Ano an Katuyohan nin Dios Para sa Daga?

TAANO ta ikinakaogma nindo an paglakawlakaw sa parke o pagparopasyar sa kalangtadan nin mahamot na mga burak? Taano ta naggagayagaya kamo kun nakakaheling kamo nin magayon na danaw o halangkawon na mga bukid na an mga alitoktok natatakopan nin panganoron? Taano ta minapondo kamo tanganing magdangog sa masinggayang huni nin mga gamgam sa itaas nin mga kahoy? Asin taano ta nakakaogmang marhay na pagmasdan an sarong magayon maghirong usa na nagluluksolukso o sarong aripompon nin mga karnero na nagsasabsab sa kaawagan?

Igwa nin sarong simbag sa gabos na hapot na ini. Linalang kita tanganing mag-istar sa Paraiso! Dian pinonan kan satong enot na mga magurang, si Adan asin Eva, an saindang buhay. Nakua niato sa sainda an satong pagmawot na mag-istar sa Paraiso, asin nakua ninda iyan sa saindang Kaglalang, si Jehova Dios. Aram nia na kitang mga tawo magigin maogma sa Paraiso huli ta linalang nia kita na igwa kan mga kualidad na kaipuhan tanganing ikaogma an siring na marahayon na erokan na daga.

Taano ta linalang ni Jehova an daga? ‘Hinaman nia iyan tanganing pag-istaran’ nin katawohan. (Isaias 45:18) Itinao kan “Kaggibo kan daga” ki Adan asin Eva an sarong magayon na paraisong erokan, an hardin nin Eden. (Jeremias 10:12; Genesis 2:7-9, 15, 21, 22) Seguradong ikinaogma ninda an mga sapa kaiyan, an mga burak kaiyan, an mga poon nin kahoy kaiyan! Maheheling an magayon maglayog na mga gamgam sa langit, asin an manlaenlaen na klase nin hayop nagraralagawlagaw sa daga​—⁠mayo sa mga iyan an nagtatao nin peligro sa mga tawo. An mga sira asin iba pang linalang naghihiriro sa malinaw asin malinig na katubigan sa daga. An pinakamahalaga, si Adan asin Eva magkaibanan. Puede sindang magkaaki asin pahiwason an saindang erokan na Paraiso na magayagayang nakikiasosyar sa nagdadakula nindang pamilya.

Minsan ngani an daga bako nang paraiso ngonyan, puedeng ikomparar iyan sa marahayon na erokan nin sarong maogmang pamilya. An itinao sa sato nin Dios na erokan na lakop sa globo igwa kan mga kaipuhan niato​—⁠ilaw, init, tubig, asin kakanon. Pinapasalamatan nanggad niato an liwanag asin init kan saldang saka an tama sanang liwanag kan bulan kun banggi! (Genesis 1:14-18) Igwa nin mga panggatong sa irarom kan daga, arog nin  karbon asin krudo, na magagamit niato sa pagpainit. Igwa kita nin tubig huli sa siklo nin tubig saka mga salog, danaw, asin dagat kan daga. Asin bilang alpombra, an daga igwa nin berdeng doot.

Kun paanong an kakanon puedeng sarayon sa harong, igwa nin abundang suplay kaiyan sa daga. Paagi sa mga pananom sa mga oma asin prutas sa mga tatamnan, ‘tinatawan kita ni Jehova nin mabungang mga kapanahonan asin binabasog an satong mga puso nin kaogmahan.’ (Gibo 14:​16, 17) Mantang an daga saro nang marahayon nanggad na erokan, imahinara kun ano an magigin kamugtakan kun an “maogmang Dios,” si Jehova, gibohon iyan na sarong paraiso!​—⁠1 Timoteo 1:11.

 [Picture Credit Lines sa pahina 2]

COVER: Earth: NASA photo; Stars: NASA, ESA and AURA/​Caltech