Pakasabot sa Biblia—Sarong Kawilihan na Bukas sa Saindo

AN Biblia may mahalagang marhay na mga katotoohan hale sa Dios. Sinasabi kaiyan sa sato an manongod sa katuyohan nin buhay, an dahelan kan pagdusa nin tawo, asin an ngapit kan katawohan. Tinotokdoan kita kaiyan kun paano manonompongan an kaogmahan, kun paano magkakaigwa nin mga katood, asin kun paano mapangganang reresolberan an mga problema. Orog pa dian, nanonodan niato an manongod sa satong Kaglalang asin langitnon na Ama, si Jehova. An siring kaiyan na kaaraman nagtatao sa sato nin dakulang kaogmahan asin nin kahulogan sa satong buhay.

An pagkua nin kaaraman manongod sa Dios iinaagid kan Biblia sa pagkakan. Si Jesus nagsabi: “An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.” (Mateo 4:4; Hebreo 5:12-14) Kun paanong an pagkakan nin masustansiang kakanon kada aldaw kaipuhan tanganing magdanay kitang buhay, an regular na pagbasa kan Tataramon nin Dios kaipuhan man niato tanganing makinabang sa panuga nin Dios na buhay na daing katapusan.

Ikinakaogma niato an pagkakan huli sa pagkagibo sa sato asin huli ta pinapanigoan kaiyan an sarong pundamental na pangangaipo. Minsan siring, igwa kita nin saro pang pundamental na pangangaipo na kaipuhan na panigoan niato kun gusto niatong magin maogma. Si Jesus nagsabi: “Maogma idtong mga nakakamate kan saindang espirituwal na pangangaipo.” (Mateo 5:3) Posible an kaogmahan huli ta an pangangaipong iyan mapapanigoan paagi sa pakasabot kan Tataramon nin Dios.

Totoo, nadedepisilan an nagkapira na masabotan an Biblia. Halimbawa, tibaad kaipuhan nindo an tabang sa mga teksto na nagsasambit manongod sa bakong pamilyar na mga kostumbre o na naggagamit nin piguratibong mga pananaram. Dangan, igwa nin mga hula na nakasurat sa simbolikong pananaram na masasabotan sana paagi  sa pagkonsulta sa ibang teksto sa Biblia na nagtotokar kan kaparehong tema. (Daniel 7:1-7; Kapahayagan 13:1, 2) Dawa siring, talagang puede nindong masabotan an Biblia. Paano kamo nakakasegurado kaiyan?

Sarong Kawilihan na Bukas sa Gabos

An Biblia iyo an Tataramon nin Dios. Paagi kaiyan ipinapahayag sa sato nin Dios an saiyang kabotan. Matao daw an Dios nin sarong libro na imposibleng masabotan o na an makakasabot sana iyo an mga tawong may halangkaw na inadalan? Dai, si Jehova bako nanggad na daing kabootan. Si Cristo Jesus nagsabi: “Siisay na ama dian sa saindo an, kun an saiyang aki humagad nin sira, tibaad tawan sia nin halas imbes na sira? O kun sia humagad man nin sogok, matao sa saiya nin amamatak? Kun siring, kun kamo, minsan maraot, tataong magtao nin marahay na mga regalo sa saindong mga aki, gurano pa daw an Ama sa langit na dai magtao nin banal na espiritu sa mga naghahagad sa saiya!” (Lucas 11:11-13) Sa siring, makakasierto kamo na makukua nindo an pakasabot sa Biblia asin na kun sinsero kamong mahagad sa Dios, itatao nia an tabang na kaipuhan nindo tanganing masabotan an saiyang Tataramon. Tara, an pundamental na mga katokdoan kan Biblia puedeng masabotan dawa kan mga aki!—2 Timoteo 3:15.

Minsan ngani kaipuhan an paghihingoa tanganing masabotan an Biblia, an paggibo kaiyan puedeng magkaigwa nin mapuersa, nakakaparigon sa boot na epekto sa sato. Pagkatapos na sia buhayon liwat, si Jesus nagpaheling sa duwa kan saiyang mga disipulo asin nakipag-olay sa sainda manongod sa mga hula sa Biblia. An pagkasaysay ni Lucas nagsasabi: “Magpoon ki Moises asin sa gabos na Mga Propeta ininterpretar nia sa sainda an mga bagay manongod sa saiya sa bilog na Kasuratan.” Ano an nagin resulta? Kan bangging iyan, kan hinohorophorop ninda an nanodan ninda, an mga disipulo nagsarabi sa lambang saro: “Bakong naglaad an satong puso mantang nagtataram sia sa sato sa dalan, mantang lubos niang binubuksan sa sato an Kasuratan?” (Lucas 24:13-32) An pakasabot sa Tataramon nin Dios nagtao sa sainda nin kawilihan huli ta pinakosog kaiyan an saindang pagtubod sa mga panuga nin Dios asin nagtao sa sainda nin positibong paglaom sa ngapit.

Imbes na pagabat, an pakasabot sa Tataramon nin Dios interesante asin kapakipakinabang, na nakakagayagaya siring sa pagkakan nin masustansiang kakanon. Ano an kaipuhan nindong gibohon tanganing makua an siring na pakasabot? Ipinapaheling kan masunod na artikulo kun paano nindo ikakaogma an “mismong kaaraman nin Dios.”—Talinhaga 2:1-5.

[Ritrato sa pahina 4]

Siring sa sarong mamomoton na ama, si Jehova nagtatao nin banal na espiritu tanganing tabangan kita na masabotan an Biblia