Mga Hapot Hale sa mga Parabasa

Ano an manonodan niato sa pangangalad na manonompongan sa Exodo 23:19: “Dai mo paglutoon an ogbon na kanding sa gatas kan saiyang ina”?

An pagboot na ini sa Ley ni Moises, na naglataw nin tolong beses sa Biblia, makakatabang sa sato na masabotan an pagmansay ni Jehova sa kun ano an tama, an saiyang pagmalasakit, asin an saiyang pagpadangat. Itinatampok man kaiyan an saiyang makuring pagkasurang sa falsong pagsamba.—Exodo 34:26; Deuteronomio 14:21.

An pagluto sa ogbon na kanding o ibang hayop sa gatas kan ina kaiyan magigin kontra sa natural na areglo ni Jehova sa mga bagay. Itinao nin Dios an gatas kan ina tanganing tawan nin sustansia an ogbon asin tabangan iyan na magtalubo. An pagluto kan ogbon sa gatas kan sadiring ina kaiyan magigin, sa mga tataramon nin sarong intelektuwal, pagpaheling nin “paglapastangan sa relasyon na inestablisar asin sinantipikar nin Dios sa pag-oltanan nin magurang asin ogbon.”

Dugang pa, may mga nagsusuherir na an pagluto nin ogbon na kanding sa gatas kan ina kaiyan tibaad paganong ritual na ginigibo tanganing umoran. Kun arog kaiyan, an pangangalad nagserbing proteksion sa mga Israelita tumang sa daing kamanungdanan asin daing puso na mga kaugalean sa relihion kan mga nasyon na nakapalibot sa sainda. Espesipikong pinagbawalan kan Ley ni Moises an mga Israelita na sumunod sa mga ley kan mga nasyon na idto.—Levitico 20:23.

Ultimo, naheheling niato sa partikular na ley na ini an mamomoton na pagmalasakit ni Jehova. Sa katunayan, an Ley igwa nin dakol na kaparehong pagboot tumang sa karingisan sa mga hayop asin nagpoprotehir tumang sa paggibo kan kontra sa natural na areglo nin mga bagay. Halimbawa, kaiba sa Ley an mga pagboot na ipinapangalad an pag-atang sa sarong hayop apuera sana kun kisuerra pitong aldaw nang nakaibahan kaiyan an ina kaiyan, paggadan sa hayop sagkod sa ogbon kaiyan sa parehong aldaw, asin pagkua kan gamgam sagkod mga sogok o siyo kaiyan sa tataghan.—Levitico 22:27, 28; Deuteronomio 22:6, 7.

Malinaw nanggad, an Ley bako sanang komplikadong mga pagboot asin pangangalad. An saro sa pakinabang kan Ley iyo na an mga prinsipyo kaiyan nagtatabang na itadom sa sato an halangkaw na klase nin moral na pakamansay na talagang nagpapabanaag kan marahayon na mga kualidad ni Jehova.—Salmo 19:7-11.

[Picture Credit Line sa pahina 31]

© Timothy O’Keefe/Index Stock Imagery