‘Paduman Kamo Asin Gumibo Kamo nin mga Disipulo, na Bautismohan Nindo Sinda’

“Kun siring, paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda . . . , na tokdoan nindo sinda na otobon an gabos na bagay na ipinagboot ko sa saindo.”—MATEO 28:19, 20.

1. Anong desisyon an ginibo kan nasyon nin Israel sa ibaba kan Bukid nin Sinai?

KAIDTONG mga 3,500 na taon na an nakaagi, sarong bilog na nasyon an nagpromesa sa Dios. Nagkakatiripon sa ibaba kan Bukid nin Sinai, hayagan na ipinahayag kan mga Israelita: “Andam kaming gibohon an gabos na itinaram ni Jehova.” Poon kaidto, an Israel nagin sarong banwaan na dusay sa Dios, an saiyang “espesyal na sadiri.” (Exodo 19:5, 8; 24:3) Linaoman nindang akoon an saiyang proteksion asin na mamumuhay an sunod-sunod nindang henerasyon sa sarong daga na “binubulosan nin gatas asin tangguli.”—Levitico 20:24.

2. Anong relasyon sa Dios an puedeng makamtan ngonyan nin mga tawo?

² Minsan siring, arog kan inadmitir kan salmistang si Asaf, ‘dai inotob kan mga Israelita an tipan nin Dios, asin nagsayuma sindang maglakaw sa saiyang ley.’ (Salmo 78:10) Dai ninda inotob an promesa kan saindang mga apoon ki Jehova. Sa kahurihurihi, winara kan nasyon an daing kaagid na relasyon na iyan sa Dios. (Eclesiastes 5:4; Mateo 23:37, 38) Kun siring, “nagtao [an Dios] kan saiyang atension sa mga nasyon tanganing kumua hale sa sainda nin sarong banwaan para sa saiyang ngaran.” (Gibo 15:14) Asin sa huring mga aldaw na ini, tinitipon nia “an sarong dakulang kadaklan, na dai nin siisay man na makakabilang, hale sa gabos na nasyon asin tribo asin banwaan patin tataramon,” na magayagayang nagrerekonoser: “Utang niato an kaligtasan sa satong Dios, na nagtutukaw sa trono, asin sa Kordero.”—Kapahayagan 7:9, 10.

3. Anong mga lakdang an dapat na gibohon nin saro tanganing magkaigwa nin personal na relasyon sa Dios?

³ Tanganing mapabilang sa mga igwa kan  mahalagang marhay na relasyon na iyan sa Dios, an saro kaipuhan na magdusay ki Jehova asin hayagan na simbolisaran iyan paagi sa bautismo sa tubig. Ini bilang pagkuyog sa direktang pagboot ni Jesus sa saiyang mga disipulo: “Kun siring, paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo.” (Mateo 28:19, 20) Naghinanyog an mga Israelita sa pagbasa kan “libro kan tipan.” (Exodo 24:3, 7, 8) Huli kaini, nasabotan ninda an saindang mga obligasyon ki Jehova. Siring man ngonyan, bago gibohon nin saro an lakdang nin pagpabautismo, kaipuhan an tamang kaaraman sa kabotan nin Dios na manonompongan sa saiyang Tataramon, an Biblia.

4. Ano an dapat na gibohon nin saro tanganing makualipikar sa bautismo? (Iiba an kahon sa itaas.)

⁴ Malinaw nanggad, gusto ni Jesus na an saiyang mga disipulo magkaigwa nin masarig na pundasyon para sa saindang pagtubod bago sinda magpabautismo. Pinagbotan nia an saiyang mga parasunod bako sana na magduman asin gumibo nin mga disipulo kundi tokdoan man sinda ‘na otobon an gabos na bagay na ipinagboot nia.’ (Mateo 7:24, 25; Efeso 3:17-19) Kun siring, an mga nakukualipikar sa bautismo sa parate pinag-adalan an Biblia sa laog nin mga bulan o sarong taon pa ngani o duwa, tanganing an saindang desisyon bakong pabiglabigla ni kulang sa kabatidan. Sa bautismo mismo, minasimbag nin iyo an mga kandidato sa duwang pundamental na hapot. Mantang idinoon ni Jesus na ‘an satong Iyo maninigong mangahulogan nin Iyo, an satong Dai, Dai,’ makakatabang sa sato gabos na maingat na repasohon an kahulogan kan duwang hapot na ini sa bautismo.—Mateo 5:37.

Pagsolsol Asin Pagdusay

5. Anong duwang pundamental na lakdang an idinodoon kan enot na hapot sa bautismo?

⁵ An enot na hapot sa bautismo naghahapot sa kandidato kun baga pinagsolsolan na nia an dati niang pamumuhay asin idinusay na an saiyang buhay ki Jehova tanganing gibohon an saiyang kabotan. Idinodoon kan hapot na ini an duwang mahalagang marhay na lakdang na dapat na gibohon bago an bautismo, arin na baga, an pagsolsol asin pagdusay.

6, 7. (a) Taano an pagsolsol ta kaipuhan para sa gabos na kandidato sa bautismo? (b) Anong mga pagbabago an dapat na gibohon pagkatapos na magsolsol an saro?

⁶ Taano ta dapat na magsolsol an sarong tawo bago ipresentar an saiyang sadiri sa bautismo? Si apostol Pablo nagpapaliwanag: “Kita gabos kaidto namuhay oyon sa mga mawot kan satong laman.” (Efeso 2:3) Bago kita nakaabot sa tamang kaaraman kan kabotan nin Dios, namuhay kita na kaoyon kan kinaban, oyon sa mga prinsipyo asin pamantayan kaini. An satong pamumuhay nasa irarom kan kontrol kan dios kan sistemang ini, si Satanas. (2 Corinto 4:4) Minsan siring, kan maaraman niato an kabotan nin Dios, nagdesisyon kita na mamuhay “bako nang huli sa mga mawot nin tawo, kundi huli sa kabotan nin Dios.”—1 Pedro 4:2.

⁷ An bagong pamumuhay na ini nagtatao nin dakol na pakinabang. Orog sa gabos, binubukasan kaiyan an dalan pasiring sa mahalagang marhay na relasyon ki Jehova, na ikinomparar ni David sa imbitasyon na lumaog sa “tolda” asin “banal  na bukid” nin Dios—na tunay nanggad na sarong dakulang pribilehio. (Salmo 15:1) Rasonable sana, an iimbitaran ni Jehova bakong kun siisay sana kundi solamente idtong “naglalakaw na daing sala asin naggigibo nin katanosan asin nagtataram kan katotoohan sa [saindang] puso.” (Salmo 15:2) Depende sa satong mga kamugtakan bago niato maaraman an katotoohan, an pag-abot sa mga kahagadan na ini tibaad mangahulogan na dapat na gumibo kita nin nagkapirang pagbabago—sa paggawe sagkod sa personalidad. (1 Corinto 6:9-11; Colosas 3:5-10) An nagmomotibar sa siring na mga pagbabago iyo an pagsolsol—an hararom na pagbasol sa dating pamumuhay niato asin makosog na determinasyon na paogmahon si Jehova. Ini nagbubunga nin lubos na pagbabago—an pagbaya sa maimot, kinabanon na paagi nin pamumuhay asin pagsunod sa dalan na nakakapaogma sa Dios.—Gibo 3:19.

8. Paano niato ginigibo an satong pagdusay, asin ano an koneksion kaiyan sa bautismo?

⁸ An ikaduwang kabtang kan enot na hapot sa bautismo naghahapot sa mga kandidato kun baga idinusay na ninda an saindang sadiri ki Jehova tanganing gibohon an saiyang kabotan. An pagdusay mahalagang marhay na lakdang na dapat na maenot sa bautismo. Ginigibo iyan paagi sa pamibi, na ipinapahayag niato an kamawotan na idusay an satong buhay ki Jehova paagi ki Cristo. (Roma 14:7, 8; 2 Corinto 5:15) Si Jehova na ngonyan an nagigin Kagurangnan asin Kagsadiri niato, asin kapareho ni Jesus ikinakaogma niatong marhay an paggibo kan kabotan nin Dios. (Salmo 40:8; Efeso 6:6) Sarong beses sanang ginigibo an sagradong promesang ini ki Jehova. Minsan siring, mantang ginigibo niato sa pribado an satong pagdusay, an pagpahayag sa publiko sa aldaw kan bautismo nagpapaisi sa gabos na ginibo na niato an solemneng pagdusay na ini sa satong langitnon na Ama.—Roma 10:10.

9, 10. (a) Ano an kalabot sa paggibo kan kabotan nin Dios? (b) Paano rinekonoser an satong pagdusay dawa kan mga opisyal na Nazi?

⁹ Ano an kalabot sa pagsunod sa halimbawa ni Jesus sa paggibo kan kabotan nin Dios? Sinabi ni Jesus sa saiyang mga disipulo: “Kun an siisay man boot na magsunod sa sako, paindahan nia an saiyang sadiri asin pasanon an saiyang hariging pasakitan patin padagos akong sundan.” (Mateo 16:24) Digdi sinabi nia an tolong bagay na dapat niatong gibohon. Enot, ‘pinapaindahan’ niato an satong sadiri. Sa ibang pagtaram, binabayaan niato an satong maimot, bakong sangkap na mga inklinasyon asin minaoyon kitang kuyogon an hatol asin pagdirehir nin Dios. Ikaduwa, ‘pinapasan niato an satong hariging pasakitan.’ Kan kaaldawan ni Jesus, an hariging pasakitan simbolo nin kasusupgan asin pagdusa. Bilang mga Kristiano, inaako niato an satong kabtang sa pagdusa para sa kapakanan kan maogmang bareta. (2 Timoteo 1:8) Maski ngani tibaad olog-ologon o tuyatuyaon kita kan kinaban, kapareho ni Cristo ‘hinahamak niato an kasupganan,’ na maogma sa pakaaram na napapaogma niato an Dios. (Hebreo 12:2) Ultimo, “padagos” niatong sinusundan si Jesus.—Salmo 73:26; 119:44; 145:2.

¹⁰ Interesante nanggad, rinerekonoser dawa kan nagkapirang paratumang an ginibo kan mga Saksi ni Jehova na pagdusay sa Dios tanganing paglingkodan sia nin bilog na puso. Halimbawa, sa kampo de konsentrasyon kan Nazi Alemania sa Buchenwald, hinagad sa mga Saksi na nagsayumang talikdan an saindang pagtubod na pirmahan an minasunod na nasusurat na deklarasyon: “Ako sagkod ngonyan dusay na Estudyante sa Biblia asin nungka kong babalgahon an sinumpaan ko ki Jehova.” Ipinapahayag nanggad kaini an aktitud kan gabos na nagdusay, maimbod na mga lingkod nin Dios!—Gibo 5:32.

 Ipinapamidbid Bilang Saro sa Mga Saksi ni Jehova

11. Anong pribilehio an nakakamtan nin saro na nagpapabautismo?

¹¹ An ikaduwang hapot sa bautismo naghahapot sa kandidato, enot sa gabos, kun baga saiyang nasasabotan na an saiyang bautismo magpapamidbid sa saiya bilang saro sa Mga Saksi ni Jehova. Pagkatapos kan bautismo, nagigin siang ordenadong ministro na nagdadara kan ngaran ni Jehova. Ini sarong dakulang pribilehio sagkod magabat na paninimbagan. Iiniiba man kaiyan an binautismohan sa linya kan mga magkakamit nin daing sagkod na kaligtasan, basta magdanay siang maimbod ki Jehova.—Mateo 24:13.

12. Anong obligasyon an kaiba kan onrang darahon an ngaran ni Jehova?

¹² Tunay nanggad, sarong pambihirang onra na darahon an ngaran kan makakamhan sa gabos na Dios, si Jehova. Si propeta Miqueas nagsabi: “An gabos na banwaan, kun para sa sainda, maglalakaw an balang saro sa ngaran kan saiyang dios; alagad, kun para sa sato, kita maglalakaw sa ngaran ni Jehova na satong Dios sagkod sa panahon na daing talaan, sagkod lamang pa ngani.” (Miqueas 4:5) Minsan siring, may kaibang obligasyon an onrang ini. Dapat niatong pagmaigotan na mamuhay sa paagi na nagtatao nin onra sa ngaran na dinadara niato. Siring kan ipinagirumdom ni Pablo sa mga Kristiano sa Roma, kun dai ginigibo nin saro an saiyang ihinuhulit, ‘nalalanghadan,’ o nararaot an dangog, kan ngaran nin Dios.—Roma 2:21-24.

13. Taano an nagdusay na mga lingkod ni Jehova ta may paninimbagan na magpatotoo manongod sa saindang Dios?

¹³ Kun an sarong tawo nagigin saro sa Mga Saksi ni Jehova, saiya man na inaako an paninimbagan na magpatotoo manongod sa saiyang Dios. Inimbitaran ni Jehova an nagdusay na nasyon nin Israel na magin saiyang mga saksi tanganing magpatotoo sa saiyang daing sagkod na pagka-Dios. (Isaias 43:10-12, 21) Alagad dai inotob kan nasyon an katongdan na ini, asin sa katapustapusi lubos nindang winara an pag-oyon ni Jehova. Ngonyan, ipinag-oorgolyo kan tunay na mga Kristiano an pribilehio na magpatotoo mapadapit ki Jehova. Ginigibo niato iyan huling namomotan niato sia asin minamawot niato na masantipikar an saiyang ngaran. Paano niato magigibong magin silensio mantang naaaraman niato an katotoohan manongod sa satong langitnon na Ama asin sa saiyang katuyohan? Namamatean niato an arog kan namatean ni apostol Pablo kan sia magsabi: “Iyan kaipuhan na gibohon ko. Sa katotoohan, herak man sa sako kun dai ako magpahayag kan maogmang bareta!”—1 Corinto 9:16.

14, 15. (a) Ano an papel kan organisasyon ni Jehova sa satong espirituwal na pag-oswag? (b) Anong mga probisyon an makukua tanganing tabangan kita sa espirituwal?

¹⁴ An ikaduwang hapot nagpapagirumdom man sa kandidato kan saiyang paninimbagan na makipagtabangan sa organisasyon ni Jehova na ginigiyahan nin espiritu. Dai kita nagsosolo sa paglilingkod sa Dios, asin kaipuhan niato an tabang, suporta, asin pagparigon sa boot kan “bilog na kasararoan nin mga tugang.” (1 Pedro 2:17; 1 Corinto 12:12, 13) Igwa nin mahalagang marhay na papel an organisasyon nin Dios sa satong espirituwal na pag-oswag. Nagtatao iyan nin abundang suplay nin mga publikasyon sa Biblia na nagtatabang sa sato na magtalubo sa tamang kaaraman, gumawe nin madonong kun napapaatubang kita sa mga problema, asin kultibaron an dayupot na relasyon sa Dios. Siring sa sarong ina na sinesegurado na an saiyang aki napapakakan nin tama asin naaasikaso, “an maimbod asin mapagmansay na oripon” nagtatao nin abunda, napapanahon na espirituwal na pagkakan para sa satong espirituwal na pag-oswag.—Mateo 24:45-47; 1 Tesalonica 2:7, 8.

¹⁵ Sa semanal na mga pagtiripon, inaako kan banwaan ni Jehova an kinakaipuhan na pagpatuod asin pagparigon sa boot tanganing magin maimbod na mga Saksi ni Jehova. (Hebreo 10:24, 25) An Teokratikong Paadalan sa Pagmiministro nagtotokdo sa sato na magtaram sa publiko, asin an Pagtiripon  sa Paglilingkod nagpapatuod sa sato na iatubang nin epektibo an satong mensahe. Sa satong mga pagtiripon sagkod sa personal na pag-adal niato sa mga publikasyon sa Biblia, naheheling niato an pagpunsionar kan espiritu ni Jehova, na nagdidirehir sa saiyang organisasyon. Paagi sa regular na mga probisyon na ini, pinapatanidan kita nin Dios sa mga peligro, pinapatuod kita na magin epektibong mga ministro, asin tinatabangan kita na magdanay na puka sa espirituwal.—Salmo 19:7, 8, 11; 1 Tesalonica 5:6, 11; 1 Timoteo 4:13.

An Nagmomotibar sa Pagpabautismo

16. Ano an nagmomotibar sa sato na idusay an satong sadiri ki Jehova?

¹⁶ Sa siring, an duwang hapot sa bautismo nagpapagirumdom sa mga kandidato kan kahalagahan kan bautismo sa tubig asin kan mga paninimbagan na kaiba kaiyan. Kun siring, ano an maninigong magmotibar sa sainda na magdesisyon na magpabautismo? Nagigin kitang bautisadong mga disipulo, bakong huli ta may nagpipirit sa sato, kundi huli ta ‘dinadagka’ kita ni Jehova. (Juan 6:44) Huling “an Dios pagkamoot,” pinapamahalaan nia an uniberso paagi sa pagkamoot, bakong paagi sa pamimirit. (1 Juan 4:8) Nadadagka kitang rumani ki Jehova paagi sa saiyang maboot na mga kualidad asin sa paagi kan saiyang pagtratar sa sato. Itinao ni Jehova para sa sato an saiyang bugtong na Aki asin iinaalok sa sato an pinakamarahay na ngapit. (Juan 3:16) Kita man napapahiro na itao sa saiya—na idusay sa saiya—an satong buhay.—Talinhaga 3:9; 2 Corinto 5:14, 15.

17. Sa ano niato dai idinusay an satong sadiri?

¹⁷ Idinudusay niato an satong sadiri, bakong sa sarong causa o sa sarong gibohon, kundi ki Jehova mismo. An gibohon na itinatao nin Dios sa saiyang banwaan magbabago, alagad an saindang pagdusay sa saiya dai nagbabago. Halimbawa, an ipinagibo nia ki Abraham laen na marhay sa ipinagibo nia ki Jeremias. (Genesis 13:17, 18; Jeremias 1:6, 7) Pero, ginibo kan duwa an espesipikong gibohon na ipinapagibo sa sainda nin Dios huling namomotan ninda si Jehova asin minamawot ninda na maimbod na gibohon an saiyang kabotan. Durante kan panahon na ini kan katapusan, an gabos na bautisadong parasunod ni Cristo nagmamaigot na gibohon an pagboot ni Cristo na ihulit an maogmang bareta kan Kahadean asin gumibo nin mga disipulo. (Mateo 24:14; 28:19, 20) An bilog na pusong paggibo kan gibohon na iyan sarong marahay na paagi na ikapaheling na namomotan niato an satong langitnon na Ama asin na kita talagang dusay sa saiya.—1 Juan 5:3.

18, 19. (a) Anong pampublikong kapahayagan an ginigibo niato paagi sa satong bautismo? (b) Ano an eestudyaran sa masunod na artikulo?

¹⁸ Daing duda, binubukasan kan bautismo an dalan pasiring sa dakol na bendisyon, alagad iyan bakong lakdang na puedeng basangbasangon. (Lucas 14:26-33) Ipinapahayag kaiyan an sarong desisyon na nangongorog kisa gabos na iba pang paninimbagan. (Lucas 9:62) Kun kita nagpapabautismo, ginigibo niato sa katunayan an pampublikong kapahayagan na ini: “An Dios na ini iyo an satong Dios sagkod sa panahon na daing talaan, sagkod lamang pa ngani. Sia mismo an magiya sa sato sagkod na kita magadan.”—Salmo 48:14.

¹⁹ Sisiyasaton kan masunod na artikulo an dugang pang mga hapot na tibaad maglataw may koneksion sa bautismo sa tubig. Igwa daw nin balidong mga dahelan na an saro dai magpabautismo? Maninigo daw na konsideraron an edad? Paano makakakontribwir an gabos sa dignidad kan okasyon nin bautismo?

Ikakapaliwanag daw Nindo?

• Taano an kada Kristiano ta kaipuhan na magsolsol bago magpabautismo?

• Ano an kalabot sa pagdusay sa Dios?

• Anong mga paninimbagan an kaiba kan onrang darahon an ngaran ni Jehova?

• Ano an maninigong magmotibar sa sato na magdesisyon na magpabautismo?

[Mga Hapot Para sa Pag-adal]

[Kahon/Ritrato sa pahina 22]

An Duwang Hapot sa Bautismo

Basado sa atang ni Jesu-Cristo, pinagsolsolan na daw nindo an saindong mga kasalan asin idinusay an saindong sadiri ki Jehova tanganing gibohon an saiyang kabotan?

Nasasabotan daw nindo na an saindong pagdusay asin bautismo nagpapamidbid sa saindo bilang saro sa Mga Saksi ni Jehova na asosyado sa organisasyon nin Dios na ginigiyahan nin espiritu?

[Ritrato sa pahina 23]

An pagdusay sarong solemneng promesa na ginibo ki Jehova paagi sa pamibi

[Ritrato sa pahina 25]

An satong paghuhulit nagpapatunay kan satong pagdusay sa Dios