Mga Hapot Hale sa mga Parabasa

Kun an saro riniribok nin mga demonyo, ano an magigibo nia tanganing makaginhawa?

Ipinapaheling kan Tataramon nin Dios na an mga sinasalakay nin mga demonyo puedeng makatalingkas sa siring na panriribok. An pamibi may mahalagang marhay na kabtang sa siring na pakabutas. (Marcos 9:25-29) Alagad an saro na riniribok nin mga demonyo tibaad kaipuhan na gumibo nin dugang pang lakdang. An mga pangyayari na may koneksion sa mga Kristiano kan enot na siglo nag-iilustrar kun ano pa an kaipuhan.

Bago sinda nagin mga parasunod ni Cristo, may nagkapirang indibiduwal sa suanoy na Efeso na naimbuelto sa demonismo. Minsan siring, kan magdesisyon sindang maglingkod sa Dios, an “mga naggigibo nin mahika tiniripon an saindang mga libro asin sinolo iyan sa atubangan nin gabos.” (Gibo 19:19) Paagi sa pagraot sa saindang mga libro sa pagtoodtood, an mga bagong nagturubod na idto sa Efeso nagpaheling nin halimbawa para sa siisay man na nagmamawot na makabutas sa pagsalakay kan mga demonyo ngonyan. Talagang kaipuhan na haleon kan mga siring an gabos na bagay na may koneksion sa espiritismo. Kaiba digdi an mga libro, magasin, pelikula, electronic data, rekording nin musika na may espiritistikong kahulogan, siring man an mga anting-anting o iba pang bagay na isinusulot para sa “proteksion” o may koneksion sa espiritistikong mga gibo-gibo.​—⁠Deuteronomio 7:​25, 26; 1 Corinto 10:21.

Nagkapirang taon pagkatapos na raoton kan mga Kristianong idto sa Efeso an saindang mga libro sa mahika, si apostol Pablo nagsurat: “Kita nakikipaggumolan . . . tumang sa maraot na mga puersang espiritu.” (Efeso 6:12) Sinadol ni Pablo an mga Kristiano: “Isulog nindo an bilog na pangalasag hale sa Dios tanganing kamo marigon na makapanindogan tumang sa mga pakana [mga katusohan, nota sa ibaba] kan Diablo.” (Efeso 6:11) An sadol na iyan aplikado pa man giraray. Kaipuhan na pasarigon kan mga Kristiano an saindang espirituwal na mga depensa tanganing maprotehiran an saindang sadiri sa maraot na mga espiritu. “Orog sa gabos,” an idinoon ni Pablo, “gamiton an dakulang kalasag nin pagtubod, na huli kaiyan masisigbo nindo an gabos na naglalaad na busog kan maraot.” (Efeso 6:16) Pinapakosog nin saro an saiyang pagtubod paagi sa pag-adal kan Biblia. (Roma 10:17; Colosas 2:​6, 7) Huli kaini, an regular na pag-adal kan Biblia nagtatabang sa sato na mapatalubo an pagtubod na nagseserbing depensa tumang sa impluwensia kan maraot na mga espiritu.​—⁠Salmo 91:⁠4; 1 Juan 5:5.

An mga Kristianong idto sa Efeso kaipuhan na gumibo nin saro pang mahalagang lakdang. Sinabihan sinda ni Pablo: “Kaiba an gabos na porma nin pamibi asin pagngayongayo padagos [na] mamibi sa gabos na panahon sa espiritu.” (Efeso 6:18) Iyo, an maigot na pamimibi para sa proteksion ni Jehova tunay na mahalagang marhay para sa mga gustong makabutas sa pagsalakay kan mga demonyo ngonyan. (Talinhaga 18:10; Mateo 6:13; 1 Juan 5:​18, 19) An Biblia angay na nagsasabi: “Kun siring pumasakop kamo sa Dios; alagad tumangon nindo an Diablo, asin sia madulag sa saindo.”​—⁠Santiago 4:7.

Minsan ngani an saro na sinasalakay nin demonyo maninigong mamibi nin odok para sa pakaginhawa, an ibang tunay na Kristiano puedeng mamibi man para sa indibiduwal na nagmamawot na marhay na maglingkod ki Jehova asin odok na nagmamaigot na labanan an maraot na mga puersa. Puede nindang hagadon sa Dios na an saro na pinapasakitan kan mga demonyo logod na magkaigwa nin espirituwal na kosog tanganing labanan an mga pananalakay kan mga demonyo. Huling an Tataramon nin Dios nagsasabi na “an pagngayongayo nin matanos na tawo, kun iyan ginigibo, may dakulang puersa,” an mga pamibi kan mga lingkod nin Dios tunay nanggad na makakatabang sa mga nagsasakit na naggigibo kan bilog nindang makakaya tanganing ‘tumangon an Diablo.’​—⁠Santiago 5:16.

[Ritrato sa pahina 31]

Rinaot kan mga nagturubod sa Efeso an saindang mga libro sa mahika