Pag-abot sa Puso nin Aki

NAMATEAN na daw nindo na mamondo sa pakaheling nin sarong aki na nagkakawat nin badilbadilan? An siring na mga eksena nagin ordinaryo na sana dawa sa mga akion pa, huling an kadahasan nakalaog na sa kinaban nin aling-alingan. Paano nindo tatabangan an sarong aki na magkawat nin mga kawatan na pankatoninongan imbes na badilbadilan? Si Waltraud, sarong haloy nang misyonera kan Mga Saksi ni Jehova sa Aprika, nakanompong nin paagi tanganing tabangan an sarong aking lalaki na gibohon iyan.

Huli sa guerra, kinaipuhan ni Waltraud na bayaan an nasyon na iniistaran nia asin bumalyo sa saro pang nasyon sa Aprika. Duman pinonan niang adalan sa Biblia an ina nin sarong singko anyos na aking lalaki. Kada magdalaw sia sa ina, an aki nagkakawat nin sarong sadit na badil-badil na plastik, an solamenteng kawatan nia. Dai noarin man naheling ni Waltraud na ipinupunteriya nia iyan, alagad pirme ining sibot na binubukasan asin sineserahan an badil, na garo baga binabalahan nia giraray iyan.

Sinabihan ni Waltraud an aki: “Werner, aram mo kun taano ta nag-iistar ako sa saindong nasyon? Huli iyan sa guerra​—⁠kinaipuhan kong dumulag hale sa sakong nasyon tanganing makarayo sa peligrosong mga tawong nambabadil nin mga tawo na gamit an badil na kaagid kan badil mo. Sa paghona mo, marahay daw an siring na pambabadil?”

“Bako po,” an mamondong simbag ni Werner.

“Tama ka nanggad,” an sabi ni Waltraud. Dangan naghapot sia: “Aram mo daw kun taano ta dinadalaw ko kamong mag-ina serosemana? Huli ta gustong tabangan kan mga Saksi ni Jehova an iba na magkaigwa nin matoninong na relasyon sa Dios sagkod sa saindang mga kataed.” May pag-oyon kan ina ni Werner, sinabihan sia ni Waltraud: “Kun itatao mo sako an saimong badil, itatapok ko iyan, asin seseguradohon ko na magkaigwa ka nin traktrakan na may apat na rueda.”

Itinao ni Werner an saiyang badil-badil. Kinaipuhan niang maghalat nin apat na semana, alagad nag-abot an bago niang kawatan​—⁠sarong traktrakan na gibo sa kahoy, na ogmahon niang inako.

Nagtatao daw kamo nin panahon na kaolayon an saindong mga aki, na naghihingoang aboton an saindang puso tanganing mapahiro sindang itapok an saindang mga kawatan na kapareho nin mga armas sa guerra? Kun iyo, tinotokdoan nindo sinda nin sarong leksion na pakikinabangan ninda sa bilog nindang buhay.