Andam Na daw Kamong Maligtas?

“Laog, ika asin an bilog mong kasararo sa harong, sa arka, huli ta ika an saro na naheling kong matanos sa atubangan ko sa tahaw kan kapag-arakian na ini.”​—⁠GENESIS 7:1.

1. Anong probisyon para sa pagkaligtas an ginibo ni Jehova kan mga aldaw ni Noe?

‘PINAPANGYARI ni Jehova an delubyo sa sarong kinaban nin mga tawong bakong diosnon’ kan mga aldaw ni Noe, alagad naggibo man Sia nin probisyon para sa pagkaligtas. (2 Pedro 2:5) An tunay na Dios nagtao sa matanos na si Noe nin malinaw na mga instruksion kun paano magibo nin arka para sa pagpreserbar nin buhay sa lakop sa globong baha. (Genesis 6:14-16) Siring kan lalaoman niato sa sarong makinuyog na lingkod ni Jehova, “ginibo ni Noe an segun sa gabos na ipinagboot sa saiya nin Dios.” Iyo, “siring nanggad an ginibo nia.” Sa sarong kabtang, huli sa pagkuyog ni Noe, kita buhay ngonyan.​—⁠Genesis 6:22.

2, 3. (a) Ano an nagin reaksion kan mga katemporanyo ni Noe sa aktibidad nia? (b) May anong kompiansa na si Noe naglaog sa arka?

² Bakong pasil an paggibo kan arka. Posibleng marhay na dakol na tawo an nagngalas sa ginigibo kaidto ni Noe asin kan saiyang pamilya. Pero, dai idto nagin igo tanganing makombensir sinda na an kaligtasan nakadepende sa saindang paglaog sa arka. Sa katapustapusi, naubos an pasensia nin Dios sa maraot na kinaban na idto.​—⁠Genesis 6:⁠3; 1 Pedro 3:20.

³ Pakatapos nin daing kapagalan na pagtrabaho ni Noe asin kan saiyang pamilya sa laog nin dakol na dekada, sinabi ni Jehova ki Noe: “Laog, ika asin an bilog mong kasararo sa harong, sa arka, huli ta ika an saro na naheling kong matanos sa atubangan ko sa tahaw kan kapag-arakian na ini.” May pagtubod asin kompiansa sa tataramon ni Jehova, “naglaog si Noe sa arka, asin kaiba nia an saiyang mga aking lalaki asin an saiyang agom patin an mga agom kan saiyang mga aki.” Sinerahan ni Jehova an pinto tanganing protehiran an saiyang mga parasamba. Kan dumatong an Delubyo sa daga, an arka iyo an nagin masasarigan na probisyon nin Dios para sa pagkaligtas.​—⁠Genesis 7:​1, 7, 10, 16.

Mga Pagkakaagid kan Presenteng Aldaw sa Kaaldawan ni Noe

4, 5. (a) Sa ano ikinomparar ni Jesus an panahon kan saiyang presensia? (b) Ano an mga pagkakaagid kan kaaldawan ni Noe asin kan satong kaaldawan?

⁴ “Kun paano kan mga aldaw ni Noe, siring man an presensia kan Aki nin tawo.” (Mateo 24:37) Paagi sa mga tataramon na ini, ipinarisa ni Jesus na an panahon kan saiyang dai naheheling na presensia magigin kaagid kan mga aldaw ni Noe, asin nagin totoo nanggad iyan. Partikularmente poon kan 1919, ipinapahayag sa mga tawo kan gabos na nasyon an sarong nagpapatanid na mensahe na kaagid kan itinaong patanid ni Noe. Sa pankagabsan, an saindang reaksion kapareho kan reaksion kan mga tawo kan mga aldaw ni Noe.

⁵ Paagi sa Baha, si Jehova huminiro tumang sa sarong kinaban na “pano nin kadahasan.” (Genesis 6:13) An bagay na si Noe asin an saiyang pamilya dai nakikabtang sa siring na kadahasan kundi imbes matoninong na naggibo nin arka risang-risa kan gabos na nakaheling sa sainda. Maheheling man niato digdi an pagkakaagid sa satong kaaldawan. Naheheling na ngonyan kan sinserong mga tawo “an kalaenan kan matanos asin maraot, kan naglilingkod sa Dios asin kan dai naglingkod sa saiya.” (Malaquias 3:18) An pagkasadiosan, kabootan, pagigin matoninong, asin kahigosan na ipinapaheling kan mga Saksi ni Jehova hinahangaan kan imparsial na mga nagmamasid, asin ilinalaen kan mga kualidad na ini an banwaan nin Dios sa kinaban sa pankagabsan. An mga Saksi habo sa gabos na klase nin kadahasan asin tinotogotan ninda an espiritu ni Jehova na magmotibar  sa sainda. Iyan an dahelan kun taano ta sinda igwa nin katoninongan asin kun taano ta sinda nagsusunod sa katanosan.​—⁠Isaias 60:17.

6, 7. (a) Ano an dai nabatid kan mga tawo kan kaaldawan ni Noe, asin paanong kaagid kaiyan an mga tawo ngonyan? (b) Anong mga halimbawa an nagpapaheling na sa pankagabsan an Mga Saksi ni Jehova minimidbid na napapalaen?

⁶ Dai nabatid kan mga katemporanyo ni Noe na si Noe sinusuportaran nin Dios asin naghihiro sono sa paggiya nin Dios. Kaya dai ninda sineryoso an saiyang paghuhulit asin dai hinimate an saiyang nagpapatanid na mensahe. Kumusta man ngonyan? Minsan ngani dakol an naghahanga sa gibohon asin paggawe kan mga Saksi ni Jehova, dai sineseryoso kan kadaklan an maogmang bareta asin an mga patanid kan Biblia. An mga kataed, among, o paryente tibaad nag-oomaw sa marahayon na mga kualidad kan tunay na mga Kristiano alagad nagpapahayag man nin panganugon, “Kun bako kutana sindang mga Saksi ni Jehova!” An dai narerealisar kan mga nagmamasid na ini iyo na an mga Saksi nagpapaheling nin mga kualidad na arog baga nin pagkamoot, katoninongan, kabootan, karahayan, kahoyoan, asin pagpopogol sa sadiri huli ta ginigiyahan sinda kan banal na espiritu nin Dios. (Galacia 5:22-25) Huli kaini mas paniwalaan kutana nin mga tawo an saindang mensahe.

⁷ Halimbawa sa Rusya, nagtotogdok kaidto nin Kingdom Hall an mga Saksi ni Jehova. Sarong lalaki na nagpondo tanganing kaolayon an saro sa mga trabahador an nagsabi: “Pambihira nanggad an pagtogdok na ini​—⁠mayo nin nagsisigarilyo, mayo nin nagraraway, asin mayo nin burat! Ano, saro ka sa Mga Saksi ni Jehova?” Hinapot sia kan trabahador, “Kun sabihon kong bako, maniniwala daw kamo sako?” An lalaki tolos-tolos na nagsimbag, “Dai.” Sa saro pang siudad sa Rusya, naghangang marhay an alkalde kan maheling nia an mga Saksi na nagtotogdok kan saindang bagong Kingdom Hall. Sinabi nia na minsan ngani kaidto parareho an heling nia sa gabos na relihiosong grupo, kan aktuwal niang mamasdan an sinserong kadaihan nin kaimotan kan mga Saksi ni Jehova, bako nang siring kaiyan an pagheling nia. Duwa sana ini sa mga halimbawa na nagpapaheling na an banwaan ni Jehova napapalaen sa mga dai nagsususog sa mga pamantayan sa Biblia.

8. Nakadepende sa ano an satong pakaligtas sa katapusan kan maraot na kinaban na ini?

⁸ Durante kan ultimong peryodo kan “suanoy na kinaban” na nalaglag sa Baha, si Noe sarong maimbod na “parahulit nin katanosan.” (2 Pedro 2:5) Sa huring mga aldaw na ini kan presenteng sistema nin mga bagay, ipinapaaram kan banwaan ni Jehova an matanos na mga pamantayan nin Dios asin ipinapahayag ninda an maogmang bareta manongod sa posibilidad na maligtas pasiring sa bagong kinaban. (2 Pedro 3:9-13) Kun paanong si Noe asin an saiyang matatakton sa Dios na pamilya napreserbar sa arka, an pakaligtas kan mga indibiduwal ngonyan nakadepende sa saindang pagtubod asin sa saindang maimbod na pakikiasosyar sa daganon na kabtang kan unibersal na organisasyon ni Jehova.

 Kaipuhan an Pagtubod Tanganing Maligtas

9, 10. Taano ta kaipuhan an pagtubod tanganing kita maligtas sa katapusan kan sistema nin mga bagay ni Satanas?

⁹ Ano an dapat na gibohon nin saro tanganing maligtas sa madali nang pagkalaglag kan kinaban na ini na namumugtak sa kapangyarihan ni Satanas? (1 Juan 5:19) Dapat ngunang rekonoseron nia na kaipuhan nia an proteksion. Dangan dapat niang aprobetsaran an siring na proteksion. An mga tawo kan kaaldawan ni Noe nagpadagos sa saindang pangaroaldaw na pamumuhay siring kan dati asin dai naheling an pangangaipo ninda nin proteksion sa nagdadangadang na kalamidad. May saro pang bagay na mayo sa sainda​—⁠an pagtubod sa Dios.

¹⁰ Sa kabaliktaran, rinekonoser ni Noe asin kan saiyang pamilya na kaipuhan ninda an proteksion asin pagliligtas. Nagkaigwa man sinda nin pagtubod sa Unibersal na Soberano, si Jehova Dios. “Kun dai nin pagtubod imposible na [si Jehova] mapanigoan na gayo,” an isinurat ni apostol Pablo, “huli ta an minadolok sa Dios kaipuhan na magtubod na sia iyo nanggad asin na sia nagigin an parabalos sa mga maigot na naghahanap sa saiya.” Idinagdag ni Pablo: “Huli sa pagtubod si Noe, pakatapos na matawan nin patanid nin Dios dapit sa mga bagay na dai pa naheheling, nagpaheling nin diosnon na takot asin naggibo nin arka para sa pagligtas kan saiyang kasararo sa harong; asin paagi sa pagtubod na ini kinondenar nia an kinaban, asin sia nagin paramana kan katanosan na sono sa pagtubod.”​—⁠Hebreo 11:​6, 7.

11. Ano an manonodan niato sa kun paano si Jehova nagtao nin proteksion kan nakaaging mga panahon?

¹¹ Tanganing maligtas sa katapusan kan presenteng maraot na sistema nin mga bagay, labi pa kisa paniniwala sana na iyan lalaglagon an kaipuhan. Dapat kitang magkaigwa nin pagtubod, na biyong inaaprobetsaran an mga probisyon nin Dios para sa pagkaligtas. Siempre, kaipuhan kitang magkaigwa nin pagtubod sa atang na pantubos kan Aki nin Dios, si Jesu-Cristo. (Juan 3:​16, 36) Minsan siring, marahay na girumdomon niato na idto sanang nasa laog talaga kan arka ni Noe an naligtas sa Baha. Kaagid kaiyan, an mga siudad na pailihan sa suanoy na Israel nagtao sana nin proteksion sa dai tinuyong nakagadan nin tawo kun sia dumulag nguna pasiring sa siring na siudad dangan magdanay sa laog kaiyan sagkod na magadan an halangkaw na saserdote. (Bilang 35:11-32) Sa ikasampulong damat sa Egipto kan kaaldawan ni Moises, an mga panganay kan mga Egipcio ginadan, alagad an mga panganay kan mga Israelita pinaligtas. Taano? Tinawan nin instruksion ni Jehova si Moises: “Makua sinda [an mga Israelita] nin dugo [kan kordero nin Paskua] asin iwiwirik ninda iyan sa duwang harigi kan pinto asin sa itaas kan pinto kan mga harong na kakakanan ninda kaiyan. . . . Asin mayo sa saindong magluwas sa entrada kan saiyang harong sagkod sa kinaagahan.” (Exodo 12:​7, 22) Siisay na panganay sa tahaw kan mga Israelita an mangangahas na ignorohon an  siring na mga instruksion na tao nin Dios paagi sa pagluwas sa harong na markado kan dugo na iwinirik sa duwang harigi kan pinto asin sa itaas kan pinto?

12. Ano an maninigong ihapot kan lambang saro sa sato sa saiyang sadiri, asin taano?

¹² Kun siring, may dahelan kita na maingat na pakaisipon an satong personal na situwasyon. Kita daw nasa laog talaga kan areglo ni Jehova para sa espirituwal na proteksion? Kun dumatong na an dakulang kahorasaan, mabolos an mga luha nin kagayagayahan asin pagpasalamat sa lalauogon kan mga naghanap kan siring na proteksion. Para sa iba, mga luha sana nin kamondoan asin pagbasol an mabolos.

Inaandam Kita kan Progresibong mga Pagliliwat

13. (a) Anong katuyohan an naotob kan organisasyonal na mga pagliliwat? (b) Ipaliwanag an nagkapira sa progresibong mga pagpakarhay.

¹³ Si Jehova naggibo nin progresibong mga pagliliwat sa daganon na kabtang kan saiyang organisasyon. Pinangyari kaining pagayonon, pasarigon, asin pakosogon an saiyang areglo para sa satong espirituwal na proteksion. Poon kan dekada nin 1870 sagkod 1932, an kamagurangan asin mga diakono ineelehir sa saindang katongdan kan mga miembro kan kongregasyon. Kan 1932 an elehidong kamagurangan sinalidahan nin sarong komite sa paglilingkod na elehido kan kongregasyon na tumabang sa sarong ninombrahan na direktor sa paglilingkod. Durante kan 1938, ginibo an mga areglo para sa teokratikong pagnombra sa gabos na lingkod sa kongregasyon. Sa paggiya kan Namamahalang Grupo kan Mga Saksi ni Jehova, poon kan 1972, ginigibo na an mga pagrekomendar asin kun maaprobaran an mga ini, an mga kongregasyon nakakaresibi na nin mga surat na nagnonombra sa mga paraataman asin ministeryal na lingkod sa teokratikong paagi. Sa nag-aging mga taon, nadagdagan an katongdan kan Namamahalang Grupo asin ginibo an mga pagbabago tanganing magin pasil an gibohon kaiyan.

14. Anong programa nin pagsasanay an pinonan kan 1959?

¹⁴ Kaidtong 1950, an maingat na pag-estudyar sa Salmo 45:16 nagbunga nin sarong nagpapadagos na programa nin pagsasanay. An teksto nagsasabi: “Kasalihid kan saimong mga apoon magkakaigwa ka nin mga aki, na saimong nonombrahan bilang mga prinsipe sa bilog na daga.” An kamagurangan na nangengenot ngonyan sa kongregasyon sinasanay para sa teokratikong mga katongdan sa presente asin pakatapos kan Armagedon. (Kapahayagan 16:​14, 16) An Pankahadean na Paadalan sa Pagmiministro pinonan kan 1959. Kan panahon na idto, iinareglo an sarong bulan na kurso nin pagtotokdo sa pangenot para sa mga lingkod sa kongregasyon, na apod kaidto sa nangengenot na mga paraataman. Pinahiwas na ngonyan an paadalan na ini tanganing magtao nin pagtotokdo sa gabos na paraataman asin ministeryal na lingkod. Dangan, an mga tugang na ini an nangengenot sa pagtotokdo sa indibiduwal na mga Saksi ni Jehova sa saindang kanya-kanyang kongregasyon. Sa siring, an gabos natatawan nin espirituwal na tabang asin natatabangan na gibohon na mas epektibo an saindang ministeryo bilang mga parabalangibog kan maogmang bareta kan Kahadean.​—⁠Marcos 13:10.

15. Ano an duwang paagi na napepreserbar an kadalisayan kan Kristianong kongregasyon?

¹⁵ An mga indibiduwal na gustong magin kabtang kan Kristianong kongregasyon dapat na aboton an nagkapirang kahagadan. Rasonable sana, an mga paraolog-olog sa presenteng aldaw dai tinotogotan na makalaog, kun paanong an siring na mga tawo dai pinalaog sa arka ni Noe. (2 Pedro 3:3-7)  Partikularmente poon kan 1952, orog na sinusuportaran kan Mga Saksi ni Jehova an areglo na nagtatabang na maprotehiran an kongregasyon​—⁠an boot sabihon, an pagtitiwalag sa mga parakasala na habong magsolsol. Siempre, an mga naggibo nin maraot na totoong nagsosolsol mamomoton na tinatabangan na ‘gumibo nin tanos na mga dana para sa saindang mga bitis.’​—⁠Hebreo 12:​12, 13; Talinhaga 28:13; Galacia 6:1.

16. Ano an kamugtakan sa espirituwal kan banwaan ni Jehova?

¹⁶ An espirituwal na prosperidad kan banwaan ni Jehova dai dapat ipagngalas ni aksidente sana. Paagi ki propeta Isaias, si Jehova nagsabi: “Uya! An sakong mga lingkod makarakan, alagad kamo magkakagurutom. Uya! An sakong mga lingkod mairinom, alagad kamo magkakaparaha. Uya! An sakong mga lingkod maggagayagaya, alagad kamo magkakasurupog. Uya! An sakong mga lingkod magkukururahaw sa kagayagayahan huli sa marahay na kamugtakan kan puso, alagad kamo mag-aaragrangay huli sa kakologan sa puso asin kamo mag-uurungal huli sa biyong pagkalumbay kan espiritu.” (Isaias 65:​13, 14) Si Jehova padagos na nagtatao sa sato nin abundang suplay nin napapanahon asin nakakarahay na espirituwal na kakanon na nagpapadanay sa sato na makosog sa espirituwal.​—⁠Mateo 24:45.

Magin Andam na Maligtas

17. Ano an matabang sa sato na mag-andam na maligtas?

¹⁷ Orog kisa kasuarin man, ngonyan na an panahon na “konsideraron niato an lambang saro tanganing mandagka sa pagkamoot asin sa marahay na mga gibo, na dai pagpabayaan an satong pagtorotiripon, siring kan kaugalean nin nagkapira, kundi na magparinigonan nin boot.” (Hebreo 10:23-25) An dayupot na pakikiasosyar asin pagdadanay na aktibo sa saro sa labing 98,000 na kongregasyon kan Mga Saksi ni Jehova matabang sa sato na andamon an satong sadiri na maligtas. Makakamtan niato an suporta kan satong mga kapagtubod mantang kita nagmamaigot na ipaheling an “bagong personalidad” asin bilog na pusong naghihingoa na tabangan an iba na makanood manongod sa probisyon ni Jehova para sa kaligtasan.​—⁠Efeso 4:22-24; Colosas 3:​9, 10; 1 Timoteo 4:16.

18. Taano ta determinado kamo na magdanay na dayupot sa Kristianong kongregasyon?

¹⁸ Si Satanas asin an saiyang maraot na kinaban gustohon na irayo kita sa Kristianong kongregasyon. Minsan siring, puede kitang magdanay na kabtang kaiyan asin maligtas sa katapusan kan presenteng maraot na sistema nin mga bagay. Logod na an pagkamoot ki Jehova asin pagtanaw nin utang na boot huli sa saiyang mamomoton na mga probisyon magpahiro sa sato na magin mas determinado kisa kasuarin man na labanan an mga paghihingoa ni Satanas. An paghorophorop sa mga bendisyon niato sa presenteng aldaw mapakosog sa satong determinasyon. An nagkapira sa mga bendisyon na ini totokaron sa sunod na artikulo.

Ano an Isisimbag Nindo?

• Paano nakakaagid sa kaaldawan ni Noe an satong kapanahonan?

• Anong kualidad an kaipuhan tanganing maligtas?

• Anong progresibong mga pagliliwat an nakapakosog sa areglo ni Jehova para sa satong proteksion?

• Paano kita personal na makakapag-andam tanganing maligtas?

[Mga Hapot Para sa Pag-adal]

[Ritrato sa pahina 22]

Si Noe dai sineryoso kan mga katemporanyo nia

[Ritrato sa pahina 23]

Kapakipakinabang nanggad na seryosohon an nagpapatanid na mga mensahe nin Dios

[Ritrato sa pahina 24]

Anong katuyohan an naootob kan Pankahadean na Paadalan sa Pagmiministro?

[Ritrato sa pahina 25]

Ngonyan na an panahon na magdanay na dayupot sa Kristianong kongregasyon