Rumayo sa Falsong Pagsamba!
Rumayo sa Falsong Pagsamba!
“‘Humale kamo sa tanga ninda, asin sumuhay kamo,’ an sabi ni Jehova, ‘asin dai na kamo dumotdot sa maating bagay.’”—2 CORINTO 6:17.
1. Nasa anong kamugtakan sa espirituwal an dakol na sinserong tawo?
AN DAKOL na sinserong tawo dai nakakaaram kan katotoohan manongod sa Dios asin sa ngapit kan katawohan. Huling dai ninda nakua an simbag sa pinakahararom na mga kapurisawan ninda manongod sa espirituwal na mga bagay, nabubuhay sinda na may karibarawan asin kadaihan nin kasegurohan. Minilyon an oripon nin mga superstisyon, rituwal, asin selebrasyon na nakakapaanggot sa satong Kaglalang. Posibleng marhay na kamo may kataraed asin mga paryente na naniniwala sa nagkakalayong impierno, trinitaryong Dios, inmortalidad kan kalag, o iba pang falsong katokdoan.
2. Ano an ginibo kan mga namomoon sa relihion, asin ano an resulta?
2 Ano an may paninimbagan sa lakop na espirituwal na kadikloman na ini? Kabaliktaran sa tibaad linalaoman, relihion an may paninimbagan—partikularmente an relihiosong mga organisasyon asin an mga namomoon sa relihion na nagpalakop nin mga ideya na kontra sa kaisipan nin Dios. (Marcos 7:7, 8) Bilang resulta, an dakol na tawo nadayang maniwala na sinasamba ninda an tunay na Dios, mantang an totoo napapaanggot ninda sia. Falsong relihion an direktang may paninimbagan sa makamomondong situwasyon na ini.
3. Siisay an pangenot na promotor kan falsong relihion, asin paano sia ilinaladawan sa Biblia?
3 May dai naheheling na persona sa likod kan falsong relihion. Nagtataram manongod sa saiya, si apostol Pablo nagsabi: “Binuta kan dios kan sistemang ini nin mga bagay an isip kan mga dai nagtutubod, tanganing an liwanag kan mamuraway na maogmang bareta manongod ki Cristo, na iyo an ladawan nin Dios, dai sumirang.” (2 Corinto 4:4) An “dios kan sistemang ini nin mga bagay” daing iba kundi si Satanas na Diablo. Sia an pangenot na promotor kan falsong relihion. “Si Satanas pirmeng nagmamalemale na anghel nin liwanag,” an isinurat ni Pablo. “Kun siring bakong dakulang bagay kun an saiyang mga ministro nagmamalemale man na mga ministro nin katanosan.” (2 Corinto 11:14, 15) Pinapalataw ni Satanas na marahay an maraot na mga bagay asin dinadaya nia an mga tawo na maniwala sa mga kaputikan.
4. Ano an sinabi kan Ley nin Dios sa suanoy na Israel manongod sa falsong mga propeta?
4 Bakong makangangalas na marigon na kinokondenar kan Biblia an falsong relihion! Halimbawa, an Ley ni Moises espesipikong nagpapatanid sa piniling banwaan nin Dios tumang sa falsong mga propeta. An siisay man na nagpapalakop nin putik na mga katokdoan asin kan pagsamba sa falsong mga dios dapat na ‘gadanon huli sa pagtaram manongod sa rebelyon tumang ki Jehova.’ An mga Israelita pinagbotan na ‘haleon an maraot sa tahaw ninda.’ (Deuteronomio 13:1-5) Iyo, ibinibilang ni Jehova na maraot an falsong relihion.—Ezequiel 13:3.
5. Anong mga patanid an maninigo niatong himateon ngonyan?
5 Ipinabanaag ni Jesu-Cristo asin kan saiyang mga apostol an makosog na saboot ni Jehova manongod sa falsong relihion. Pinatanidan ni Jesus an saiyang mga disipulo: “Magmaan kamo sa falsong mga propeta na minadolok sa saindo sa gubing nin karnero, alagad sa laog sinda naninibang mga lobo.” (Mateo 7:15; Marcos 13:22, 23) Si Pablo nagsurat na “an grabeng kaanggotan nin Dios nahahayag hale sa langit tumang sa gabos na pagkabakong diosnon asin pagkabakong matanos nin mga tawo na nag-oolang sa katotoohan.” (Roma 1:18) Mahalagang marhay nanggad na an tunay na mga Kristiano maghimate sa mga patanid na ini asin likayan an siisay man na minaolang sa katotoohan kan Tataramon nin Dios o nagpapalakop nin falsong mga katokdoan!—1 Juan 4:1.
Dumulag Kamo Hale sa “Dakulang Babilonya”
6. Paano ilinaladawan sa Biblia an “Dakulang Babilonya”?
6 Estudyare kun paano ilinaladawan kan libro kan Biblia na Kapahayagan an falsong relihion. Ilinaladawan iyan na sarong burat na patotot na may kapangyarihan sa dakol na kahadean asin sa mga tawong nasasakopan kan mga ini. An piguratibong babaeng ini nagkokomiter nin pakikisaro sa dakol na hade asin burat sa dugo kan tunay na mga parasamba sa Dios. (Kapahayagan 17:1, 2, 6, 18) Ini may ngaran na nakasurat sa saiyang angog na bagay sa saiyang marigsok asin makababaldeng paggawe. An ngaran na iyan “Dakulang Babilonya, an ina kan mga patotot asin kan makababaldeng mga bagay kan daga.”—Kapahayagan 17:5.
7, 8. Paano nagpakangpatotot an falsong relihion, asin may anong mga resulta?
7 An paglaladawan kan Kasuratan sa Dakulang Babilonya bagay sa gabos na falsong relihion kan kinaban bilang sarong grupo. Minsan ngani an rinibong relihion dai man nagkakasararo nin pormal bilang sarong pankinaban na organisasyon, sinda magkakakonektar na marhay sa katuyohan asin gibo. Siring kan irinerepresentar kan inmoral na babae sa Kapahayagan, an falsong relihion may dakulaon na impluwensia sa mga gobyerno. Kapareho nin sarong babae na bakong maimbod sa saiyang mga sinumpaan sa kasal, an falsong relihion nagpakangpatotot paagi sa pakikialyansa sa dakol na politikal na kapangyarihan. “Mga parapakisambay, dai nindo naaaraman na an pakikikatood sa kinaban pakikiiwal sa Dios?” an isinurat kan disipulong si Santiago. “An siisay man, kun siring, na boot na magin katood kan kinaban ginigibo an saiyang sadiri na kaiwal nin Dios.”—Santiago 4:4.
8 An pakikisalak na ini kan falsong relihion sa mga gobyerno nagresulta sa grabeng pagdusa nin tawo. An Aprikanong analisador nin politika na si Dr. Xolela Mangcu nagsabi na “an kasaysayan kan kinaban igwa nin dakol na halimbawa nin lagdoan na paggadan na bunga nin pagkakasaro kan relihion asin politika.” An sarong peryodiko nagsabi kasuarin pa sana: “An pinakamadugo asin pinakapeligrosong iriwal ngonyan . . . konektadong marhay sa relihion.” Minilyon an nagkagaradan sa mga ralaban na suportado nin relihion. Pinaglamag asin ginadan pa ngani kan Dakulang Babilonya an tunay na mga lingkod nin Dios, na garo baga naburat sa saindang dugo.—Kapahayagan 18:24.
9. Paano ipinahayag sa libro kan Biblia na Kapahayagan an pagkaongis ni Jehova sa falsong pagsamba?
9 An bagay na ikinakaongis ni Jehova an falsong pagsamba malinaw na naheheling sa mangyayari sa Dakulang Babilonya. An Kapahayagan 17:16 nagsasabi: “An sampulong sungay na naheling mo, asin an mabangis na hayop, an mga ini maoongis sa patotot asin lalaglagon patin huhubaan sia, asin kakakanon an saiyang laman asin biyo siang sosoloon sa kalayo.” Enot, rurutangon sia nin sarong dakulaon na mabangis na hayop sagkod na sia magadan asin kakakanon an saiyang laman. Dangan, biyong sosoloon an ano man na matatada sa saiya. Sa kaparehong paagi, sa dai na mahahaloy gigibohon kan mga gobyerno sa kinaban an siring kaiyan na aksion tumang sa falsong relihion. Papangyayarihon iyan nin Dios. (Kapahayagan 17:17) An Dakulang Babilonya, an pambilog na kinaban na imperyo nin falsong relihion, seguradong malalaglag. “Dai na sia noarin man makukua giraray.”—Kapahayagan 18:21.
10. Ano an maninigong magin paninindogan niato mapadapit sa falsong relihion?
10 Ano an maninigong magin paninindogan kan tunay na mga parasamba mapadapit sa Dakulang Babilonya? Sa maliwanag na marhay na pananaram, an Biblia nagboboot: “Lumuwas kamo sa saiya, banwaan ko, kun habo nindong makikabtang sa saiyang mga kasalan, asin kun habo nindong mag-ako nin kabtang kan saiyang mga damat.” (Kapahayagan 18:4) An mga gustong makaligtas dapat na lumuwas sa falsong relihion bago magin huri an gabos. Kan uya pa digdi sa daga, ihinula ni Jesu-Cristo na sa huring mga aldaw, dakol an maghihingako sana na nagsusunod sa saiya. (Mateo 24:3-5) Sa siring na mga tawo, sia nagsasabi: “Dai ko kamo noarin man namidbid! Humarayo kamo sa sako, kamong mga paragibo nin katampalasanan.” (Mateo 7:23) Isinikwal kan pinatukaw na sa tronong Hade, si Jesu-Cristo, an falsong relihion.
Rumayo—Paano?
11. Ano an maninigo niatong gibohon tanganing makarayo sa falsong pagsamba?
11 An tunay na mga Kristiano minarayo sa falsong pagsamba, na isinisikwal an falsong mga katokdoan nin relihion. Nangangahulogan ini na linilikayan niato na malantad sa relihiosong mga programa sa radyo asin telebisyon siring man sa relihiosong mga literatura na nagpapalakop nin mga kaputikan manongod sa Dios asin sa saiyang Tataramon. (Salmo 119:37) May kadonongan man niatong linilikayan na makikabtang sa sosyal na mga pagtiripontipon asin mga aktibidad sa pag-aling-aling na iniisponsor kan arin man na organisasyon na asosyado sa falsong relihion. Dugang pa, dai kita nagsusuportar sa falsong pagsamba sa ano man na paagi. (1 Corinto 10:21) An paggibo nin siring na mga lakdang nagpoprotehir sa sato na dai madara nin siisay man “bilang saiyang biktima paagi sa pilosopiya asin basang na daya segun sa tradisyon nin mga tawo, segun sa pundamental na mga bagay kan kinaban asin bakong segun ki Cristo.”—Colosas 2:8.
12. Paano an saro makakabutas sa ano man na koneksion sa falsong relihiosong mga organisasyon?
12 Kumusta kun an sarong tawo na gustong magin saro sa mga Saksi ni Jehova rehistradong miembro nin sarong falsong relihion sa presente? Sa kadaklan na kamugtakan, an sarong surat nin paghale nagseserbing ebidensia na an sarong tawo habo nang ibilang na miembro nin sarong falsong relihion. Nangorognang mahalaga na an saro gumibo nin desididong aksion tanganing lubos na malikayan an ano man na klase nin espirituwal na kontaminasyon hale sa falsong pagsamba. Paagi sa mga aksion na ginigibo nin saro na gustong magin Saksi maninigong magin malinaw sa relihiosong organisasyon asin sa mga nagmamasid sa publiko na tinatapos na nia an pagigin miembro kan relihion na iyan.
13. Anong konseho an itinatao kan Biblia mapadapit sa pangangaipo na rumayo sa falsong pagsamba?
13 “Dai kamo makipagsakal na bakong timbang sa mga dai nagtutubod,” an isinurat ni apostol Pablo. “Huli ta anong pakikiiba igwa an katanosan asin katampalasanan? O ano an pakikisumaro kan liwanag sa diklom? Dugang pa, ano an pagkakaoyon ni Cristo asin ni Belial? O ano an pakikikabtang kan tawong may pagtubod sa daing pagtubod? Asin anong pakikioyon igwa an templo nin Dios sa mga idolo? . . . ‘Kun siring humale kamo sa tanga ninda, asin sumuhay kamo,’ an sabi ni Jehova, ‘asin dai na kamo dumotdot sa maating bagay.’” (2 Corinto 6:14-17) Hinihimate niato an mga tataramon na ini paagi sa pagrayo sa falsong pagsamba. An sadol daw na ini ni Pablo naghahagad na rayoan man niato an falsong mga parasamba?
“Padagos Kamong Maglakaw sa Kadonongan”
14. Dapat daw niatong biyong likayan an mga nakikikabtang sa falsong pagsamba? Ipaliwanag.
14 Maninigo daw na likayan kan tunay na mga parasamba an gabos na koneksion sa mga tawong nakikikabtang sa falsong pagsamba? Maninigo daw na biyo niatong irayo an satong sadiri sa mga bako niatong kapagtubod? An simbag dai. An ikaduwa sa duwang pinakadakulang togon nagsasabi: “Kamotan mo an saimong kapwa nin siring sa saimo man sana.” (Mateo 22:39) Nagpapaheling nanggad kita nin pagkamoot sa satong mga kapwa kun ipinapaabot niato sa sainda an maogmang bareta kan Kahadean. Maheheling man an satong pagkamoot sa sainda kun sinda inaadalan niato sa Biblia asin ipinaparealisar sa sainda an pangangaipo na rayoan an falsong pagsamba.
15. Ano an boot sabihon kan pagigin “bakong kabtang kan kinaban”?
15 Minsan ngani ihinuhulit niato an maogmang bareta sa satong kapwa, bilang mga parasunod ni Jesus kita “bakong kabtang kan kinaban.” (Juan 15:19) An termino digding “kinaban” nanonongod sa sosyedad nin tawo na siblag sa Dios. (Efeso 4:17-19; 1 Juan 5:19) Kita siblag sa kinaban sa bagay na rinarayoan niato an mga aktitud, pagtaram, asin gawe-gawe na ikinakaanggot ni Jehova. (1 Juan 2:15-17) Dugang pa, kaoyon kan prinsipyong “an maraot na pag-iriba nakakaraot sa marahay na mga ugale,” linilikayan niato na makidayupot sa mga dai namumuhay oyon sa Kristianong mga pamantayan. (1 Corinto 15:33) An pagigin bakong kabtang kan kinaban nangangahulogan nin pagdanay na “daing digta kan kinaban.” (Santiago 1:27) Huli kaini, an pagigin siblag sa kinaban dai nangangahulogan na kita minarayo sa pisikal na paagi sa gabos na koneksion sa ibang mga tawo.—Juan 17:15, 16; 1 Corinto 5:9, 10.
16, 17. Paano maninigong trataron kan mga Kristiano an mga dai nakakaaram kan katotoohan sa Biblia?
16 Kun siring, paano niato dapat na trataron an mga dai nakakaaram kan mga katotoohan sa Biblia? Sa kongregasyon sa Colosas, si Pablo nagsurat: “Padagos kamong maglakaw sa kadonongan manongod sa mga nasa luwas, na tinutubos an panahon para sa saindo man sana. An saindo logod na pagtaram danay na igwa nin pagkamaugayon, na tinimplahan nin asin, tanganing maaraman nindo kun paano kamo dapat na sumimbag sa lambang saro.” (Colosas 4:5, 6) Si apostol Pedro nagsurat: “Santipikaron nindo an Cristo bilang Kagurangnan sa saindong puso, na pirmeng andam na gumibo nin pagdepensa sa atubangan nin lambang tawo na naghahagad sa saindo nin rason para sa saindong paglaom, alagad ginigibo iyan sa mahoyong boot asin hararom na paggalang.” (1 Pedro 3:15) Si Pablo nagtao nin konseho sa mga Kristiano na “dai magtaram nin nakakaraot manongod sa kiisay man, dai magin maluminaban, magin rasonable, nagpapaheling nin bilog na kahoyoan sa gabos na tawo.”—Tito 3:2.
17 Bilang mga Saksi ni Jehova, linilikayan niatong magin maringis o arogante sa iba. Dai nanggad kita naggagamit nin mapanraot na mga tataramon tanganing iladawan an mga tawo na iba an relihion. Imbes, kita mataktika, dawa kun an kagharong, kataed, o katrabaho bakong maboot o naggagamit nin mapan-insultong mga tataramon.—Colosas 4:6; 2 Timoteo 2:24.
“Padagos Mong Pangaptan an Arogan nin Ikakarahay na mga Tataramon”
18. Anong makamomondong kamugtakan sa espirituwal an naeeksperyensiahan kan mga minabalik sa falsong pagsamba?
18 Pakatapos na manodan an mga katotoohan sa Biblia, makaturotriste nanggad kun an saro bumalik sa falsong pagsamba! Ilinaladawan kan Biblia an makamomondong mga resulta kan siring na aksion kan sabihon kaiyan: “Tunay nanggad na kun, pakadulag sa mga ramog kan kinaban huli sa tamang kaaraman dapit sa Kagurangnan asin Paraligtas na si Jesu-Cristo, sinda masiod liwat kan mismong mga bagay na ini asin madaog, an huring mga kamugtakan nagigin orog na maraot para sa sainda kisa kan enot. . . . Nangyari sa sainda an kasabihan kan totoong talinhaga: ‘An ayam nagbalik sa sadiri niang suka, asin an pinarigosan na anayon sa pagtubog sa lamaw.’”—2 Pedro 2:20-22.
19. Taano ta mahalagang marhay na magdanay na mapagbantay sa ano man na puedeng magsapeligro kan satong espirituwalidad?
19 Dapat kitang magdanay na mapagbantay sa ano man na puedeng magsapeligro kan satong espirituwalidad. Igwa talaga nin mga peligro! Si apostol Pablo nagpapatanid: “An ipinasabong na tataramon talagang nagsasabi na sa huring mga panahon an nagkapira masuhay sa pagtubod, na nagtatao nin atension sa nakakalagalag na ipinasabong na mga tataramon asin katokdoan nin mga demonyo.” (1 Timoteo 4:1) Kita nabubuhay sa “huring mga panahon.” An mga dai minarayo sa falsong pagsamba puedeng ‘ikaanod nin mga alon asin ikapadpad nin lambang doros nin katokdoan paagi sa kadayaan nin mga tawo, paagi sa katusohan sa pagpakana nin karatan.’—Efeso 4:13, 14.
20. Paano niato mapoprotehiran an satong sadiri tumang sa nakakaraot na impluwensia nin falsong relihion?
20 Paano niato mapoprotehiran an satong sadiri tumang sa nakakaraot na impluwensia nin falsong relihion? Pensara an gabos na probisyon na itinao ni Jehova. Yaon sa sato an Tataramon nin Dios, an Biblia. (2 Timoteo 3:16, 17) Si Jehova nagtao man nin abundang espirituwal na kakanon paagi sa “maimbod asin mapagmansay na oripon.” (Mateo 24:45) Mantang kita nag-ooswag sa katotoohan, bako daw na maninigo na kultibaron niato an gana para sa ‘matagas na kakanon na para sa mga maygurang’ asin an pagmawot na makipagtipon kun saen kita nakakanood nin espirituwal na mga katotoohan? (Hebreo 5:13, 14; Salmo 26:8) Magin determinado kitang lubos na aprobetsaran an mga probisyon ni Jehova tanganing kita ‘padagos na makapangapot sa arogan nin ikakarahay na mga tataramon’ na nadangog niato. (2 Timoteo 1:13) Sa siring makakarayo kita sa falsong pagsamba.
Ano an Nanodan Nindo?
• Ano an “Dakulang Babilonya”?
• Ano an dapat niatong gibohon tanganing makarayo sa falsong relihion?
• Anong mga peligro sa satong espirituwalidad an maninigo niatong likayan?
[Mga Hapot Para sa Pag-adal]
[Ritrato sa pahina 28]
Aram daw nindo kun taano an “Dakulang Babilonya” ta ilinaladawan bilang sarong inmoral na babae?
[Ritrato sa pahina 29]
An “Dakulang Babilonya” seguradong malalaglag
[Ritrato sa pahina 31]
Nagpapaheling kita nin “mahoyong boot asin hararom na paggalang” sa mga bako niatong kapagtubod