Mga Pastor na “Halimbawa sa Aripompon”
Mga Pastor na “Halimbawa sa Aripompon”
‘Pastoran nindo an aripompon nin Dios na nasa saindong pangataman nin gikan sa boot, may pagkagalaga, na nagigin mga halimbawa sa aripompon.’—1 PEDRO 5:2, 3.
1, 2. (a) Anong pribilehio an ipinaniwala ni Jesus ki apostol Pedro, asin taano ta dai napasala an kompiansa ni Jesus? (b) Ano an saboot ni Jehova manongod sa nombradong mga pastor?
HALOY-HALOY pa bago kan Pentecostes 33 C.E., si Pedro asin an anom na iba pang disipulo nagkakakan kan pamahawan na inandam ni Jesus sa baybayon kan Dagat nin Galilea. Bako ini an kaenot-enoteng pangyayari na naheling ni Pedro an binuhay liwat na si Jesus, asin daing duwa-duwa na napalukso an saiyang puso kan maaraman nia na buhay si Jesus. Alagad tibaad nahadit man si Pedro. Ini huli ta, mga pirang aldaw sana bago kaidto, hayagan niang dineharan na midbid nia si Jesus. (Lucas 22:55-60; 24:34; Juan 18:25-27; 21:1-14) Sinagwe daw ni Jesus an nagsosolsol na si Pedro huli sa kawaran kaini nin pagtubod? Dai. Imbes, ipinaniwala nia ki Pedro an pribilehio nin pagpakakan asin pagpastor sa ‘saradit na karnero’ ni Jesus. (Juan 21:15-17) Siring kan ipinapaheling kan kasaysayan sa Biblia kan Kristianong kongregasyon kan enot na siglo, dai napasala an kompiansa ni Jesus ki Pedro. Kaiba kan ibang apostol asin kan kamagurangan na lalaki sa Jerusalem, pinastoran ni Pedro an Kristianong kongregasyon sa sarong panahon nin grabeng pagbalo asin marikas na pagdakol.—Gibo 1:15-26; 2:14; 15:6-9.
2 Ngonyan, nagnombra si Jehova paagi ki Jesu-Cristo nin kualipikadong mga lalaki tanganing maglingkod bilang espirituwal na mga pastor na magiya sa Saiyang mga karnero sa pinakadelikadong mga panahon sa kasaysayan nin tawo. (Efeso 4:11, 12; 2 Timoteo 3:1) Napasala daw an siring na kompiansa? Pinapatunayan kan matoninong na Kristianong kasararoan nin magturugang na maheheling sa bilog na kinaban na iyan dai napasala. Totoo, an mga pastor na ini mga tawo na nasasala, arog ni Pedro. (Galacia 2:11-14; Santiago 3:2) Dawa siring, pinagtitiwalaan sinda ni Jehova na mangataman sa mga karnero na “saiyang binakal paagi sa dugo kan saiyang sadiring Aki.” (Gibo 20:28) Padangat na marhay ni Jehova an mga lalaking ini, na ibinibilang sindang “angay sa dobleng onra.”—1 Timoteo 5:17.
3. Paano napapagdanay kan espirituwal na mga pastor an gikan sa boot asin galagang espiritu?
3 Paano napapagdanay kan espirituwal na mga pastor an gikan sa boot asin galagang espiritu, sa siring nagigin mga halimbawa sa aripompon? Arog ni Pedro asin nin iba pang pastor kan enot na siglo, nagsasarig sinda sa banal na espiritu nin Dios, na nagtatao sa sainda kan kosog na kaipuhan ninda tanganing mapasan an saindang paninimbagan. (2 Corinto 4:7) An banal na espiritu nagpapaluwas man sa sainda kan mga bunga kan espiritu—an pagkamoot, kagayagayahan, katoninongan, pakatios, kabootan, karahayan, pagtubod, kahoyoan, asin pagpopogol sa sadiri. (Galacia 5:22, 23) Estudyaran niato an nagkapirang espesipikong paagi na makakapagtao nin halimbawa an mga pastor sa pagpaheling kan mga bungang ini mantang saindang pinapastoran an aripompon nin Dios na nasa saindang pangataman.
Kamotan an Aripompon Sagkod an Lambang Indibiduwal na Karnero
4, 5. (a) Paano si Jehova asin si Jesus nagpapaheling nin pagkamoot para sa aripompon? (b) Ano an nagkapirang paagi na an espirituwal na mga pastor nagpapaheling nin pagkamoot para sa aripompon?
4 An pangenot na kualidad na pinapaluwas kan espiritu nin Dios iyo an pagkamoot. Ipinapaheling ni Jehova an saiyang pagkamoot para sa aripompon sa kabilogan kun iyan tinatawan nia nin abundang espirituwal na pagkakan. (Isaias 65:13, 14; Mateo 24:45-47) Pero, labi pa sa pagpakakan sana sa aripompon an saiyang ginigibo. Nakakamate sia nin personal na pagkamuya sa lambang indibiduwal na karnero. (1 Pedro 5:6, 7) Namomotan man ni Jesus an aripompon. Itinao nia an saiyang kalag para sa aripompon, asin an lambang karnero personal niang midbid, “sa ngaran.”—Juan 10:3, 14-16.
5 Inaarog kan espirituwal na mga pastor si Jehova asin si Jesus. Ipinapaheling ninda an pagkamoot sa aripompon nin Dios sa kabilogan paagi sa ‘pagmamaigot ninda sa pagtotokdo’ sa kongregasyon. An saindang mga pahayag na basado sa Biblia nakakatabang sa pagpakakan asin sa pagprotehir sa aripompon, asin an pagpapagal ninda sa bagay na ini naheheling kan gabos. (1 Timoteo 4:13, 16) An daing gayo naheheling iyo an panahon na ginagamit ninda sa pag-asikaso sa mga rekord asin sa mga surat, paggibo nin mga iskedyul, asin pag-asikaso sa kadakol na iba pang detalye tanganing seguradohon na an mga pagtiripon kan kongregasyon asin iba pang aktibidad mangyari sa “disente asin aregladong paagi.” (1 Corinto 14:40) An kadaklan sa trabahong ini ginigibo na dai naheheling nin mga tawo asin tibaad daing gayo narerekonoser. Iyan tunay nanggad na ginigibo huli sa pagkamoot.—Galacia 5:13.
6, 7. (a) Ano an sarong paagi na orog na namimidbid kan mga pastor an mga karnero? (b) Taano ta kapakipakinabang kun beses na ipahayag an satong namamatean sa sarong magurang sa kongregasyon?
6 An mamomoton na Kristianong mga pastor nagmamaigot na magpaheling nin personal na interes sa lambang karnero sa laog kan kongregasyon. (Filipos 2:4) An sarong paagi na orog na namimidbid kan mga pastor an indibiduwal na mga karnero iyo an pakikiiba sa sainda sa pampublikong paghuhulit. Parate na kaiba kaidto ni Jesus an saiyang mga parasunod sa paghuhulit asin ginamit nia an siring na mga okasyon tanganing magtao nin pagparigon sa boot. (Lucas 8:1) Sarong eksperyensiadong Kristianong pastor an nagsabi: “Nanompongan ko na an saro sa pinakamarahay na paagi na mamidbid asin maparigon an boot kan sarong tugang iyo an pag-iba sa saiya sa ministeryo sa langtad.” Kun haloy-haloy na kamong dai nagkaigwa nin oportunidad na makaibanan sa ministeryo sa langtad an saro sa kamagurangan, taano ta dai gumibo nin areglo na gibohon tolos ini?
7 An pagkamoot nagpahiro ki Jesus na makigayagaya asin makimondo sa saiyang mga parasunod. Halimbawa, kan an 70 sa saiyang mga disipulo magbuelta na may kagayagayahan hale sa saindang paghuhulit, “naggayagaya nin labi-labi” si Jesus. (Lucas 10:17-21) Minsan siring, kan maheling nia an epekto kan kagadanan ni Lazaro ki Maria asin sa mga kapamilya asin katood kaini, “si Jesus naghibi.” (Juan 11:33-35) Siring man, an mapagmakolog na mga pastor ngonyan bakong indiperente sa mga pagmate kan mga karnero. Pinapahiro sinda kan pagkamoot na “makigayagaya sa mga tawong naggagayagaya” asin “makitangis sa mga tawong nagtatangis.” (Roma 12:15) Kun nakakaeksperyensia kamo magsalang nin kagayagayahan o kamondoan sa saindong buhay, dai mag-alangan na ipahayag an saindong namamatean sa Kristianong mga pastor. An pakadangog sa saindong kagayagayahan magpaparigon kan saindang boot. (Roma 1:11, 12) An pakaaram manongod sa saindong mga kasakitan magpapangyari sa sainda na pakosogon asin rangahon kamo.—1 Tesalonica 1:6; 3:1-3.
8, 9. (a) Paano ipinaheling kan sarong magurang sa kongregasyon an saiyang pagkamoot sa saiyang agom? (b) Gurano kahalaga para sa sarong pastor an pagpaheling nin pagkamoot para sa saiyang pamilya?
8 An pagkamoot nin sarong pastor para sa aripompon partikularmenteng naririsa sa paagi nin pagtratar nia sa sadiri niang pamilya. (1 Timoteo 3:1, 4) Kun sia may agom, an pagkamoot asin onra na ipinapaheling nia sa saiyang agom nagtatao nin halimbawa na maaarog nin ibang agom na lalaki. (Efeso 5:25; 1 Pedro 3:7) Estudyare an komento kan sarong Kristiana na an ngaran Linda. An saiyang agom naglingkod bilang paraataman sa laog nin labing 20 taon bago ini nagadan. Sia nagsabi: “An sakong agom pirmeng sibot na marhay kaidto sa pag-ataman sa kongregasyon. Alagad ipinamate nia sa sako na magkatuwang kami. Parate niang pinapasalamatan an suporta ko, asin kaming duwa an nag-iibaiba kun sia may libreng panahon. Bilang resulta, namatean ko na namomotan ako asin dai ako nag-imon sa panahon na ginagamit nia sa paglilingkod sa kongregasyon.”
9 Kun an Kristianong pastor may mga aki, an saiyang paagi nin mamomoton na pagdisiplina asin regular na pagtao nin komendasyon sa mga aking ini nagigin modelo na maaarog nin ibang mga magurang. (Efeso 6:4) Sa katunayan, an pagkamoot na ipinapaheling nia sa saiyang pamilya padagos na nagpapatunay na maninigo sia sa ipinagkatiwala sa saiya kan sia nombrahan kan banal na espiritu.—1 Timoteo 3:4, 5.
Paoswagon an Kagayagayahan Asin Katoninongan Paagi sa Pagkomunikar
10. (a) Ano an puedeng magkaigwa nin negatibong epekto sa kagayagayahan asin katoninongan kan kongregasyon? (b) Anong isyu an makakaraot kutana sa katoninongan kan kongregasyon kan enot na siglo, asin paano rinesolberan an isyung iyan?
10 An banal na espiritu makakapaluwas nin kagayagayahan asin katoninongan sa puso nin indibiduwal na Kristiano, sa tahaw kan grupo nin kamagurangan, asin sa kongregasyon sa kabilogan. Minsan siring, an kawaran nin bukas na komunikasyon puedeng magkaigwa nin negatibong epekto sa kagayagayahan asin katoninongan na ini. Si Salomon kan suanoy nagkomento: “Nasusudya an mga plano kun mayo nin pribadong orolay.” (Talinhaga 15:22) Sa ibong na lado, an magalang asin prangkang komunikasyon nagpapaoswag nin kagayagayahan asin katoninongan. Halimbawa, kan mararaot kutana an katoninongan kan kongregasyon kan enot na siglo huli sa isyu sa pagturi, hinagad kan namamahalang grupo sa Jerusalem an pagdirehir kan banal na espiritu. Ipinahayag man ninda an saindang laen-laen na punto de vista sa temang iyan. Pagkatapos nin mainit na diskusyon, nakagibo sinda nin desisyon. Kan ipaabot ninda sa mga kongregasyon an desisyon na pinagkaoroyonan ninda gabos, ‘ipinaggayagaya kan mga tugang an pagparigon sa boot.’ (Gibo 15:6-23, 25, 31; 16:4, 5) Napaoswag an kagayagayahan asin katoninongan.
11. Paano mapapaoswag kan kamagurangan an kagayagayahan asin katoninongan sa kongregasyon?
11 Siring man ngonyan, pinapaoswag kan mga pastor an kagayagayahan asin katoninongan sa kongregasyon paagi sa pagigin matibay na mga parakomunikar. Kun may mga problema na puedeng makaraot sa katoninongan kan kongregasyon, nagtitiripon sinda asin sueltong ipinapahayag an saindang mga saboot. Magalang nindang hinihinanyog an mga komento kan mga kapwa ninda pastor. (Talinhaga 13:10; 18:13) Pagkatapos na arangon an banal na espiritu, ibinabasar ninda an saindang mga desisyon sa mga prinsipyo sa Biblia asin sa mga giya na ipinublikar kan “maimbod asin mapagmansay na oripon.” (Mateo 24:45-47; 1 Corinto 4:6) Oras na makagibo na an grupo nin kamagurangan nin desisyon na basado sa Kasuratan, an kada magurang minapasakop sa pagdirehir kan banal na espiritu paagi sa pagsuportar sa desisyon na iyan dawa kun an saiyang personal na opinyon dai inaprobaran kan mayoriya. An siring na kababaan nin boot nagpapaoswag nin kagayagayahan asin katoninongan asin nagtatao nin marahay na halimbawa sa mga karnero kun paano maglalakaw sa kaibanan nin Dios. (Miqueas 6:8) Kamo daw may kababaan nin boot na nakikikooperar sa mga desisyon na basado sa Biblia na ginibo kan mga pastor sa kongregasyon?
Magin Matinios Asin Maboot
12. Taano ta kinaipuhan ni Jesus na magin matinios asin maboot sa saiyang pagtratar sa mga apostol?
12 Si Jesus matinios asin maboot sa pagtratar nia sa mga apostol, sa ibong kan paorootrong mga pagkukulang ninda. Halimbawa, paorootrong hiningoa ni Jesus na idoon sa sainda an pangangaipo na magin mapakumbaba. (Mateo 18:1-4; 20:25-27) Pero, sa ultimong banggi kan daganon na buhay ni Jesus, pakatapos na itao pa sana nia sa sainda an leksion sa kapakumbabaan paagi sa paghanaw sa saindang mga bitis, “nagkaigwa man sinda nin mainit na diriskutiran kun baga siisay sa sainda an garo baga pinakadakula.” (Lucas 22:24; Juan 13:1-5) Inanggotan daw ni Jesus an mga apostol? Dai, may kabootan siang nakipangatanosan sa sainda, na sinasabi: “Siisay an orog na dakula, an saro na nakahilay sa lamesa o an sarong naglilingkod? Bako daw na an nakahilay sa lamesa? Alagad ako nasa tanga nindo bilang an sarong naglilingkod.” (Lucas 22:27) An pakatios asin kabootan ni Jesus—kaiba an saiyang marahay na halimbawa—nakapahiro sa puso kan mga apostol sa kahurihurihi.
13, 14. Noarin espesyalmenteng dapat na magin maboot an mga pastor?
13 Kaagid kaiyan, an sarong espirituwal na pastor tibaad kaipuhan na magtao nin paorootrong hatol sa sarong tawo mapadapit sa sarong pagkukulang. An pastor tibaad mauyam sa indibiduwal. Minsan siring, sa paggirumdom sa sadiri niang mga pagkukulang mantang ‘sinasadol nia an mga bakong toltol,’ nakakapagpaheling sia nin pakatios asin kabootan sa saiyang tugang. Paagi kaiyan inaarog nia si Jesus asin si Jehova, na nagpapaheling kan mga kualidad na ini sa gabos na Kristiano—pati sa mga pastor.—1 Tesalonica 5:14; Santiago 2:13.
14 Kun beses, tibaad kaipuhan kan mga pastor na magtao nin makosog na hatol sa saro na nakakomiter nin magabat na kasalan. Kun an indibiduwal habong magsolsol, dapat na haleon kan mga pastor sa kongregasyon an nagkasala. (1 Corinto 5:11-13) Dawa siring, an paagi nin pagtratar ninda sa tawong iyan nagpapaheling na an ikinakaongis ninda iyo an kasalan, bakong an nagkasala. (Judas 23) Tibaad huli sa maboot na paggawe kan mga pastor magin mas pasil para sa naparayong karnero na magbuelta sa aripompon sa kahurihurihi.—Lucas 15:11-24.
Minomotibar nin Pagtubod an Marahay na mga Gibo
15. Ano an sarong paagi na inaarog kan mga pastor an karahayan ni Jehova, asin ano an nagmomotibar sa sainda na gibohon iyan?
15 “Si Jehova marahay sa gabos,” dawa sa mga dai nag-aapresyar sa ginigibo nia para sa sainda. (Salmo 145:9; Mateo 5:45) An karahayan ni Jehova espesyalmenteng naheheling sa pagsugo nia sa saiyang banwaan na ihulit an ‘maogmang bareta kan kahadean.’ (Mateo 24:14) Ipinapabanaag kan mga pastor an karahayan nin Dios paagi sa pangengenot sa paghuhulit na ini. Ano an nagmomotibar sa daing kapagalan na paghihingoa ninda? Iyan iyo an makosog na pagtubod ki Jehova asin sa saiyang mga panuga.—Roma 10:10, 13, 14.
16. Paano an mga pastor ‘makakagibo kan marahay’ sa mga karnero?
16 Apuera sa paggibo “kan marahay sa gabos” paagi sa paghuhulit, may paninimbagan an mga pastor na gumibo nin marahay “orog na sa mga may relasyon sa [sainda] sa pagtubod.” (Galacia 6:10) An sarong paagi na ginigibo ninda ini iyo an paggibo nin nakakaparigon sa boot na mga pagsongko sa pagpastor. “Ikinakaogma ko an paggibo nin mga pagsongko sa pagpastor,” an sabi nin sarong magurang sa kongregasyon. “Nagtatao iyan sa sako kan oportunidad na tawan nin komendasyon an mga tugang na lalaki asin babae sa saindang mga paghihingoa asin na tabangan sinda na marealisar na inaapresyar an saindang pagpapagal.” Kun beses, an mga pastor puedeng magsuherir nin mga paagi kun paano mapapaoswag nin saro an saiyang paglilingkod ki Jehova. Sa paggibo kaiyan, inaarog kan madonong na mga pastor si apostol Pablo. Estudyare kun paano sia nakiolay sa mga tugang sa Tesalonica: “Kami may kompiansa sa Kagurangnan mapadapit sa saindo, na ginigibo nindo asin padagos na gigibohon an mga bagay na samuyang ipinagboot.” (2 Tesalonica 3:4) An siring na mga kapahayagan nin kompiansa nakakaakit sa marahay na mga tendensia kan mga karnero asin nagpapagin mas pasil para sa sainda na ‘magin makinuyog duman sa mga nangengenot.’ (Hebreo 13:17) Kun minaako kamo nin nakakaparigon sa boot na pagsongko sa pagpastor, taano ta dai ipahayag an saindong pag-apresyar dian?
An Kahoyoan Nangangaipo nin Pagpopogol sa Sadiri
17. Anong leksion an nanodan ni Pedro ki Jesus?
17 Si Jesus mahoyo, dawa kun sia napoprobokar. (Mateo 11:29) Kan sia pasaloiban asin arestaron, ipinaheling ni Jesus an kahoyoan asin dakulang pagpopogol sa sadiri. May pagkapusokpusokan, hinulbot ni Pedro an espada asin buminalos. Alagad pinagirumdom sia ni Jesus: “Naghohona ka na dai ako makakapakimaherak sa sakong Ama na tawan ako ngonyan nin labi sa kagduwang hukbo nin mga anghel?” (Mateo 26:51-53; Juan 18:10) Nanodan na marhay ni Pedro an leksion na iyan asin sa huri pinagirumdom nia an mga Kristiano: “Si Cristo nagdusa para sa saindo, na winalatan kamo nin modelo tanganing sunodon nindo nin estrikto an saiyang mga lakad. . . . Kan sia pinagmumuda, dai sia nagbalos na magmuda. Kan sia nagdudusa, dai sia nanhuma.”—1 Pedro 2:21-23.
18, 19. (a) Noarin partikularmente dapat na ipaheling kan mga pastor an kahoyoan asin pagpopogol sa sadiri? (b) Anong mga hapot an sunod na totokaron niato?
18 Kaagid kaiyan, tanganing magin epektibo dapat na magin mahoyo an mga pastor dawa kun tinatratar sinda sa bakong makatanosan na paagi. Halimbawa, tibaad bakong paborable an magin reaksion kan nagkapira na hinihingoa nindang tabangan sa kongregasyon. Kun an indibiduwal na nangangaipo nin tabang nalugadan o naghehelang sa espirituwal, tibaad an magin reaksion nia sa hatol iyo an ‘pagtaram nin dai iniisip arog kan mga bono nin espada.’ (Talinhaga 12:18) Minsan siring, kapareho ni Jesus, an mga pastor dai minabalos paagi sa makolog na mga tataramon o benggatibong mga hiro. Imbes, nagpopogol sinda sa sadiri asin ipinapaheling pa man giraray an pakikipagkapwa, na tibaad magin sarong bendisyon sa saro na nangangaipo nin tabang. (1 Pedro 3:8, 9) Nakakanood daw kamo sa halimbawa kan kamagurangan asin ipinapaheling an kahoyoan saka pagpopogol sa sadiri kun nag-aako kamo nin hatol?
19 Daing duda, inaapresyar ni Jehova asin ni Jesus an pagpapagal kan rinibong pastor na gikan sa boot na nangangataman sa pambilog na kinaban na aripompon. Padangat man na marhay ni Jehova asin kan saiyang Aki an rinibong ministeryal na lingkod na nagsusuportar sa kamagurangan sa ‘paglilingkod sa mga banal.’ (Hebreo 6:10) Kun siring, taano ta nagduduwaduwa an nagkapirang bautisadong tugang na lalaki na maghingoang aboton an “marahay na gibong” ini? (1 Timoteo 3:1) Asin paano sinasanay ni Jehova an mga ninonombrahan nia bilang mga pastor? Totokaron niato an mga hapot na ini sa sunod na artikulo.
Nagigirumdoman daw Nindo?
• Ano an nagkapirang paagi na an mga pastor nagpapaheling nin pagkamoot para sa aripompon?
• Paano an gabos sa kongregasyon makakapaoswag sa kagayagayahan asin katoninongan?
• Taano an mga pastor ta matinios asin maboot kun nagtatao nin hatol?
• Paano an kamagurangan nagpapaheling nin karahayan asin pagtubod?
[Mga Hapot Para sa Pag-adal]
[Ritrato sa pahina 18]
An kamagurangan minomotibar nin pagkamoot na paglingkodan an kongregasyon
[Mga Ritrato sa pahina 18]
Nagtatao man sinda nin panahon sa saindang pamilya sa pag-aling-aling . . .
. . . sagkod sa ministeryo
[Ritrato sa pahina 20]
An marahay na komunikasyon sa tahaw kan kamagurangan nagpapaoswag nin kagayagayahan asin katoninongan sa kongregasyon