Arogon an Halimbawa ni Jesus Asin Magpaheling nin Pagmakolog sa mga Dukha

AN KADUKHAAN asin pan-aapi haros kagubay na nin katawohan. Minsan ngani an Ley nin Dios sa Israel naghihingoang protehiran an mga dukha asin inaan an saindang pagdusa, an Ley na iyan parateng dai sinusunod. (Amos 2:6) Idinenunsiar ni propeta Ezequiel an paagi nin pagtratar sa mga dukha. Sia nagsabi: “An banwaan kan daga mismo naggigibo nin pakana sa pandadaya asin nan-aagaw sa paghabon, asin an nagsasakit nin makuri asin dukha minamaltrato ninda, asin an nakikihimanwa dinadaya ninda na mayo nin hustisya.”​—⁠Ezequiel 22:29.

An situwasyon mayo nin pagkakalaen kan si Jesus yaon kaidto sa daga. An mga namomoon sa relihion nagpaheling nin lubos na kawaran nin pagmakolog sa mga dukha asin daing sukat. An mga namomoon sa relihion ilinadawan bilang “mga mamomoton sa kuarta” na ‘nananamsam sa harong kan mga balo’ asin mas interesado sa pagsunod sa mga tradisyon ninda kisa pag-ataman sa mga gurang asin daing sukat. (Lucas 16:14; 20:47; Mateo 15:​5, 6) Interesante nanggad na sa parabola ni Jesus manongod sa marahay na Samaritano, kan maheling nin sarong saserdote asin Levita an sarong eridong lalaki, sinda nagliklik sa ibong na dalan imbes na magpondo tanganing tabangan ini.​—⁠Lucas 10:30-37.

Si Jesus Nagpaheling nin Pagmakolog sa mga Dukha

Ipinapaheling kan mga pagkasaysay sa Ebanghelyo kan buhay ni Jesus na nasasabotan nia nin lubos an mga problema kan mga dukha asin sia mapagrisang marhay sa saindang mga pangangaipo.  Minsan ngani si Jesus nag-erok sa langit, sia nagpakadai sa sadiri, nagpakangtawo, asin ‘nagin dukha huli sa sato.’ (2 Corinto 8:9) Kan maheling an mga kadaklan, si Jesus ‘naherak sa sainda, huli ta sinda naanitan asin nagkakaralagalag siring sa mga karnero na mayong pastor.’ (Mateo 9:36) An pagkasaysay manongod sa daing sukat na babaeng balo nagpapaheling na naghanga si Jesus, bakong sa darakulang regalo kan mayayaman, na nagtao “gikan sa saindang kalabihan,” kundi sa dikiton na kontribusyon kan dukhang babaeng balo. Natudok an puso ni Jesus sa ginibo kaini huli ta ini “naghulog gikan sa saiyang kadaihan kan gabos niang pagbuhay.”​—⁠Lucas 21:4.

Si Jesus dai sana nakamate nin pagmakolog sa mga dukha kundi nagpaheling man sia nin personal na interes sa mga pangangaipo ninda. Sia asin an saiyang mga apostol igwa nin komun na pondo na kinukuanan ninda kan itinatao ninda sa daing sukat na mga Israelita. (Mateo 26:6-9; Juan 12:5-8; 13:29) Inenkaminar ni Jesus an mga gustong magin parasunod nia na rekonoseron an saindang obligasyon na magtabang sa mga daing sukat. Sinabihan nia an sarong mayaman na hoben na namamahala: “Pabakalan an gabos mong sadiri asin tawan sa mga dukha, asin magkakaigwa ka nin kayamanan sa kalangitan; asin madia sumunod ka sa sako.” An bagay na habong butasan kan tawong iyan an saiyang mga rogaring nagpaheling na mas dakula an pagkamoot nia sa kayamanan kisa sa pagkamoot nia sa Dios asin sa kapwa tawo. Sa siring, mayo sia kan mga kualidad na kaipuhan tanganing magin disipulo ni Jesus.​—⁠Lucas 18:​22, 23.

An mga Parasunod ni Cristo Nagmamakolog sa mga Dukha

Pagkagadan ni Jesus, an mga apostol asin iba pang parasunod ni Cristo padagos na nagpaheling nin pagmakolog sa mga dukha na kabilang sa sainda. Kan mga 49 C.E., si apostol Pablo nakipaghelingan ki Santiago, Pedro, asin Juan asin pinag-olayan ninda an sugo na naresibi nia hale sa Kagurangnan na Jesu-Cristo na ihulit an maogmang bareta. Nagkaoroyon sinda na si Pablo asin Bernabe maninigong magpasiring sa “mga nasyon,” na nagkokonsentrar sa mga Hentil sa saindang paghuhulit. Minsan siring, si Pablo asin Bernabe sinadol ni Santiago asin kan saiyang kairiba na “girumdomon an mga dukha.” Asin iyan an ‘odok na pinagmaigotan na gibohon’ ni Pablo.​—⁠Galacia 2:7-10.

Durante kan pagreynar ni Emperador Claudio, nagkaigwa nin grabeng tiggutom sa manlaenlaen na lugar sa Imperyo nin Roma. Bilang paghiro, an mga Kristiano sa Antioquia “nagdesisyon, an lambang saro siring sa saiyang makakayanan, na magpadara nin ayuda sa mga tugang na nag-eerok sa Judea; asin ini ginibo ninda, na ipinadara iyan sa kamagurangan na lalaki paagi ki Bernabe asin Saulo.”​—⁠Gibo 11:28-30.

Nasasabotan man kan tunay na mga Kristiano ngonyan na an mga parasunod ni Jesus kaipuhan na magpaheling nin pagmakolog sa mga dukha asin daing sukat, nangorogna sa mga kapagtubod. (Galacia 6:10) Kun siring, nagpapaheling sinda nin tunay na pagmakolog sa materyal na mga pangangaipo kan mga pobre. Halimbawa, kan 1998 dinestroso nin grabeng tigmara an kadaklan na lugar sa amihanan-sirangan nin Brazil. Rinaot kan tigmara an mga pananom na paroy, monggo, asin mais, na nagresulta sa lakop na tiggutom​—⁠an pinakagrabe sa nakaaging 15 taon. Sa nagkapirang lugar, kulang na dawa an inomon na tubig. An mga Saksi ni Jehova sa ibang parte kan nasyon tolos na nag-organisar nin mga komite sa pag-ayuda, asin sa halipot na panahon, nakatipon sinda nin kadakol na kakanon asin nabayadan an mga gastos sa pagtransportar kan mga suplay na iyan.

An mga Saksing nagtao kan ayudang iyan nagsurat: “Naoogma kaming marhay na nakatabang kami sa samong mga tugang, nangorogna ta nakakasierto kami na napagayagaya mi an puso ni Jehova. Dai mi noarin man nalilingawan an mga  tataramon sa Santiago 2:​15, 16.” An mga bersikulong iyan sa Biblia nagsasabi: “Kun an sarong tugang na lalaki o babae huba asin kulang nin pagkakan sa aroaldaw, alagad an saro sa saindo nagsasabi sa sainda: ‘Lakaw kamo sa katoninongan, magpakahimbong kamo asin magpakabasog kamo,’ alagad dai man nindo sinda tinatawan kan mga pangangaipo para sa saindang hawak, ano an pakinabang kaiyan?”

Sa saro sa mga kongregasyon kan Mga Saksi ni Jehova sa siudad nin Sao Paulo, an sarong mapakumbaba asin maigot na Saksi na dukha sa materyal parateng nasasakitan sa pagpatamatama kan saiyang hinanapan. An sabi nia: “Minsan ngani namumuhay ako nin dukha, an mensahe kan Biblia nagtao nin tunay na kahulogan sa sakong buhay. Dai ko aram kun ano na an nangyari sa sako kun dai ako nakaresibi nin tabang hale sa sakong mga kapwa Saksi.” Mga pirang taon na an nakaagi, an mahigos na Kristianang ini nangaipong operaran alagad mayo sia nin pambayad sa ospital. Sa partikular na pangyayaring ini, an Kristianong mga tugang na lalaki asin babae sa kongregasyon an nagbayad kan gastos sa operasyon. An pagtao nin tabang sa mga kapagtubod na nangangaipo ginigibo kan tunay na mga Kristiano sa bilog na kinaban.

Minsan siring, gurano man tibaad kanakakaogma an siring na mga eksperyensia, malinaw na dai mahahale kan arog kaiyan na sinserong mga paghihingoa an kadukhaan. Dawa ngani nagin mapanggana man an makapangyarihan na mga gobyerno asin darakulang internasyonal na ahensia sa pag-ayuda, dai ninda nakayang haleon an haloyon nang problema nin kadukhaan. Kun siring, minalataw an hapot na, Ano an pangultimong solusyon sa kadukhaan asin iba pang problema na nagpapasakit sa katawohan?

An mga Katokdoan kan Biblia Nagtatao nin Nagdadanay na Tabang

An mga pagkasaysay sa Ebanghelyo nagsasabi na si Jesu-Cristo regular na naggigibo nin marahay para sa mga dukha o may iba pang pangangaipo. (Mateo 14:14-21) Pero, anong aktibidad an tinawan nia nin prioridad? Sa sarong okasyon, pagkatapos na tawan nia nin panahon an pagtabang sa mga nangangaipo, sinabihan ni Jesus an saiyang mga disipulo: “Magduman pa kita sa ibang lugar, sa mga baryo sa harani, tanganing makapaghulit man ako duman.” Taano ta ipinondo ni Jesus an saiyang ginigibo para sa mga may helang asin daing sukat tanganing ipagpadagos an saiyang paghuhulit? Sia nagpaliwanag paagi sa pagsabing: “Sa katuyohan na ini [an boot sabihon, tanganing maghulit] na ako napadigdi.” (Marcos 1:​38, 39; Lucas 4:43) Minsan ngani mahalaga ki Jesus an paggibo nin marahay para sa mga tawong nangangaipo, an paghuhulit manongod sa Kahadean nin Dios an pangenot na misyon nia.​—⁠Marcos 1:14.

Mantang sinasadol kan Biblia an mga Kristiano na ‘sunodon nin estrikto an mga lakad ni Jesus,’ igwa nin malinaw na paggiya sa mga Kristiano ngonyan kun manongod sa pagbugtak nin mga prioridad sa paghihingoa nindang tabangan an iba. (1 Pedro 2:21) Arog ni Jesus, tinatabangan ninda an mga tawong nangangaipo. Minsan siring, arog man ni Jesus, an pinakapangenot na prioridad ninda iyo an pagtotokdo kan mensahe kan Biblia manongod sa maogmang bareta kan Kahadean nin Dios. (Mateo 5:14-16; 24:14; 28:​19, 20) Pero, taano ta an paghuhulit kan mensahe na manonompongan sa Tataramon nin Dios an maninigong tawan nin prioridad kisa sa ibang porma nin pagtabang sa iba?

Pinapatunayan kan aktuwal na mga eksperyensia hale sa bilog na kinaban na kun nasasabotan  asin sinusunod nin mga tawo an praktikal na hatol kan Biblia, mas nasasangkapan sinda na atubangon an pangaroaldaw na mga problema sa buhay, kaiba an kadukhaan. Dugang pa, an mensahe kan Biblia manongod sa Kahadean nin Dios na ihinuhulit kan Mga Saksi ni Jehova ngonyan nagtatao sa mga tawo nin paglaom sa ngapit​—⁠sarong paglaom na nagpapangyaring magin kapakipakinabang an buhay, dawa sa irarom kan pinakamasakit na mga kamugtakan. (1 Timoteo 4:8) Anong paglaom iyan?

Inaasegurar kita kan Tataramon nin Dios mapadapit sa satong ngapit: ‘Igwa nin bagong kalangitan asin sarong bagong daga na satong hinahalat segun sa panuga nin Dios, asin sa mga ini magdadanay an katanosan.’ (2 Pedro 3:13) Kun an Biblia nagtataram manongod sa “daga,” kun beses iyan nanonongod sa mga tawo na nag-iistar sa daga. (Genesis 11:1) Kaya an matanos na “bagong daga” na ipinanugang madatong iyo an sarong sosyedad nin mga tawo na inooyonan nin Dios. An Tataramon nin Dios nanunuga pa na sa irarom kan pamamahala ni Cristo, an mga inooyonan nin Dios mag-aako nin regalong buhay na daing katapusan asin magkakaigwa nin buhay na nakakakontento sa daganon na paraiso. (Marcos 10:30) An makangangalas na ngapit na iyan puedeng kamtan kan gabos, kaiba an mga dukha. Sa “bagong daga” na iyan, mareresolberan na sagkod lamang an problema nin kadukhaan.

[Kahon/​Ritrato sa pahina 7]

PAANO NI JESUS “ILILIGTAS AN DUKHA”?​—⁠Salmo 72:12

HUSTISYA: “Hokoman logod nia an mga nagsasakit nin makuri sa banwaan, iligtas logod nia an mga aki kan dukha, asin ronoton logod nia an tikas.” (Salmo 72:4) Durante kan paghade ni Cristo sa daga, magkakaigwa nin hustisya para sa gabos. Mayo na nin lugar para sa karatan, sarong dahelan nin makuring kasakitan na nagpaparuro sa dakol na mayaman na nasyon sa kadukhaan.

KATONINONGAN: “Sa saiyang mga aldaw an matanos mamumurak, asin an kadakolan nin katoninongan sagkod na mayo na nin bulan.” (Salmo 72:7) An kadaklan kan kadukhaan sa kinaban resulta kan mga iriwal asin guerra nin tawo. Papangyayarihon ni Cristo an sangkap na katoninongan sa daga, na paagi kaiyan mahahale an saro sa pangenot na dahelan nin kadukhaan.

PAGMALASAKIT: “Maheherak sia sa hamak asin sa dukha, asin an kalag kan mga dukha saiyang ililigtas. Gikan sa pan-aapi asin sa kadahasan saiyang tutuboson an saindang kalag, asin an saindang dugo magigin mahalagang marhay sa saiyang mga mata.” (Salmo 72:12-14) An mga hamak, dukha, asin inaapi magigin kabtang nin sarong maogmang pamilya nin tawo, na nagkakasararo sa irarom kan pamomoon kan Hadeng si Jesu-Cristo.

PROSPERIDAD: “Magkakaigwa nin abundang tipasi sa ibabaw kan daga.” (Salmo 72:16) Durante kan paghade ni Cristo, magkakaigwa nin materyal na prosperidad asin abundansia. An mga tawo dai na magsasakit sa kakulangan nin kakanon asin tiggutom na pirmeng dahelan nin kadukhaan ngonyan.

[Ritrato sa pahina 4, 5]

Si Jesus nagpaheling nin personal na interes sa mga pangangaipo kan mga dukha

[Ritrato sa pahina 6]

An mensahe kan Biblia nagtatao nin tunay na paglaom