Kagadanan—Sarong Makatatakot na Marhay na Katunayan!

“POON sa pagkamundag igwa nin dai nahahaleng posibilidad na an sarong tawo tibaad magadan ano man na oras,” an isinurat kan Britanong historyador na si Arnold Toynbee. Idinagdag nia: “Asin dai malilikayan na talagang mangyayari an posibilidad na ini.” Kanigoan na kamondoan an itinatao sa sato kan kagadanan kun iyan mangyari sa sarong namomotan na marhay na miembro kan pamilya o sa sarong dayupot na katood!

An kagadanan nagin makatatakot na marhay na katunayan para sa katawohan sa laog nin dakol nang milenyo. Nakakamate kita na biyong daing maginibo kun magadan an namomotan niato. An kamondoan na ini minaabot na daing pinipili. Mayo nin siisay man na pinapalibre iyan. “An kapungawan ginigibo kita gabos na magin aki giraray—na nawawara an gabos na pagkakalaen sa intelihensia. Daing aram an pinakamadonong.” Iyan an isinurat nin sarong kompositor kan ika-19 siglo. Kita nagigin garo saradit na aki—daing maginibo, dai kayang liwaton an situwasyon. Dai mababaliktad nin kayamanan ni kapangyarihan an kawaran na iyan. An mga madonong asin intelektuwal mayong ikataong simbag. Minahibi an makokosog, na arog kan maluluya.

Si Hadeng David kan suanoy na Israel nakaeksperyensia nin arog kaiyan na labi-labing kamondoan kan magadan an saiyang aking si Absalon. Kan mabaretaan na nagadan ini, an hade naghibi asin nagkagsing: “Aki kong Absalon, aki ko, aki kong Absalon! O maanong ako kutana an nagadan, ako mismo, imbes na ika, aki kong Absalon, aki ko!” (2 Samuel 18:33) Sarong poderosong hade na duminaog sa makapangyarihan na mga kaiwal an mayong maginibo kundi magmawot na sana na sia na lang kutana an dinaog kan “ultimong kaiwal, an kagadanan,” imbes na an saiyang aki.—1 Corinto 15:26.

Igwa daw nin remedyo sa kagadanan? Kun igwa, ano an paglaom para sa mga gadan? Maheheling pa daw niato giraray an satong mga namomotan? An masunod na artikulo nagtatao nin sono sa Kasuratan na simbag sa mga hapot na ini.