giraray sa saiyang buhay an pag-adal sa Biblia, pagpamibi, asin ministeryo, an ibang bagay nagpoon  na mamugtak sa tamang lugar. An saiyang relasyon sa saiyang agom asin mga aki luway-luway na nakabalik sa dati. Buminalik an saiyang kagayagayahan asin pagkakontento. Sia mahigos pa man giraray na nagtatrabaho. An buhay nia bakong estorya nin pobre na nagyaman. Pero, nakanood sia nin mahalagang mga leksion sa saiyang makolog na eksperyensia.

Nagduduwaduwa kaidto si David kun baga madonong an pagbalyo sa Estados Unidos, asin nagdesisyon sia na nungka na nia giraray na totogotan na an kuarta an mangibabaw sa saiyang mga desisyon. Aram na nia ngonyan na an pinakamahalagang mga bagay sa buhay​—sarong mamomoton na pamilya, marahay na mga katood, asin relasyon sa Dios​—​dai mababakal nin kuarta. (Talinhaga 17:17; 24:27; Isaias 55:​1, 2) Tunay nanggad, an moral na integridad mas mahalagang marhay kisa sa materyal na kayamanan. (Talinhaga 19:1; 22:1) Kaiba an saiyang pamilya, determinado si David na enoton an pinakamahalaga.​—Filipos 1:10.

Paorootrong nasudya an mga paghihingoa nin tawo na magkaigwa nin sosyedad na talagang may prosperidad pero may moral. Minsan siring, nanuga an Dios na an saiyang Kahadean matao nin abundang materyal asin espirituwal na bagay na kaipuhan niato tanganing mabuhay nin maogma. (Salmo 72:16; Isaias 65:21-23) Itinokdo ni Jesus na an tunay na prosperidad minapoon sa espirituwalidad. (Mateo 5:3) Kaya baga man kita mayaman o dukha sa materyal, an pagpaorog sa espirituwal na mga bagay ngonyan iyo an pinakamarahay na paagi na makapag-andam an siisay man sa sato para sa bagong kinaban nin Dios na haranihon na. (1 Timoteo 6:17-19) An kinaban na iyan magigin sosyedad na totoong may prosperidad sa materyal sagkod sa espirituwal.

[Nota sa Ibaba]

[Mga Ritrato sa pahina 5]

Si Job nagsarig sa Dios, bakong sa kayamanan nia

[Mga Ritrato sa pahina 7]

An pinakamahalagang mga bagay sa buhay dai mababakal nin kuarta