Dai Kamo Matakot—Si Jehova Nasa Saindo!

LABING 50 taon na an nakaagi, dai nahaloy pakatapos na pumutok an enot na mga bomba nuklear, an sientistang nanggana nin Premyong Nobel na si Harold C. Urey nagsabi dapit sa ngapit: “Kita makakan nin takot, matotorog sa takot, mabubuhay sa takot asin magagadan sa takot.” Ngonyan, an satong kinaban pano nanggad nin takot, asin iyan bakong makangangalas! Aroaldaw, an mga peryodiko nagbabareta nin makatatakot na mga salaysay manongod sa terorismo, madahas na mga krimen, asin misteryosong mga helang.

Bilang mga Kristiano, aram niato kun ano an kahulogan kan siring na mga kamugtakan. Ipinaparisa kaiyan na kita nabubuhay sa “huring mga aldaw” kan maraot na sistemang ini, na ihinula kan Biblia na mamimidbid sa “delikadong mga panahon na masakit pakibagayan.” (2 Timoteo 3:1) Sa siring, napapakosog an satong kompiansa na sa dai na mahahaloy papangyayarihon ni Jehova Dios an sarong bagong kinaban na dian magdadanay an katanosan. (2 Pedro 3:13) Pero, mientras tanto, kita daw libre sa takot?

An Takot Asin an mga Lingkod nin Dios

Si Jacob, David, asin Elias kabilang sa mga lingkod ni Jehova na nakamate nin takot kan mapaatubang sa peligrosong mga situwasyon. (Genesis 32:​6, 7; 1 Samuel 21:​11, 12; 1 Hade 19:​2, 3) An mga tawong ini dai nagkulang nin pagtubod. Al kontraryo, nagpaheling sinda nin marigon na pagsarig ki Jehova. Minsan siring, si Jacob, David, asin Elias mga tawo; huli kaini, nakakamate sinda nin takot. “Si Elias sarong tawo na may mga saboot na arog kan sa sato,” an isinurat ni disipulo Santiago.​—⁠Santiago 5:17.

Tibaad mahandal man kita mantang iniisip-isip niato an sarong kaolangan na napapaatubang sa sato ngonyan o tibaad mapaatubang sa sato sa ngapit. Natural sana an siring na takot. Ini huli ta an Biblia nagsasabi na si Satanas na Diablo determinadong ‘makiguerra’ sa mga “nagkukuyog sa mga togon nin Dios asin igwa kan gibohon na pagpatotoo ki Jesus.” (Kapahayagan 12:17) Minsan ngani an mga tataramon na iyan espesipikong aplikado sa linahidan na mga Kristiano, si Pablo nagsurat: “An gabos na nagmamawot na mamuhay na may diosnon na debosyon kaibahan ni Cristo Jesus paglalamagon man.” (2 Timoteo 3:12) Sa ibong kaiyan, dai kita kaipuhan na malunosan sa takot kun kita napapaatubang sa mga problema. Taano?

“Dios nin mga Pagliligtas”

An salmistang si David nagsurat: “An tunay na Dios para sa sato Dios nin mga pagliligtas.” (Salmo 68:20) Paorootrong ipinaheling ni Jehova an saiyang kakayahan na iligtas an saiyang banwaan, magsalang paagi sa pagligtas sa sainda sa peligrosong mga situwasyon o paagi sa pagtao sa sainda nin kosog na makatagal. (Salmo 34:17; Daniel 6:22; 1 Corinto 10:13) Basado sa pinag-adalan nindo sa Biblia, pira sa siring na “pagliligtas” an nagigirumdoman nindo?

Ginagamit an Watch Tower Publications Index,⁠ * taano ta dai magsiyasat sa tunay na buhay na mga pangyayari na arog baga kan lakop sa globong Delubyo kan kaaldawan ni Noe, kan pagkaligtas ni Lot asin kan saiyang mga aking babae sa Sodoma asin Gomorra, kan Lagdoan na Pagharale sa Egipto asin pagbalyo sa Dagat na Pula, o kan naprakasong pakana ni Haman na laglagon an mga Judio? An pagbasa dangan paghorophorop manongod sa nakakapukaw sa boot na mga salaysay na ini mapakosog sa saindong pagtubod na si Jehova sarong Dios nin mga pagliligtas. Bilang resulta, tatabangan kamo kaini na atubangon na daing takot an mga pagbalo sa saindong pagtubod.

Mga Halimbawa sa Presenteng Panahon

May maiisip daw kamong mga halimbawa nin pakatagal sa presenteng panahon sa saindong lugar? Tibaad may nabilanggo huli sa kaimbodan. Tibaad may midbid kamong may edad nang Kristiano na naglilingkod ki Jehova sa ibong nin maluyang salud.  O isipon an mga hoben na nagdadanay na siblag sa kinaban sa ibong nin grabeng pan-iimpluwensia kan saindang mga kaeskuela. Yaon man an nagsosolong mga magurang, na nagpapadakula nin mga aki maski daing agom, o daing agom na mga indibiduwal na naglilingkod ki Jehova sa ibong nin mga pakamate nin kapungawan. Ano an nanonodan nindo sa mga siring? An paghorophorop kan saindang kaimbodan puedeng makatabang sa saindo na makatagal asin magdanay na daing takot sa ibong kan ano man na pagbalo na tibaad mapaatubang sa saindo.

An pagigin daing takot kaipuhan bako sanang kun kita napapaatubang sa pagkontra asin paglamag kundi siring man kun nagpopoon na kitang magduda sa pagkamoot ni Jehova sa sato. Kaipuhan niatong kultibaron an kompiansa na an pantubos ni Cristo aplikado sa sato bilang mga indibiduwal. (Galacia 2:20) Sa siring makakadolok kita ki Jehova na mayo kan salang pagkatakot o pagkahandal. Kun nagsasaboot kita na bako kitang angay sa pagkamoot ni Jehova, puede niatong horophoropon an mga tataramon ni Jesus sa saiyang mga parasunod: “Bakong ipinapabakal an duwang dignos nin sarong sentimo na kadikit sana an halaga? Pero mayo ni saro sa sainda na mahuhulog sa daga na dai naaaraman kan saindong Ama. Alagad an mismong buhok kan saindong payo bilang gabos. Kun siring dai kamo matakot: orog kamong mahalaga kisa dakol na dignos.”​—⁠Mateo 10:29-31.

An mga magasin na Torrengbantayan asin Awake! sa parate nagpupublikar nin mga eksperyensia nin mga Saksi ni Jehova sa presenteng aldaw na daing takot na inatubang an mga kasakitan. Dai ini nangangahulogan na dai sinda nagkaigwa nin negatibong mga saboot manongod sa saindang mamondong kamugtakan. Alagad dai ninda tinogotan an siring na mga saboot na papondohon sinda sa paglilingkod ki Jehova. An ipinublikar na mga estorya ninda makakatabang sa saindo na makatagal man na daing takot. Estudyare an duwang halimbawa.

Sarong Pagkaerido na Luminiwat sa Saiyang Buhay

An isyu kan Awake! na Abril 22, 2003 igwa kan artikulo na “Kun Paano Liniwat nin Sarong Pagkaerido an Sakong Buhay.” Sa artikulong iyan, sinabi ni Stanley Ombeva, saro sa Mga Saksi ni Jehova sa Kenya, an mga kasakitan na inatubang nia bilang resulta kan pakabangga sa saiya nin sarong kaskason na lunadan. Mantang nagluluya an saiyang salud, nawaran sia nin trabaho asin gabos na benepisyo. “Kan dikit-dikit kong marealisar na grabe nanggad an sakong kamugtakan,” inadmitir ni Tugang na Ombeva sa saiyang salaysay, “ako nagin negatibo, sadiri sana an iniintindi, asin purungoton. Kun beses, ako naaanggot asin mapait an boot.” Sa ibong kan saiyang masakit na inagihan, an Kristianong lalaking ini nagdanay na daing takot. Dai nia tinogotan an pagkadesganar na pangibabawan sia asin magpangyari sa saiya na biyong sumuko. Imbes, nagsarig sia ki Jehova. “Pirme nia akong sinusuportaran sa gabos na inagihan ko​—⁠kaya nasusupog ako kun beses,” an sabi ni Tugang na Ombeva. “Marigon akong nagdesidir na basahon asin horophoropon an mga teksto na aram kong nakakaranga sa sakong situwasyon.”

An prangkang mga komento ni Tugang na Ombeva nagpangyari sa dakol na iba pa na tagalan na daing takot an mga pagbalo. “Naghibi ako kan mabasa ko an artikulong ini,” an isinurat nin sarong tugang na Kristiana. “Namatean ko na paagi sa artikulong ini ipinapaheling ni Jehova an saiyang init asin mamomoton na pagmakolog patin tinatawan nia ako nin karangahan.” An saro pang Saksi nagsurat: “An mga artikulong arog kaini nagtatao nin dakulang pagparigon sa boot sa mga kabilang sa sato na nakakaeksperyensia kan kaagid na mga situwasyon asin nagdudusa na daing reklamo.”

Pag-atubang sa Emosyonal na Kasakitan

An saro pang nakakapahirong eksperyensia iyo an ki Herbert Jennings, na isinaysay sa artikulong “Dai Nindo Naaaraman Kun Ano an Magigin Buhay Nindo  Nuodma.”⁠ * Si Tugang na Jennings igwa nin bipolar disorder. Pinepensar an enot na mga aldaw kan saiyang helang, sia nagsabi: “An pag-atender pa sana sa Kristianong mga pagtiripon totoong depisilon na. Minsan siring, kombensido nanggad ako sa kahalagahan nin espirituwal na pakikiasosyar. Tanganing makayanan iyan, sa parate ako minalaog sa Kingdom Hall kun nakatukaw na an kadaklan asin minahale bago sinda magharale pakatapos kan programa.”

Depisil man an paghuhulit. “Kun beses, dawa yaon na ako sa sarong harong, mayo talaga ako nin kosog nin boot na magtimbre sa pinto,” an isinasaysay ni Tugang na Jennings. “Minsan siring, dai ako minasuko huli ta ako nakakaaram na an satong ministeryo nangangahulogan nin kaligtasan niato asin nin siisay man na naghihimate nin paborable. (1 Timoteo 4:16) Pakalihis nin dikit na panahon, nakokontrol ko na an sakong emosyon, minaduman sa sunod na pinto, asin nagpoprobar giraray. Paagi sa padagos na pakikikabtang sa ministeryo, napapagdanay ko an rasonableng espirituwal na salud, asin paagi kaiyan nadagdagan an sakong kakayahan na makayanan iyan.”

An prangkang salaysay ni Tugang na Jennings nakatabang sa dakol na parabasa na atubangon man na daing takot an saindang mga kapurisawan. Halimbawa, an sarong Kristiana nagsurat: “Sa laog kan 28 taon na binabasa ko an mga magasin na Torrengbantayan asin Awake!, dai pa napukaw an sakong boot na siring kan binabasa ko an artikulong ini. Kinaipuhan kong pumondo sa bilog na panahon na paglilingkod asin nakonsensia akong marhay, na nagsasaboot na kun nagkaigwa kutana ako nin orog na pagtubod, nakapagpadagos kutana ako. An pakabasa ko kun paanong kinaipuhan ni Tugang na Jennings na butasan an sarong asignasyon tanganing asikasohon an saiyang helang nakatabang sa sako na mansayon an sakong situwasyon sa timbang na paagi. Iyo nanggad ini an simbag sa sakong mga pamibi!”

Kaagid kaiyan, an sarong Kristianong tugang na lalaki nagsurat: “Pakapaglingkod ko nin sampulong taon bilang magurang sa kongregasyon, kinaipuhan kong butasan an sakong pribilehio huli sa sarong helang sa isip. Grabe an sakong mga saboot na ako bakong mapanggana kaya sa parate nagtatao nin makuring kamondoan sa sako an pagbasa kan mga artikulo na estorya nin buhay, na sa parate nagsasaysay nin ekstraordinaryong mga nagibo kan banwaan ni Jehova. Alagad an pagmamaigot ni Tugang na Jennings nakapakosog sa sako. Nabasa ko na an artikulo nin kadakol na beses.”

Pag-abante na May Kompiansa

Arog ki Tugang na Ombeva asin Jennings, dakol sa Mga Saksi ni Jehova an nagpapadagos na sumamba ki Jehova Dios na daing takot sa ibong nin nakakapanluya sa boot na mga kaolangan. Kun kamo kabilang sa sainda, dapat kamong tawan nin komendasyon. Makakasierto kamo: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran, na kamo naglingkod sa mga banal asin padagos pang naglilingkod.”​—⁠Hebreo 6:10.

Kun paanong tinabangan ni Jehova an saiyang maimbod na banwaan kan suanoy na mga panahon na daogon an saindang mga kalaban, kaya man nia kamong tabangan na magkamit nin kapangganahan sa ano man na kaolangan na tibaad mapaatubang sa saindo. Kun siring, isapuso an mga tataramon na itinaram ni Jehova paagi ki propeta Isaias: “Dai ka matakot, huli ta ako nasa saimo. Dai ka mangalagkalag, huli ta ako an saimong Dios. Papakosogon taka. Tatabangan taka nanggad. Kakapotan taka nanggad nin marigon kan sakong toong kamot nin katanosan.”​—⁠Isaias 41:10.

[Mga Nota sa Ibaba]

[Mga Ritrato sa pahina 16]

Arog ni Stanley Ombeva (sa itaas) asin Herbert Jennings (sa too), dakol an naglilingkod ki Jehova na daing takot

[Picture Credit Line sa pahina 14]

Retrato kan USAF