Nagigirumdoman daw Nindo?

Inapresyar daw nindo an pagbasa kan dai pa sana nahahaloy na mga luwas kan An Torrengbantayan? Helingon kun masisimbag nindo an minasunod na mga hapot:

• Ano an nagkapirang dahelan kun taano ta grabe an karatan ngonyan?

An sarong dahelan nin maraot na mga gibo iyo an tendensia nin tawo sa karatan. (Genesis 8:21) An saro pang dahelan iyo na an kadaklan na tawo mayo nin tamang kaaraman manongod sa kabotan nin Dios. Apuera kaini, si Satanas, an kagtugdas nin karatan, padagos na nag-eentremeter sa mga gibo-gibo nin tawo.​—⁠1/1, pahina 4-6.

• Anong positibong mga epekto an puedeng ibunga nin marahay na tataramon sa tamang panahon? (Talinhaga 12:25)

Iyan puedeng makaparigon sa kompiansa kan nag-aako, makaenkaminar asin makamotibar sa saiya, asin makapamate sa saiya nin dayupot na relasyon. Siring man, mantang naghihingoa kitang magtao nin komendasyon, natatabangan kita na maheling an karahayan nin iba.​—⁠1/1, pahina 16-​17.

• Ano an laog kan kaban kan tipan?

Yaon dian an duwang tablang gapo kan Ley saka an kadikit na mana. Pakatapos kan pagrebelde ni Core, an sogkod ni Aaron ibinugtak sa Kaban tangani na magserbing sarong patotoo tumang sa kapag-arakian na nabuhay kan panahon ni Core. (Hebreo 9:4) An sogkod asin an mana posibleng hinale sa Kaban bago an pagdedikar kan templo ni Salomon.​—⁠1/15, pahina 31.

• Taano an mga Judio kan kaaldawan ni Nehemias ta kaipuhan na magdara nin kahoy sa templo?

An dolot na kahoy dai ipinagboot sa Ley ni Moises. Alagad kan kaaldawan ni Nehemias nagkaipo nin padagos na suplay nin kahoy tanganing soloon an mga atang sa altar.​—⁠2/1, pahina 11.

• Ano an Kapidaso ni Muratori?

Iyan kabtang nin sarong Latin na manuskrito. An teksto orihinal na isinurat sa Griego kan mga katapusan kan ikaduwang siglo C.⁠E. Yaon dian an kagurangguranging lista nin mga libro kan Kristianong Griegong Kasuratan na minamansay na masasarigan, saka an mga komento manongod sa mga libro asin mga kagsurat kaiyan.​—⁠2/15, pahina 13-​14.

• Taano ta padagos na nagsayuma si Reyna Vasti nin Persia na magduman sa hade? (Ester 1:​10-​12)

Dai sinasabi kan Biblia an saiyang motibo. Isinusuherir nin nagkapirang iskolar na sia nagsayuma huli ta habo nia na mawaran nin onra sa atubangan kan burat na mga bisita kan hade. O tibaad an reynang ini na magayon an panluwas na itsura bako talagang mapagpasakop, sa siring nagtatao nin maraot na halimbawa para sa ibang mga agom na babae sa Imperyo nin Persia.​—⁠3/1, pahina 9.

• Paano nagliligtas an pantubos?

An atang ni Jesus puedeng makakalda sa sato sa minanang kasalan asin makapatalingkas sa sato sa nakakagadan na mga epekto nin kasalan. (Roma 6:23) An atang na ini pinalilibre an tunay na mga Kristiano sa pagkapurisaw nin konsensia. Asin paagi sa pagtubod sa pantubos, makakatalingkas kita sa pagkatakot mapadapit sa satong kamugtakan sa atubangan nin Dios. (1 Juan 2:1)​—⁠3/15, pahina 8.

• Ano an manonodan niato sa pangangalad sa Ley na dai paglutoon an ogbon na kanding sa gatas kan saiyang ina”? (Exodo 23:19)

An siring na pagluto tibaad paganong ritual na ginigibo tanganing umoran. (Levitico 20:23) Itinao nin Dios an gatas nin inang kanding tanganing tawan nin sustansia an ogbon asin tabangan iyan na magtalubo. An pagluto kan ogbon sa gatas na iyan magpapaheling nin paglapastangan sa relasyon na inestablisar nin Dios sa pag-oltanan nin magurang asin ogbon. An ley na tumang digdi nagpapaheling kan mamomoton na pagmalasakit nin Dios.​—⁠4/1, pahina 31.