“Estoryahi Pa Kami!”

SA Nezlobnaya, sa Rusya, pinag-aadalan nin sarong klase sa literatura sa haiskul an mga libro na isinurat kan Rusong autor na si Mikhail Bulgakov. Kabilang sa mga libro an sarong nobela na naglaladawan ki Jesu-Cristo sa mapagmenos na paagi, mantang ilinaladawan kaiyan si Satanas bilang sarong eroe. Kan an klase matapos sa pag-orolay, tinawan sinda kan maestra nin nasusurat na test basado sa nobelang ini. Minsan siring, an saro sa mga estudyante, na 16 anyos na Saksi ni Jehova na an ngaran Andrey, magalang na nakiolay na mapalibre sa pagkua kan test huli ta dai itinotogot kan saiyang konsensia na pag-adalan an arog kaining klase nin literatura. Nakiolay sia na kun puede magsurat na sana sia nin sarong komposisyon na magpapaliwanag kun paano nia minamansay si Jesu-Cristo. Uminoyon an maestra.

Sa saiyang komposisyon, ipinaliwanag ni Andrey na minsan ngani iginagalang nia an opinyon nin iba, nanompongan nia na an pinakamarahay na paagi na makaaram manongod ki Jesus iyo na basahon an saro sa apat na Ebanghelyo. Sa paggibo kaini, “manonodan mo an manongod sa buhay asin mga katokdoan ni Jesus basado sa mga pagkasaysay kan mga nakaheling mismo.” Idinagdag ni Andrey: “An saro pang importanteng bagay iyo an pagkaladawan ki Satanas. Tibaad nakakalibang sa iba an magbasa nin sarong libro na dian sarong eroe si Satanas, alagad para sa sako dai iyan nakakalibang.” Ipinaliwanag nia na si Satanas sa katunayan sarong makapangyarihan, maraot na espiritung linalang na tuminalikod sa Dios, na nagtao sa katawohan nin karatan, makuring sakit, asin pagdusa. An konklusyon ni Andrey sa saiyang komposisyon: “Dai ako naniniwala na makikinabang ako kun babasahon ko an nobelang ini. Siempre, mayo ako nin reklamo laban ki Bulgakov. Alagad personalmente, mas pipilion ko na basahon an Biblia tanganing maaraman ko an katotoohan manongod ki Jesu-Cristo na nasa kasaysayan.”

Nagustohan na marhay kan maestra ni Andrey an komposisyon ata ngani pinagibo sia kaini nin berbal na report manongod ki Jesu-Cristo. Daing pag-alangan na uminoyon si Andrey. Kan suminunod na klase ninda sa literatura, binasa ni Andrey an saiyang report sa atubangan kan bilog na klase. Ipinaliwanag nia kun taano ta naniniwala sia na si Jesus an pinakadakulang tawo na nabuhay kasuarin man. Dangan binasa nia an sarong kapitulo manongod sa kagadanan ni Jesus sa libro ni Mateo sa Biblia. Palibasa matatapos na an itinalaan na oras para sa report, gusto ni Andrey na taposon na iyan, alagad pinirit sia kan saiyang mga kaklase: “Estoryahi pa kami! Ano an sunod na nangyari?” Kaya ipinagpadagos nia an pagbasa sa pagkasaysay ni Mateo manongod sa pagkabuhay liwat ni Jesus.

Kan matapos si Andrey, kadakol kan hapot sa saiya kan saiyang mga kaklase manongod ki Jesus asin ki Jehova. “Namibi ako ki Jehova na tawan ako nin kadonongan, asin sinimbag nia an sakong pamibi,” an sabi ni Andrey. “Nasimbag ko an gabos nindang hapot!” Pagkatapos kan klase, tinawan ni Andrey an saiyang maestra nin kopya kan librong The Greatest Man Who Ever Lived, * na galagang inako kaini. Nagkomento si Andrey: “Tinawan nia ako nin halangkaw na marka sa report ko asin inomaw ako na may sadiri akong kombiksion asin dai ko iyan ikinakasupog. Sinabi man nia na oyon sia sa nagkapirang paniniwala ko.”

Si Andrey naggagayagaya ta nagdesisyon siang sunodon an saiyang konsensia na sinanay sa Biblia paagi sa paglikay sa babasahon na naglalapastangan ki Jehova asin sa saiyang Aki, si Jesu-Cristo. An siring na paninindogan bako sanang nagprotehir sa saiya na dai maapektaran nin mga punto de vista na bakong sono sa Kasuratan kundi nagbukas man nin marahayon na oportunidad na ikapaabot nia sa iba an mahahalagang marhay na katotoohan sa Biblia.

[Mga Nota sa Ibaba]