An mga Kagayagayahan na Bunga nin Paglakaw sa Integridad

“An bendisyon ni Jehova​—⁠iyan an nakakapayaman, asin dai nia iyan dinadagdagan nin kakologan.”​—⁠TALINHAGA 10:22.

1, 2. Taano ta maninigo na kita magmaan sa pagigin sobra kapreokupado manongod sa ngapit?

“AN PAGKAPREOKUPADO manongod sa ngapit . . . nakakaolang sa sato na ikaogma an nasa presente,” an komento nin sarong pilosopong Amerikano. Totoo ini kun dapit sa mga aki na preokupadong marhay manongod sa nagigibo kan mga nasa edad na kaya dai ninda pig-iintindi an mga pakinabang na bunga nin pagigin aki sagkod na lumihis na logod iyan.

² Dawa an mga parasamba ki Jehova kun beses nagkakaigwa man nin siring na kaisipan. Estudyare kun ano an puedeng mangyari. Hinihidaw niato an kaotoban kan panuga nin Dios na pangyarihon an sarong paraisong daga. Galaga kitang naghahalat sa buhay na mayo nin helang, paggurang, kolog, asin pagdusa. Minsan ngani marahay na antisiparon an siring na mga bagay, kumusta kun kita nagigin preokupado nang marhay sa pisikal na mga bendisyon sa ngapit na dai na logod niato naririsa an espirituwal na mga bendisyon sa sato sa presenteng panahon? Sayang nanggad iyan! Posible na kita madaling panluyahan nin boot asin makamate nin ‘kasakitan sa puso huli ta an mga inaasahan niato nadidigson’ nin mas haloy kisa inantisipar niato. (Talinhaga 13:12) Huli sa mga problema asin kasakitan sa buhay tibaad an pagmate niato garo kita nabibilanggo sa kadaihan nin paglaom o sa pagkaherak sa sadiri. Imbes na makaya an bakong paborableng mga situwasyon, tibaad magkaigwa kita nin mareklamong aktitud. Ini gabos malilikayan paagi sa mapagpasalamat na paghorophorop sa mga bendisyon na yaon sa sato sa presente.

3. Sa ano niato isesentro an satong atension sa artikulong ini?

³ “An bendisyon ni Jehova​—⁠iyan an nakakapayaman, asin dai nia iyan dinadagdagan nin kakologan,” an sabi kan Talinhaga 10:22. Bako daw na sarong bendisyon na dapat ipaggayagaya an espirituwal na prosperidad kan mga lingkod ni Jehova sa presenteng aldaw? Estudyaran niato an nagkapirang aspekto kan satong espirituwal na prosperidad asin helingon niato kun ano  an kahulogan kaiyan para sa sato personalmente. An pagtao nin panahon sa paghorophorop kan mga bendisyon na abundang itinatao ni Jehova sa ‘matanos na naglalakaw sa saiyang integridad’ maparigon nanggad sa satong determinasyon na padagos na paglingkodan an satong langitnon na Ama na may kagayagayahan.​—⁠Talinhaga 20:7.

‘Mga Bendisyon na Nagpapayaman sa Sato’ Ngonyan

4, 5. Arin na katokdoan sa Biblia an nangorognang pinapahalagahan nindo, asin taano?

⁴ Tamang kaaraman sa mga katokdoan sa Biblia. An mga relihion kan Kakristianohan sa pankagabsan naghihingako na naniniwala sa Biblia. Minsan siring, dai sinda nagkakaoroyon sa kun ano an itinotokdo kaiyan. Dawa an mga miembro kan iyo man sanang relihiosong grupo sa parate magkakalaen an opinyon sa kun ano man nanggad an itinotokdo kan Kasuratan. Laen nanggad an saindang kamugtakan sa kamugtakan kan mga lingkod ni Jehova! Ano man an satong pinaghalean na nasyon, kultura, o rasa, sinasamba niato an Dios na midbid niato sa ngaran. Bako siang misteryosong dios na trinidad. (Deuteronomio 6:⁠4; Salmo 83:18; Marcos 12:29) Aram man niato na an pangenot na isyu kan unibersal na soberaniya nin Dios madali nang resolberan asin na paagi sa pagpapadanay kan satong integridad sa saiya, an balang saro sa sato personalmenteng napapalabot sa isyung iyan. Aram niato an katotoohan manongod sa mga gadan asin mayo kita kan pagkangiri sa sarong Dios na nagpapasakit daa sa mga tawo sa kalayo sa impierno o nagbubugtak sa sainda sa purgatoryo.​—⁠Eclesiastes 9:​5, 10.

⁵ Dugang pa, kanigoan kanakakagayagayang maaraman na kita dai nagtunga nin aksidente sana huli sa ebolusyon na basta na sana nangyari! Imbes, kita mga linalang nin Dios, na ginibo sa saiyang ladawan. (Genesis 1:26; Malaquias 2:10) “Ika oomawon ko huli ta sa makangingirhat na paagi makangangalas an pagkagibo sa sako,” an inawit kan salmista sa saiyang Dios. “Makangangalas an saimong mga gibo, na aram na gayo kan sakuyang kalag.”​—⁠Salmo 139:14.

6, 7. Anong mga pagbabago sa saindong buhay o sa buhay nin iba na midbid nindo an nagbunga nin bendisyon?

⁶ Pakalikay sa nakakadanyar na mga bisyo asin kaugalean. Kadakol kan patanid sa media manongod sa mga peligro nin paninigarilyo, sobrang pag-inom, asin pakikidorog minsan kiisay. Sa kadaklan, dai hinihimate an mga patanid na ini. Pero, ano an nangyayari kun manodan nin sarong sinserong tawo na kinokondenar kan tunay na Dios an siring na mga bagay asin na sia napapamondo kan mga naggigibo kaiyan? Tara, napapahiro an tawong iyan na haleon an siring na mga gibo sa saiyang buhay! (Isaias 63:10; 1 Corinto 6:​9, 10; 2 Corinto 7:⁠1; Efeso 4:30) Minsan ngani ginigibo nia ini sa pangenot tanganing paogmahon si Jehova Dios, nag-aako man sia nin dagdag na mga pakinabang​—⁠mas marahay na salud asin toninong na isip.

⁷ An paghale kan maraot na mga bisyo depisil na marhay para sa dakol. Sa ibong kaiyan, taon-taon manampulong ribo an naggigibo kaiyan. Idinudusay ninda an saindang sadiri ki Jehova asin sinda nagpapabautismo sa tubig, sa siring ipinapaaram sa publiko na hinale na ninda sa saindang buhay an mga kaugalean na ikinakaanggot nin Dios. Saro nanggad iyan na pamparigon sa boot niato gabos! Pinapasarig kaiyan an satong determinasyon na magdanay na talingkas sa pagkaoripon sa makasalan asin nakakadanyar na gawe-gawe.

8. Anong konseho na basado sa Biblia an nakakakontribwir sa kaogmahan nin pamilya?

⁸ Maogmang buhay pampamilya. An buhay pampamilya sa dakol na nasyon nagraraot. Dakol na pag-agoman an natatapos sa diborsio, na an nawawalat sa parate mga aking nadanyaran na marhay an emosyon. Sa nagkapirang nasyon sa Europa, haros 20 porsiento kan gabos na pamilya an may nagsosolong magurang. Paano kita tinabangan ni Jehova na lumakaw sa dalan nin integridad sa bagay na ini? Basahon tabi an Efeso 5:⁠22⁠–​⁠6:​4, asin mangnohon an marahayon na konseho na itinatao kan Tataramon nin Dios sa mga agom na lalaki, agom na babae, asin  aki. An pag-aplikar kan sinasabi dian asin sa iba pang kabtang kan Kasuratan nagpapakosog nanggad sa bogkos nin pag-agoman, nakakatabang sa mga magurang na mapadakula an mga aki sa tamang paagi, asin nakakakontribwir sa pagkaigwa nin sarong maogmang buhay pampamilya. Bako daw na iyan sarong bendisyon na maninigo niatong ipaggayagaya?

9, 10. Paano napapalaen an satong paglaom sa ngapit sa paglaom kan kinaban?

⁹ Pakaseguro na an mga problema sa kinaban mareresolberan sa dai na mahahaloy. Sa ibong kan pagkatatao sa siensia asin teknolohiya asin kan sinserong mga paghihingoa nin nagkapirang namomoon, dai pa man giraray nareresolberan an magabat na mga problema sa buhay sa presenteng panahon. Si Klaus Schwab, kagtugdas kan Pambilog na Kinaban na Forum sa Ekonomiya, nagsabi dai pa sana nahahaloy na “an listahan nin mga problemang napapaatubang sa kinaban padagos na naglalaba alagad an panahon tanganing maresolberan an mga iyan padagos na minalipot.” Sia nagtaram manongod sa “mga peligro na nakakaapektar sa gabos na nasyon arog baga kan terorismo, pagkaraot kan palibot asin kadaihan nin kasegurohan sa pinansial.” Si Schwab nagkonklusyon: “Ngonyan, orog kisa kasuarin man, an kinaban napapaatubang sa tunay na mga pangyayari na nangangaipo nin iriba asin desididong aksion.” Mientras na nag-aabante an ika-21 siglo, malibog pa man giraray an pankagabsan na paglaom kan katawohan sa ngapit.

¹⁰ Kanigoan kanakakaogmang maaraman na si Jehova nag-establisar nin sarong areglo na makakaresolber sa gabos na problema nin katawohan​—⁠an Mesiyanikong Kahadean nin Dios! Paagi kaiyan, ‘papaontokon kan tunay na Dios an mga guerra’ asin papangyayarihon nia an “abundang katoninongan.” (Salmo 46:⁠9; 72:7) An linahidan na Hade, si Jesu-Cristo, ‘ililigtas an dukha, an nagsasakit nin makuri, asin an hababa gikan sa pan-aapi asin sa kadahasan.’ (Salmo 72:12-14) Sa irarom kan pamamahala kan Kahadean, dai na magkakaigwa nin kakulangan nin kakanon. (Salmo 72:16) “Papahidon [ni Jehova] an gabos na luha sa [satong] mga mata, asin dai na magkakaigwa nin kagadanan, ni magkakaigwa pa man nin pagmondo o pagtangis o kolog. An enot na mga bagay nakalihis na.” (Kapahayagan 21:4) An Kahadean naestablisar na sa langit asin sa dai na mahahaloy gigibohon kaiyan an kaipuhan na aksion tanganing resolberan an gabos na problema digdi sa daga.​—⁠Daniel 2:44; Kapahayagan 11:15.

11, 12. (a) Nagtatao daw nin nagdadanay na kaogmahan an paghanap nin kawilihan? Ipaliwanag. (b) Ano an nagtatao nin tunay na kaogmahan?

¹¹ An pakaaram sa kun ano an nagtatao nin tunay na kaogmahan. Ano talaga an nagtatao nin tunay na kaogmahan? Sinabi nin sarong sikologo na may tolong sangkap an kaogmahan​—⁠kawilihan, pagigin kalabot (pakikikabtang sa mga aktibidad na arog baga nin pagtrabaho asin sa pamilya), asin kahulogan (paghihingoang maabot an sarong obheto o pasohan na mas mahalaga kisa sa sadiri). Sa tolo, ibinilang nia an kawilihan na pinakamenos sa halaga asin nagsabi: “Dapat nanggad ining mabareta huli ta kadakol na tawo an isinesentro an saindang buhay sa paghanap nin kawilihan.” Ano an punto de vista kan Biblia sa bagay na ini?

¹² Si Hadeng Salomon kan suanoy na Israel nagsabi: “Ako, ako mismo, nagsabi sa sakuyang puso: ‘Madia, ta babaloon taka sa paggayagaya. Saro pa, magkamit ka nin karahayan.’ Asin, uya! iyan man daing kamanungdanan. Sinabihan ko an pagngisi: ‘Karungawan!’ asin an paggayagaya: ‘Ano an ginigibo kaini?’” (Eclesiastes 2:​1, 2) Sono sa Kasuratan, an ano man na kaogmahan na itinatao nin kawilihan temporaryo sana. Kumusta man an pakikikabtang sa gibohon? Yaon sa sato an pinakamakahulogan na gibohon na puede niatong pakikabtangan​—⁠an paghuhulit kan Kahadean asin paggibo nin mga disipulo. (Mateo 24:14; 28:​19, 20) Paagi sa pagpaabot sa iba kan mensahe nin kaligtasan na ipinaliwanag sa Biblia, nakikikabtang kita sa sarong gibohon na  puedeng magbunga kan kaligtasan niato asin kan mga naghihinanyog sa sato. (1 Timoteo 4:16) Bilang “mga kapwa trabahador nin Dios,” naeeksperyensiahan niato na “igwang orog na kaogmahan sa pagtao kisa pag-ako.” (1 Corinto 3:⁠9; Gibo 20:35) An gibohon na ini nagtatao nin orog pang kahulogan sa satong buhay asin nagtatao sa Kaglalang nin ikakasimbag sa nagduduhagi sa saiya, si Satanas na Diablo. (Talinhaga 27:11) Tunay nanggad, ipinaheling sa sato ni Jehova na an diosnon na debosyon nagtatao nin tunay asin nagdadanay na kaogmahan.​—⁠1 Timoteo 4:8.

13. (a) Sa anong paagi na an Teokratikong Paadalan sa Pagmiministro sarong bendisyon na dapat niatong ipaggayagaya? (b) Paano kamo nakinabang sa Teokratikong Paadalan sa Pagmiministro?

¹³ Sarong mahalaga asin epektibong programa sa pagsasanay. Si Gerhard naglilingkod bilang magurang sa sarong kongregasyon kan Mga Saksi ni Jehova. Ginigirumdom an panahon kaidtong sia hoben pa, sia nagsasabi: “Bilang sarong hoben, nasasakitan akong marhay kaidto sa pagtaram. Kun nagigipit, haros dai ako makataram asin nagpopoon akong makamol. Nagkaigwa ako nin saboot na ako maluya asin nagkadepresyon ako. Ilinaog ako kan sakong mga magurang sa sarong kurso sa pagtaram alagad an saindang paghihingoa dai nakatabang. An problema ko nasa isip, bakong pisikal. Pero, may marahayon na probisyon hale ki Jehova​—⁠an Teokratikong Paadalan sa Pagmiministro. An pagpalista sa paadalan na ini nagtao sa sako nin bagong kosog nin boot. Ginibo ko an sakong pinakamakakaya na iaplikar an nanonodan ko. Asin nag-aser iyan! Nagin suelto an pagtaram ko, nawara an sakong depresyon, asin nagin mas makosog an sakong boot sa ministeryo. Ngonyan nagtatao na ngani ako nin pampublikong mga pahayag. Nagpapasalamat nanggad ako ki Jehova, na nagpaoswag sa kualidad kan sakong buhay paagi sa paadalan na ini.” Bako daw na an paagi nin pagsasanay sa sato ni Jehova tanganing magibo an saiyang gibohon sarong dahelan na maggayagaya?

14, 15. Sa mga panahon nin kasakitan, anong tabang an madaling makua? Iilustrar.

¹⁴ Sarong personal na relasyon ki Jehova asin suporta hale sa nagkakaborogkos, internasyonal na kasararoan nin magturugang. Si Katrin, na nag-eerok sa Alemania, nahadit na marhay kan madangog nia an mga bareta manongod sa makosogon na linog asin sa ibinunga kaining tsunami sa timog-sirangan na Asia. Namamasyar sa Tailandia an saiyang aking babae kan mangyari an grabeng kapahamakan na ini. Sa laog nin 32 oras dai aram kan inang ini kun baga an saiyang aki buhay o kabilang sa mga biktima na oras-oras naglalangkaw an kabilangan. Nakaginhawa nanggad si Katrin kan sa katapustapusi makaresibi sia nin apod sa telepono na nag-aasegurar sa saiya na ligtas an saiyang aki!

¹⁵ Ano an nakatabang ki Katrin durante kan mga oras na idto nin pagkahadit? Sia nagsurat: “Haros sa bilog na panahon na idto namimibi ako ki Jehova. Paorootro kong nariparo na nagtao ini sako nin dakulang kosog asin katoninongan nin isip. Apuera kaiyan, dinalaw ako kan mamomoton na mga tugang sa espirituwal asin pinarigon ninda an sakong boot.” (Filipos 4:​6, 7) Orog kutanang masakit an situwasyon nia durante kan mga oras na idto nin labi-labing sakit kun mayo sia kan pribilehiong mamibi ki Jehova asin kan pagranga na itinatao nin mamomoton na kasararoan nin magturugang sa espirituwal! An satong dayupot na relasyon ki Jehova asin sa saiyang Aki pati an satong dayupot na pakikiasosyar sa Kristianong kasararoan nin magturugang sarong daing kaagid na bendisyon, na mahalagang marhay tangani sanang baliwalaon.

16. Isaysay an sarong eksperyensia na nag-iilustrar kan halaga kan paglaom na pagkabuhay liwat.

 ¹⁶ An paglaom na maheling giraray an nagadan na mga namomotan. (Juan 5:​28, 29) An sarong hoben na lalaki na an ngaran Matthias pinadakula na magin saro sa Mga Saksi ni Jehova. Minsan siring, huling dai nia narerealisar kaidto an mga bendisyon na yaon sa saiya, sia naparayo sa Kristianong kongregasyon kan sia tinedyer pa sana. Ngonyan nagsurat sia: “Dai talaga ako noarin man nagkaigwa nin seryosong pakikipag-olay sa sakong ama. Sa nag-aging mga taon, nagkaigwa kami nin dakol na simbagan. Pero, pirmeng gusto kan sakong ama an pinakamarahay para sa sako. Namomotan nia akong marhay, sarong bagay na dai ko narealisar kaidto. Kan 1996, mientras na nakatukaw ako sa gilid kan saiyang kama, na kapot an saiyang kamot asin nananangis, sinabi ko saiya na pinagbabasolan ko an gabos na ginibo ko asin na namomotan ko siang marhay. Alagad dai nia ako nadadangog. Pakatapos nin halipot na paghelang, sia nagadan. Kun ako yaon tanganing maheling an sakong ama sa pagkabuhay liwat, hihipnoan mi an mga pagkukulang kan nakaagi. Asin siertong maoogma siang maaraman na naglilingkod ako ngonyan bilang magurang sa kongregasyon asin na kami mag-agom nagkapribilehiong maglingkod bilang mga payunir.” Kanigoan na bendisyon sa sato an paglaom na pagkabuhay liwat!

“Dai Nia Iyan Dinadagdagan nin Kakologan”

17. Ano an maninigo na magin epekto sa sato kan paghorophorop sa mga bendisyon ni Jehova?

¹⁷ Mapadapit sa saiyang langitnon na Ama, si Jesu-Cristo nagsabi: “Pinapasirang nia an saiyang saldang sa mga maraot asin sa marahay asin pinapaoranan nia an mga matanos asin bakong matanos.” (Mateo 5:45) Kun si Jehova Dios nagtatao nin mga bendisyon dawa sa mga bakong matanos asin sa mga maraot, lalo na sa mga naglalakaw sa dalan nin integridad! “Si Jehova mismo dai isasayuma an ano man na marahay sa mga naglalakaw na daing sala,” an sabi kan Salmo 84:11. Kun hinohorophorop niato an espesyal na pagmakolog asin pagmalasakit na ipinaheling nia sa mga namomoot sa saiya, napapano nanggad nin pagpasalamat asin kagayagayahan an satong puso!

18. (a) Sa anong paagi na dai dinadagdagan ni Jehova nin kakologan an saiyang bendisyon? (b) Taano ta nagdudusa an dakol na maimbod sa Dios?

¹⁸ “An bendisyon ni Jehova”​—⁠iyan an nagtao nin espirituwal na prosperidad sa saiyang banwaan. Asin inaasegurar kita na “dai nia iyan dinadagdagan nin kakologan.” (Talinhaga 10:22) Kun siring, taano ta nag-aagi nin mga pagbalo asin kasakitan an dakol sa mga maimbod sa Dios, na nagtatao sa sainda nin grabeng kakologan asin pagdusa? An mga kadepisilan asin kasakitan nangyayari sa sato huli sa tolong pangenot na dahelan. (1) An sadiri niatong makasalan na inklinasyon. (Genesis 6:⁠5; 8:21; Santiago 1:​14, 15) (2) Si Satanas asin an saiyang mga demonyo. (Efeso 6:​11, 12) (3) An maraot na kinaban. (Juan 15:19) Minsan ngani itinotogot ni Jehova na mangyari sa sato an maraot na mga bagay, bako sia an ginigikanan kaiyan. Sa katunayan, “an lambang marahay na balaog asin lambang sangkap na regalo hale sa itaas, huling iyan naghahale sa Ama kan langitnon na mga liwanag.” (Santiago 1:17) An mga bendisyon ni Jehova dai nagtatao nin kakologan.

19. Ano an naghahalat sa mga padagos na naglalakaw sa integridad?

¹⁹ An pagkaigwa nin espirituwal na prosperidad pirmeng konektado sa pagkaigwa nin haraning relasyon sa Dios. Kun pinapatalubo niato an dayupot na relasyon sa saiya, kita ‘nagririmpos para sa sato man sana nin marahay na pasisikadan para sa ngapit, tangani na kita makapangapot nin marigon sa tunay na buhay’​—⁠buhay na daing katapusan. (1 Timoteo 6:​12, 17-19) Sa maabot na bagong kinaban na gigibohon nin Dios, an satong espirituwal na kayamanan papadisan nin pisikal na mga bendisyon. An tunay na buhay iyo na an makakamtan kan gabos na “danay na naghihinanyog sa tingog ni Jehova.” (Deuteronomio 28:2) May napakosog na determinasyon, magpadagos kitang maglakaw sa integridad na may kagayagayahan.

Ano an Nanodan Nindo?

• Taano ta bakong madonong na magin sobra kapreokupado manongod sa ngapit?

• Anong mga bendisyon an nakakamtan niato ngonyan?

• Taano ta nagdudusa an maimbod na mga lingkod nin Dios?

[Mga Hapot Para sa Pag-adal]