Igwa daw Kamo nin “Katalingkasan sa Pagtaram”?

LABING anom na milyon katawo sa 235 nasyon an igwa kan inaapod sa Biblia na “katalingkasan sa pagtaram.” An ekspresyon na iyan minalataw nin 16 na beses sa teksto kan Kristianong Griegong Kasuratan kan New World Translation of the Holy Scriptures. (Filipos 1:20; 1 Timoteo 3:13; Hebreo 3:⁠6; 1 Juan 3:21) Ano an kalabot sa “katalingkasan sa pagtaram”? Ano an makakatabang sa sato na magkaigwa kaiyan? Sa anong mga kabtang nin pakikikomunikar kita nakakapagtaram na daing olang huli sa katalingkasan na ini?

Oyon sa Vine’s Expository Dictionary of Old and New Testament Words, an Griegong termino para sa ekspresyon na “katalingkasan sa pagtaram” nangangahulogan nin “pagigin libre sa pagtaram, daing kaolangan sa pagtaram, . . . an kawaran nin takot sa pagtaram nin pusoan; huli kaini, iyan may ideya nin kompiansa, masinggayang kosog nin boot, pagkapusoan, na dai man konektado pirme sa pagtaram.” Minsan siring, an siring na daing pag-alangan na pagtaram dai dapat ipareho sa pagigin daing kontrol na pagtaram o pagigin daing modo. “An saindo logod na pagtaram danay na igwa nin pagkamaugayon,” an sabi kan Biblia. (Colosas 4:6) Kalabot sa katalingkasan sa pagtaram an pagdadanay na mataktika mantang dai nagtotogot na mapogolan an satong pagtaram kan makamomondong mga kamugtakan o pagkatakot sa tawo.

Natural na deretso daw niato an katalingkasan sa pagtaram? Isipon nindo an isinurat ni apostol Pablo sa mga Kristiano sa Efeso. Sia nagsabi: “Sa sako, tawong mas hababa sa pinakahababa sa gabos na banal, itinao an dai na kutana maninigong kabootan na ini, na maninigong ipahayag ko sa mga nasyon an maogmang bareta manongod sa dai marorop na mga kayamanan kan Cristo.” Sinabi pa ni Pablo na paagi ki Jesu-Cristo na “igwa kita nin katalingkasan sa pagtaram asin pagdolok na may pagsarig paagi sa satong pagtubod saiya.” (Efeso 3:8-12) Imbes na sarong pribilehio na natural nang deretso niato, an katalingkasan sa pagtaram resulta kan satong relasyon ki Jehova Dios basado sa pagtubod ki Jesu-Cristo. Helingon niato kun ano an makakatabang sa sato na magkaigwa kan katalingkasan na ini asin kun paano niato ikakapaheling iyan kun kita naghuhulit, nagtotokdo, asin namimibi.

Ano an Nakakatabang sa Sato na Maghulit na May Pagkapusoan?

Si Jesu-Cristo an pangenot na halimbawa nin saro na naggamit nin katalingkasan sa pagtaram. An saiyang kaigotan an nagpahiro sa saiya na aprobetsaran an mga oportunidad na maghulit. Baga man nagpapahingalo, nagkakakan sa harong nin sarong tawo, o naglalakaw sa tinampo, dai nia noarin man pinalampas an oportunidad na ipakipag-olay an manongod sa Kahadean nin Dios. Dai natakot si Jesus sa pag-olog-olog ni sa direktang pagtumang tanganing magdanay na daing girong. Imbes, makosog an boot na ibinuyagyag nia an mga namomoon sa falsong relihion kan kaaldawan  nia. (Mateo 23:13-36) Dawa kan inarestar asin binibista, si Jesus nagtaram nin daing takot.​—⁠Juan 18:​6, 19, 20, 37.

An mga apostol ni Jesus nagkaigwa man nin daing pag-alangan na pagtaram. Kan Pentecostes 33 C.E., si Pedro nagtaram na may katalingkasan sa pagtaram sa atubangan nin sarong kadaklan na labing 3,000. Pambihira nanggad, dai pa sana nahaloy bago kaini, sia napaulnok sa takot kan namidbid nin sarong surugoon na babae. (Marcos 14:66-71; Gibo 2:​14, 29, 41) Kan iinatubang sa mga namomoon sa relihion, si Pedro asin Juan dai uminulnok sa takot. Daing pag-alangan, mapuso sindang nagpatotoo may labot sa binuhay liwat na si Jesu-Cristo. Sa katunayan, an daing pag-alangan na pagtaram ni Pedro asin Juan an dahelan na namidbid kan mga namomoon sa relihion na an mga lalaking ini dating mga kaiba ni Jesus. (Gibo 4:5-13) Ano an nagpangyari sa sainda na magtaram na may pagkapusoan nanggad?

Si Jesus nanuga sa saiyang mga apostol: “Kun kamo itao na ninda, dai kamo mahadit kun paano o kun ano an saindong itataram; huli ta an saindong itataram itatao sa saindo sa oras na iyan; huli ta an nagtataram bako sanang kamo, kundi an espiritu kan saindong Ama an nagtataram paagi sa saindo.” (Mateo 10:​19, 20) An banal na espiritu an nagtabang ki Pedro asin sa iba pa na haleon an pagkamasusupgon o pagkatakot na puede kutanang nakaolang sa may katalingkasan na pagpahayag kan saindang saboot. Puede man na makatabang sa sato an impluwensia kan makapangyarihan na puersang iyan.

Saro pa, isinugo ni Jesus an saiyang mga parasunod na gumibo nin mga disipulo. Angay ini, huli ta sia an Saro na tinawan kan “gabos na autoridad sa langit asin sa daga.” Asin ‘sia kaiba ninda.’ (Mateo 28:18-20) An pakaaram sa pagsuportar ni Jesus an nagtao sa enot na mga disipulo nin kompiansa mantang inaatubang ninda an mga autoridad na desididong olangon an saindang paghuhulit. (Gibo 4:18-20; 5:​28, 29) An siring na pakaaram puede man na magkaigwa nin kaparehong epekto sa sato.

Sa pagsabi kan saro pang dahelan kan daing pag-alangan na pagtaram, iinasosyar ni Pablo an paglaom sa “dakulang katalingkasan sa pagtaram.” (2 Corinto 3:12; Filipos 1:20) Marahayon nanggad an mensahe nin paglaom tanganing sadirihon sana. Kaya kaipuhan na sabihon kan mga Kristiano sa iba an manongod dian. Tunay nanggad na an satong paglaom sarong dahelan tanganing gamiton niato an katalingkasan sa pagtaram.​—⁠Hebreo 3:6.

Paghuhulit na May Pagkapusoan

Paano kita makakapaghulit na may pagkapusoan dawa sa irarom kan posibleng nakakatakot na mga kamugtakan? Isipon nindo an halimbawa ni apostol Pablo. Mantang bilanggo sa Roma, pinakiolayan nia an saiyang mga kapagtubod na mamibi na ‘itao logod sa saiya an kakayahan na magtaram sa pagbuka kan saiyang ngoso, tanganing sia makapagtaram na may pagkapusoan siring sa maninigo niang ipagtaram.’ (Efeso 6:​19, 20) Sinimbag daw an mga pamibi na idto? Iyo! Mantang nabibilanggo, si Pablo padagos na “naghuhulit kan kahadean nin Dios . . . na may lubos na katalingkasan sa pagtaram, na mayo nin olang.”​—⁠Gibo 28:​30, 31.

An pag-aprobetsar sa mga oportunidad na magpatotoo sa trabaho, sa eskuelahan, o mantang nagbibiahe puedeng makabalo sa satong katalingkasan sa pagtaram. An pagkamasusupgon, pagkatakot sa magigin reaksion sa sato, o kawaran nin kompiansa sa satong kakayahan an tibaad magin dahelan na dai na sana kita maggirong. Sa giraray si apostol Pablo nagtatao nin marahay na halimbawa digdi. “Kami nagpakapusoan paagi sa samong Dios na magtaram sa saindo kan maogmang bareta nin Dios na may dakulang paglapigot,” an isinurat nia. (1 Tesalonica 2:2) Nagibo ni Pablo an dai nia kayang gibohon kun sia sana huli sana ta nagsarig sia ki Jehova.

Nakatabang an pamibi sa sarong babae na an ngaran Sherry na magpakapusoan kan magkaigwa sia nin oportunidad na magpatotoo sa impormal na paagi. Sarong aldaw mantang hinahalat niang magbuelta an saiyang agom hale sa sarong kaolay, narisa nia an sarong babae na naghahalat man. “Huling ninenerbios ako,” an sabi ni Sherry, “namibi ako ki Jehova para sa kosog nin boot.” Kan dinolok ni Sherry an babae, uminabot an sarong ministrong Baptista. Dai inaasahan ni Sherry na makaatubang an sarong klerigo. Minsan siring, sia namibi giraray asin nahimo niang makapagpatotoo. Nakapasakamot sia nin babasahon sa babae asin iinareglo an pagdalaw liwat. Kun inaaprobetsaran niato an mga oportunidad na magpatotoo, makakakompiar kita na an pagsarig ki Jehova matabang sa sato na dai mag-alangan na magtaram.

 Kun Nagtotokdo

An katalingkasan sa pagtaram konektadong marhay sa pagtotokdo. May labot sa “mga lalaki na naglilingkod sa marahay na paagi” sa kongregasyon, an Biblia nagsasabi: “[Sinda] nakakakua para sa sainda man sana nin marahay na kamugtakan asin nin dakulang katalingkasan sa pagtaram sa pagtubod dapit ki Cristo Jesus.” (1 Timoteo 3:13) Nagkakaigwa sinda kan katalingkasan na ini sa pagtaram paagi sa pag-aplikar sa sadiri ninda kan itinotokdo ninda sa iba. An paggibo ninda kaiyan nagpoprotehir asin nagpapakosog sa kongregasyon.

Kun may katalingkasan kita sa pagtaram sa arog kaining paagi, an satong hatol mas epektibo asin mas posibleng marhay na susunodon. Imbes na pagparaisipon an bakong marahay na halimbawa, an mga naghihinanyog sa sato naeenkaminar kan naheheling nindang praktikal na pag-aplikar kan itinotokdo sa sainda. Paagi sa katalingkasan na ini, magigibo kan mga may espirituwal na mga kualipikasyon na ‘pakarhayon giraray an saindang tugang’ bago pa grumabe an sarong problema. (Galacia 6:1) Sa kabaliktaran, an saro na nagpapaheling nin bakong marahay na halimbawa tibaad mag-alangan na magtao nin hatol, huli ta iniisip nia na mayo sia nin deretsong maghatol. An pag-atraso sa pagtao nin kinakaipuhan na hatol puedeng magkaigwa nin kapahapahamak na mga resulta.

An pagtaram niato na may pagkapusoan dai nangangahulogan nin pagigin mapaghusgar, dogmatiko, o matagas sa sadiring opinyon. Sinadol ni Pablo si Filemon “basado sa pagkamoot.” (Filemon 8, 9) Asin an mga tataramon kan apostol minalataw na inako nin paborable. Tunay nanggad na pagkamoot an maninigong magmotibar sa ano man na sadol na tibaad itao nin sarong magurang sa kongregasyon!

An katalingkasan sa pagtaram mahalagang marhay nanggad kun kaipuhan na magtao nin hatol. Mahalaga man iyan sa iba pang panahon. Si Pablo nagsurat sa kongregasyon sa Corinto: “Igwa ako nin dakulang katalingkasan sa pagtaram sa saindo. Igwa ako nin dakulang pag-orgolyo dapit sa saindo.” (2 Corinto 7:4) Dai nagduwaduwa si Pablo na magtao nin komendasyon sa saiyang mga tugang na lalaki asin babae kun maninigo iyan. An pagkamoot an nagpahiro sa saiya na magkonsentrar sa marahay na mga kualidad kan saiyang mga kapagtubod, dawa ngani aram nia an saindang mga depekto. An Kristianong kongregasyon ngonyan napapakosog man kun an kamagurangan sueltong kinokomendaran asin ineenkaminar an saindang mga tugang na lalaki asin babae.

Tanganing magin epektibo sa saindang pagtotokdo, an gabos na Kristiano kaipuhan na magkaigwa nin katalingkasan sa pagtaram. Gusto ni Sherry, na nasambitan sa enotan, na enkaminaron an saiyang mga aki na magpatotoo sa eskuelahan. “Minsan ngani pinadakula ako sa katotoohan,” an pag-admitir nia, “bibihira akong magpatotoo sa eskuelahan. Asin bibihira akong magpatotoo sa impormal na paagi. Hinapot ko an sakong sadiri, ‘Anong klaseng halimbawa an itinatao ko sa sakong mga aki?’ ” Ini an nagpahiro ki Sherry na mas magmaigot pa na makapagpatotoo sa impormal na paagi.

 Iyo, naoobserbaran kan iba an mga ginigibo niato asin naririsa ninda kun dai niato nagigibo an satong itinotokdo. Kun siring, magkaigwa kita nin katalingkasan sa pagtaram paagi sa pagmamaigot na ioyon an satong mga ginigibo sa satong sinasabi.

Sa Pamibi

An katalingkasan sa pagtaram nangorognang mahalaga kun kita namimibi ki Jehova. Lubos asin biyo niatong ikakapahayag ki Jehova an nasa puso niato na may kompiansang dadangogon nia an satong mga pamibi asin sisimbagon nia an mga iyan. Huli kaini, nakakamtan niato an mainit, dayupot na relasyon sa satong langitnon na Ama. Dai kita noarin man mag-alangan na dumolok ki Jehova, na nag-iisip na kita mayong gayong halaga. Paano kun an satong pakamate nin sala huli sa sarong pagkukulang o kasalan nakakapogol sa satong odok sa pusong mga kapahayagan? Puede pa man daw giraray kitang dumolok nin suelto sa Soberano kan uniberso?

An mamuraway na katongdan ni Jesus bilang Halangkaw na Saserdote nagtatao nin dagdag na basehan tanganing magsarig kun namimibi. Sa Hebreo 4:​15, 16, mababasa niato: “An satong halangkaw na saserdote, bakong saro na dai makakapakidamay sa satong mga kaluyahan, kundi saro na nabalo na sa gabos na bagay arog niato, alagad dai nin kasalan. Kun siring, dumolok kita na may katalingkasan sa pagtaram sa trono nin dai na kutana maninigong kabootan, tanganing kita magkamit nin pagkaherak asin makakua nin dai na kutana maninigong kabootan na makakatabang sa tamang panahon.” Arog kaiyan an halaga kan kagadanan ni Jesus asin kan saiyang katongdan bilang Halangkaw na Saserdote.

Kun odok kitang maghihingoa na kuyogon si Jehova, igwa nanggad kita nin dahelan na maglaom na paborable nia kitang dadangogon. Si apostol Juan nagsurat: “Mga namomotan, kun dai kita kondenaron kan satong puso, igwa kita nin katalingkasan sa pagtaram sa Dios; asin ano man an satong hagadon inaako niato gikan sa saiya, huli ta kinukuyog niato an saiyang mga pagboot asin ginigibo niato an mga bagay na nakakapaogma sa saiyang mga mata.”​—⁠1 Juan 3:​21, 22.

An daing olang na pagdolok ki Jehova sa pamibi nangangahulogan na puede niatong sabihon sa saiya an gabos na bagay. Ano man an ikinakatakot niato, ano man an ikinakapurisaw niato, ikinakahadit niato, o ikinakahandal niato na nagpapasakit sa sato, puede niatong sabihon iyan ki Jehova, na kompiadong pirme niang dadangogon an sinsero niatong mga pamibi. Dawa kun nagkasala kita nin magabat, an pakamate nin kasalan dai kaipuhan na makaolang sa satong mga pamibi kun sinsero kitang nagsosolsol.

An dai na kutana maninigong regalo na katalingkasan sa pagtaram talagang mahalagang marhay. Paagi kaiyan puede niatong mapamuraway an Dios sa satong paghuhulit asin pagtotokdo saka mas mapadayupot sa saiya sa pamibi. “Dai [niato] isikwal an [satong] katalingkasan sa pagtaram, huli ta iyan igwa nin dakulang balos na katimbang kaiyan”​—⁠an balos na buhay na daing katapusan.​—⁠Hebreo 10:35.

[Ritrato sa pahina 13]

Si apostol Pablo nagtaram na may pagkapusoan

[Mga Ritrato sa pahina 15]

An epektibong pagtotokdo nangangaipo nin katalingkasan sa pagtaram

[Ritrato sa pahina 16]

Mahalagang marhay an katalingkasan sa pagtaram kun namimibi