An Halaga kan “Lalagan na Mas Maluya”

“KAMONG mga agom na lalaki, padagos na makiiba [sa saindong agom na babae] segun sa kaaraman,” an isinurat ni apostol Pedro, “na tinatawan sinda nin onra siring sa lalagan na mas maluya, an babae.” (1 Pedro 3:7) An pagkasambit daw na ini sa Kasuratan dapit sa sarong babae bilang “lalagan na mas maluya” nagmemenos sa mga babae sa ano man na paagi? Helingon niato kun ano an boot sabihon sa kapoonpooni kan pinasabngan na parasurat.

An Griegong nombre na trinadusir na “onra” nangangahulogan nin “presyo, halaga, . . . paggalang.” Huli kaini, kaipuhan na trataron nin sarong Kristianong agom na lalaki an saiyang agom sa mapagpadangat na paagi, na pinapahelingan sia nin maninigong konsiderasyon bilang mapapasaon asin mahalagang marhay na lalagan. Dai nanggad ini nakakapamenos. Bilang halimbawa, isipon nindo an Tiffany lotus lamp. An magayonon na lamp na ini masasabi nanggad na mapapasaon. An pagigin mapapasaon daw kan lamp nakaina sa halaga kaiyan? Dai nanggad! Kan 1997 an orihinal na Tiffany lotus lamp ipinabakal sa sarong subasta sa halagang 2.8 milyones na dolyar! An pagigin mapapasaon kaiyan nakadagdag sa halaga kaiyan, bakong nakaina kaiyan.

Kaagid kaiyan, an pagtao nin onra sa babae siring sa lalagan na mas maluya dai nagpapababa sa halaga nia o nagmemenos sa saiya. An pakikiiba sa saiyang agom na babae “segun sa kaaraman” nangangahulogan na kokonsideraron nin sarong agom na lalaki an mga kakayahan asin limitasyon, an mga gusto asin dai gusto, saka an punto de vista asin mga saboot kan babae. Rinerekonoser asin iginagalang kan may pagmakolog na agom na lalaki an pagkakalaen nin personalidad nindang mag-agom. Tinatawan nia ini nin igong konsiderasyon “tanganing an [saiyang] mga pamibi dai maolang.” (1 Pedro 3:7) Isinasapeligro nin sarong agom na lalaki an sadiri niang relasyon sa Dios kun dai nia iginagalang an marahayon na mga kualidad kan saiyang agom na babae. Malinaw nanggad, dai minemenos kan Tataramon nin Dios an mga babae. Imbes, tinatawan sinda kaiyan nin dignidad asin onra.

[Picture Credit Line sa pahina 32]

© Christie’s Images Limited 1997