An Katuyohan nin Dios Para sa Daga—Madali Nang Maotob

KAN si Adan asin Eva yaon pa sa Paraiso, nag-ako sinda kan pagboot na ini na tao nin Dios: “Pangagbunga asin pangagdakol kamo asin panoa nindo an daga patin sakopa nindo iyan, asin sakopon nindo an mga sira sa dagat asin an naglalayog na mga linalang sa kalangitan patin an lambang nabubuhay na linalang na naghihiro sa ibabaw kan daga.”​—⁠Genesis 1:28.

An pagsakop sa daga bako sanang pagkultibar o pag-asikaso kan sadit na kabtang kaiyan. Papahiwason ni Adan asin ni Eva saka kan saindang mga aki an Paraiso sagkod na makalakop iyan sa bilog na globo. Minsan siring, an enot na mag-agom na tawo nagkasala asin pinaluwas sa hardin nin Eden. (Genesis 3:​23, 24) Alagad dai iyan nangangahulogan na an daga dai na noarin man sasakopon.

Huling sinda bebendisyonan nin Dios, masasakop kan makinuyog na katawohan an daga. Kan an banwaan kan suanoy na Israel igwa kan bendisyon nin Dios, marahay an ani kan saindang mga oma asin marahayon an bunga kan saindang mga tatamnan. Magigin kapareho kaiyan an kamugtakan mantang an satong globo luway-luway na magigin sarong paraiso. Siring kan ipinanuga sa ipinasabong na Tataramon nin Dios, an Biblia, “an daga mismo magtatao kan bunga kaiyan; an Dios, an satong Dios, mabendisyon sa sato.” (Salmo 67:6) Garo man sana maggagayagaya an kaawagan asin kabukidan kan daga, an mga kahoy asin burak kaiyan,  an mga salog asin dagat kaiyan. (Salmo 96:11-13; 98:7-9) An satong globo mapapano nin matubang na mga pananom, makolor na mga gamgam, makangangalas na mga hayop, asin madinamayon na mga tawo.

Madali Nang Dumatong an Sarong Bagong Kinaban!

Yaon na kita ngonyan sa tata nin sarong bagong kinaban na ipinanuga ni Jehova Dios. “Igwa nin bagong kalangitan asin sarong bagong daga na satong hinahalat segun sa saiyang panuga,” an isinurat ni apostol Pedro, “asin sa mga ini magdadanay an katanosan.” (2 Pedro 3:13) Pagkatapos basahon an mga tataramon na iyan ni Pedro, an nagkapira tibaad magkonklusyon na an planetang ini dai noarin man magigin sarong paraiso. Tibaad iniisip ninda na sasalidahan an pisikal na kalangitan asin daga. Iyan daw talaga an mangyayari?

Ano an “bagong kalangitan”? Bako iyan an pisikal na kalangitan na linalang nin Dios. (Salmo 19:​1, 2) Si Pedro nagtaram pa sana manongod sa simbolikong “kalangitan”​—⁠mga gobyerno nin tawo na ilinangkaw sa saindang mga nasasakopan. (2 Pedro 3:10-12) Dai nagin mapanggana sa pamamahala sa katawohan an “kalangitan” na ini asin iyan mapapara. (Jeremias 10:23; Daniel 2:44) An “bagong kalangitan” na masalida dian iyo an Kahadean nin Dios na kompuesto kan Hadeng si Jesu-Cristo asin kan saiyang 144,000 na kairibang paramana na binuhay liwat pasiring sa langitnon na buhay.​—⁠Roma 8:​16, 17; Kapahayagan 5:​9, 10; 14:​1, 3.

An “bagong daga” na nasambitan ni Pedro bakong bagong planeta. Ginibo ni Jehova an daga na sangkap para sa daing katapusan na buhay nin tawo. (Salmo 104:5) Kun beses, ginagamit kan Biblia an terminong “daga” na an boot sabihon mga tawo. (Genesis 11:1) An daga na madali nang laglagon kompuesto nin mga tawo na kabtang kan maraot na kinaban na ini. Kaagid kaiyan, sarong kinaban nin bakong diosnon na mga tawo an nalaglag sa Baha kan kaaldawan ni Noe. (2 Pedro 3:5-7) Kun siring, ano an “bagong daga”? Iyan bagong sosyedad nin mga tawo​—⁠an tunay na mga parasamba sa Dios, na “may tanos na puso.” (Salmo 125:⁠4; 1 Juan 2:17) An gabos na ley para sa “bagong daga” magikan sa “bagong kalangitan.” Seseguradohon nin maimbod na mga lalaki sa daga na nasusunod an mga instruksion na ini.

Mga Bagay na Bago Asin Makangangalas!

Tinawan nanggad kita ni Jehova nin sarong marahayon na erokan kan iinandam nia an daga para sa mga tawo. Sia mismo an nagsabi na an gabos niang ginibo sa daga “marahayon.” (Genesis 1:31) Nadara ni Satanas na Diablo si Adan asin Eva na magrebelde. (Genesis 3:1-5; Kapahayagan 12:9) Minsan siring, sa dai na mahahaloy seseguradohon nin Dios na an mga matanos magkaigwa nin “tunay na buhay.” Iyan nangangahulogan nin “buhay na daing katapusan” sa irarom nin sangkap na mga kamugtakan sa Paraiso. (1 Timoteo 6:​12, 19) Estudyaran niato ngonyan an nagkapira sa mga bendisyon na makakamtan sa panahon na iyan.

Durante kan Sangribong Taon na Paghade ni Cristo, si Satanas popogolan asin dai makakatao nin grabeng sakit sa katawohan. Si apostol Juan nagsasabi: “Naheling ko an sarong anghel [an arkanghel na si Miguel, o Jesu-Cristo] na naghihilig hale sa langit na igwa kan liabe kan bungaw asin sarong dakulang kadena sa saiyang kamot. Asin dinakop nia an dragon, an enot na halas, na iyo an Diablo asin Satanas, asin ginapos nia sia sa laog nin sangribong taon. Asin ihinulog nia sia sa bungaw asin pinintoan nia idto patin sinelyohan idto sa ibabaw nia, tanganing dai na nia ikalagalag an mga nasyon sagkod na matapos an sangribong taon.” (Kapahayagan 20:1-3; 12:12) Apuera sa mayo nang impluwensia si Satanas mantang sia nasa bungaw, an katawohan magkakamit nin dakol na iba pang bendisyon sa irarom kan pamamahala kan Kahadean.

An karatan, kadahasan, asin guerra mawawara na. An Biblia nanunuga: “Dai na mahahaloy, asin an maraot mawawara na; asin hehelingon mo  nanggad an saiyang namumugtakan, asin mayo na sia dian. Alagad an mga mahoyo mismo makakasadiri kan daga, asin tunay na manonompongan ninda an saindang labi-labi nanggad na kaogmahan sa nagsosopay na katoninongan. An mga matanos mismo makakasadiri kan daga, asin sinda mag-eerok dian sagkod lamang.” (Salmo 37:​10, 11, 29) ‘Papaontokon ni Jehova Dios an mga guerra sagkod sa kaporoporohi kan daga.’ (Salmo 46:9) Abaa karahay na mga garantiya nin katiwasayan asin katoninongan!

Magkakaigwa nin abundang nakakarahay sa salud asin masiram na kakanon sa satong mga lamesa. “Magkakaigwa nin abundang tipasi sa ibabaw kan daga,” an inawit kan salmista. “Maglilipwas sa alitoktok kan kabukidan.” (Salmo 72:16) Sa panahon na iyan, mayo nin siisay man na magtitios nin grabeng kolog nin pagkagutom.

Mayo nin siisay man na maghehelang. Sa katunayan, “mayo nin nag-eerok na masabi: ‘Naghehelang ako.’ ” (Isaias 33:24; 35:​5, 6) Kan si Jesu-Cristo nasa daga, pinaomayan nia an mga daoton asin an mga pilay saka buta. (Mateo 9:35; Marcos 1:40-42; Juan 5:5-9) Imahinara kun ano an gigibohon nia sa bagong kinaban! Isipon nindo an magigin kaogmahan kun maomayan na an mga buta, bungog, pilay, asin pula.

Mantang an makinuyog na katawohan nag-ooswag sa pagkasangkap, mababaliktad an danyos nin paggurang. Mayo nang mga salming sa mata, sogkod, saklay, silyang de rueda, ospital, asin bolong. Kanigoan an magigin mga pagbabago mantang ibinabalik sa dati an satong bagsik nin pagkahoben! (Job 33:25) Kada aga, mamata kita hale sa masiram na pagtorog, na narepreskohan asin andam na ponan an saro na naman na aldaw nin nakakagayagayang aktibidad.

An pagkabuhay liwat nin mga namomotan asin kan iba pa matao nin kagayagayahan sa satong puso. (Juan 5:​28, 29; Gibo 24:15) Abaa kanakakapukaw sa boot na sabaton si Abel, Noe, Abraham, Sara, Job, Moises, Rut, David, Elias, Ester, asin dakol pang iba! Minilyon na iba pa an bubuhayon man liwat. An kadaklan sa sainda nungkang nakaaram manongod ki Jehova, alagad sinda sasabaton kan mga tawo na gustong-gusto sindang tokdoan manongod sa Dios, sa saiyang mga katuyohan, asin sa saiyang Aki, si Jesu-Cristo. Mantang namimidbid kan mga binuhay liwat an saindang Kaglalang, an daga talagang mapapano kan kaaraman dapit ki Jehova.

Orog sa gabos, masasamba niato an iyo sanang tunay na Dios sagkod lamang. Magkakapribilehio kita na ‘maglingkod ki Jehova na may paggayagaya,’ asin kita magtatarabangan na may pagkaoroyon mantang kita nagtotogdok nin magagayon na harong, nagkukultibar kan daga asin, sa katapustapusi, sinasakop an bilog na daga. (Salmo 100:1-3; Isaias 65:21-24) Magigin dakulang kaogmahan nanggad na mabuhay sagkod lamang sa sarong mabunga, matoninong, asin magayon na paraiso na nagdadara nin onra sa banal na ngaran ni Jehova!​—⁠Salmo 145:21; Juan 17:3.

Sarong Pangultimong Pagbalo sa Katawohan

Durante kan saiyang Sangribong Taon na Paghade, iaaplikar ni Jesus an mga pakinabang kan saiyang atang na pantubos sa lambang makinuyog na tawo. Kun siring, pag-abot nin panahon mahahale na an gabos na kasalan, asin an katawohan dadarahon sa pagkasangkap bilang tawo. (1 Juan 2:⁠2; Kapahayagan 21:1-4) Sa biyong pagkapara kan mga epekto kan kasalan ni Adan, maaabot na kan sangkap na mga tawo an mga pamantayan nin Dios sa pisikal, mental, moral, asin espirituwal. Sa siring, sinda ‘mabubuhay’ sa pinakalubos na paagi kun makaabot sinda sa daing kasalan na pagkasangkap. (Kapahayagan 20:5) Mapapamuraway  nanggad kaini asin kan Paraisong daga si Jehova!

Sa halipot na panahon pagkatapos kan Sangribong Taon na Paghade ni Cristo, si Satanas na Diablo asin an saiyang mga demonyo, o maraot na mga anghel, bubutasan hale sa bungaw na hinulogan sa sainda mga sampulong siglo bago kaini. (Kapahayagan 20:1-3) Totogotan sindang gumibo nin pangultimong paghihingoa na italikod sa Dios an mga tawo. Minsan ngani may nagkapira na mapadara sa salang mga pagmawot, an pagrebeldeng ini masusudya. Gagadanon ni Jehova an mga maimot kaiba si Satanas asin an gabos niang demonyo. An karatan dai na noarin man giraray malataw. An gabos na paragibo nin maraot mawawara na sagkod lamang, asin an mga matanos maako nin buhay na daing katapusan.​—⁠Kapahayagan 20:7-10.

Yaon daw Kamo Duman?

May esperansang magin maogma sa bilog na panahon na daing sagkod an mga namomoot ki Jehova Dios. Dai magigin nakakalangkag an buhay na daing katapusan sa Paraiso. Sa katunayan, an buhay magigin mas interesante sa pag-agi nin panahon, huli ta mayo nin sagkodan an kaaraman ni Jehova Dios. (Roma 11:33) Pirme kamong may bagong bagay na manonodan, asin dakol an panahon nindo na kumua nin kaaraman. Taano? Huli ta kamo mabubuhay, bakong sa laog sana nin 70 o 80 taon, kundi sagkod sa panahon na daing sagkod.​—⁠Salmo 22:26; 90:10; Eclesiastes 3:11.

Kun namomotan nindo an Dios, pirme kamong magigin maogmang marhay sa paggibo kan saiyang kabotan. Si apostol Juan nagsurat: “Ini iyo an boot sabihon kan pagkamoot sa Dios, na kuyogon niato an saiyang mga togon; pero an saiyang mga togon dai nakakapagabat.” (1 Juan 5:3) Kaya dai nindo pagtogotan an ano man na papondohon kamo sa pagpaogma ki Jehova Dios paagi sa paggibo kan bagay na matanos. Pirmeng girumdomon an marahayon na paglaom na iinaalok sa saindo kan Tataramon nin Dios, an Biblia. Magin determinadong gibohon an kabotan ni Jehova, asin nungkang sumuhay dian. Dangan kamo magigin yaon duman kun maotob na an katuyohan nin Dios para sa daga asin an satong lakop sa globong erokan magin nang daing sagkod na paraiso.

[Ritrato sa pahina 4]

Huli sa bendisyon nin Dios, abunda an ani sa mga tanoman sa Israel

[Ritrato sa pahina 7]

Anong mga bendisyon an linalaoman nindong kamtan sa Paraiso?