Estorya nin Buhay

Pakaaram kan Tama Asin Paggibo Kaiyan

ISINAYSAY NI HADYN SANDERSON

Si Jesus nagsabi kaidto sa saiyang mga apostol: “Kun aram nindo an mga bagay na ini, maogma kamo kun gibohon nindo iyan.” (Juan 13:17) Iyo, tibaad aram niato an tama, alagad kun beses, depisil an paggibo kaiyan! Minsan siring, pakalihis nin 80 taon kan sakong buhay, na an 40 taon kaiyan naglingkod ako bilang misyonero, kombensido ako na totoo an mga tataramon ni Jesus. An paggibo kan sinasabi nin Dios talagang nagbubunga nin kaogmahan. Togotan nindo akong magpaliwanag.

KAN 1925, kan ako tres anyos, an sakong mga magurang nag-atender sa sarong pahayag sa Biblia sa samong ginikanan na banwaan nin Newcastle, Australia. An pahayag, “An Minilyon na Nabubuhay Ngonyan Dai Na Noarin Man Magagadan,” nakakombensir sa sakong ina na nanompongan na nia an katotoohan, asin nagpoon siang mag-atender nin regular sa Kristianong mga pagtiripon. Minsan siring, tolos na nawara an interes kan sakong ama. Habo nia kan bago pa sanang makuang pagtubod ni Nanay asin naghuma na malayas sia kun dai kaini tatalikdan an saiyang pagtubod. Namomotan ni Nanay an sakong ama asin gusto niang papagdanayon na magkairibanan an pamilya. Minsan siring, aram nia na an pagkuyog sa Dios iyo an pangenot, asin determinado sia na gibohon an tama sa pagheling nin Dios. (Mateo 10:34-39) Naghale an sakong ama, asin pagkatapos paminsanminsan ko na sana siang naheheling.

Sa paggirumdom kan nakaagi, hinahangaan ko an kaimbodan sa Dios kan sakong ina. An saiyang desisyon nagbunga nin buhay na may espirituwal na mga bendisyon para sa sako asin sa matua kong tugang na babae na si Beulah. Nagtokdo man iyan sa samo nin mahalagang leksion​—kun aram niato an tama, kaipuhan na pagmaigotan niatong gibohon iyan.

 Mga Pagbalo sa Pagtubod

An Mga Estudyante sa Biblia, an apod kaidto sa Mga Saksi ni Jehova, daramay na nagtarabang sa samong pamilya. An sakong lola nag-istar sa samo asin maogma man niang inako an katotoohan sa Biblia. Sindang duwa ni Nanay an nagin pirmeng magkaibanan sa paghuhulit, asin nakua ninda an paggalang kan mga tawo huli sa saindang pagigin may dignidad asin makikatood.

Mientras tanto, tinawan ako nin espesyal na atension kan mas may edad nang mga tugang na lalaking Kristiano asin tinawan ako nin mapapakinabangan na marhay na pagsasanay. Dai nahaloy nakanood akong gumamit nin kard sa pagpatotoo tanganing makatao nin simpleng mga presentasyon sa mga tawong nasa harong ninda. Nagpapatanog man ako nin nakarekord na mga pahayag sa Biblia sa sarong nabibitbit na ponograpo asin nakikikabtang sa pagmartsa na may darang plakard sa mayor na kalye kan banwaan. Depisil ini, huling pinagmamaigotan kong labanan an pagkatakot sa tawo. Minsan siring, aram ko an tama asin determinado akong gibohon iyan.

Pakagradwar sa pag-eskuela, nagpoon akong magtrabaho sa sarong bangko, na kalabot an pagbiahe sa dakol na sangang bangko sa bilog na estado nin New South Wales. Minsan ngani pira sana an Saksi sa parteng iyan kan nasyon, an pagsasanay sa sako nakatabang na mapagdanay kong buhay an sakong pagtubod. Nagpapadara si Nanay nin nakakaparigon sa boot na mga surat na nagpakosog sa sako sa espirituwal.

An mga surat na iyan nagtao sa sako nin tabang sa tamang panahon. Nagpoon na an Guerra Mundial II, asin napaatubang ako sa pirit na pagsoldados. An manedyer kan bangko sarong maigot na parasimba asin lokal na komandante militar. Kan ipaliwanag ko an sakong neutral na paninindogan bilang sarong Kristiano, tinawan nia ako nin ultimatum​—humale sa sakong relihion o humale sa bangko! An mga bagay uminabot sa kulminasyon kan magreport ako sa lugar nin lokal na pagreklutar nin armi. Yaon an manedyer asin interesadong marhay na nagmamasid mantang parani ako sa lamesa sa pagparehistro. Kan magsayuma akong pirmahan an papeles sa pagreklutar, an mga opisyal nagin antipatiko. Nagkaigwa nin tension, alagad determinado akong gibohon an tama. Sa tabang ni Jehova, nagdanay akong kalmado asin marigon. Kan maaraman ko kan huri na hinahanap ako nin nagkapirang maton, tolos kong inimpake an sakong mga gamit asin nagsakay sa pinakaenot na pahaleng tren paluwas sa banwaan!

Pagkabalik sa Newcastle, napaatubang ako sa sarong pagbista sa korte kaiba nin pitong iba pang tugang na lalaki na nagsayumang magsoldados. Sinentensiahan kami kan huwes nin tolong bulan na pagkakarsel na may kaibang magabat na pagtrabaho. Minsan ngani dai nakakaogmang eksperyensia an pagkabilanggo, an paggibo nin tama nagbunga nin mga bendisyon. Pagkatapos kaming paluwason, an saro sa sakong kaiba sa selda, sarong kapwa Saksi na an ngaran Hilton Wilkinson, inimbitaran akong magtrabaho sa saiyang istudyo sa pagretrato. Duman ko nakamidbid an magigin agom ko, si Melody, na nagtatrabaho sa istudyo bilang resepsionista. Dai nahaloy pagkatapos kan pagpaluwas sa sako, nabautismohan ako bilang simbolo kan sakong pagdusay ki Jehova.

Paghihingoang Maabot an Bilog na Panahon na Paglilingkod

Pagkakasal mi, nagbukas kami ni Melody nin sadiri ming istudyo sa pagretrato sa Newcastle. Dai nahaloy kadakol na kan samong trabaho kaya nagpoon nang maapektaran an samong salud asin espirituwalidad. Kan panahon man na idto, si Ted Jaracz, na naglilingkod kaidto sa sangang opisina kan Mga Saksi ni Jehova sa Australia asin ngonyan miembro na kan Namamahalang Grupo, nakipag-olay sa samo manongod sa samong espirituwal na mga pasohan. Pagkatapos kan pag-orolay na idto, nagdesisyon kami na ipabakal an samong negosyo asin gibohon na simple an samong buhay. Kan 1954 nagbakal kami nin sadit na harong na de rueda, nagbalyo sa siudad nin Ballarat sa estado nin Victoria, asin  nagpoon na maglingkod bilang mga payunir, o bilog na panahon na mga ebanghelisador.

Mantang naglilingkod kami kaiba kan sadit na kongregasyon sa Ballarat, binendisyonan ni Jehova an samong mga paghihingoa. Sa laog nin 18 bulan, an kabilangan kan mga nag-aatender sa mga pagtiripon biglang duminakol hale sa 17 sagkod sa 70. Dangan uminabot an imbitasyon samo na maglaog sa ministeryong nagbibiahe, o gibohon sa sirkito, sa estado kan Timog na Australia. Sa laog kan suminunod na tolong taon, ikinaogma mi an pagdalaw sa mga kongregasyon sa siudad nin Adelaide asin sa mga rehion nin arak asin sitrus sa gilid kan Salog nin Murray. Dakulaon nanggad an nagin pagbabago sa samong buhay! Maogma kaming naglilingkod kaiba kan mamomoton na mga tugang na lalaki asin babae. Kanigoan na balos para sa paggibo mi kan aram ming tama!

Sarong Destino sa Pagmimisyonero

Kan 1958 ipinaaram mi sa sangang opisina sa Australia an samong intension na mag-atender sa “Kabotan nin Dios” na Internasyonal na Asamblea sa Siudad nin Nueva York sa huring kabtang kan taon na idto. Nagsimbag sinda paagi sa pagpadara sa samo nin aplikasyon para sa paadalan nin Gilead para sa mga misyonero sa Estados Unidos. Huling kami 35 anyos na, naghona kami na gurang na kaming marhay tanganing mag-eskuela sa Gilead. Minsan siring, ipinadara mi an samong aplikasyon asin inimbitaran kaming mag-atender sa ika-32 na klase. Kan nangangabangaan na an kurso, naresibi mi an samong destino sa pagmimisyonero​—sa India! Sa ibong kan samong pagkahandal sa primero, gusto ming gibohon an tama asin maogmang inako an samong destino.

Nagbiahe sa barko, uminabot kami sa Bombay (ngonyan Mumbai) nin amay na aga kan 1959. Ginatos na trabahador an nagtotororog minsan saen duman sa pantalan. Iba an parong kan doros. Kan sumirang an saldang, nagtao iyan sa samo nin ideya kun ano an maabot sa ngapit. Nungka pa niamong naeksperyensiahan kaidto an siring kaiyan na init! Sarong misyonerong mag-agom, si Lynton asin Jenny Dower, na kaiba ming nagpayunir sa Ballarat, an maogmang nagsabat sa samo. Dinara ninda kami sa sangang opisina asin sa Erokan na Bethel sa India, na kompuesto nin surusuan na apartment sa itaas na harani sa sentro kan siudad. Nag-iistar sa erokan an anom na boluntaryong nagtatrabaho sa Bethel. Sinabihan kami ni Tugang na Edwin Skinner, na naglingkod bilang misyonero sa India poon kan 1926, na magbakal nin duwang holdall, o telang bag na pambiahe, bago kami magbalyo sa samong destino. Pamilyar nang maheheling an mga bag na iyan sa mga tren sa India asin napakinabangan niamong marhay iyan durante kan mga pagbiahe mi kan huri.

Pakalihis nin duwang aldaw na pagbiahe sa tren, nakaabot kami sa samong destino sa Tiruchchirappalli, sarong siudad sa timog na estado nin Madras (ngonyan Tamil Nadu). Duman, nakiiba kami sa tolong Bombay na espesyal payunir na naghuhulit sa lugar na may populasyon na 250,000. Simpleng marhay an kamugtakan nin buhay. Sarong beses, kulang na sa $4 (E.U.) an yaon sa bulsa mi. Alagad kan maubos an kuartang iyan, dai kami pinabayaan ni Jehova. Sarong tawo na nag-aadal kan Biblia an nagpasubli sa samo nin kuarta tanganing makaarkila nin sarong harong na angay na gibohon na tiriponan. Sarong beses kan kulang na an samong kakanon, sarong kataed an may kabootan na nagtao sa samo nin linuto sa harong na kari (curry). Gustohon kong marhay iyan, alagad napasinok ako huli ta maharangon iyan!

Pasiring sa Ministeryo sa Langtad

Minsan ngani may mga tawo sa Tiruchchirappalli na nakakataram nin Ingles, an mayoriya nagtataram nin Tamil. Kun siring, nagmaigot kaming marhay na makanood nin sarong simpleng presentasyon para sa paglilingkod sa langtad sa lenguaheng iyan. Huli kaiyan nakua mi an paggalang kan dakol na taga duman.

Lubos na ikinakaogma mi an ministeryo sa harong-harong. Ugale na kan mga Bombay an pagigin mapag-istimar, asin an kadaklan pinapadagos kami tangani na magmeryenda. Mantang an temperatura sa parate nagdadanay sa 40 grado Celsio, inaapresyar niamong marhay an saindang pagkamapag-istimar. Pagpaheling nin paggalang na pag-olayan nguna an manongod sa personal na mga bagay bago niamo ipresentar an samong mensahe. Sa parate hinahapot kaming mag-agom kan mga kagharong: “Saen kamo hale? Igwa kamong mga aki? Taano ta mayo?” Sa puntong ini, parateng minarekomendar sinda nin matibay na doktor! Minsan siring, an mga pag-orolay na iyan nagpapangyari na ikapamidbid mi an samong sadiri asin ikapaliwanag an kahalagahan kan samong gibohon na basado sa Biblia.

An kadaklan na napapatotoohan mi Hindu an relihion​—sarong sistema nin mga paniniwala na laen na marhay sa Kristianismo. Imbes na makipagdebate sa pagigin komplikado kan pilosopiyang Hindu, an ihinuhulit  mi sana maogmang bareta kan Kahadean​—asin may marahay na resulta iyan. Sa laog nin anom na bulan, haros 20 katawo an nagpoon na mag-atender sa mga pagtiripon sa samong erokan nin mga misyonero. An saro sa mga indibiduwal na ini iyo an inhenyero sibil na an ngaran Nallathambi. Sia asin an saiyang aking lalaki, si Vijayalayan, nagtabang kan huri sa mga 50 katawo na magin lingkod ni Jehova. Si Vijayalayan naglingkod man sa laog nin kadikit na panahon sa sangang opisina sa India.

Pabarobalyo

Dai pa kami nag-aanom na bulan sa India kan imbitaran ako na maglingkod bilang an pinakaenot na permanenteng paraataman sa distrito sa nasyon. Kalabot digdi an pagbiahe sa bilog na India, na nag-oorganisar nin mga asamblea asin naglilingkod kaiba nin siyam na grupo na may laen-laen na lenguahe. Masakit iyan na trabaho. Inimpake mi an samong mga gubing asin kasangkapan para sa anom na bulan sa tolong maletang lata asin sa samong ginagamit pirme na mga holdall asin nagbiahe sa tren hale sa siudad nin Madras (ngonyan Chennai). Mantang an teritoryong sakop kan distrito mga 6,500 kilometros an sokol sa palibot, pabarobalyo kami. Sarong beses, natapos an samong asamblea sa timog na siudad kan Bangalore kan Domingo. Dangan nagbiahe kami sa amihanan pasiring sa Darjeeling sa bulod sa ibaba kan bukid nin Himalaya tanganing maglingkod sa saro pang asamblea sa kasunod na semana. Kalabot sa pagpasiring sa Darjeeling an pagbiahe nin mga 2,700 kilometros asin limang sakay sa tren.

Durante kan samong enot na mga pagbiahe, ikinaogma mi an pagpadalan kan pasaleng The New World Society in Action. Ipinapaheling kan pelikulang ini sa mga tawo an sakop asin aktibidad kan daganon na organisasyon ni Jehova. Sa parate, ginatos an nag-aatender sa mga pagpadalan na ini. Sarong beses, ipinadalan mi an pelikula sa sarong grupo na nagtitiripon sa gilid kan tinampo. Mantang nagpapadagos an pelikula, naghihibog an panganoron nin bagyo na garo mabagsak iyan. Mantang nangyari na kaidto na nagkaigwa nin pagkariribok kan pinondo an pelikula, nagdesisyon ako na ipadagos an pagpadalan alagad pinarikas iyan. Marahay sana ta natapos an pelikula na mayo nin abala kan magpoon na bumagsak an oran.

Kan sumunod na mga taon, nagbiahe kami ni Melody sa kadaklan na parte kan India. Mantang an kada rehion may daing kaagid na kakanon, gubing, lenguahe, asin tanawon, iyan garo pagbiahe sa manlaenlaen na nasyon. Tunay nanggad na makangangalas an pagkalaenlaen kan mga linalang ni Jehova! Totoo man ini sa mga hayop na layas sa India. Sarong beses, mantang nagkakamping sa kadlagan nin Nepal, napagmasdan ming marhay an sarong dakulang tigre. Iyan kahangahangang hayop. An pakaheling kaiyan nagpakosog kan samong pagmawot na mag-istar sa Paraiso, na dian sa katapustapusi magkakaigwa nin katoninongan sa tahaw nin mga tawo asin hayop.

Organisasyonal na mga Pag-oswag

Durante kan enot na mga aldaw na idto, kinaipuhan kan mga tugang sa India na mas makasunod sa organisasyonal na mga areglo ni Jehova. Sa nagkapirang kongregasyon, an mga lalaki nagtutukaw sa sarong kampi kan tiriponan mantang an mga babae nagtutukaw sa ibong na kampi. An mga pagtiripon  bihirang magpoon sa tamang oras. Sa sarong lugar, an mga parahayag kan Kahadean inaapodan na magduman sa pagtiripon paagi sa sarong makosog na bagting. Sa ibang lugar, an mga parahayag pasarosarong minaarabot ta sa saldang sinda nagheheling kan oras. Bakong regular an mga asamblea asin pagsongko kan mga nagbibiaheng paraataman. An mga tugang andam na gibohon an tama, alagad kaipuhan ninda an pagsasanay.

Kan 1959, pinonan kan organisasyon ni Jehova an Pankahadean na Paadalan sa Pagmiministro. An pambilog na kinaban na programang ini nin pagsasanay nakatabang sa mga paraataman sa sirkito, espesyal payunir, misyonero, asin magurang sa kongregasyon na isagibo nin mas epektibo an saindang mga paninimbagan na sono sa Kasuratan. Kan magpoon an paadalan sa India kan Disyembre 1961, naglingkod ako bilang instruktor kan klase. Luway-luway, an mga resulta kan pagsasanay na iyan pinakinabangan sa mga kongregasyon sa bilog na nasyon, asin sinda marikas na uminoswag. Kan aram na kan mga tugang kun ano an tama, minotibar sinda kan espiritu nin Dios na gibohon iyan.

An darakulang kombension nagparigon man sa boot asin pinagkasararo an mga tugang. An lataw sa mga kombension na ini iyo an “Daing Katapusan na Maogmang Bareta” na Internasyonal na Asamblea na ginibo sa New Delhi kan 1963. An mga Saksi sa bilog na India nagbiahe nin rinibong kilometro tanganing mag-atender sa asambleang iyan, na an dakol ginamit an gabos na natipon nindang kuarta tanganing makaatender. Mantang 583 na delegado hale sa 27 iba pang nasyon an presente man, iyan an kaenot-enote para sa lokal na mga Saksi na makamidbid asin makaasosyar an dakol na bisitang tugang.

Kan 1961, inimbitaran kaming duwa ni Melody na magin kabtang kan pamilyang Bethel sa Bombay, kun saen kan huri naglingkod ako bilang miembro kan Komite kan Sanga. Suminunod an iba pang pribilehio. Sa laog nin dakol na taon, naglingkod ako bilang paraataman sa sona sa bilog na Asia asin Tahaw na Sirangan. Mantang ibinabawal an paghuhulit sa dakol sa mga nasyon na ini, an lokal na mga parahayag kaipuhan na magin “maingat siring sa mga halas pero inosente siring sa mga salampati.”​—Mateo 10:16.

Pagpahiwas Asin mga Pagbabago

Kan 1959 kan enot kaming umabot sa India, 1,514 parahayag an aktibo sa nasyon. Ngonyan, an kabilangan na iyan duminakol sa labing 24,000. Tanganing maasikaso an pag-oswag na ini, duwang beses kaming nagbalyo sa bagong edipisyo kan Bethel sa laog kan o harani sa Bombay. Dangan, kan Marso 2002, an pamilyang Bethel nagbalyo giraray​—ngonyan sa sarong bagong edipisyo na itinogdok harani sa Bangalore, sa timog kan India. Sa modernong pasilidad na ini nakaistar an 240 miembro kan Bethel, na an nagkapira sa sainda nagtatradusir nin mga literatura sa Biblia sa 20 lenguahe.

Minsan ngani galaga ming inantisipar ni Melody an pagbalyo sa Bangalore, huli sa maluyang salud napiritan kaming magbalik sa Australia kan 1999. Naglilingkod kami ngonyan bilang miembro kan pamilyang Bethel sa Sydney. Minsan ngani naghale na kami sa India, nagdadanay na makosog an samong pagkamoot sa samong mahal na mga katood asin espirituwal na mga aki sa nasyon na iyan. Nakakagayagaya nanggad na makaresibi nin mga surat hale sa sainda!

Ginigirumdom an nakaaging labing 50 taon nin bilog na panahon na paglilingkod, namatean mi ni Melody na binendisyonan kami nin igo. Dati, an trabaho mi iyo an preserbaron an mga ladawan nin mga tawo sa mga retrato, alagad an pagpreserbar sa buhay kan mga tawo sa memorya nin Dios iyo an orog nanggad karahay na gibohon na pinili mi. Kanigoan kamahalagang mga eksperyensia an ibinunga kan samong desisyon na enoton sa samong buhay an kabotan nin Dios! Iyo, an paggibo kan sinasabi nin Dios na tama talagang nagbubunga nin kaogmahan!

[Mga Mapa sa pahina 15]

(Para sa aktuwal na format, hilingon an publikasyon)

INDIA

New Delhi

Darjeeling

Bombay (Mumbai)

Bangalore

Madras (Chennai)

Tiruchchirappalli

[Mga Ritrato sa pahina 13]

Si Hadyn asin Melody kan 1942

[Ritrato sa pahina 16]

An pamilyang Bethel sa India, 1975