An Probisyon nin Dios Para sa Pagbayad sa Kasalan

AN TATARAMON sa Ingles na “atonement” (sa Bicol, “pagbayad sa kasalan”) kinua sa pananaram na “at one” (sa Bicol, “kapareho”) asin, siring kan paggamit kaiyan sa Biblia, nangangahulogan na pagtahob sa mga kasalan. Sa Hebreong Kasuratan an mga termino dapit sa pagbayad sa kasalan minalataw nin dakol na beses, nangorogna sa mga libro nin Levitico asin Bilang. An ka·pharʹ iyo an termino sa Hebreo para sa pagbayad sa kasalan, asin posible na sa orihinal iyan nangangahulogan na “tahob,” minsan ngani isinuherir man an “pagpara.”

Kaipuhan nin Tawo an Bayad sa Kasalan

An tawo nangangaipo nin pantahob sa kasalan, o bayad sa kasalan, huli sa minanang kasalan (1 Hade 8:46; Salmo 51:5; Eclesiastes 7:20; Roma 3:23), na an responsable bakong an Dios kundi an tawo mismo. (Deuteronomio 32:​4, 5) Si Adan, na nawaran nin buhay na daing katapusan bilang sangkap na tawo, ipinamana an kasalan asin kagadanan sa saiyang mga aki (Roma 5:12), asin an mga gikan ni Adan kun siring napasairarom kan pagkakondenar sa kagadanan. Kun siring, tanganing mabawi kan katawohan an oportunidad na magkaigwa nin buhay na daing katapusan kaoyon nin sarong legal na prinsipyo na kan huri iiniba ni Jehova sa Ley ni Moises, iyo na ngani, na kun ano an inutang iyo man an kabayadan, kakaipuhanon an eksaktong kabayadan para sa iwinara ni Adan.​—Deuteronomio 19:21.

Siring kan pagkagamit sa Biblia, an “pagbayad sa kasalan” may pundamental na ideya nin “tahob” o “pagrinibayan,” asin an itinatao na karibay, o bilang “tahob,” nin saro pang bagay dapat na kapareho kaiyan. Sa siring, an ano man na bagay na ibinabayad para sa nawara o ipinatunod dapat na “kapareho” kan bagay na iyan, na lubos na nakakatahob dian bilang eksaktong katimbang kaiyan. Dai dapat magsobra asin magkulang. Mayo nin bakong sangkap na tawo an makakatao kan siring na pantahob o bayad sa kasalan tanganing ibalik an sangkap na buhay nin tawo sa siisay man o sa bilog na katawohan. (Salmo 49:​7, 8) Tanganing ikatao an igong kabayadan para sa ipinatunod ni Adan, kaipuhan an sarong dolot manongod sa kasalan na may eksaktong halaga nin sarong sangkap na buhay nin tawo.

Inestablisar ni Jehova Dios an sarong areglo sa tahaw kan mga Israelita para sa pagbayad sa kasalan na nagrepresentar sa sarong mas dakulang probisyon para sa pagbayad sa kasalan. Si Jehova, bakong an tawo, an dapat na tawan nin kredito sa pagdeterminar asin paghayag kan paagi nin pagbayad sa kasalan para sa pagtahob sa minanang kasalan asin pagtao nin kaginhawahan sa ibinungang pagkakondenar sa kagadanan.

Mga Atang Manongod sa Pagbayad sa Kasalan

Siring kan ipinagboot nin Dios, an mga Israelita dapat na magdolot nin mga atang bilang mga dolot manongod sa kasalan tanganing makabayad sa kasalan. (Exodo 29:36; Levitico 4:20) Partikularmenteng makahulogan an taonan na Aldaw nin Pagbayad sa Kasalan, na durante kaiyan an halangkaw na saserdote sa Israel nagdodolot nin mga atang na hayop asin naggigibo nin pagbayad sa kasalan para sa saiyang sadiri, para sa iba pang mga Levita, asin para sa bakong saserdoteng mga tribo nin Israel. (Levitico 16) An atang na mga hayop dapat na daing kaninan, na nagpaparisa na kaipuhan na sangkap an antitipo kaiyan. Siring man, an bagay na dakulang halaga an kalabot sa pagbayad sa kasalan ipinapaheling kan katunayan na buhay kan atang an itinatao, pinapabolos an dugo kaiyan tanganing makabayad sa kasalan. (Levitico 17:11) An mga dolot manongod sa kasalan na ginigibo kan mga Israelita asin an manlaenlaen na kabtang kan taonan na Aldaw nin Pagbayad sa Kasalan daing duwa-duwa na ikinatudok sa saindang isip an pagigin seryoso kan saindang pagkamakasalan asin an dakulang pangangaipo ninda para sa lubos na pagbayad sa kasalan. Minsan siring, an mga atang na hayop dai lubos na makakabayad sa kasalan nin tawo huli ta an mga hayop mas hababa kisa tawo, na sa sainda ipinasakop an mga hayop.​—Genesis 1:28; Salmo 8:4-8; Hebreo 10:1-4.

Kaotoban ki Cristo Jesus

An Kristianong Griegong Kasuratan malinaw na ikinokonektar ki Jesu-Cristo an lubos na kabayadan sa mga kasalan nin tawo. Sa saiya naotob an mga tipo asin anino sa Ley ni Moises, huling sia an mismong Saro na patienot na itinotokdo kan manlaenlaen na atang na hayop. Bilang sangkap, daing kasalan na tawo, si Jesus an dolot manongod sa kasalan para sa gabos na gikan ni Adan na sa katapustapusi ililigtas sa minanang kasalan asin kagadanan. (2 Corinto 5:21) Si Cristo “nagdolot nin sarong atang para sa mga kasalan nin daing kasagkoran” (Hebreo 10:12), asin daing duda na sia “an Kordero nin Dios na naghahale kan kasalan kan kinaban.”  (Juan 1:​29, 36; 1 Corinto 5:7; Kapahayagan 5:​12, 13:8; ikomparar an Isaias 53:7.) An kapatawadan nakadepende sa pagpabolos nin dugo (Hebreo 9:22), asin an mga Kristianong naglalakaw sa liwanag inaasegurar na “an dugo ni Jesus na . . . Aki [nin Dios] naglilinig sato sa gabos na kasalan.”​—1 Juan 1:7; Hebreo 9:​13, 14; Kapahayagan 1:5.

An sangkap na buhay ni Jesus bilang tawo na idinolot bilang atang iyo an antitipikong dolot manongod sa kasalan. Iyan an mahalagang bagay na minatubos sa katawohan, na binabalukat sinda sa minanang kasalan asin kagadanan. (Tito 2:​13, 14; Hebreo 2:9) Si Cristo mismo nagpahayag: “An Aki nin tawo nagdigdi, bakong tanganing paglingkodan, kundi tanganing maglingkod asin itao an saiyang kalag na pantubos [Griego, lyʹtron] karibay kan dakol.” (Marcos 10:45) An saiyang atang eksaktong nakabayad sa ipinatunod kan nagkasalang si Adan, huling si Jesus sangkap asin sa siring katimbang ni Adan bago enot na nagkasala an tawo.​—1 Timoteo 2:​5, 6; Efeso 1:7.

Ginibong Posible an Pakiulian

An kasalan nin tawo an dahelan kan pagkasuway nin Dios sagkod nin tawo, huli ta dai inooyonan ni Jehova an kasalan. An pagkaraot na ini kan relasyon kan tawo sagkod kan saiyang Kaglalang puede sanang mapakarhay basta ikatao an kaipuhan na tunay na “pantahob,” o kabayadan, para sa siring na kasalan. (Isaias 59:2; Habacuc 1:13; Efeso 2:3) Alagad ginibo ni Jehova Dios na magin posible an pagkaulian nia sagkod kan makasalan na katawohan paagi sa sangkap na tawong si Jesu-Cristo. Sa siring, si apostol Pablo nagsurat: “Kita nag-oogma man sa Dios paagi sa satong Kagurangnan na si Jesu-Cristo, na huli sa saiya kita ngonyan nag-ako na kan pakiulian.” (Roma 5:11) Tanganing kamtan an pabor ni Jehova, kaipuhan na akoon an probisyon nin Dios para sa pakiulian paagi ki Jesu-Cristo. Solamente paagi kaini na posibleng makamit an kamugtakan na kaagid kan ki Adan bago sia nagkasala. An pagkamoot nin Dios maheheling sa pagpagin posible kan siring na pakiulian.​—Roma 5:6-10.

An Hustisya Napapanigoan kan Pampagian nin Boot

An hustisya kaipuhan na panigoan pa man giraray. An tawo, minsan ngani linalang na sangkap, nawara sa siring na kamugtakan paagi sa kasalan asin sa siring si Adan asin an saiyang mga aki napasairarom kan pagkondenar nin Dios. An hustisya asin kaimbodan sa mga prinsipyo nin katanosan naghagad na gibohon nin Dios an sentensia kan saiyang ley tumang sa masinuway na si Adan. Alagad an pagkamoot nagpahiro sa Dios na gibohon na katuyohan an sarong karibay na areglo na dian mapapanigoan an hustisya, alagad ta dai linalapas an hustisya, an nagsosolsol na mga aki kan nagkasalang si Adan mapapatawad asin puedeng magkamit nin pakipagkatoninongan sa Dios. (Colosas 1:19-23) Kun siring, “isinugo [ni Jehova] an saiyang Aki bilang pampagian nin boot na atang para sa satong mga kasalan.” (1 Juan 4:10; Hebreo 2:17) An pampagian nin boot sarong bagay na nagpaparahay nin boot, o nagpapagin paborable. An pampagian nin boot na atang ni Jesus hinahale an dahelan na kondenaron nin Dios an sarong linalang na tawo asin ginigibong posible an pagtao nin Dios sa saiya nin pabor asin pagkaherak. An pampagian nin boot na ini hinahale an akusasyon na kasalan asin an ibinubungang pagkakondenar sa kagadanan sa kaso kan espirituwal na Israel asin kan gabos na iba pa na nag-aaprobetsar kaiyan.​—1 Juan 2:​1, 2; Roma 6:23.

An ideya nin pagtao nin karibay risang-risa sa nagkapirang teksto sa Biblia na may koneksion sa pagbayad sa kasalan. Halimbawa, sinabi ni Pablo na “si Cristo nagadan para sa satong mga kasalan oyon sa Kasuratan” (1 Corinto 15:3), asin na “tinubos kita ni Cristo sa sumpa kan Ley paagi sa pagigin sumpa imbes na kita [mga Judio], huli ta nasusurat: ‘Sinumpa an lambang tawo na binitay sa harigi.’” (Galacia 3:13; Deuteronomio 21:23) Si Pedro nagkomento: “Sia mismo nagdara kan satong mga kasalan sa saiyang sadiring hawak duman sa harigi, tanganing kita mahalean nin mga kasalan asin mabuhay sa katanosan. Asin ‘huli kan saiyang mga labod kamo nagkaoromayan.’” (1 Pedro 2:24; Isaias 53:5) Si Pedro nagsurat man: “Si Cristo nagadan nin sararoan sana may labot sa mga kasalan, sarong matanos para sa mga bakong matanos, tanganing magiyahan nia kamo sa Dios.”​—1 Pedro 3:18.

An Mamomoton na Probisyon Naghahagad nin Paghimate Paagi sa Pagtubod

An pagkamoot ipinaheling nin Dios asin ni Cristo paagi sa halimbawa may koneksion sa probisyon nin lubos na kabayadan para sa minanang mga kasalan nin tawo. (Juan 3:16; Roma 8:32; 1 Juan 3:16) Minsan siring, tanganing makinabang dian an sarong tawo dapat na tunay na nagsosolsol asin sia dapat na magtubod. Si Jehova dai naogma sa mga atang kan Juda kan idinodolot na mayo nin tamang aktitud. (Isaias 1:10-17) Sinugo nin Dios si Cristo “bilang dolot na pampagian nin boot paagi sa pagtubod sa saiyang dugo.” (Roma 3:21-26) An mga may pagtubod na inaako an probisyon nin Dios para sa pagbayad sa kasalan paagi ki Jesu-Cristo puedeng magkamit nin kaligtasan; an mga nagsasayuma dian dai. (Gibo 4:12) Asin, para sa siisay man na ‘naggigibo nin tuyong pagkakasala pakatapos na maako an tamang kaaraman sa katotoohan, mayo na nin natatadang atang para sa mga kasalan, kundi yaon an siertong makatatakot na paghalat sa paghokom.’​—Hebreo 10:26-31.