Gusto daw Nindong Magkaigwa nin Dayupot na mga Katood?

AN KADAKLAN na tawo gustong magkaigwa nin dayupot na mga katood. Nagigin mas maogma an saindong buhay kun ikinakaestorya nindo an saindong mga eksperyensia sa dayupot na mga kaibaiba. Alagad paano kamo makakanompong nin tunay na pakikikatood? Haros 2,000 na taon na an nakaagi, sinabi ni Jesus na an pinakaliabe tanganing magin mapanggana an gabos na klaseng relasyon nin tawo iyo an daing kaimotan na pagkamoot. Itinokdo nia: “Kun ano an boot nindong gibohon sa saindo nin mga tawo, iyo man an gibohon nindo sa sainda.” (Lucas 6:31) An mga tataramon na ini, na parateng inaapod na Bulawan na Reglamento sa Paggawe, nagpapaheling na kaipuhan na kamo magin bakong maimot, buka an palad na tawo tanganing magkaigwa nin mga katood. Sa simpleng pagtaram, tanganing magkaigwa nin katood, kaipuhan na kamo magin katood man. Paano?

Bako man na biglaan an pagkaigwa nin dayupot, may init na pakikikatood. Total, an mga katood nakakalabi sa mga kamidbid. Sinda mga indibiduwal na karani nindo an boot. An pagkaigwa asin pagpapadanay nin dayupot na pagkakatood nangangaipo nin paghihingoa. An pakikikatood parateng naghahagad na ipaorog nindo an mga pangangaipo kan saindong katood kisa sadiri nindong kagianan. An magkatood magkadamay bako sanang sa saindang mga kagayagayahan kundi pati sa saindang mga kamondoan.

Ikakapaheling nindo an tunay na pakikikatood espesyalmente paagi sa pagtao nin emosyonal asin praktikal na suporta sa sarong tawong nangangaipo. An Talinhaga 17:17 nagsasabi: “An tunay na kaibaiba mamomoton sa gabos na panahon, asin tugang na namundag manongod sa panahon nin kasakitan.” Sa katunayan, an pagkakatood puedeng magin mas makosog pa ngani kisa sa nagkapirang relasyon na pampamilya. An Talinhaga 18:24 nagsasabi: “Igwa nin magkairiba na andam na magrinonotan, alagad igwa nin katood na labi pa kadayupot kisa sa tugang.” Gusto daw nindong makaaram pa kun paano magkakaigwa nin siring na tunay na pakikikatood? Gusto daw nindong makabilang sa sarong grupo nin mga tawo na midbid sa pagkaminorootmootan? (Juan 13:35) Kun iyo, an mga Saksi ni Jehova sa saindong komunidad maoogmang tokdoan kamo kun paano makakanompong nin tunay na mga katood.