Kaipuhan daw Niato an Sarong Mesiyas?

TIBAAD ihapot man nanggad nindo, “Kaipuhan daw niato an sarong Mesiyas?” Iyo, rasonableng mag-isip-isip kun baga magkakaigwa talaga nin ano man na epekto sa saindo an sarong Mesiyas.

Sisiertohon sa saindo kan mga tawong tibaad iginagalang nindo an opinyon na an simbag malinaw asin dai mapagdududahan: Kaipuhan nanggad nindo an sarong Mesiyas, kun paanong kaipuhan sia kan gabos. Nagsurat an sarong eksperto sa Judiong ley kan enot na siglo manongod sa Mesiyas: “Minsan gurano kadakol kan mga panuga nin Dios, an mga iyan nagin Iyo paagi sa saiya.” Sa siring, tinawan nia nin pagdodoon an importanteng marhay na kabtang kan Mesiyas sa katuyohan kan satong Kaglalang na bendisyonan an gabos na nasyon sa daga. (2 Corinto 1:20) An papel kan Mesiyas talagang mahalagang marhay kaya an hula sa Biblia nakasentro sa saiyang pagdatong asin buhay. Sa sarong libro nin mga reperensia na ginamit nin minilyon sa nag-aging 70 taon, si Henry H. Halley positibong nagsabi: “An Daan na Tipan isinurat tanganing pukawon an pag-antisipar sa, asin buksan an dalan para sa, Pagdatong kan [Mesiyas].” Alagad kaipuhan daw an pagdatong nia? Taano ta maninigo kamong magin interesado?

An “Mesiyas” sa katunayan nangangahulogan “Linahidan” asin katimbang kan midbid na marhay na terminong “Cristo.” An Sarong ini na inaapod kan Encyclopædia Britannica, Edisyon nin 1970, bilang “an ultimong parabalukat,” kaipuhan na dumatong huli sa daing galang na paggawe kan enot na tawong mag-agom, si Adan asin Eva. Linalang sindang sangkap, na may nakakaogmang marhay na oportunidad na mabuhay nin daing katapusan sa Paraiso, alagad nawara ninda an oportunidad na iyan. An sarong rebeldeng anghel, na namidbid bilang si Satanas na Diablo, nag-insinwar na an saindang Kaglalang sobra kamapamogol asin na sinda mas mapaparahay kun sinda an madesisyon para sa sadiri ninda kun ano an marahay asin kun ano an maraot.​—Genesis 3:1-5.

Nadaya si Eva asin naniwala sa kaputikan na iyan. Si Adan, na minalataw na pinapahalagahan an pakiibaiba kan saiyang agom nin labi pa sa kaimbodan sa Dios, nagin kasapakat sa pagrebeldeng iyan na sutsut kan Diablo. (Genesis 3:6; 1 Timoteo 2:14) Huli sa ginibo ninda, bako sanang ipinatunod ninda an sainda mismong oportunidad na mabuhay nin daing katapusan sa paraisong mga kamugtakan. Ipinamana man ninda sa saindang dai pa namumundag na mga aki an kasalan asin an epekto kaiyan, an kagadanan.​—Roma 5:12.

Tolos-tolos na dineterminaran kan satong Kaglalang, si Jehova, an paagi tanganing baliktadon an maraot na mga epekto kan sunod-sunod na mga pangyayari na pinonan kan pagrebelde. Gigibohon nia an pakiulian paagi sa kan huri magigin sarong legal na prinsipyo sa Ley ni Moises​—an paghagad kan katimbang. (Deuteronomio 19:21; 1 Juan 3:8) An legal na prinsipyong ini kaipuhan na mapanigoan tangani na igwa sa kaherakherak  na mga gikan ni Adan asin Eva na umako nin buhay na daing katapusan sa paraisong daga, siring kan katuyohan kan Kaglalang para sa pamilya nin tawo. Dinadara kita kaini sa Mesiyas.

Kan sinesentensiahan an Diablo, sinabi ni Jehova Dios sa enot na hula sa Biblia: “Papag-iiwalon ko ika asin an babae saka an saimong banhi asin an saiyang banhi. Lulugadon ka nia sa payo asin lulugadon mo sia sa bool.” (Genesis 3:15) An sarong nag-espesyalisar sa Biblia nagkomento na “an estorya kan mga panuga manongod sa Mesiyas siring kan pagkapresentar kaiyan sa Kasuratan minapoon paagi sa deklarasyon [na ini].” Nagkomento an saro pa na an Mesiyas iyo an instrumento nin Dios na “mabaliktad sa bilog na kalamidad na bunga kan pagkahulog sa kasalan kan enot na mga tawo,” na kadungan kaini nagtatao nin mga bendisyon sa katawohan.​—Hebreo 2:​14, 15.

Pero, tibaad namamatean nindo na an katawohan sa presente bako nanggad na maogma. Imbes, an rasa nin tawo nakakaeksperyensia nin grabeng kadaihan nin paglaom asin pagkadesesperar. Sa siring, an The World Book Encyclopedia nagsasabi na “dakol na Judio an naglalaom pa man giraray na madatong an sarong Mesiyas” asin na “itatanos [nia] an mga sala asin dadaogon an mga kaiwal kan mga Judio.” Minsan siring, sinasabi kan Biblia na nagdatong na an Mesiyas. May dahelan daw na magtubod sa sinasabi kan Biblia? Sisimbagon iyan kan masunod na artikulo.