Pakaabot sa mga Kahagadan Para sa Kristianong Bautismo
Pakaabot sa mga Kahagadan Para sa Kristianong Bautismo
“Ano an nakakaolang sako na mabautismohan?”—GIBO 8:36.
1, 2. Paano pinonan ni Felipe an pakikipag-olay sa sarong opisyal na Etiope, asin ano an nagpapatunay na may espirituwal na inklinasyon an lalaking ini?
SARO o duwang taon pagkagadan ni Jesus, sarong opisyal nin gobyerno an nagbibiahe paamihanan sa tinampong hale sa Jerusalem pasiring sa Gaza. Mabiahe sia nin mga 1,500 kilometros sakay sa karuwahe. An debotong lalaking ini nagbiahe haleng Etiopia pasiring sa Jerusalem tanganing sumamba ki Jehova. Sa halawigon na biahe pabalik, ginagamit nia sa madonong na paagi an saiyang panahon paagi sa pagbasa kan Tataramon nin Dios—na nagpapatunay sa pagtubod kan lalaki. Naobserbaran ni Jehova an sinserong lalaking ini, asin paagi sa sarong anghel, giniyahan Nia si disipulo Felipe tanganing hulitan sia.—Gibo 8:26-28.
2 Dai nasakitan si Felipe na ponan an orolay, huling an opisyal na Etiope makosog na nagbabasa, siring sa kostumbre kan kapanahonan na idto. Huli kaini, nadangog ni Felipe na sia nagbabasa sa balumbon ni Isaias. Sarong simpleng hapot ni Felipe an nakapukaw sa interes kan lalaki: “Ano talagang aram mo an binabasa mo?” Naggiya ini sa pag-oolay sa Isaias 53:7, 8. Sa katapustapusi, “ipinahayag [ni Felipe] sa saiya an maogmang bareta manongod ki Jesus.”—Gibo 8:29-35.
3, 4. (a) Taano ta daing pag-atraso na binautismohan ni Felipe an Etiope? (b) Anong mga hapot an eestudyaran niato ngonyan?
3 Sa laog nin halipot na panahon, nasabotan kan Etiope an kabtang ni Jesus sa katuyohan nin Dios, kaiba an pangangaipo na magin sarong bautisadong disipulo ni Cristo. “Ano an nakakaolang sako na mabautismohan?” an ihinapot nia ki Felipe kan maheling na may tubig sa harani. Siempre, napapalaen an mga kamugtakan na ini. An lalaking ini sarong tawong may pagtubod na nagsasamba na sa Dios bilang sarong Judiong proselito. Kaipuhan nia gayod na maghalat nin halawig na panahon tanganing magkaigwa giraray nin oportunidad na magpabautismo. Mas mahalaga, nasabotan kan lalaking ini kun ano an hinahagad sa saiya nin Dios, asin gusto niang humiro nin bilog na puso. Maogmang nag-oyon si Felipe sa saiyang kahagadan, asin an Etiope, pagkatapos na mabautismohan, “nagdagos na naggagayagaya.” Daing duwa-duwa na sia nagin entusiastikong parahulit kan maogmang bareta sa saiyang sadiring nasyon.—Gibo 8:36-39.
4 Minsan ngani an mga lakdang nin pagdusay asin pagpabautismo dai dapat na ibilang na basta-basta sana o gibohon nin dali-dali, an halimbawa kan opisyal na Etiope nagpapaheling na may mga pangyayari na an mga indibiduwal nabautismohan dai nahaloy pagkadangog ninda kan katotoohan kan Tataramon nin Dios. * Sa siring, angay na estudyaran an minasunod na mga hapot: Anong klaseng pag-andam an maninigong gibohon bago an bautismo? Sagkod saen maninigong konsideraron an edad? Anong espirituwal na pag-oswag an maninigong magin risang-risa bago bautismohan an saro? Orog sa gabos, taano ta hinahagad ni Jehova sa saiyang mga lingkod na gibohon an lakdang na ini?
Sarong Solemneng Kasundoan
5, 6. (a) Paano binalosan kan banwaan nin Dios kan nakaagi an pagkamoot ni Jehova? (b) Anong dayupot na relasyon sa Dios an makakamtan niato oras na kita mabautismohan?
5 Pagkatapos na kaldahon an mga Israelita sa Egipto, nag-opresir si Jehova na akoon sinda bilang saiyang “espesyal na sadiri,” na kamotan asin protehiran sinda patin gibohon sindang “banal na nasyon.” Minsan siring, tanganing akoon an siring na mga bendisyon, kaipuhan na balosan kan banwaan an pagkamoot nin Dios sa sarong depinidong paagi. Ginibo ninda ini paagi sa pag-oyon na gibohon “an gabos na itinaram ni Jehova” asin sa paglaog sa pakikipagtipan sa saiya. (Exodo 19:4-9) Kan enot na siglo, pinagbotan ni Jesus an saiyang mga parasunod na gumibo nin mga disipulo sa mga tawo kan gabos na nasyon, asin idtong mga nag-ako kan saiyang katokdoan binautismohan. An marahay na relasyon sa Dios nakadepende sa pagtubod ki Jesu-Cristo kasunod an bautismo.—Mateo 28:19, 20; Gibo 2:38, 41.
6 Ipinapaheling kan mga pangyayaring ini sa Kasuratan na binebendisyonan ni Jehova an mga naggigibo asin nag-ootob kan solemneng kasundoan na paglingkodan sia. Para sa mga Kristiano, an pagdusay asin bautismo kinakaipuhan na mga lakdang na nagbubunga nin bendisyon ni Jehova. Desidido kitang sunodon an saiyang mga dalan asin hagadon an saiyang paggiya. (Salmo 48:14) Si Jehova man garo baga kinakapotan an satong kamot asin ginigiyahan kita sa dalan na maninigo niatong lakawan.—Salmo 73:23; Isaias 30:21; 41:10, 13.
7. Taano an pagdusay asin bautismo ta dapat na magin personal na desisyon?
7 Pagkamoot ki Jehova asin kamawotan na paglingkodan sia an maninigong magmotibar sa sato na gibohon an mga lakdang na ini. Mayo nin siisay man na maninigong magpabautismo huli sana ta may nagsasabi sa saiya na igo na an lawig kan saiyang pag-adal o huling an saiyang mga amigo mapabautismo. Naturalmente, an mga magurang asin ibang maygurang na Kristiano puedeng enkaminaron an saro na pag-isipan an pagdusay asin bautismo. Sinadol ni apostol Pedro an mga nagdangog sa saiya kan Pentecostes na ‘magpabautismo.’ (Gibo 2:38) Minsan siring, personal na bagay an satong pagdusay, asin mayo nin siisay man na makakagibo kaiyan para sa sato. Dapat na kita an magdesisyon na gibohon an kabotan nin Dios.—Salmo 40:8.
Igong Pag-andam Para sa Bautismo
8, 9. (a) Taano an pagbautismo sa omboy ta bakong oyon sa Kasuratan? (b) Anong espirituwal na pag-oswag an maninigong nagibo na nin mga hoben bago bautismohan?
8 Nasa kamugtakan daw an mga aki na gumibo nin inisip na pagdusay? An Kasuratan mayo nin mga kahagadan sa edad para sa bautismo. Pero, an mga omboy siertong dai puedeng magin mga nagtutubod, gumibo nin mga desisyon basado sa pagtubod, o gumibo nin pagdusay sa Dios. (Gibo 8:12) Mapadapit sa mga Kristiano kan enot na siglo, an historyador na si Augustus Neander nagsasabi sa saiyang librong General History of the Christian Religion and Church: “An pagbautismo kan enot ginigibo sana sa mga nasa edad na, huling an pagsabot nin mga tawo biyong magkakonektar an bautismo asin pagtubod.”
9 Kun dapit sa mga hoben, may mga nakakapatalubo nin espirituwalidad sa medyo amay na edad, mantang an iba mas naghahaloy. Minsan siring, bago mabautismohan, an aki maninigong magkaigwa nin personal na relasyon ki Jehova, nin tamang pakasabot sa pundamental na mga katokdoan kan Kasuratan, asin nin malinaw na pakasabot sa kun ano an napapalabot sa pagdusay, siring kan mga nasa edad na.
10. Anong mga lakdang an dapat na gibohon bago an pagdusay asin bautismo?
10 Ipinagboot ni Jesus sa saiyang mga disipulo na itokdo sa mga bagohan an gabos na bagay na saiyang ipinagboot. (Mateo 28:20) Kaya enot sa gabos, an mga bagohan kaipuhan na magkaigwa nin tamang kaaraman sa katotoohan, na iyo man an matabang sa sainda na pataluboon an pagtubod ki Jehova asin sa saiyang Tataramon. (Roma 10:17; 1 Timoteo 2:4; Hebreo 11:6) Dangan, kun nakakaapektar sa puso nin saro an katotoohan sa Kasuratan, pinapahiro sia kaiyan na magsolsol asin magbakle sa saiyang dating paagi nin pamumuhay. (Gibo 3:19) Ultimo, an saro minaabot sa punto na gusto na niang idusay an saiyang sadiri ki Jehova asin mabautismohan, siring kan ipinagboot ni Jesus.
11. Taano ta mahalaga na regular na kitang nakikikabtang sa paghuhulit bago an bautismo?
11 An saro pang mahalagang lakdang sa pagtalubo pasiring sa bautismo iyo an pakikikabtang sa paghuhulit kan maogmang bareta kan Kahadean. Ini an pangenot na gibohon na iinasignar ni Jehova sa saiyang banwaan durante kan huring mga aldaw na ini. (Mateo 24:14) Sa siring, an dai pa bautisadong mga parahayag puedeng magkaigwa kan kagayagayahan na ipahayag sa iba an manongod sa saindang pagtubod. An pakikikabtang sa gibohon na ini nag-aandam man sa sainda para sa regular asin maigot na partisipasyon sa ministeryo sa langtad pagkatapos nin bautismo.—Roma 10:9, 10, 14, 15.
Igwa daw nin Nakakaolang sa Saindo na Mabautismohan?
12. Ano an tibaad makapogol sa nagkapira na magpabautismo?
12 An nagkapira tibaad napopogolan sa pagpabautismo huling nagduduwaduwa sinda na akoon an paninimbagan na dara kaiyan. Narerealisar ninda na tanganing maabot an mga pamantayan ni Jehova, kaipuhan nindang gumibo nin dakulang mga pagbabago sa saindang buhay. O tibaad natatakot sinda na madedepisilan sindang maotob an mga kahagadan nin Dios pagkatapos kan bautismo. An iba tibaad mangatanosan pa ngani, “Tibaad pag-abot nin panahon makagibo ako nin maraot asin matiwalag ako sa kongregasyon.”
13. Kan kaaldawan ni Jesus, ano an nakapogol sa nagkapira na magin mga parasunod ni Jesus?
13 Kan kaaldawan ni Jesus, tinogotan kan nagkapira an personal na intereses asin relasyon sa pamilya na makaolang sa sainda na magin saiyang mga disipulo. Sarong eskriba an nagpahayag na masunod sia ki Jesus saen man Sia paduman. Alagad sinabi ni Jesus na sa dakol na okasyon, mayo ngani sia nin lugar na matotorogan. Kan imbitaran ni Jesus an saro pang nagdadangog na magin saiyang parasunod, an lalaking ini nagsimbag na kaipuhan nguna niang “ilobong” an saiyang ama. Posibleng marhay na mas gusto niang magdanay sa harong asin maghalat sagkod na magadan an saiyang ama kisa sumunod ki Jesus asin asikasohon an paninimbagan na iyan sa pamilya kun iyan mag-abot na. Ultimo, an ikatolo nagsabi na bago sia sumunod ki Jesus, kaipuhan nia ngunang “magpaaram” sa kasararo nia sa harong. An apod ni Jesus sa siring na pagpanuodma ‘pagsalingoy sa mga bagay na nasa hudian.’ Huli kaini, minalataw na idtong mga gustong magpanuodma pirmeng makakahanap nin mga sarahotan sa pag-ebitar sa saindang Kristianong paninimbagan.—Lucas 9:57-62.
14. (a) Ano an nagin reaksion ni Pedro, Andres, Santiago, asin Juan kan imbitaran sinda ni Jesus na magin mga parasira nin mga tawo? (b) Taano ta dai kita maninigong mag-alangan na akoon an sakal ni Jesus?
14 Napapalaen na marhay an halimbawa ni Pedro, Andres, Santiago, asin Juan. Kan imbitaran sinda ni Jesus na sumunod sa saiya asin magin mga parasira nin mga tawo, an Biblia nagsasabi: “Tolos-tolos na binayaan an mga hikot, sinda nagsunod saiya.” (Mateo 4:19-22) Paagi sa paggibo tolos kan desisyon na iyan, personal nindang naeksperyensiahan an sinabi sa sainda ni Jesus kan huri: “Pasana nindo an sakong sakal asin makanood kamo sa sako, huli ta ako mahoyo asin may kababaan an puso, asin makakakua kamo nin kaginhawahan para sa saindong kalag. Huli ta an sakong sakal maboot asin an sakong pasan magian.” (Mateo 11:29, 30) Maski ngani an bautismo nagtatao nin sakal nin paninimbagan, inaasegurar sa sato ni Jesus na iyan maboot asin pasil darahon na sakal na makakapaginhawang marhay sa sato.
15. Paano ipinapaheling kan mga halimbawa ni Moises asin Jeremias na makakasarig kita na aakoon niato an suporta nin Dios?
15 Siempre, normal sanang makamate nin kadaihan nin kakayahan. Sa primero, si Moises asin Jeremias pareho nakamate na daing kakayahan sa paggibo kan mga asignasyon na itinao sa sainda ni Jehova. (Exodo 3:11; Jeremias 1:6) Paano pinakosog liwat nin Dios an saindang boot? “Ako makakaibanan mo,” an sabi nia ki Moises. “Ako nasa saimo tanganing iligtas ka,” an ipinanuga nia ki Jeremias. (Exodo 3:12; Jeremias 1:8) Makakasarig man kita sa suporta nin Dios. An pagkamoot sa Dios asin pagtitiwala sa saiya makakatabang sa sato na pangganahan an dai nawawarang mga pagduda kun baga makakapamuhay kita oyon sa satong pagdusay. “Mayo nin pagkatakot sa pagkamoot,” an isinurat ni apostol Juan, “kundi hinahale kan sangkap na pagkamoot an pagkatakot.” (1 Juan 4:18) Tibaad matakot an sadit na aki kun solo siang maglalakaw, alagad kompiado sia kun sia naglalakaw na kabit kan saiyang ama. Kaagid kaiyan, kun bilog na puso kitang nagtitiwala ki Jehova, nanunuga sia na ‘itatanos nia an satong mga dana’ mantang naglalakaw kita sa kaibahan nia.—Talinhaga 3:5, 6.
Sarong Okasyon na May Dignidad
16. Taano ta kalabot sa bautismo an biyong pagladop sa tubig?
16 Parate na bago an mismong bautismo may sarong pahayag sono sa Kasuratan na nagpapaliwanag kan kahulogan kan Kristianong bautismo. Sa pagtatapos kan pahayag na ini, hinahagad sa mga kandidato na gumibo nin pampublikong pagpapahayag kan saindang pagtubod paagi sa pagsimbag sa duwang hapot sa bautismo. (Roma 10:10; helingon an kahon sa pahina 22.) Dangan ilinaladop sa tubig an mga kandidato, na sinusunod an arogan na itinao ni Jesus mismo. Ipinapaheling kan Biblia na pagkatapos na mabautismohan, si Jesus “naghawas sa tubig.” (Mateo 3:16; Marcos 1:10) Malinaw nanggad, biyong ilinadop ni Juan na Bautisador si Jesus. * An biyong pagladop angay na nagsisimbolisar sa pambihirang pagbabago na ginibo niato sa satong buhay—piguratibo kitang nagagadan sa satong dating pamumuhay asin nagkakaigwa nin bagong buhay sa paglilingkod sa Dios.
17. Paano an mga kandidato sa bautismo sagkod mga nagmamasid makakakontribwir sa dignidad kan okasyon?
17 An bautismo sarong seryoso sagkod magayagayang okasyon. Sinasabi kan Biblia na namimibi si Jesus kan iladop sia ni Juan sa Salog nin Jordan. (Lucas 3:21, 22) Kaoyon kan halimbawang ini, an mga kandidato sa bautismo ngonyan maninigong magpaheling nin angay na gawe-gawe. Asin mantang sinasadol kita kan Biblia na maggubing na may kabinian sa pangaroaldaw na buhay, gurano pa daw na maninigo kitang orog na maghimate sa konsehong ini sa aldaw kan satong bautismo! (1 Timoteo 2:9) Ikakapaheling man kan mga nagmamasid an tamang paggalang paagi sa maingat na paghinanyog sa pahayag sa bautismo asin paagi sa pagdalan sa bautismo sa aregladong paagi.— 1 Corinto 14:40.
Mga Bendisyon na Nakakamtan kan Bautisadong mga Disipulo
18, 19. Anong mga pribilehio asin bendisyon an ibinubunga nin bautismo?
18 Oras na idusay niato an satong sadiri sa Dios asin kita mabautismohan, nagigin kabtang kita nin sarong espesyal na pamilya. Enot sa gabos, si Jehova nagigin satong Ama asin satong Katood. Siblag kita sa Dios bago an satong bautismo; ngonyan nakiulian na kita sa Dios. (2 Corinto 5:19; Colosas 1:20) Paagi sa atang ni Cristo, ruminani kita sa Dios asin sia minarani sa sato. (Santiago 4:8) Ilinaladawan ni propeta Malaquias kun paano si Jehova nagtatao nin atension asin naghihinanyog sa mga naggagamit asin nagdadara kan saiyang ngaran, asin iiniiba nia an saindang ngaran sa saiyang libro nin girumdoman. “Sinda magigin nanggad sadiri ko,” an sabi nin Dios, “asin ako mapaheling nin pagmalasakit sa sainda, kun paanong an sarong tawo nagpapaheling nin pagmalasakit sa saiyang aki na naglilingkod sa saiya.”—Malaquias 3:16-18.
19 An bautismo nagpapangyari man sa sato na magin kabtang nin sarong pambilog na kinaban na kasararoan nin magturugang. Kan maghapot si apostol Pedro kun anong mga bendisyon an aakoon kan mga disipulo ni Cristo sa mga sakripisyong ginibo ninda, nanuga si Jesus: “An gabos na nagbaya nin mga harong o mga tugang na lalaki o mga tugang na babae o ama o ina o mga aki o mga daga para sa sakuyang ngaran maako nin mas dakol pa asin magmamana nin buhay na daing katapusan.” (Mateo 19:29) Pakalihis nin dakol na taon, si Pedro nagsurat manongod sa “bilog na kasararoan nin mga tugang” na gradwal na nahayag “sa kinaban.” Personal na naeksperyensiahan ni Pedro an tabang asin mga bendisyon gikan sa mamomoton na kasararoan nin magturugang, asin puede man niatong maeksperyensiahan iyan.—1 Pedro 2:17; 5:9.
20. Anong pambihirang paglaom an itinatao nin bautismo?
20 Apuera kaini, sinabi ni Jesus na an mga nagsusunod sa saiya “magmamana nin buhay na daing katapusan.” Iyo, an pagdusay asin bautismo nagtatao kan paglaom na “makapangapot nin marigon sa tunay na buhay”—buhay na daing katapusan sa bagong kinaban nin Dios. (1 Timoteo 6:19) Igwa pa daw nin mas marahay na pundasyon para sa ngapit na posibleng ikatogdok niato para sa satong sadiri asin para sa satong pamilya? Huli sa pambihirang paglaom na ini kita “maglalakaw sa ngaran ni Jehova na satong Dios sagkod sa panahon na daing talaan, sagkod lamang pa ngani.”—Miqueas 4:5.
[Mga Nota sa Ibaba]
^ par. 4 An tolong ribong Judio asin proselito na naghinanyog sa diskurso ni Pedro kan Pentecostes nabautismohan man na daing pag-atraso. Siempre, kapareho kan kapon na Etiope, dati na sindang pamilyar sa pundamental na mga katokdoan asin prinsipyo kan Tataramon nin Dios.—Gibo 2:37-41.
^ par. 16 An termino sa Griego na baʹpti·sma (bautismo) nangangahulogan kan “proseso nin pagladop, pag-irarom sa tubig asin pagbutwa,” oyon sa Expository Dictionary of New Testament Words ni Vine.
Ikakapaliwanag daw Nindo?
• Paano asin taano ta maninigo niatong balosan an pagkamoot ni Jehova?
• Anong espirituwal na pag-oswag an maninigong magibo bago an bautismo?
• Taano an pagkatakot na magkulang o an pagduwaduwa na umako nin paninimbagan ta dai niato maninigong togotan na makapogol sa sato sa pagpabautismo?
• Anong pambihirang mga bendisyon an puedeng kamtan kan bautisadong mga disipulo ni Jesu-Cristo?
[Mga Hapot Para sa Pag-adal]
[Ritrato sa pahina 26]
“Ano an nakakaolang sako na mabautismohan?”
[Mga Ritrato sa pahina 29]
An bautismo sarong seryoso sagkod magayagayang okasyon