Si Jehova Nagsasanay nin mga Pastor Para sa Aripompon Nia

“Si Jehova mismo nagtatao nin kadonongan; gikan sa saiyang ngoso may kaaraman asin pakabatid.”​—⁠TALINHAGA 2:6.

1, 2. Taano ta naghihingoa an bautisadong mga lalaki na mag-ako nin dagdag na paninimbagan sa kongregasyon?

“NAOGMA akong marhay kan manombrahan ako bilang sarong magurang sa kongregasyon,” an sabi ni Nick, na pito nang taon na naglilingkod bilang paraataman. “Ibinilang ko an pribilehiong ini na sarong oportunidad na pahiwason an sakong paglilingkod ki Jehova. Namatean ko na may utang na boot ako sa saiya huli sa gabos na ginibo nia para sa sako. Gusto ko man na tabangan an mga miembro kan kongregasyon sa pinakalubos na mahihimo ko, na tabangan sinda arog kan pagtabang sa sako nin ibang kamagurangan.” Minsan siring, an saiyang kagayagayahan may kasalak na kahaditan. “Mantang ako mayo pang 30 anyos kan manombrahan ako,” an pagpapadagos ni Nick, “nahadit ako na tibaad kulang ako sa kinakaipuhan na mga abilidad​—⁠an pakabatid asin kadonongan⁠​—⁠​tanganing epektibong pastoran an kongregasyon.”

² Igwa nin dakol na dahelan na magin maogma an mga ninonombrahan ni Jehova na mangataman sa aripompon nia. Ipinagirumdom ni apostol Pablo sa kamagurangan hale sa Efeso an sarong dahelan kan, sa pagkotar ki Jesus, sia nagsabi: “Igwang orog na kaogmahan sa pagtao kisa pag-ako.” (Gibo 20:35) An paglilingkod bilang ministeryal na lingkod o bilang magurang sa kongregasyon nagtatao sa bautisadong mga lalaki nin dugang pang mga paagi na makapagtao ki Jehova asin sa kongregasyon. Halimbawa, an ministeryal na mga lingkod nagtatabang sa kamagurangan. Inaasikaso man kan mga lingkod na ini an kadakol na iba pang asignasyon na nakakaubos nin dakol na panahon alagad kaipuhan. An siring na mga tugang na lalaki minomotibar nin pagkamoot sa Dios asin sa kapwa na gumibo nin mahalagang paglilingkod.​—⁠Marcos 12:​30, 31.

3. Taano ta tibaad nagduduwaduwa an nagkapira na maghingoang aboton an mga pribilehio sa kongregasyon?

³ Kumusta man an sarong Kristianong lalaki na huli sa saiyang pakamate nin kakulangan sa kakayahan tibaad nagduduwaduwang maghingoa na aboton an pribilehio na magin ministeryal na lingkod asin sa kahurihurihi sarong magurang sa kongregasyon? Arog ni Nick, tibaad naghahadit sia na mayo sia kan kaipuhan na mga abilidad tanganing magin sarong epektibong pastor. Bilang sarong bautisadong tugang na lalaki, kamo daw kabilang sa mga nakakamate nin arog kaini? An siring na mga paghadit bakong daing basehan. Pinapaninimbag ni Jehova an nombradong mga pastor sa saindang paagi nin pagtratar sa aripompon. Si Jesus nagsabi: “An lambang saro na tinawan nin dakol, dakol an hahagadon sa saiya; asin an saro na pinamahala nin mga tawo sa dakol, orog kisa ordinaryo an hahagadon ninda sa saiya.”​—⁠Lucas 12:48.

4. Paano tinatabangan ni Jehova an mga ninonombrahan nia na mangataman sa mga karnero nia?

⁴ Inaasahan daw ni Jehova an mga ninonombrahan nia bilang ministeryal na mga lingkod asin kamagurangan na pasanon an dagdag na pasan na sinda sana? Al kontraryo, nagtatao sia nin praktikal na tabang kaya bako sanang nakakaya ninda iyan kundi nagigin man sindang mapanggana. Siring kan tinokar sa sinusundan na artikulo, itinatao sa sainda ni Jehova an saiyang banal na espiritu, na an bunga kaiyan nagtatabang sa sainda na maboot na mangataman sa mga karnero. (Gibo 20:28; Galacia 5:​22, 23) Dugang pa, tinatawan sinda ni Jehova nin kadonongan, kaaraman, asin pakabatid. (Talinhaga 2:6) Paano daw nia ginigibo ini? Pag-olayan niato an tolong paagi na sinasanay ni Jehova an mga indibiduwal na saiyang ninonombrahan na mangataman sa mga karnero nia.

 Sinasanay Paagi sa Eksperyensiadong mga Pastor

5. Taano si Pedro asin Juan ta epektibong mga pastor?

⁵ Kan an mga apostol na si Pedro asin Juan umatubang sa Sanhedrin, an pagheling kan madonong sa kinaban na mga hokom kan korteng iyan sa mga lalaking nasa atubangan ninda “daing inadalan asin ordinaryo.” Iyo, tatao man sindang magbasa asin magsurat, alagad dai sinda nag-ako nin ano man na rabinikong pagsasanay sa pag-adal kan Kasuratan. Dawa siring, nagin epektibong mga paratokdo si Pedro asin Juan kaiba an iba pang disipulo, na pinahiro an kadaklan kan mga naghinanyog sa sainda na magin mga nagtutubod. Paano nagin siring kaekstraordinaryong mga paratokdo an ordinaryong mga lalaking ini? Pagkatapos na hinanyogon si Pedro asin Juan, “namidbid [kan korte] na sinda dating mga kaiba ni Jesus.” (Gibo 4:1-4, 13) Totoo, nag-ako sinda kan banal na espiritu. (Gibo 1:8) Alagad risang-risa man​—⁠dawa kan mga hokom na idto na buta sa espirituwal⁠​—⁠​na sinanay sinda ni Jesus. Mantang sia nasa daga kaiba ninda, tinokdoan ni Jesus an mga apostol bako sanang kun paano titiponon an mga arog-karnero kundi kun paano man sinda papastoran kun sinda kabtang na kan aripompon.​—⁠Mateo 11:29; 20:24-28; 1 Pedro 5:4.

6. Anong halimbawa sa pagsasanay sa iba an itinao ni Jesus asin ni Pablo?

⁶ Pagkatapos na buhayon liwat si Jesus, padagos niang sinanay an mga ninombrahan bilang mga pastor. (Kapahayagan 1:⁠1; 2:1⁠–​3:22) Halimbawa, sia an personal na puminili ki Pablo asin namahala sa pagsasanay sa saiya. (Gibo 22:6-10) Inapresyar ni Pablo an pagsasanay na inako nia asin ipinaabot sa ibang kamagurangan an saiyang nanodan. (Gibo 20:17-35) Halimbawa, dakol na panahon asin kosog an ginamit nia sa pagsasanay ki Timoteo na magin “sarong trabahador” sa paglilingkod sa Dios, “na mayo nin maninigong ikasupog.” (2 Timoteo 2:15) Nagin dayupot na magkatood an duwang ini. Bago kaidto, nagsurat si Pablo manongod ki Timoteo: “Siring sa aki sa kaibanan nin ama sia naglingkod na garo oripon sa kaibanan ko sa pagpalakop kan maogmang bareta.” (Filipos 2:22) Dai hiningoa ni Pablo na gibohon na disipulo nia si Timoteo o an siisay pa man na tawo. Imbes, pinarigon nia an boot kan saiyang mga kapagtubod na magin ‘mga paraarog sa saiya, siring na sia paraarog ki Cristo.’​—⁠1 Corinto 11:1.

7, 8. (a) Anong eksperyensia an nagpapaheling kan nagigin pakinabang kun inaarog kan kamagurangan si Jesus asin si Pablo? (b) Noarin maninigong ponan kan kamagurangan an pagsasanay sa mga may esperansang magin ministeryal na lingkod asin magurang sa kongregasyon?

⁷ Bilang pag-arog ki Jesus asin ki Pablo, an eksperyensiadong mga pastor nagsasadiring kabotan na sanayon an bautisadong mga tugang na lalaki, na may kaparehong marahay na mga resulta. Estudyare an eksperyensia ni Chad. Nagdakula sia sa sarong pamilya na nababanga huli sa relihion alagad kasuarin pa sana sia nanombrahan bilang sarong magurang sa kongregasyon. Sia nagsasabi: “Sa nag-aging mga taon, tinabangan ako kan nagkapirang eksperyensiadong kamagurangan na umoswag sa espirituwal. Huling daing pagtubod an sakong ama, an kamagurangan na idto nagpaheling nin partikular na interes sa sako asin nagin siring sa espirituwal na mga ama ko. Nagtagama sinda nin panahon tanganing sanayon ako sa ministeryo, asin sa huri, sarong magurang sa kongregasyon an partikularmenteng nagsanay sa sako sa pag-asikaso sa inako kong mga asignasyon sa kongregasyon.”

⁸ Siring kan ipinapaheling kan eksperyensia ni Chad, pinoponan kan may pakabatid na mga pastor na sanayon an mga may esperansang magin ministeryal na lingkod asin magurang sa kongregasyon haloy pa bago mag-oswag nin igo an mga ini tanganing makualipikar sa siring na mga pribilehio. Taano man? Huli ta an Biblia nagboboot na dapat na maabot kan ministeryal na mga lingkod sagkod mga magurang sa kongregasyon an halangkaw na moral asin espirituwal na pamantayan bago sinda nombrahan na maglingkod. Dapat sindang “baloon nguna kun baga angay.”​—⁠1 Timoteo 3:1-10.

9. Ano an paninimbagan nin maygurang na mga pastor, asin taano?

⁹ Kun babaloon an bautisadong mga tugang na lalaki, rasonable sana na sanayon nguna sinda. Sa pag-ilustrar: Kun hahagadon sa sarong estudyante sa eskuelahan na kumua nin sarong depisil na eksaminasyon na mayong espesipikong pagsasanay hale sa mga maestra, makakapasar daw an estudyante sa eksaminasyon? Posibleng marhay na dai sia makakapasar. Kun siring, kaipuhan an pagsasanay. Minsan siring, sinasanay kan maatom na mga maestra an mga estudyante bako sanang tanganing makapasar sa eksaminasyon kundi tanganing gamiton man an kaaraman na nakamtan ninda. Kaagid kaiyan, tinatabangan nin mahigos na kamagurangan an bautisadong  mga tugang na lalaki na makultibar an mga kualidad na hinahagad sa nombradong lalaki paagi sa pagtao sa sainda nin espesipikong pagsasanay. Ginigibo ninda iyan bako sanang tanganing matabangan an mga lalaking ini na manombrahan na maglingkod kundi tangani man na matabangan sinda na makapangataman nin igo sa aripompon. (2 Timoteo 2:2) Siempre, dapat na gibohon kan bautisadong mga lalaki an saindang kabtang asin magmaigot sinda tanganing maabot an mga kualipikasyon na hinahagad sa sarong ministeryal na lingkod o magurang sa kongregasyon. (Tito 1:5-9) Minsan siring, paagi sa gikan sa boot na pagsasanay sa mga naghihingoang mag-ako nin paninimbagan sa kongregasyon, an eksperyensiadong mga pastor makakatabang sa sainda na magtalubo nin mas marikas.

10, 11. Paano sasanayon nin mga pastor an iba para sa dugang pang mga pribilehio?

¹⁰ Paano espesipikong sasanayon nin eksperyensiadong mga pastor an iba sa pag-asikaso sa mga pribilehio sa kongregasyon? Enot sa gabos, paagi sa pagpaheling nin interes sa mga tugang na lalaki sa kongregasyon​—⁠na regular na nakikiiba sa sainda sa ministeryo sa langtad asin tinatabangan sindang paoswagon an saindang abilidad na gamiton “an tataramon kan katotoohan sa tamang paagi.” (2 Timoteo 2:15) Ipinapakipag-olay kan maygurang na mga pastor sa mga tugang na lalaking iyan an mga kagayagayahan na makukua sa paglilingkod sa iba asin an pagkakontento na mismong namamatean ninda huli sa pagbugtak nin asin pakaabot sa espirituwal na mga pasohan. Maboot man sindang nagtatao nin espesipikong mga suhestion kun paano an sarong tugang na lalaki maoswag sa pagigin “halimbawa sa aripompon.”​—⁠1 Pedro 5:​3, 5.

¹¹ Kun an sarong tugang na lalaki manombrahan na bilang ministeryal na lingkod, padagos siang sinasanay nin madonong na mga pastor. Si Bruce, na dakol nang dekada na naglingkod bilang magurang sa kongregasyon, nagsasabi: “An ikinakaogma kong gibohon tumukaw kaiba kan bagong nombrahan na ministeryal na lingkod asin repasohon kaiba nia an mga instruksion na ipinublikar kan maimbod asin mapagmansay na oripon. Binabasa man niamo an ano man na giya mapadapit sa espesipikong asignasyon sa saiya, dangan naoogma akong magtrabaho kaiba nia sagkod na pamilyar na sia sa saiyang mga obligasyon.” Mientras na nagkakaeksperyensia an sarong ministeryal na lingkod, puede na man siang sanayon sa pagpapastor. “Kun iiniiba ko an sarong ministeryal na lingkod sa sarong pagsongko sa pagpastor,” an pagpapadagos ni Bruce, “tinatabangan ko siang pumili nin espesipikong mga teksto na makakaparigon sa boot asin makakamotibar sa indibiduwal o sa pamilya na sosongkoon mi. An pakanood na gamiton an Kasuratan sa paagi na nakakamotibar sa puso mahalagang marhay tanganing an sarong ministeryal na lingkod magin epektibong pastor.”​—⁠Hebreo 4:​12; 5:⁠14.

12. Paano puedeng sanayon kan eksperyensiadong mga pastor an bagong nombrahan na mga magurang sa kongregasyon?

¹² An mga pastor na bagong nombrahan nakikinabang man na marhay sa dugang pang pagsasanay. Si Nick, na nasambitan sa enotan, nagsasabi: “An pagsasanay na inako ko partikularmente hale sa duwang mas may edad na paraataman nakatabang na marhay. Sa parate nasasabotan kan mga tugang na ini kun paano aasikasohon an nagkapirang bagay. Pirme sindang pasensiosong naghihinanyog sa sako asin seryoso nindang ineestudyaran an sakong punto de vista​—⁠dawa dai sinda oyon dian. Nakanood akong marhay paagi sa pag-obserbar sa mapakumbaba asin magalang na pagtratar ninda sa mga tugang na lalaki asin babae sa kongregasyon. Ikinadoon sa sako kan mga magurang na ini an pangangaipo na ekspertong gamiton an Biblia kun rineresolberan an mga problema o kun nagtatao nin pamparigon sa boot.”

Sinasanay Paagi sa Tataramon nin Dios

13. (a) Ano an kaipuhan nin sarong tugang na lalaki tanganing magin sarong epektibong pastor? (b) Taano si Jesus ta nagsabi: “An sakong itinotokdo bako ko”?

¹³ Tunay nanggad, an Tataramon nin Dios, an Biblia, igwa kan mga ley, prinsipyo, asin halimbawa na kinakaipuhan nin sarong pastor tanganing magin “lubos na may kakayahan, biyong nasangkapan  para sa gabos na marahay na gibo.” (2 Timoteo 3:​16, 17) An sarong tugang na lalaki tibaad halangkaw an sekular na edukasyon, alagad an saiyang kaaraman sa Kasuratan asin an pag-aplikar nia kaiyan iyo an nakakatabang sa saiya na magin epektibong pastor. Estudyare an halimbawa ni Jesus. Sia an may pinakamahiwas na kaaraman, an pinakamay pakabatid, asin an pinakamadonong na espirituwal na pastor na nabuhay sa daga kasuarin man; pero, dawa sia dai nagsarig sa sadiri niang kadonongan kan nagtotokdo sa mga karnero ni Jehova. Sia nagsabi: “An sakong itinotokdo bako ko, kundi kaidtong nagsugo sa sako.” Taano ta itinao ni Jesus an kaomawan sa saiyang langitnon na Ama? Sia nagpaliwanag: “An nagtataram nin hale sana saiya naghahanap kan saiyang sadiring kamurawayan.”​—⁠Juan 7:​16, 18.

14. Paano linilikayan kan mga pastor an paghanap kan sadiri nindang kamurawayan?

¹⁴ Linilikayan kan maimbod na mga pastor na maghanap kan sadiri nindang kamurawayan. Ibinabasar ninda an saindang hatol asin pagparigon sa boot, bakong sa sadiri nindang kadonongan, kundi sa Tataramon nin Dios. Nasasabotan ninda na an gibohon nin sarong pastor tabangan an mga karnero na magkaigwa kan “isip ni Cristo,” bakong kan isip kan kamagurangan. (1 Corinto 2:14-16) Halimbawa, kumusta kun an sarong magurang sa kongregasyon na nagtatabang sa sarong mag-agom na atubangon an mga problema ninda mag-agom ibinabasar an saiyang hatol sa sadiri niang eksperyensia imbes na sa mga prinsipyo sa Biblia asin sa impormasyon na ipinublikar kan “maimbod asin mapagmansay na oripon”? (Mateo 24:45) Tibaad an saiyang sadol impluwensiadong marhay kan lokal na mga kostumbre asin nalilimitaran kan limitado niang kaaraman. Totoo, bako man na sala an nagkapirang kostumbre, asin tibaad may eksperyensia na sa buhay an magurang sa kongregasyon. Alagad nakakamtan kan mga karnero an pinakadakulang pakinabang kun ineenkaminar sinda kan mga pastor na maghinanyog sa tingog ni Jesus asin sa mga tataramon ni Jehova imbes na sa kaisipan nin mga tawo o sa mga idinidikta kan lokal na kostumbre.​—⁠Salmo 12:⁠6; Talinhaga 3:​5, 6.

Sinasanay Paagi sa “Maimbod Asin Mapagmansay na Oripon”

15. Anong gibohon an isinugo ni Jesus sa “maimbod asin mapagmansay na oripon,” asin ano an sarong dahelan kaya mapanggana an grupong oripon?

¹⁵ An mga pastor na arog ni apostol Pedro, Juan, asin Pablo gabos miembro kan grupo na inapod ni Jesus na “an maimbod asin mapagmansay na oripon.” An grupong oripon na ini kompuesto kan linahidan nin espiritu na mga tugang ni Jesus digdi sa daga, na an paglaom iyo an mamahala kaiba ni Cristo sa langit. (Kapahayagan 5:​9, 10) Durante kaining huring mga aldaw kan sistemang ini, duminikit na siempre an mga tugang ni Cristo na nawalat digdi sa daga. Minsan siring, an gibohon na isinugo ni Jesus sa sainda​—⁠an paghuhulit kan maogmang bareta kan Kahadean bago umabot an katapusan⁠​—⁠​mas mahiwas na ngonyan kisa kasuarin pa man. Dawa siring, pambihira nanggad an nagin kapangganahan kan grupong oripon! Taano? Huli ta, sa sarong kabtang, nasanay ninda an mga miembro kan “ibang karnero” na tumabang sa sainda sa paghuhulit asin pagtotokdo. (Juan 10:16; Mateo 24:14; 25:40) Ngonyan,  ginigibo kan maimbod na grupong ini an mayor na kabtang kan gibohon.

16. Paano sinasanay kan grupong oripon an nombradong mga lalaki?

¹⁶ Paano itinatao kan grupong oripon an pagsasanay na ini? Kan enot na siglo, an mga representante kan grupong oripon inautorisaran na magsanay asin magnombra nin mga paraataman sa mga kongregasyon, asin sinanay man kan mga paraataman an mga karnero. (1 Corinto 4:17) Totoo man iyan ngonyan. An Namamahalang Grupo​—⁠an sadit na grupo kan linahidan na kamagurangan na nagrerepresentar sa grupong oripon⁠​—⁠​inaautorisaran an mga representante kaiyan na magsanay asin magnombra nin mga ministeryal na lingkod asin magurang sa manampulong ribong kongregasyon sa bilog na kinaban. Dugang pa, inoorganisar kan Namamahalang Grupo an mga paadalan tanganing sanayon an mga miembro kan mga Komite kan Sangang Opisina, nagbibiaheng mga paraataman, kamagurangan, asin ministeryal na mga lingkod kun paano mangangataman sa mga karnero sa pinakamarahay na paagi. Itinatao an dugang pang pagdirehir paagi sa mga surat, sa mga artikulo na ipinupublikar sa An Torrengbantayan, asin paagi sa iba pang publikasyon, arog baga kan Organisado sa Paggibo kan Kabotan ni Jehova.⁠ *

17. (a) Paano ipinaheling ni Jesus an saiyang kompiansa sa grupong oripon? (b) Paano ikakapaheling kan espirituwal na mga pastor na may kompiansa sinda sa grupong oripon?

¹⁷ Dakulaon an kompiansa ni Jesus sa grupong oripon kaya ninombrahan nia iyan na mamahala sa “gabos niang rogaring”​—⁠an boot sabihon, sa gabos niang espirituwal na intereses sa daga. (Mateo 24:47) Pinapatunayan kan ninombrahan na mga pastor na may kompiansa man sinda sa grupong oripon paagi sa pagsunod sa mga instruksion na inaako ninda hale sa Namamahalang Grupo kaiyan. Iyo, kun sinasanay kan mga pastor an iba, kun tinotogotan nindang sanayon sinda kan Tataramon nin Dios, asin kun iinaaplikar ninda an pagsasanay na itinatao kan grupong oripon, pinapaoswag ninda an pagkasararo sa tahaw kan aripompon. Nagpapasalamat nanggad kita na nagsanay si Jehova nin mga lalaki na odok sa boot na nangangataman sa kada miembro kan Kristianong kongregasyon!

[Nota sa ibaba]

Ano an Isisimbag Nindo?

• Paano sinasanay kan maygurang na espirituwal na mga pastor an iba?

• Taano an mga pastor ta dai nagtotokdo basado sa sadiri nindang kaisipan?

• Paano asin taano ta nagpapaheling nin kompiansa an mga pastor sa grupong oripon?

[Mga Hapot sa Pag-adal]

[Mga Ritrato sa pahina 24, 25]

Sinasanay kan Kristianong kamagurangan an mas hoben na mga lalaki sa kongregasyon

[Mga Ritrato sa pahina 26]

Nagtatao “an maimbod asin mapagmansay na oripon” nin abundang pagsasanay para sa kamagurangan