Kun Naggagamit nin Autoridad, Arogon an Cristo

NAGKAPIRANG taon na an nakaagi, an sarong eksperimento sa gawe-gawe nin tawo nagpaluwas nin nakakapukaw nin interes na mga resulta. An mga nakikabtang binanga sa duwang grupo. An sarong grupo iinasignar bilang mga guardia asin pinamahala sa ikaduwang grupo, na iinasignar na magin mga preso. Ano an nangyari?

“Sa laog nin pira sanang aldaw,” segun sa report, “an kadaklan kan [mga guardia] nagin mapan-abuso asin paradaogdaog, na parateng nagtatao nin mga padusa, mantang an mga preso nagin matatakton asin nagsusunodsunod na sana.” An nagin konklusyon kan mga parasiyasat iyo ini: Haros gabos puedeng mahulog sa siod nin salang paggamit nin autoridad.

Autoridad—Tama Asin Salang Paggamit Kaiyan

Siempre, an tamang paggamit nin autoridad puedeng magin kapakipakinabang na impluwensia. Puedeng magtao iyan nin tamang paggiya asin puedeng magresulta sa pisikal, emosyonal, asin espirituwal na mga pakinabang. (Talinhaga 1:5; Isaias 48:17, 18) Minsan siring, arog kan ipinaheling kan eksperimento na nasambitan sa enotan, dai nawawara an peligro na magpasobra sa rasonableng paggamit nin autoridad. Itinotokdo kan Biblia an peligrong ini asin nagsasabi: “Kun namamahala an siisay man na maraot, nag-aagrangay an banwaan.”—Talinhaga 29:2; Eclesiastes 8:9.

Nakakadanyar an pag-abuso sa autoridad nin saro, dawa kun marahay an motibo sa paggibo kaiyan. Halimbawa, kasuarin pa sana, an sarong relihiosong sosyedad nin mga paratokdo sa Irlandia naghagad nin dispensasyon sa publiko huli sa pag-abuso sa autoridad nin nagkapirang paratokdo sa mga aki na nasa pangangataman ninda. Daing duda, noble an obheto kan dakol sa mga paratokdong ini, alagad an mga paagi na ginamit kan nagkapira nakakadanyar na marhay. An sarong peryodiko nagbareta na “dakol na aki an biyong nadanyaran minsan paano huli sa grabeng kadahasan asin karingisan nin pamamaagi kan dakol na paratokdo.” (The Irish Times) Kun siring, paano nindo magagamit an autoridad tanganing mapaluwas an pinakamarahay sa iba imbes na parayoon an boot ninda o kologan sinda paagi sa tataramon o gibo?—Talinhaga 12:18.

Itinao ki Jesu-Cristo an “Gabos na Autoridad”

Isipon an halimbawa ni Jesu-Cristo. Dai nahaloy bago sia sumakat sa langit, sinabihan nia an saiyang mga disipulo: “An gabos na autoridad sa langit asin sa daga itinao na sa sako.” (Mateo 28:18) Iyan daw maski paano nagtao nin takot sa mga disipulo? Nagsaboot daw sinda na si Jesus mapaheling na ngonyan nin kaparehong aktitud kan mga Cesar sa Roma, na bantog sa paggamit nin puersa sa pagpapondo nin protesta o rebelyon?

 An rekord kan Biblia may pagdodoon na nagsisimbag nin dai! Si Jesu-Cristo naggagamit nin autoridad sa kaparehong paagi kan paggamit kaiyan kan saiyang Ama. Minsan ngani si Jehova an tama sana na makakamhan sa gabos na Unibersal na Soberano, an gusto nia gikan sa pusong paglilingkod hale sa saiyang mga sakop, bakong daing isip, natatakot, o sa oripon na pagkuyog. (Mateo 22:37) Nungkang inaabuso ni Jehova an saiyang autoridad. Ipinapaheling ini nin sarong nakakaapod nin atension na bisyon na itinao ki propeta Ezequiel.

Sa bisyon na ini, nakaheling si Ezequiel nin apat na linalang na anghel na nagsusuportar sa soberaniya nin Dios. An lambang saro igwa nin apat na lalauogon. “Kun manongod sa kaagid kan saindang lalauogon,” an isinurat ni Ezequiel, “sindang apat may lalauogon nin tawo na may lalauogon nin leon sa too, asin sindang apat may lalauogon nin toro sa wala; sindang apat igwa man nin lalauogon nin agila.” (Ezequiel 1:10) An apat na lalauogon na ini nagrerepresentar sa apat na pangenot na kualidad nin Dios na sangkap sa pagkatimbang. Sinasabi ini sa Tataramon nin Dios bilang: pagkamoot, na irinerepresentar kan lalauogon nin tawo; hustisya, na irinerepresentar kan lalauogon nin leon; asin kadonongan, na irinerepresentar kan lalauogon nin agila. An tolong kualidad na ini nagtatarabangan kaiba kan ikaapat—an kapangyarihan, na ipinapaheling kan lalauogon nin toro. Ano an kahulogan kan gabos na ini? Ipinapaheling kan bisyon na dai noarin man ginagamit ni Jehova an saiyang daing sagkod na kapangyarihan asin autoridad sa paagi na bakong kaoyon kan iba pa niang pangenot na kualidad.

Bilang pag-arog sa saiyang Ama, pirmeng ginagamit ni Jesu-Cristo an saiyang autoridad sa paagi na lubos na kaoyon kan pagkamoot, kadonongan, asin hustisya. An mga disipulo nia nakanompong nin dakulang kaginhawahan sa paglilingkod sa irarom kan autoridad ni Jesus. (Mateo 11:28-30) Kun may sarong kualidad na nagpapamidbid ki Jehova Dios sagkod ki Jesu-Cristo, iyan an pagkamoot, bakong  an kapangyarihan o autoridad!—1 Corinto 13:13; 1 Juan 4:8.

Paano Nindo Ginagamit an Autoridad?

Kumusta kamo mapadapit digdi? Halimbawa, sa pamilya, kinokontrol daw nindo an mga bagay paagi sa kosog kan saindong autoridad dawa mangahulogan ini na ipipirit nindo an personal nindong mga kapritso o gusto? An ibang miembro daw kan saindong pamilya minasunod sa saindong mga desisyon huli sa takot o huli sa pagkamoot? An nakakalabing puersa daw an basehan sa pagdedesisyon? Ini an mga hapot na puedeng isipon kan mga payo nin pamilya sa katuyohan na suportaran an teokratikong areglo sa pamilya.—1 Corinto 11:3.

Paano kun igwa kamo nin sarong sokol nin autoridad sa Kristianong kongregasyon? Tanganing helingon kun baga ginagamit nindo iyan nin tama, sokolon an saindong sadiri na ginagamit an minasunod na mga prinsipyo na ipinasabong ni Jehova Dios asin ipinaheling paagi sa halimbawa ni Jesu-Cristo.

“An oripon kan Kagurangnan . . . kaipuhan na magin maboot sa gabos, . . . padagos na nagpopogol sa irarom nin karatan, nagtotokdo na may kahoyoan duman sa mga minatumang.”—2 Timoteo 2:24, 25.

May nagkapirang indibiduwal sa Kristianong kongregasyon kan enot na igwa nin dakulang autoridad. Halimbawa, si Timoteo puede nganing ‘pagbotan an nagkapira na dai magtokdo nin laen na doktrina.’ (1 Timoteo 1:3) Pero, makakasierto kita na ipinabanaag ni Timoteo an diosnon na mga kualidad sa gabos na ginibo nia, huli ta daing duda na sia huminiro kaoyon kan hatol ni Pablo na magtokdo na “may kahoyoan” asin “magin maboot sa gabos” sa pag-asikaso kan saiyang Kristianong pangangataman. Huling sia medyo hoben pa, kaipuhan na gumawe sia na siring sa sarong magalang na aking lalaki sa mga mas may edad na asin sarong may pagmakolog na tugang sa mga mas hoben. (1 Timoteo 5:1, 2) Sa irarom kan arog kaiyan na mamomoton na pag-asikaso, ipinapabanaag kan Kristianong kongregasyon an espiritu nin maogma asin mamomoton na pamilya, bakong arog kan indiperente asin daing puso na korporasyon sa negosyo.—1 Corinto 4:14; 1 Tesalonica 2:7, 8.

“An mga namamahala sa mga nasyon nagpapakangkagurangnan sa sainda asin an darakulang tawo nagkakapot nin autoridad sa sainda. Bakong siring kaini dian sa tahaw nindo; kundi an siisay man na boot na magin dakula sa saindo dapat na iyo an mani paralingkod sa saindo.”—Mateo 20:25, 26.

An maisog na mga namomoon sa kinaban “nagpapakangkagurangnan” sa iba paagi sa pag-imponer kan saindang gusto asin pagpirit na gibohon ninda an mga bagay sa partikular na paagi, na nanhuhuma nin padusa kun sinda makisuway. Minsan siring, idinoon ni Jesu-Cristo an paglilingkod sa iba asin bakong an pangigipit sa sainda. (Mateo 20:27, 28) Pirme niang tinatratar an saiyang mga disipulo sa mamomoton asin may pagmakolog na paagi. Kun susunodon nindo an halimbawa ni Jesus, mas magigin pasil nanggad para sa iba na  makikooperar sa saindo. (Hebreo 13:7, 17) Mas magigin man pasil nanggad para sa sainda na ‘umiba nin ekstrang milya’ kun kaya ninda, na ginigibo iyan nin gikan sa boot asin dai napipiritan.—Mateo 5:41.

“Pastoran nindo an aripompon nin Dios na nasa saindong pangataman, bakong . . . nagpapakangkagurangnan sa mga mana nin Dios, kundi nagigin mga halimbawa sa aripompon.”—1 Pedro 5:2, 3.

Aram kan mga paraataman ngonyan na maninimbag sinda sa espirituwal na ikakarahay kan gabos sa kongregasyon. Sineseryoso ninda an paninimbagan na ini. Sa pag-asikaso sa aripompon nin Dios, nagmamaigot sindang gibohon iyan nin gikan sa boot, may pagkagalaga, asin sa mamomoton na paagi. Arog ni apostol Pablo, nagmamaigot sindang pasarigon asin pakosogon an pagtubod kan mga pinapangatamanan ninda, na dai minagawe bilang mga kagurangnan kan saindang pagtubod.—2 Corinto 1:24.

Kun kaipuhan na magtao nin angay na hatol, ginigibo iyan kan kamagurangan sa espiritu nin kahoyoan tanganing pakarhayon giraray an napapasala o tabangan an sarong kapwa Kristiano na umoswag sa espirituwal. Ginigirumdom ninda an pagirumdom ni apostol Pablo: “Mga tugang, minsan kun an sarong tawo gumibo nin sala bago nia iyan maaraman, kamo na igwang espirituwal na mga kualipikasyon pagmaigotan nindo na pakarhayon giraray an tawong iyan sa espiritu nin kahoyoan, mantang binabantayan man nindo an saindong sadiri, ta tibaad kamo masugotan man.”—Galacia 6:1; Hebreo 6:1, 9-12.

“Padagos kamong magpatiriostios asin sueltong magpatarawadtawadan . . . Isulog nindo an pagkamoot, huli ta iyan sangkap na bogkos nin pagkasararo.”—Colosas 3:13, 14.

Paano nindo tinatratar an siisay man na tibaad dai nakakaabot sa sangkap na paagi sa Kristianong mga pamantayan? Tinatawan daw nindo nin konsiderasyon an saindang mga pagkabakong sangkap, arog kan ginigibo ni Jehova asin ni Jesu-Cristo? (Isaias 42:2-4) O iniinsistir nindo na iaplikar an aktuwal na nakasurat sa ley sa gabos na kamugtakan? (Salmo 130:3) Girumdomon, angay na magpaheling nin kabootan kun posible asin karigonan kun kaipuhan sana. An paggawe na may pagkamoot makakatabang na magkaigwa nin makosog na bogkos nin pagkompiar sa kada saro asin tiwala sa pag-oltanan nindo asin kan mga sakop kan autoridad nindo.

Kun may ipinaniwala sa saindo na ano man na klaseng autoridad, magmaigot na arogon si Jehova Dios asin si Jesu-Cristo sa paggamit kaiyan. Girumdomon an marahayon na deskripsion kan salmista sa paglaladawan kan paagi nin paggamit ni Jehova kan saiyang autoridad sa saiyang banwaan. Si David nag-awit: “Si Jehova an sakuyang Pastor. Dai ako magkukulang nin ano man. Sa madoot na mga sabsaban pinapaluko nia ako; dinadara nia ako sa matubig na mga pahingaloan. An sakuyang kalag saiyang pinapaginhawa. Ginigiyahan nia ako sa mga dalan nin katanosan huli sa saiyang ngaran.” Siring man, manongod ki Jesus mababasa niato: “Ako an marahay na pastor, asin midbid ko an sakong mga karnero patin midbid ako kan sakong mga karnero, kun paanong namimidbid ako kan Ama asin namimidbid ko an Ama; asin itinatao ko an sakong kalag para sa mga karnero.” Igwa pa daw kita nin mas marahay na arogan sa mamomoton na paggamit nin autoridad?—Salmo 23:1-3; Juan 10:14, 15.

[Blurb sa pahina 18]

An paggamit ni Jehova nin kapangyarihan pirmeng lubos na kaoyon kan saiyang hustisya, kadonongan, asin pagkamoot

[Ritrato sa pahina 18]

Kun beses, an kamagurangan kaipuhan na magtao nin mamomoton na hatol sa mga napapasala

[Ritrato sa pahina 19]

Hinatolan ni Pablo si Timoteo na gumawe na siring sa sarong magalang na aking lalaki asin sarong may pagmakolog na tugang

[Ritrato sa pahina 20]

Ginagamit ni Jesu-Cristo an saiyang autoridad sa madonong, makatanosan, asin mamomoton na paagi