An Tataramon ni Jehova Buhay

Tampok na mga Kabtang sa Libro nin Job

AN PATRIARKANG si Job nag-istar sa daga nin Uz, na ngonyan nasa Arabia. Dakol na Israelita an nag-iistar sa Egipto kan panahon na idto. Minsan ngani bako siang Israelita, si Job sarong parasamba ki Jehova Dios. May labot sa saiya, an Biblia nagsasabi: “Mayo nin siisay man na nakakaagid sa saiya sa daga, lalaking daing katuyawan asin tanos, na natatakot sa Dios asin naglilikay sa maraot.” (Job 1:8) Seguradong ini an peryodo sa pag-oltanan kan buhay nin duwang marahayon na lingkod ni Jehova—an aki ni Jacob na si Jose asin an propetang si Moises.

Si Moises, na pinaniniwalaan na iyong nagsurat kan libro nin Job, posibleng nakaaram manongod ki Job kan sia mag-erok nin 40 taon sa Midian, na harani sa daga nin Uz. Tibaad nabaretaan ni Moises an manongod sa ultimong mga taon ni Job kan an mga Israelita nasa harani kan Uz, sa paghinanapos kan saindang 40 taon na temporaryong pag-istar sa kaawagan. * Magayonon an pagkasurat kan eksperyensia ni Job kaya an salaysay ibinibilang na sarong literaryong obra maestra. Pero labi pa dian, sinisimbag kaiyan an mga hapot na siring kan: Taano ta nagdudusa an marahay na mga tawo? Taano ta tinotogotan ni Jehova na magkaigwa nin karatan? Kaya daw na papagdanayon nin bakong sangkap na mga tawo an saindang integridad sa Dios? Bilang kabtang kan ipinasabong na Tataramon nin Dios, an mensahe kan libro nin Job buhay asin mapuersa dawa ngonyan.—Hebreo 4:12.

‘MAPARA LOGOD AN ALDAW KAN SAKONG PAGKAMUNDAG’

(Job 1:1–3:26)

Sarong aldaw inangat ni Satanas an integridad ni Job sa atubangan nin Dios. Inako ni Jehova an angat asin tinogotan nia si Satanas na tawan si Job nin sunod-sunod na kalamidad. Alagad nagsayuma si Job na ‘sumpaon an Dios.’—Job 2:9.

Nagdatong an tolong kairiba ni Job tanganing “damayan sia.” (Job 2:11) Nagtukaw sinda kaiba nia na dai man lamang nagtataram sagkod na si Job magtaram na nagsasabi: “Mapara logod an aldaw na ako namundag.” (Job 3:3) Nagmawot sia na magin “siring sa mga aki na dai nakaheling nin liwanag,” o gadan nang nagluwas.—Job 3:11, 16.

Mga Hapot sa Kasuratan na Sinimbag:

1:4—Nagselebrar daw nin kumpleanyo an mga aki ni Job? Dai. An mga termino sa orihinal na lenguahe para sa “aldaw” asin “kumpleanyo” magkalaen, na an kada saro kaiyan may sadiring kahulogan. (Genesis 40:20) Sa Job 1:4, ginamit an terminong “aldaw,” na nangangahulogan nin lagwat nin panahon poon sa pagsirang sagkod sa pagsolnop nin saldang. An pitong aking lalaki ni Job minalataw na nagkakaigwa nin pitong aldaw na pampamilyang pagtiripontipon sarong beses kada taon. Mantang ginigibo ninda an paglibot, an lambang aking lalaki an may andam kan bangkete na ginigibo sa saiyang harong sa “saiyang aldaw.”

1:6; 2:1—Sairisay an tinotogotan na lumaog sa atubangan ni Jehova? Kabilang sa mga nagtirindog sa atubangan ni Jehova iyo an bugtong na Aki nin Dios, an Tataramon; an maimbod na mga anghel; asin an suwayan na mga anghel na ‘aki nin Dios,’ kaiba si Satanas na Diablo. (Juan 1:1, 18) Si Satanas asin an saiyang mga demonyo pinalayas sa langit dai nahaloy pakatapos kan pagkaestablisar kan Kahadean nin Dios kan 1914. (Kapahayagan 12:1-12) Paagi sa pagtogot na sinda lumaog sa atubangan nia, iprinesentar ni Jehova sa atubangan kan gabos na espiritung linalang an angat ni Satanas asin an mga isyu na pinalataw kaiyan.

 1:7; 2:2—Direkta daw na nakipag-olay si Jehova ki Satanas? An Biblia dai nagtatao nin dakol na detalye manongod sa kun paano nakikikomunikar si Jehova sa espiritung mga linalang. Minsan siring, si propeta Micaya nagkaigwa nin bisyon kun saen nakaheling sia nin sarong anghel na direktang nakikomunikar ki Jehova. (1 Hade 22:14, 19-23) Kun siring, garo baga nakipag-olay si Jehova ki Satanas na mayo nin parapangoltanan.

1:21—Sa anong paagi makakabalik si Job sa ‘tulak kan saiyang ina’? Mantang pinorma ni Jehova Dios an tawo “hale sa kabokabo kan daga,” an terminong “ina” ginamit digdi sa piguratibong paagi na nanonongod sa daga.—Genesis 2:7.

2:9—Ano an tibaad kamugtakan nin isip kan agom ni Job kan sabihan kaini an saiyang agom na sumpaon an Dios asin magadan? An agom ni Job nag-agi man nin mga kawaran arog kan saiyang agom. Seguradong makolog sa saiya na maheling an dati makosog niang agom na nagsasakit huli sa sarong nakaririmarima nin makuring helang. Nagadanan sia nin namomotan na mga aki. Tibaad napupurisaw siang marhay huli sa gabos na ini kaya nalingawan nia kun ano an talagang mahalaga—an saindang relasyon sa Dios.

Mga Leksion Para sa Sato:

1:8-11; 2:3-5. Arog kan ipinaheling sa nangyari ki Job, kaiba an tamang paghiro asin pagtaram, an integridad naghahagad nin tamang motibo sa paglilingkod ki Jehova.

1:21, 22. Paagi sa pagdadanay na maimbod ki Jehova sa paborable saka sa bakong paborableng mga kamugtakan, mapapatunayan niato na si Satanas putikon.—Talinhaga 27:11.

2:9, 10. Arog ni Job, maninigo na magdanay kitang marigon sa pagtubod dawa kun an mga miembro kan satong pamilya dai nagpapahalaga sa satong espirituwal na mga gibohon o ginigipit kita tangani na makikompromiso o butasan an satong pagtubod.

2:13. An mga kairiba ni Job mayong sinabing nakakaranga manongod sa Dios asin sa saiyang mga panuga huli ta mayo sinda nin espirituwalidad.

“DAI KO HAHALEON SA SAKUYANG SADIRI AN SAKUYANG INTEGRIDAD!”

(Job 4:1–31:40)

An pinakapunto kan tolong kairiba ni Job sa saindang mga pahayag iyo na si Job seguradong nakaginibo nin sarong bagay na maraoton kaya nag-ako kan arog kaiyan kagrabeng padusa hale sa Dios. Si Elifaz an nangenot. Si Bildad an suminunod ki Elifaz, na naggamit nin mas mapagtuyang mga tataramon. Mas makolog pa ngani an mga tataramon ni Zofar.

Dai inako ni Job an putik na pangangatanosan kan saiyang mga bisita. Huling dai masabotan kun taano ta itinogot nin Dios na sia magdusa, nabangkag siang marhay sa pangangatanosan sa saiyang sadiri. Pero, namomotan ni Job an Dios asin nagkagsing: “Sagkod na ako magadan dai ko hahaleon sa sakuyang sadiri an sakuyang integridad!”—Job 27:5.

Mga Hapot sa Kasuratan na Sinimbag:

7:1; 14:14—Ano an gustong sabihon kan “obligatoryong trabaho” o “obligatoryong paglilingkod”? Grabe nanggad an kapurisawan ni Job kaya inisip nia na an buhay mapagal asin masakit na obligatoryong trabaho. (Job 10:17, nota sa ibaba) Mantang an panahon nin saro sa Sheol—poon sa panahon na an saro magadan sagkod sa pagkabuhay liwat—sarong obligatoryong peryodo, iinagid ni Job an panahon na iyan sa obligatoryong paglilingkod.

7:9, 10; 10:21; 16:22—An mga tataramon daw na ini nag-iindikar na si Job dai naniniwala sa pagkabuhay liwat? An mga komentong ini nanonongod sa harani nang ngapit ni Job. Kun siring, ano an gusto niang sabihon? An sarong posibilidad iyo na kun sia magadan, mayo sa mga katemporanyo nia an makakaheling sa saiya. Sa punto de vista ninda, sia dai na mabalik sa saiyang harong ni rerekonoseron pa sagkod sa itinalaan na panahon nin Dios. Tibaad an boot man sabihon ni Job iyo na mayo nin makakabalik hale sa Sheol na dai nagkakaipo nin tabang. An bagay na nagtutubod si Job sa pagkabuhay liwat sa ngapit malinaw na sinasabi sa Job 14:13-15.

10:10—Paano ‘ibinubo ni Jehova si Job na siring sa gatas asin pinakorta sia na siring sa keso?’ Ini sarong poetikong deskripsion kun paano pinorma si Job sa matris kan saiyang ina.

19:20—Ano an gustong sabihon ni Job kan ekspresyon na “baga na sana kublit kan sakong mga ngipon na ako nakaligtas”? Sa pagsabi na sia nakaligtas na baga na sana kublit nin sarong bagay na minalataw na mayo man nin kublit, posibleng  sinasabi ni Job na sia nakaligtas na haros mayo nin ano man.

Mga Leksion Para sa Sato:

4:7, 8; 8:5, 6; 11:13-15. Dai niato dapat na ipamugtak tolos na an sarong tawong nasa kasakitan nag-aani kan itinanom nia asin mayo sa saiya an pag-oyon nin Dios.

4:18, 19; 22:2, 3. An hatol niato maninigong basado sa Tataramon nin Dios, bakong sa personal na opinyon.—2 Timoteo 3:16.

10:1. Binuta si Job kan kapaitan sa boot, kaya dai nia inisip an ibang posibleng dahelan kan saiyang pagdusa. Dai dapat magpait an satong boot kun kita nag-aagi nin pagdusa, nangorogna huling igwa kita nin malinaw na pakasabot sa mga isyung kalabot.

14:7, 13-15; 19:25; 33:24. Durante nin ano man na pagbalo na tibaad itao ni Satanas sa sato, makakasustenir sa sato an paglaom na pagkabuhay liwat.

16:5; 19:2. An satong mga tataramon maninigong makaparigon nin boot asin makapakosog sa iba, bakong makairitar sa sainda.—Talinhaga 18:21.

22:5-7. Daing kamanungdanan asin nakakadanyar an hatol na itinao basado sa mga akusasyon na mayo nin masarig na ebidensia.

27:2; 30:20, 21. An pagpapadanay nin integridad dai nangangaipo nin pagkasangkap. Bakong tama na krinitikar ni Job an Dios.

27:5. Si Job sana an makakahale kan sadiri niang integridad huling an integridad nakadepende sa pagkamoot nin saro sa Dios. Kun siring, maninigo niatong kultibaron an makosog na pagkamoot ki Jehova.

28:1-28. Aram nin tawo kun haen an mga kayamanan kan daga. Mantang hinahanap nia an mga iyan, dahelan sa saiyang pagkamapamaagi nakakaabot sia sa mga agihan sa irarom kan daga na dai naheheling kan naninibang gamgam na harayo an pananaw. Pero, an diosnon na kadonongan naggigikan sa pagkatakot ki Jehova.

29:12-15. Maninigo na boluntad kitang magpaheling nin mamomoton na kabootan sa mga nangangaipo.

31:1, 9-28. Nagpaheling si Job nin halimbawa para sa sato sa paagi na sia naglikay sa pakigitilan, pagsambay, bakong makatanosan asin daing herak na pagtratar sa iba, materyalismo, asin idolatriya.

“AKO NAGSOSOLSOL SA KABOKABO ASIN ABO”

(Job 32:1–42:17)

An sarong hoben na miron na an ngaran Eliu mapasensiang naghihinanyog sa debate. Ngonyan sia nagtaram. Ikinorehir nia si Job asin an tolong nagpapasakit digdi.

Kan matapos si Eliu, suminimbag si Jehova hale sa sarong bagyo nin doros. Dai sia nagtao nin paliwanag sa pagsakit ni Job. Minsan siring, paagi sa sunod-sunod na hapot, pinangyari kan Makakamhan sa Gabos na marealisar ni Job an Saiyang makangingirhat na kapangyarihan asin dakulang kadonongan. Inadmitir ni Job na sia nagtaram na mayo nin pakasabot asin nagsabi: “Binabawi ko an sakuyang isinabi, asin ako nagsosolsol sa kabokabo asin abo.” (Job 42:6) Kan matapos an mga pagbalo ki Job, an saiyang integridad binalosan.

Mga Hapot sa Kasuratan na Sinimbag:

32:1-3—Kasuarin nag-abot si Eliu? Mantang nadangog ni Eliu an gabos na pahayag, seguradong sia tuminukaw sa distansiang madadangog nia an orolay kaidtong bago magtaram si Job asin tinapos an pitong aldaw na pagsilensio kan tolo niang kairiba.—Job 3:1, 2.

34:7—Paanong si Job garo tawong “nag-iinom nin pag-olog-olog na arog nin tubig”? Sa saiyang purisaw na kamugtakan, may tendensia si Job na isipon na sia an pinag-oolog-olog kan tolo niang bisita, minsan ngani an totoo nagtataram sinda tumang sa Dios. (Job 42:7) Sa siring, inaako nia an pag-olog-olog na siring sa saro na nasisiraman sa pag-inom nin tubig.

 Mga Leksion Para sa Sato:

32:8, 9. An kadonongan dai nakakamtan huli sa edad sana. Nangangaipo iyan nin pakasabot sa Tataramon nin Dios asin paggiya kan saiyang espiritu.

34:36. An integridad napapatunayan paagi sa ‘lubos na pagbalo’ sa sato sa sarong paagi.

35:2. Si Eliu maingat na naghinanyog asin tinumbok an tunay na isyu bago nagtaram. (Job 10:7; 16:7; 34:5) Bago magtao nin hatol, an Kristianong kamagurangan kaipuhan na maingat na maghinanyog, aramon an mga detalye, asin malinaw na saboton an pertinenteng mga isyu.—Talinhaga 18:13.

37:14; 38:1–39:30. An paghorophorop sa makangangalas na mga gibo ni Jehova—mga kapahayagan kan saiyang kapangyarihan asin kadonongan—nagpapakumbaba sa sato asin nagtatabang sa sato na maheling na an bindikasyon kan saiyang soberaniya mas mahalaga kisa ano man na personal na intereses niato.—Mateo 6:9, 10.

40:1-4. Kun may tendensia kitang magreklamo tumang sa Makakamhan sa Gabos, maninigong ‘ibugtak niato an satong kamot sa satong ngoso.’

40:15–41:34. Kanigoan an puersa kan Behemot (an hipopotamo) asin Leviatan (an buaya)! Tanganing makatagal sa paglilingkod sa Dios, kaipuhan man niato an kosog hale sa Kaggibo kan mapuersang mga hayop na ini, na nagtatao sa sato nin puersa.—Filipos 4:13.

42:1-6. An pakadangog sa tataramon ni Jehova asin an pagpagirumdom sa saiya kan kapahayagan kan saiyang kapangyarihan nakatabang ki Job na ‘maheling an Dios,’ o maheling an katotoohan manongod sa saiya. (Job 19:26) Itinanos kaini an saiyang kaisipan. Kun ikinokorehir basado sa Kasuratan, maninigo na galaga niatong rekonoseron an satong sala asin gumibo nin mga pagliliwat.

Kultibaron an “Pakatagal ni Job”

Malinaw na ipinapaheling kan libro nin Job na bako an Dios an responsable sa pagdusa nin tawo. Si Satanas an responsable. An pagtogot nin Dios sa karatan sa daga nagtatao sa sato nin oportunidad na magtao nin personal na simbag kun saen kita kampi sa mga isyu dapit sa soberaniya ni Jehova asin sa satong integridad.

Arog ni Job, an gabos na namomoot ki Jehova maagi nin pagbalo. An pagkasaysay manongod ki Job nagtatao sa sato nin kompiansa na puede kitang makatagal. Ipinapagirumdom kaiyan sa sato na an satong mga problema dai magdadanay sagkod lamang. “Nadangog nindo an dapit sa pakatagal ni Job asin naheling an bunga na itinao ni Jehova,” an sabi kan Santiago 5:11. Binalosan ni Jehova si Job sa pagigin nagdadanay na may integridad. (Job 42:10-17) Kanigoan karahay na paglaom an nasa atubangan niato—buhay na daing katapusan sa Paraiso sa daga! Kun siring, arog ni Job magin determinado kita na papagdanayon an satong integridad.—Hebreo 11:6.

[Nota sa Ibaba]

[Mga Ritrato sa pahina 16]

Ano an manonodan niato sa “pakatagal ni Job”?